Read Hmong Njua Malakaus 3 Bible Online

Malakaus 3 - Hmong Njua bible

Malakaus 3

¹Yexus txawm rov qaab moog rua huv lub tsev saablaaj, muaj ib tug txivneej qhuav teg nyob ntawd.

²Cov tuabneeg kws nyob ntawd muaj qee leej xaav nrhav txim rua Yexus, puab txawm saib nub Xanpataus Yexus puas yuav khu tug txivneej ntawd txhais teg los tsi khu.

³Yexus has rua tug txivneej kws qhuav teg ntawd has tas, “Koj ca le sawv lug ntawm nuav.”

⁴Yexus txawm nug suavdlawg has tas, “Nub Xanpataus peb txuj kevcai ca peb ua le caag? Ca ua zoo lossis ca ua phem? Cawm txujsa lossis ca txujsa tu?” Tabsis tsi muaj leejtwg teb le.

⁵Yexus saib cov tuabneeg kws nyob ntawd, nwg chim hab nwg nyuaj sab rua puab, rua qhov puab muaj lub sab tawv. Yexus has rua tug txivneej kws qhuav teg has tas, “koj ca le xyaab hlo koj txhais teg.” Nwg xyaab hlo teg, ces nwg txhais teg txawm rov zoo le qub lawm.

⁶Taamsim ntawd cov Falixais txawm tawm huv tsev saablaaj moog nrug Helauj cov tuabneeg qee leej saablaaj, puab tuav tswvyim yuav muab Yexus tua povtseg.

⁷Yexus hab nwg cov thwjtim moog rua nraag ntug Havtxwv Kalilais, muaj tuabneeg coob coob nrug Yexus moog hab. Cov tuabneeg ntawd muaj ibtxha tuaj huv xeev Kalilais tuaj, muaj ibtxha tuaj nraag xeev Yudas tuaj,

⁸muaj ibtxha tuaj nraag lub nroog Yeluxalees tuaj, muaj ibtxha tuaj nraag cheebtsaam Idumias tuaj, muaj ibtxha tuaj saab ntug dlej Yauladees tim u tuaj, hab muaj ibtxha tuaj peg tej zog kws nyob ze lub nroog Tiles hab lub nroog Xidoos tuaj. Cov tuabneeg ntawd tuaj saib Yexus, rua qhov puab nov txug tej num kws Yexus ua.

⁹Muaj tuabneeg coob coob, ces Yexus txawm has kuas nwg cov thwjtim npaaj ib lub nkoj tog nwg, cov tuabneeg coob coob ntawd txhaj tsi txaav lug ti Yexus.

¹⁰Yexus khu ntau leej mob zoo lawm, ces tej tuabneeg kws muaj mob txawm pheej sis txiv lug kuas ze, puab txhaj kov tau Yexus.

¹¹Txhua zag kws cov tuabneeg raug dlaab pum Yexus, puab txawm qhau cev hlo ntawm Yexus kutaw hab qw nrov nrov has tas, “Koj yog Vaajtswv tug Tub.”

¹²Yexus txwv tawv tawv cov dlaab ntawd has tas, “Mej tsi xob qha has tas kuv yog leejtwg.”

¹³Tom qaab ntawd, Yexus txawm nce moog rua peg ib lub roob. Nwg hu cov tuabneeg kws nwg xaav yuav ua nwg cov thwjtim lug cuag nwg, Ces puab txawm lug cuag nwg.

¹⁴Nwg xaiv tau kaum ob leeg. Nwg hu kaum ob leeg ntawd ua cov timthawj. Nwg has rua puab tas, “Kuv xaiv mej lug nrug kuv nyob. Kuv yuav khaiv mej moog qha Txujmoo Zoo,

¹⁵hab kuv yuav pub fwjchim rua mej kuas mej ntab tau dlaab.”

¹⁶Kaum ob leeg kws Yexus xaiv ntawd yog: Ximoos (tug kws Yexus tis dlua ib lub npe hu ua Petus).

