Read Hmong Njua Malakaus 7 Bible Online

Malakaus 7 - Hmong Njua bible

Malakaus 7

¹Muaj cov Falixais hab cov xwbfwb kws qha Vaajtswv txuj Kevcai qee leej tuaj nraag lub nroog Yeluxalees tuaj cuag Yexus.

²Puab pum Yexus cov thwjtim qee leej noj mov tsi ntxuav teg lawv le txuj kevcai kws qha has tas, yuavtsum xub ntxuav teg, maam le noj mov.

³(Lawv le cov Falixais hab cov Yudais cov yawmkoob tau qha rua puab lawm, yog puab tsi tau ntxuav teg, puab yeej tsi noj mov.

⁴Txhua yaam kws puab yuav tom kab lug, puab yuavtsum muab ntxuav tsaiv maam le noj. Puab coj ntau txuj kevcai kws puab cov yawmkoob qha rua puab lawm, tsi has ntxuav laujkaub, taig dlav, tej taig tooj lab hab tej txaaj pw. )

⁵Cov Falixais hab cov xwbfwb kws qha Vaajtswv txuj Kevcai nug Yexus has tas, “Vim le caag koj cov thwjtim tsi ua lawv le peb cov yawmkoob qha, puab tsi xub ntxuav teg tsaiv maam le noj mov?”

⁶Yexus teb has tas, “Qhov kws Yaxayas tug kws cev Vaajtswv lug has tseg txug mej yeej muaj tseeb tag! Mej yog cov tuabneeg ntsejmuag ncaaj sab nkhaus lawv le nwg sau tseg has tas: Vaajtswv has tas, Cov tuabneeg nuav lub ncauj fwm kuv tabsis puab lub sab tsi npuab kuv.

⁷Qhov kws puab pehawm kuv tsi muaj nqes le, rua qhov puab muab tuabneeg tej kevcai qha ib yaam le tej ntawd yog kuv txuj kevcai!”

⁸“Nwgnuav mej tsi coj lawv le Vaajtswv tej lug qha, mej tsua moog coj lawv le tuabneeg tej kevcai.”

⁹Hab Yexus has ntxiv tas, “Ua le caag mej yuav ntse ua luaj le? Mej muab Vaajtswv txuj kevcai tso tseg, kuas mej tau kev moog ua lawv le mej tej kevcai.

¹⁰Mauxes qha has tas, ‘Mej yuavtsum fwm mej nam mej txiv,’ hab has tas, ‘Yog leejtwg tshev nwg nam nwg txiv, yuavtsum muab tug ntawd tua povtseg.’

¹¹Tabsis mej qha has tas, yog leejtwg muaj ib yaam dlaabtsi yuav paab tau rua nwg nam nwg txiv, tabsis nwg has tas, ‘Tej ntawd tub muab rua Vaajtswv lawm,’

¹²ces tsi taag nwg yuav paab nwg nam nwg txiv lawm.

¹³Mej ua le ntawd, tub yog mej ua saib tsi taug Vaajtswv txujlug, rua qhov mej qha lawv le mej cov yawmkoob qha rua mej xwb. Hab tseem ua ntau yaam zoo le nuav.”

¹⁴Yexus rov hu cov tuabneeg coob coob lug cuag nwg, hab nwg has rua puab tas, “Mej txhua tug ua tuab zoo noog kuv tej lug, mej txhaj totaub.

¹⁵Tsi yog yaam kws moog rua huv tuabneeg lub qhovncauj, ua rua tuabneeg ua txhum; tabsis yog tej kws tawm huv tuabneeg lub sab lug, txhaj ua rua tuabneeg ua txhum.”

¹⁶Yog leejtwg muaj qhovntsej, ca le noog.

¹⁷Thaus Yexus ncaim cov tuabneeg coob coob ntawd moog rua huv tsev lawm, nwg cov thwjtim lug thov kuas nwg txhais zaaj lug pevtxwv ntawd.

¹⁸Yexus teb puab has tas, “Mej tsi totaub ib yaam le puab cov ntawd hab los? Mej tsi paub has tas tsi yog yaam kws moog rua huv tuabneeg lub qhovncauj, ua rua tuabneeg ua txhum,

¹⁹rua qhov tej ntawd tsi moog rua huv tuabneeg lub sab, tsuas moog rua huv tuabneeg lub plaab hab tawm lawm xwb.” (Yexus qha le nuav, yog nwg has tas, tej zaub mov tuabneeg noj tau huv tuabsi tsi txhum.)

