Read Hmong Njua Malakaus 6 Bible Online

Malakaus 6 - Hmong Njua bible

Malakaus 6

¹Yexus txawm tawm qhov ntawd rov qaab moog rua huv nwg lub nroog, nwg cov thwjtim nrug nwg moog hab.

²Nub Xanpataus Yexus moog qha huv tsev saablaaj. Cov tuabneeg coob coob kws noog Yexus qha xaav tsi thoob le. Puab sis thaam has tas, “Nwg tau tej nuav qhov twg lug? Lub tswvyim kws nwg tau nuav yog tswvyim dlaabtsi? Nwg ua le caag ua tau tej txujci tseemceeb ntawd?

³Nwg puas yog ib tug kws ntoo kws yog Malis tug tub, hab Yakaunpaus, Yauxej, Yudas hab Ximoos puab puas yog nwg cov kwv? Hab puas yog nwg cov muam nrug peb nyob ntawm nuav?” Cov tuabneeg ntawd txawm tsi fwm Yexus.

⁴Yexus has rua puab tas, “Tej tuabneeg ob caag puavleej fwm tug cev Vaajtswv lug, tsuas yog cov tuabneeg kws nyob huv nwg lub zog, nwg cov kwvtij, hab nwg tsev tuabneeg txhaj tsi fwm nwg xwb.”

⁵Yexus tsi tau ua tej txujci tseemceeb ntau pistsawg qhov ntawd, nwg tsuas cev teg tuav ob peb leeg kuas puab tej mob zoo xwb.

⁶Yexus xaav tsi thoob, rua qhov cov tuabneeg kws nyob huv nwg lub nroog ntawd tsi ntseeg nwg. Tom qaab ntawd, Yexus moog qha thoob plawg txhua lub zog kws nyob huv lub tebchaws ntawd.

⁷Yexus hu kaum ob tug thwjtim lug cuag nwg, hab nwg khaiv puab moog qha Txujmoo Zoo. Nwg kuas puab ob leeg moog ib qho. Hab nwg pub fwjchim rua puab, kuas ntab tau dlaab tawm,

⁸hab nwg has rua puab tas, “Mej tsi xob nqaa dlaabtsi moog, tsuas pub mej nqaa tug paas nreg xwb. Tsi xob ntim mov, tsi xob khuam naab thoobpuab hab tsi xob nqaa nyaj moog.

⁹Mej yuavtsum rau khau, tabsis tsi xob npaaj tsho moog hloov.”

¹⁰Yexus has ntxiv rua puab tas, “Yog yim twg zoo sab hu mej moog huv puab tsev, mej ca le moog su huv yim ntawd moog txug nub kws mej tawm huv lub nroog ntawd moog.

¹¹Mej moog txug huv lub nroog twg yog tsi muaj tuabneeg hu mej moog huv puab tej tsev, hab puab tsi noog mej tej lug qha, mej ca le tawm qhov ntawd moog hab nchus tej moov aav kws lu mej kutaw povtseg. Mej ua le ntawd kuas puab paub has tas, puab muaj txim!”

¹²Cov thwjtim txawm moog, hab puab qha suavdlawg kuas nyag tso nyag tej kev txhum tseg.

¹³Tej tuabneeg kws raug dlaab los cov thwjtim ntab dlaab tawm, hab cov tuabneeg muaj mob los cov thwjtim muab roj pleev hab khu txhua tug zoo huv tuabsi.

¹⁴Vaajntxwv Helauj nov tej nuav, rua qhov Yexus lub moo tub nrov nchaa moog thoob plawg txhua qhov chaw lawm. Muaj qee leej has tas, “Tug Yauhaas kws muab tuabneeg ua kevcai raus dlej tub sawv rov qaab lug lawm, nwg txhaj ua tau tej txujci tseemceeb ntawd!.”

¹⁵Tabsis muaj qee leej has tas, “Yexus yog Eliyas.” Muaj qee leej has tas, “Yexus yog ib tug cev Vaajtswv lug, ib yaam le cov cev Vaajtswv lug thaus u ib tug.”

¹⁶Thaus Helauj nov suavdlawg has le ntawd, nwg has tas, “Tug ntawd tub yog tug Yauhaas kws muab tuabneeg ua kevcai raus dlej ntaag! Kuv tub muab nwg txav cejdlaab, tabsis nwgnuav nwg sawv rov qaab lug lawm!”

¹⁷Helauj yog tug kws has kuas luas nteg Yauhaas coj moog kaw rua huv tsev lojcuj. Helauj ua le ntawd tub yog nwg ua kuas hum Helaudias sab. Txawm yog Helaudias yog Helauj tug kwv Filis tug quaspuj los Helauj tseem yuav Helaudias lug ua nwg quaspuj hab.

