Read Hmong Njua Malakaus 5 Bible Online

Malakaus 5 - Hmong Njua bible

Malakaus 5

¹Yexus hab nwg cov thwjtim moog txug saab ntug Havtxwv Kalilais tim u, kws yog cheebtsaam Nkelaxas.

²Thaus Yexus tawm huv lub nkoj lug, taamsim ntawd muaj ib tug txivneej raug dlaab tawm tom roob toj ntxaas lug cuag Yexus. Tug txivneej ntawd muaj ib tug dlaab nyob huv nwg,

³hab tug txivneej ntawd yeej nyob tom roob toj ntxaas xwb. Muaj tuabneeg tub muab saw hlau khi nwg ntau zag, tabsis nwg muaj zug heev, nwgnuav puab khi tsi tau nwg lawm.

⁴Puab muab saw hlau khi nwg teg nwg taw ntau zag, tabsis txhua zag kws puab khi nwg, nwg muab ntag tu taag, hab muab tej khawb hlau kws xauv nwg kutaw luv taag. Nwg muaj zug heev, tsi muaj leejtwg kovyeej nwg le.

⁵Nwg yos taag nub taag mo tom toj ntxaas hab peg tej roob, nwg pheej qw nrov nrov hab muab pobzeb hlais nwg lub cev.

⁶Thaus nwg pum Yexus, nwg tseem nyob dleb tsawv, nwg txawm dlha lug txhus caug ndlua ntawm Yexus kutaw,

⁷hab nwg qw nrov nrov has tas, “Yexus kws yog Vaajtswv tug kws muaj Fwjchim Luj kawg nkaus tug Tub! Koj tuaj thaab kuv ua dlaabtsi? Muaj Vaajtswv nyob sau ntuj pum, kuv thov koj tsi xob tsimtxom kuv!”

⁸(Nwg has le ntawd, rua qhov Yexus has rua nwg tas, “Nam dlaab phem, koj ca le tawm huv tug txivneej nuav moog!”)

⁹Yexus nug nwg has tas, “Koj lub npe hu le caag!” “Nwg teb has tas, ‘Kuv lub npe hu ua Coob’ rua qhov peb muaj coob tug!”

¹⁰Nwg txawm thov Yexus has tas, “Thov koj tsi xob ntab peb tawm huv thaaj chaw nuav moog.”

¹¹Nyob ze ntawd muaj ib paab npua coob coob taabtom nrhav noj ntawm ib ntaa toj.

¹²Cov dlaab ntawd thov Yexus has tas, “Ca peb moog rua huv paab npua ntawd.”

¹³Yexus txawm ca dlaab moog rua huv paab npua, ces cov dlaab txawm tawm plawg huv tug txivneej moog nkaag rua paab npua. Paab npua ntawd yuav laug muaj ob txheeb tug. Thaus dlaab moog rua huv paab npua lawm, ces paab npua txawm dlha moog poob tsaag tsua rua huv havtxwv tuag taag huv tuabsi lawm.

¹⁴Thaus cov tuabneeg kws zuv npua pum le ntawd, puab txawm dlha rov qaab moog qha tej ntawd rua cov tuabneeg kws nyob huv nroog hab huv tej zog kws nyob ibncig lub nroog ntawd, ces suavdlawg txawm tuaj saib muaj le caag tag.

¹⁵Thaus puab tuaj txug ntawm Yexus, puab pum tug tuabneeg kws raug ntau tug dlaab nyob quastsawg ntawd, nwg naav rig tsho hab nwg tub feeb meej lawm, puab ntshai kawg le.

¹⁶Cov tuabneeg kws pum Yexus ntab dlaab, puab txawm qha zaaj kws Yexus ntab dlaab tawm huv tug txivneej ntawd, hab qha txug paab npua rua suavdlawg noog.

¹⁷Thaus suavdlawg nov le ntawd, puab txawm thov kuas Yexus tawm huv puab cheebtsaam ntawd moog.

¹⁸Thaus Yexus taabtom nce moog rua huv lub nkoj, tug txivneej kws raug dlaab thov Yexus has tas, “Ca kuv nrug koj moog!”

¹⁹Tabsis Yexus tsi kheev, Yexus has rua nwg tas, “Koj ca le rov qaab moog tsev hab qha rua koj cov kwvtij paub has tas, tug Tswv paab koj hab hlub koj npaum le caag.”

²⁰Tug txivneej ntawd txawm moog qha thoob plawg huv lub nroog Dekapaulis txug tej kws Yexus tau paab nwg lawm rua suavdlawg noog, txhua tug kws nov nwg qha xaav tsi thoob le.

²¹Yexus txawm caij nkoj hlaa havtxwv rov qaab moog rua saab tim u. Muaj tuabneeg coob coob tuaj cuag Yexus ntawm ntug dlej.

