Read Hmong Njua Malakaus 4 Bible Online

Malakaus 4 - Hmong Njua bible

Malakaus 4

¹Yexus rov qaab moog qha nraag ntug dlej Havtxwv Kalilais dlua ib zag. Muaj tuabneeg coob coob tuaj cuag Yexus, ces Yexus txhaj nce moog nyob rua huv ib lub nkoj huv havtxwv. Cov tuabneeg coob coob ntawd sawv tim ntug dlej.

²Yexus ua lug pevtxwv qha ntau zaaj rua puab noog has tas,

³“Mej ua tuab zoo noog! Muaj ib tug txivneej nqaa nplej moog tseb.

⁴Thaus nwg tseb cov noob nplej rua huv dlaim teb, muaj qee lub poob rua huv plawv kev, ces noog txawm yaa lug khaws noj lawm.

⁵Muaj qee lub poob rua ntawm qhov aav kws huv muaj pobzeb tiv lawm. Cov noob ntawd tuaj sai sai, rua qhov aav tsi tub.

⁶Thaus tshaav ntuj kub cov kaug nplej txawm ntsws hab qhuav lawm, rua qhov cov caag ntsa aav tsi tub.

⁷Muaj qee lub poob rua huv qaab tsob xuavpaug, ces cov xuavpaug hlub tuaj laum cov nplej ntawd tuag taag lawm, hab cov nplej txhawv tsi taug.

⁸Tabsis muaj qee lub poob rua ntawm qhov aav zoo, cov ntawd tuaj kaug, hlub sai hab txhawv zoo. Qee naab txi tau peb caug lub, qee naab txi tau rau caum lub, hab qee naab txi tau ib puas lub.”

⁹Yexus xaus lug has tas, “Yog leejtwg muaj qhovntsej, ca le noog!”

¹⁰Thaus Yexus nyob ib leeg xwb, cov tuabneeg kws nov Yexus qha muaj qee leej nrug cov thwjtim tuaj thov Yexus txhais zaaj lug pevtxwv ntawd rua puab paub.

¹¹Yexus has rua puab tas, “Yaav taag lug mej tsi paub zaaj kws has txug Vaajtswv lub Tebchaws, tabsis nwgnuav Vaajtswv tub qha zaaj ntawd rua mej paub lawm. Txhua zaaj kws lwm tug nov puavleej yog lug pevtxwv xwb,

¹²kuas muaj tav lawv le Vaajtswv txujlug kws has tas: ‘Puab yuav saib taag saib thab, tabsis puab yuav tsi pum; puab yuav noog taag noog thab, tabsis puab yuav tsi totaub. Yog puab pum hab totaub lawm, nyob tsaam puab yuav rov lug cuag Vaajtswv, hab Vaajtswv yuav zaam puab lub txim.’ ”

¹³Yexus has rua puab tas, “Mej tsi totaub zaaj lug pevtxwv nuav los? Yog mej tsi totaub zaaj nuav, mej yuav ua le caag totaub lwm zaaj?

¹⁴Tug tseb nplej tub yog tug kws qha Vaajtswv txujlug.

¹⁵Cov noob nplej kws poob rua huv plawv kev ntawd, pev txug Vaajtswv txujlug kws tseb rua huv tuabneeg lub sab, thaus puab nov dlheev lawm, taamsim ntawd dlaab Ntxwgnyoog txawm lug txeeb txujlug ntawd huv puab lub sab moog lawm.

¹⁶Cov noob nplej kws poob rua ntawm qhov aav kws huv muaj pobzeb tiv lawm, pev txug Vaajtswv txujlug kws thaus tuabneeg nov dlheev, puab txaus sab hlo txais yuav taamsim ntawd.

¹⁷Tabsis txujlug ntawd cog tsi ruaj rua huv puab lub sab, puab ntseeg ib nyuas ntu xwb. Thaus puab raug kev txomnyem lossis raug kev tsimtxom, vim puab ntseeg txujlug ntawd, ces puab txawm thim rov qaab lawm.

¹⁸Cov noob nplej kws poob rua huv qaab tsob xuavpaug, pev txug cov tuabneeg kws nov Vaajtswv txujlug,

¹⁹tabsis puab tej kev nyuaj sab, kev ntshaw nyaj, hab ntshaw yaam nuav yaam u, txawm luj hlub tuaj laum Vaajtswv txujlug, ces puab lub neej txhaj tsi tawg paaj hab tsi txi txiv.

²⁰Cov noob nplej kws poob rua ntawm qhov aav zoo, pev txug Vaajtswv txujlug kws tuabneeg nov dlheev hab puab khaws tej lug ntawd ca rua huv puab lub sab, puab lub neej txhaj tawg paaj txi txiv. Muaj qee naab txi tau peb caug lub, muaj qee naab txi tau rau caum lub, hab muaj qee naab txi tau ib puas lub.”