¹⁸Thaus Yauhaas tseem ua neej nyob, nwg pheej ntuag Helauj has tas, “Qhov kws koj yuav koj tug kwv tug quaspuj txhum kevcai lawm!”

¹⁹Vim le ntawd Helaudias txhaj ntxub Yauhaas heev, hab xaav muab Yauhaas tua povtseg, tabsis tua tsi tau, rua qhov Helauj tsi kheev kuas tua.

²⁰Helauj ntshai Yauhaas, rua qhov Helauj paub has tas, Yauhaas yog ib tug tuabneeg ncaaj nceeg hab dlawbhuv, Helauj txhaj tsi pub leejtwg ua phem rua Yauhaas. Txawm yog tej kws Yauhaas qha pheej ua rua Helauj nyuaj sab los Helauj nyam noog Yauhaas qha.

²¹Muaj ib nub Helaudias nrhav tau kev ua phem rua Yauhaas lawm. Nub ntawd yog nub kws Helauj ua ib rooj mov ncu txug Helauj nub yug, Helauj hu cov numtswv, cov thawj tubrog hab cov tuabneeg tseemceeb huv lub xeev Kalilais tuaj nrug Helauj noj mov.

²²Helaudias tug ntxhais txawm lug seev cev rua suavdlawg saib. Nwg ua le ntawd, Helauj hab cov numtswv suavdlawg txaus sab kawg le. Vaajntxwv Helauj txawm has rua tug ntxhais tas, “Koj xaav yuav dlaabtsi koj ca le thov, kuv yuav muab pub rua koj.”

²³Helauj txawm coglug has tas, “Kuv qha tseeb rua koj has tas, yog koj thov yaam twg, kuv yuav muab yaam ntawd rua koj. Txawm yog koj xaav tau kuv lub tebchaws ib nraab los kuv yuav muab rua koj!”

²⁴Tug ntxhais txawm tawm moog nug nwg nam has tas, “Kuv yuav thov dlaabtsi?” Nwg nam teb has tas, “Koj ca le thov yuav Yauhaas tug kws muab tuabneeg ua kevcai raus dlej lub taubhau.”

²⁵Taamsim ntawd tug ntxhais txawm rov lug cuag Vaajntxwv Helauj hab has tas, “Kuv xaav kuas koj muab Yauhaas tug kws muab tuabneeg ua kevcai raus dlej lub taubhau tso rua huv lub phaaj nqaa lug rua kuv taamsim nuav!”

²⁶Tug ntxhais has le ntawd, vaajntxwv nyuaj sab kawg le, tabsis nwg hloov tsi tau lug lawm, rua qhov nwg tub coglug rua txug ntxhais taabmeeg suavdlawg lawm.

²⁷Helauj txawm khaiv ib tug tubrog moog txav Yauhaas cejdlaab. Ces tug tubrog txawm moog rua tom tsev lojcuj hab txav Yauhaas cejdlaab;

²⁸nwg muab Yauhaas lub taubhau tso rua huv ib lub phaaj nqaa lug rua tug ntxhais. Ces tug ntxhais txawm nqaa moog rua nwg nam.

²⁹Thaus Yauhaas cov thwjtim nov le ntawd, puab txawm tuaj muab Yauhaas lub cev kwv moog log lawm.

³⁰Yexus cov timthawj rov qaab lug cuag nwg, hab qha txhua yaam kws puab moog ua hab qha lawm rua Yexus noog.

³¹Muaj tuabneeg coob coob pheej tuaj noog Yexus qha, paab noog taag, paab tuaj. Yexus hab nwg cov thwjtim tsi tau su le, txawm yog yuav noj mov los tub tsi khoom noj. Yexus txhaj has rua cov thwjtim has tas, “Peb ca le moog rua tej qhov chaw kws tsi muaj tuabneeg, mej txhaj tau su mivntsiv.”

³²Yexus hab nwg cov thwjtim txawm caij nkoj hlaa havtxwv moog rua ib qhov chaw kws tsi muaj tuabneeg.

³³Txawm le ntawd los muaj ntau leej pum Yexus hab nwg cov thwjtim sawv kev moog, puab paub has tas yog Yexus hab nwg cov thwjtim. Cov tuabneeg ntawd txawm dlha lawv ntug havtxwv moog, puab xub moog txug qhov chaw kws Yexus hab nwg cov thwjtim yuav moog.

³⁴Thaus Yexus tawm huv lub nkoj lug, nwg pum cov tuabneeg coob coob ntawd, nwg hlub puab kawg le, rua qhov puab zoo le paab yaaj kws tsi muaj tug tswv yug. Yexus txhaj pib qha ntau zaaj rua puab noog.