²²Muaj ib tug txivneej hu ua Yailus, nwg yog tug kws saib num huv lub tsev saablaaj huv lub nroog ntawd. Nwg tuaj txug, nwg pum dlheev Yexus, nwg txawm lug txhus caug ndlua ntawm Yexus kutaw.

²³Nwg thov Yexus has tas, “Kuv tug ntxhais mob heev tub yuav tuag. Thov koj moog cev teg tuav nwg, nwg txhaj yuav zoo.”

²⁴Yexus nrug Yailus moog hab muaj tuabneeg coob coob nrug Yexus moog sis nphoo quas tshua.

²⁵Muaj ib tug quaspuj kws coj khaub dluag tau kaum ob xyoos tsi tu, hab nwg txomnyem kawg le.

²⁶Nwg ndlav ntau tug kws tshuaj khu, tabsis tsi zoo. Txawm yog nwg siv taagnrho nwg cov nyaj khu los tsi zoo, nwg pheej mob luj zuj zug ntxiv xwb.

²⁷Tug quaspuj ntawd nov suavdlawg has tas Yexus txawj khu mob, ces nwg txawm nrug suavdlawg caum Yexus qaab moog,

²⁸nwg xaav has tas, “Yog kuv kov Yexus lub tw tsho, kuv tug mob yuav zoo.”

²⁹Nwg txawm cev teg moog kov Yexus lub tw tsho, taamsim ntawd ntshaav txawm tu nrho hab nwg noog nwg lub cev tub zoo lawm.

³⁰Taamsim ntawd Yexus paub has tas fwjchim tawm ntawm nwg moog lawm, Yexus txawm tig hlo lug nug cov tuabneeg kws lawv nwg qaab has tas, “Leejtwg kov kuv lub tsho?”

³¹Yexus cov thwjtim teb has tas, “Koj tsi pum has tas, muaj tuabneeg coob ua luaj le nuav txiv koj los? Ua le caag koj yuav nug has tas, leejtwg kov koj lub tw tsho?”

³²Tabsis Yexus tseem saib tej tuabneeg kws sawv ibncig Yexus, saib yog leejtwg kov Yexus.

³³Tug quaspuj ntawd paub has tas nwg tug mob zoo lawm, nwg ntshai ua ib ce tshee quas nyo, nwg txawm lug txhus caug ndlua ntawm Yexus kutaw, hab qha txhua yaam rua Yexus.

³⁴Yexus has rua nwg tas, “Mivntxhais, koj tug mob zoo lawm, tub yog vim koj ntseeg. koj ca le moog tso sab lug, koj tug mob tub zoo lawm.”

³⁵Thaus Yexus tseem taabtom has le ntawd, txawm muaj tuabneeg khaiv ob peb leeg tuaj tom Yailus tsev tuaj has rua Yailus has tas, “Koj tug ntxhais tub tuag lawm. Ua le caag koj tseem yuav taabkaum Xwbfwb ua dlaabtsi hab?”

³⁶Tabsis Yexus tsi quavntsej tej lug kws puab has ntawd, Yexus has rua Yailus has tas, “Koj tsi xob ntshai, ca le ntseeg xwb.”

³⁷Yexus tsi pub suavdlawg nrug nwg moog, nwg tsuas pub Petus, Yakaunpaus, hab Yakaunpaus tug kwv Yauhaas nrug nwg moog xwb.

³⁸Thaus puab moog txug ntawm Yailus tsev, Yexus pum suavdlawg ua ntxhuv quas nab, hab quaj nyav ntsoog qeeg huv tsev.

³⁹Yexus moog rua huv tsev hab has rua suavdlawg tas, “Mej ua ntxhuv quas nab hab quaj ua dlaabtsi? Tug mivntxhais ntawd tub tsi tuag, nwg tsaug zug xwb.”

⁴⁰Suavdlawg luag Yexus zum zawg, Yexus kuas puab tawm moog rua nrau zoov, ces Yexus txawm coj tug mivnyuas ntawd nam hab txiv, hab Yexus peb tug thwjtim nrug nwg moog rua huv lub txaaj kws tug mivnyuas pw.

⁴¹Yexus moog tuav nkaus tug mivnyuas ntawd txhais teg hab has rua nwg tas, “Talithas khumis,” lu lug ntawd txhais has tas, “Mivntxhais, kuv has rua koj tas, koj ca le sawv tseeg!”

⁴²Taamsim ntawd tug ntxhais ntawd txawm sawv tseeg moog kev. (Nwg noobnyoog muaj kaum ob xyoos.) Thaus suavdlawg pum le ntawd, suavdlawg xaav tsi thoob le.

⁴³Tabsis Yexus has tawv tawv rua puab kuas tsi xob moog qha zaaj nuav rua leejtwg, hab Yexus has tas, “Mej ca le moog muab mov lug rua tug mivntxhais nuav noj.”