²¹Yexus qha ntxiv has tas, “Puas muaj leejtwg taws teeb hab muab phab khwb rua lossis muab txawb rua huv qaab txaag? Tsuas muaj yuav muab txawb rua sau qhov chaw sab xwb.

²²Tej kws muab zais ca lawm, yeej yuav muaj tuabneeg pum. Hab tej kws muab npog ca lawm, yeej yuav muaj tug muab nthuav lug rua suavdlawg saib.

²³Yog leejtwg muaj qhovntsej, ca le noog!”

²⁴Yexus has ntxiv rua puab tas, “Mej yuavtsum ua tua zoo noog tej kws mej nov. Mej muab lub luaj le caag luj rua lwm tug, Vaajtswv yuav muab lub luaj le ntawd luj rua mej. Tsi yog le ntawd xwb, Vaajtswv tseem yuav tsaav ntxiv rua mej hab.

²⁵Tug kws muaj lawm, Vaajtswv yuav muab ntxiv rua tug ntawd, tabsis tug kws tsi muaj, txawm yog nwg muaj mivntsiv xwb los Vaajtswv yuav muab tej ntawd rhu ntawm nwg moog.”

²⁶Yexus qha ntxiv has tas, “Vaajtswv lub Tebchaws pev ib yaam le ib tug txivneej moog tseb nplej rua huv nwg dlaim teb.

²⁷Mo ntuj nwg pw tsaug zug, nruab nub nwg sawv ua num, mo ntuj lossis nruab nub cov noob nplej tuaj kaug hab pheej hlub zuj zug tuaj. Nwg tsi paub sov ua le caag cov nplej txawj hlub le ntawd.

²⁸Tub yog cov aav ua kuas nplej tuaj hab txhawv, xub muaj tug kaug mog mog hlub tuaj maam le txhawv, tom qaab rau ntsab taag, maam le pib dlaaj qaab naab.

²⁹Thaus nplej sav lawm, tug txivneej ntawd txawm muab lag moog hlais, rua qhov tub txug lub caij hlais lawm.”

³⁰Yexus qha ntxiv has tas, “Yuav muab Vaajtswv lub Tebchaws pev rua yaam twg txhaj phim? Hab yuav ua lug pevtxwv le caag qha suavdlawg txhaj totaub?

³¹Vaajtswv lub Tebchaws pev ib yaam le lub noob zaub, lub noob ntawd yog lub kws miv dlua lwm yaam noob huv nplajteb nuav, hab muaj ib tug txivneej nqaa lub noob ntawd moog cog rua huv aav.

³²Tsi ntev lub noob ntawd txawm tuaj kaug hab hlub tuaj luj dlua tej zaub huv tuabsi, nwg ncau ceg ntau hab noog lug ua zeg rua sau tej ceg kws muaj nplooj roog.”

³³Yexus qha Vaajtswv txujlug rua suavdlawg, nwg ua lug pevtxwv ntau zaaj zoo le tej kws nwg xub qha taag lug lawm rua puab; tej kws nwg qha ntawd, nwg tsuas qha tej zaaj kws puab yuav totaub xwb.

³⁴Thaus nwg qha suavdlawg, nwg ua lug pevtxwv qha xwb, tabsis thaus nwg tuab leeg nrug cov thwjtim nyob, nwg txhais txhua zaaj rua cov thwjtim paub.

³⁵Nub ntawd thaus yuav tsaus ntuj, Yexus has rua nwg cov thwjtim has tas, “Peb ca le hlaa havtxwv moog rua saab tim u.”

³⁶Puab ncaim suavdlawg moog lawm; Yexus xub moog nyob huv lub nkoj, cov thwjtim maam le nce lawv qaab moog rua huv, hab coj Yexus nrug puab moog. Muaj ob peb lub nkoj nrug Yexus puab lub moog hab.

³⁷Taamsim ntawd txawm muaj cua dlaaj cua dlub hlub heev ntsawj dlej ndlaas lug rua huv lub nkoj, dlej tub yuav puv lub nkoj.

³⁸Yexus rau ncoo pw tsaug zug tom tw nkoj, cov thwjtim txawm lug tsaa Yexus has tas, “Xwbfwb, koj tsi quavntsej peb los? Peb tub yuav tuag.”

³⁹Yexus sawv tseeg lug txwv cua has tas, “Ca le tu!” hab txwv dlej has tas, “Ca le tug.” Ces cua txawm tu hab dlej tsi ndlaas lawm.

⁴⁰Yexus has rua nwg cov thwjtim has tas, “Vim le caag mej ntshai ua luaj? Ua le caag mej tsi muaj kev ntseeg le?”

⁴¹Tabsis puab ntshai kawg, puab sis thaam has tas, “Tug nuav yog leejtwg,? Ua le caag cua hab dlej yuav noog nwg lug?”