³⁵Thaus yuav tsaus ntuj Yexus cov thwjtim lug has rua Yexus has tas, “Tub lig lig lawm ntawm nuav tsi muaj mov,

³⁶koj ca le kuas suavdlawg moog nrhav yuav mov tom tej zog hab tej teb kws nyob ntawm nuav noj.”

³⁷Yexus has rua cov thwjtim has tas, “Mej ca le nrhav rua puab noj.” Cov thwjtim nug Yexus has tas, “Koj xaav kuas peb muab ob puas lub nyaj moog yuav mov lug rua suavdlawg noj los?”

³⁸Yexus txawm has rua cov thwjtim has tas, “Mej ca le moog saib mej muaj pistsawg lub ncuav?” Thaus puab moog saib, puab rov lug qha rua Yexus has tas, “Peb muaj tsib lub ncuav hab ob tug ntseg.”

³⁹Yexus kuas cov thwjtim moog has rua cov tuabneeg coob coob ntawd kuas nyob quastsawg ua tej paab rua ntawm tej nyom.

⁴⁰Cov tuabneeg ntawd txawm nyob quastsawg ua tej paab, qee paab muaj ib puas leej, hab qee paab muaj tsib caug leej.

⁴¹Nwg muab tsib lub ncuav hab ob tug ntseg lug, ces nwg tsaa qhovmuag saib rua sau ntuj hab ua Vaajtswv tsaug, hab muab cov ncuav ndlais faib rua nwg cov thwjtim nqaa moog faib rua suavdlawg: Nwg muab ob tug ntseg faib rua suavdlawg hab.

⁴²Txhua tug puavleej tau noj tsau huv tuabsi.

⁴³Cov thwjtim moog sau tej ncuav hab tej ntseg kws suavdlawg noj tsi taag tau kaum ob tawb puv nkaus.

⁴⁴Cov tuabneeg kws noj mov nub ntawd, cov txivneej xwb muaj tsib txheeb leej.

⁴⁵Taamsim ntawd Yexus txawm kuas cov tuabneeg suavdlawg rov moog tsev, hab nwg kuas nwg cov thwjtim nce moog huv nkoj caij hlaa dlej havtxwv ua nwg ntej moog nyob tim lub nroog Npexaidas tog nwg.

⁴⁶Thaus suavdlawg moog taag lawm, Yexus nce moog thov Vaajtswv peg roob.

⁴⁷Thaus tsaus ntuj cov thwjtim tub caij nkoj moog txug ib nraab dlej lawm, Yexus tseem nyob ib leeg peg roob.

⁴⁸Yexus pum nwg cov thwjtim nkuam nkoj nyuaj kawg le, rua qhov muaj cua nplawm lub nkoj. Thaus yuav kaaj ntug Yexus lug kutaw sau nplaim dlej lug cuag cov thwjtim. Nwg yeej yuav dlhau plawg puab moog,

⁴⁹tabsis thaus cov thwjtim pum nwg moog sau nplaim dlej, puab xaav has tas nwg yog dlaab, puab txawm qw ntsoog qeeg.

⁵⁰Thaus puab pum nwg, puab ntshai kawg le. Taamsim ntawd Yexus has rua puab tas, “Mej tsi xob poob sab! Tub yog kuv ntaag, tsi xob ntshai.”

⁵¹Yexus nce moog nrug cov thwjtim nyob huv lub nkoj, ces cua txawm tu lawm. Cov thwjtim xaav tsi thoob le,

⁵²Puab tsi totaub zaaj kws Yexus muab ncuav faib rua tsib txheeb leej noj; rua qhov puab lub sab tawv.

⁵³Yexus hab nwg cov thwjtim caij nkoj hlaa havtxwv moog txug tim Nkenexales, puab txawm tso lub nkoj rua ntawm ntug havtxwv.

⁵⁴Thaus Yexus puab taabtom tawm huv lub nkoj lug, taamsim ntawd, cov tuabneeg kws nyob ntawd paub has tas yog Yexus.

⁵⁵Ces cov tuabneeg ntawd txawm dlha moog qha rua tej tuabneeg kws nyob huv cheebtsaam ntawd has tas, Yexus nyob qhov twg. Puab txawm muab choj qhwv cov tuabneeg kws muaj mob kwv tuaj rua Yexus khu qhov ntawd.

⁵⁶Txhua qhov kws Yexus moog, tsi has lub zog luj lossis lub zog miv lossis huv tej nroog, pheej muaj tuabneeg coj puab tej tuabneeg muaj mob tuaj tso rua ntawm tej kab. Puab thov Yexus has tas, “Ca peb cov tuabneeg muaj mob kov koj lub tw tsho; ces txhua tug kws kov puavleej zoo huv tuabsi.”