²⁰Yexus has ntxiv tas, “Tej kws tawm huv tuabneeg lub sab lug, tej ntawd txhaj ua rua tuabneeg ua txhum.

²¹Tej kws tuabneeg xaav huv nruab sab, tej ntawd coj tuabneeg moog ua txhum kev nkauj kev nraug, ua tubsaab, tua tuabneeg,

²²ntxag luas quaspuj luas quasyawg, ntshaw luas tug, ua txhua yaam phem, dlaag ntxag, ua phem ua qas, khib, xyaav lwm tug moo, khaavtheeb, hab ua tuabneeg ruag.

²³Tej ntawd puavleej tawm huv tuabneeg lub sab lug, hab ua rua tuabneeg ua txhum.”

²⁴Tom qaab ntawd Yexus moog rua peg cheebtsaam kws ze lub nroog Tiles. Nwg moog huv ib lub tsev, nwg tsi xaav pub leejtwg paub has tas nwg nyob huv, tabsis nwg nraim tsi tau.

²⁵Muaj ib tug quaspuj kws nwg tug ntxhais raug dlaab nov has tas Yexus tuaj, nwg txawm tuaj txhus caug ndlua ntawm Yexus kutaw.

²⁶Tug quaspuj ntawd yog lwm Tsaav Tuabneeg, nwg yug huv lub xeev Faunikias tebchaws Xilias. Nwg thov kuas Yexus ntab dlaab tawm ntawm nwg tug ntxhais moog.

²⁷Tabsis Yexus has tas, “Peb yuavtsum xub pub mov rua mivnyuas noj tsaiv. Rua qhov tsi tsimnyog peb yuav muab mivnyuas tej mov pov rua dlev noj.”

²⁸Tug quaspuj ntawd teb has tas, “Tug Tswv, txawm le ntawd los tej dlev kws nyob huv qaab rooj, tub tau noj mivnyuas tej qub mov hab!”

²⁹Yexus txawm has rua nwg tas, “Tub yog vim lu lug kws koj has ko, koj ca le rov qaab moog tsev, dlaab tub tawm huv koj tug ntxhais lawm!”

³⁰Nwg txawm rov moog tsev, hab pum nwg tug ntxhais pw sau txaaj, dlaab tub tawm lawm.

³¹Tom qaab ntawd, Yexus tawm huv lub nroog Tiles hab hlaa lub nroog Xidoos moog rua nraag Havtxwv Kalilais kws yog taug txujkev moog rua nraag lub nroog Dekapaulis.

³²Muaj ib cov tuabneeg coj ib tug txivneej laag ntseg kws has tsi tau lug tuaj cuag Yexus hab thov Yexus cev teg tuav nwg.

³³Yexus coj tug txivneej ntawd moog rua ib qho nrug dleb ntawm cov tuabneeg coob coob. Yexus muab ntivteg ntxig rua huv tug txivneej ntawd ob lub qhovntsej, hab nwg muab ntivteg tub quavncaug pleev tug ntawd tug nplaig.

³⁴Yexus tsaa qhovmuag saib sau ntuj hab nwg hlu ib suab, ces nwg txhawm has rua tug txivneej ntawd tas, “Efathas,” lu lug ntawd txhais has tas, “Ca le qheb hlo!”

³⁵Taamsim ntawd tug txivneej ntawd txawm nov lug, nwg tug nplaig tsi txhaav, hab has tau lug meej lawm.

³⁶Yexus txwv tsi pub suavdlawg qha zaaj nuav rua leejtwg le. Txawm yog Yexus txwv puab heev npaum le caag los nwg txwv tsi tau, puab hajyam qha heev ntxiv xwb.

³⁷Txhua tug kws nov tej nuav xaav tsi thoob le, puab sis thaam has tas, “Txhua yaam kws nwg ua puavleej zoo huv tuabsi. Txawm yog tej tuabneeg laag ntseg los nwg khu tau nov lug, cov tuabneeg kws has tsi tau lug los nwg khu has tau lug!”