¹⁷Yakaunpaus hab nwg tug kwv Yauhaas, Obtug yog Xenpedais tub; (Yexus tis npe rua obtug hu ua Npau-anekes, rua qhov obtug “Sab ceev heev.”);

¹⁸Aadales, Filis, Npataulaumais, Mathais, Thaumas, Yakaunpaus kws yog Alafais tug tub, Thade-us, Ximoos tug kws xaav kuas nwg tsaav tuabneeg muaj kev ywjpheej,

¹⁹hab Yudas Ixakali-us tug kws ntxeev sab rua Yexus.

²⁰Yexus moog txug huv ib lub tsev, muaj dlua ib cov tuabneeg coob coob tuaj, Yexus hab nwg cov thwjtim tsi khoom noj mov le.

²¹Thaus Yexus tsev tuabneeg nov le ntawd, puab txawm moog nrhav Yexus hab coj Yexus lug tsev, rua qhov muaj tuabneeg has tas, “Yexus vwm lawm!”

²²Cov xwbfwb kws qha Vaajtswv txuj Kevcai qee leej kws tuaj nraag Yeluxalees tuaj has tas, “Yog Npexenpus pub fwjchim rua nwg! Yog dlaab Ntxwgnyoog pub fwjchim rua nwg, nwg txhaj ntab tau dlaab.”

²³Yexus txawm hu cov tuabneeg coob coob ntawd lug cuag nwg, hab nwg ua lug pevtxwv qha rua puab has tas: dlaab Ntxwgnyoog yuav ua le caag ntab tau dlaab Ntxwgnyoog?

²⁴Yog muaj ib lub tebchaws tawg ua ob peb paab, hab cov tuabneeg ntawd sis ntaus sis tua, ces lub tebchaws ntawd yeej yuav puamtsuaj moog.

²⁵Yog tsev tuabneeg twg tsi sis hum, ces tsev tuabneeg ntawd yeej yuav tawg moog taag.

²⁶Cov tuabneeg kws dlaab Ntxwgnyoog kaav, yog puab tsi sis hum, puab yeej yuav nyob tsi tau ua ke, puab yuav tawg moog taag.

²⁷“Tsi muaj leejtwg yuav tsoo moog tau rua huv tug txivneej kws muaj zug heev lub tsev, hab fuab nwg tej qhov txhua chaw, tsuas yog nwg xub muab tug kws muaj zug ntawd khi tsaiv, nwg txhaj fuab tau tej qhov txhua chaw huv tug ntawd tsev.

²⁸“Kuv qha tseeb rua mej has tas, txhua yaam kev txhum kws tuabneeg ua hab txhua lu lug phem kws tuabneeg has, mas Vaajtswv zaam tau.

²⁹Tabsis tug kws thuam Vaaj Ntsujplig tug Dlawbhuv, Vaajtswv zaam txim tsi tau rua tug ntawd. Tug ntawd yuavtsum ris nwg lub txim moog ibtxhis.”

³⁰(Yexus has le ntawd, rua qhov muaj qee leej has tas, “Yexus raug dlaab.”)

³¹Thaus ntawd Yexus nam hab Yexus cov kwv tuaj sawv nrau zoov. Puab tso tuabneeg moog hu Yexus lug.

³²Muaj tuabneeg coob coob nyob puagncig Yexus. Puab has rua Yexus has tas, “Koj saib, koj nam hab koj cov kwv tuaj nrhav koj, puab nyob saab nrau.”

³³Yexus teb has tas, “Leejtwg yog kuv nam? Hab cov twg yog kuv cov kwv?”

³⁴Yexus txawm saib cov tuabneeg kws nyob puagncig nwg hab has tas, “Cov tuabneeg kws nyob ntawm nuav txhaj yog kuv nam hab kuv cov kwv!

³⁵Tug kws ua lawv le Vaajtswv lub sab nyam, tug ntawd txhaj yog kuv tug kwv, yog kuv tug muam, hab yog kuv nam.”