Read Hmong Njua Malakaus 8 Bible Online

Malakaus 8 - Hmong Njua bible

Malakaus 8

¹Tom qaab ntawd tsi ntev muaj dlua ib cov tuabneeg coob coob tuaj ua ke. Tej mov kws puab ntim tuaj, puab noj taag lawm, Yexus txawm hu nwg cov thwjtim lug cuag nwg hab has rua puab tas,

²“Kuv hlub cov tuabneeg nuav heev, puab tub tuaj nrug kuv nyob ntawm nuav tau peb nub lawm, puab tsi muaj ib yaam dlaabtsi noj.

³Yog kuv ca puab moog tsev tsi muab mov rua puab noj, nyob tsaam puab tsaus muag hab qaug tom tej tog kev, rua qhov ibtxha tuaj dleb tuaj.”

⁴Yexus cov thwjtim has rua Yexus has tas, “Ntawm nuav yog roob mojsaab qhua xwb, leejtwg yuav moog nrhav tau mov lug rua suavdlawg noj?”

⁵Yexus nug cov thwjtim has tas, “Mej muaj pistsawg lub ncuav?” Puab teb has tas, “Peb muaj xyaa lub.”

⁶Yexus kuas suavdlawg nyob quastsawg huv aav. Yexus muab xyaa lub ncuav lug ua Vaajtswv tsaug, hab muab ndlais cev rua cov thwjtim nqaa moog faib rua suavdlawg. Cov thwjtim txawm ua le ntawd.

⁷Cov thwjtim muaj ob peb tug ntseg miv miv. Thaus Yexus ua Vaajtswv tsaug taag, Yexus kuas cov thwjtim nqaa cov ntseg moog faib rua suavdlawg hab.

⁸Txhua tug puavleej tau noj tsau huv tuabsi.

⁹Cov tuabneeg kws noj mov nub ntawd yuav laug muaj plaub txheeb leej. Cov thwjtim moog sau tej seem kws suavdlawg noj tsi taag tau xyaa tawb puv nkaus. Tom qaab ntawd, Yexus kuas suavdlawg rov qaab moog tsev,

¹⁰taamsim ntawd Yexus hab nwg cov thwjtim txawm nce moog rua huv nkoj hab caij moog rua tim cheebtsaam Damanuthas lawm.

¹¹Cov Falixais qee leej tuaj nrug Yexus sis caav, puab xaav sim Yexus, puab txawm kuas Yexus ua ib yaam txujci tseemceeb rua puab saib, puab txhaj ntseeg has tas yog Vaajtswv khaiv Yexus lug.

¹²Yexus hlu ib suab hab has tas, “Ua le caag cov tuabneeg tam nuav tsuas xaav pum tej txujci tseemceeb xwb? Kuv qha tseeb rua mej has tas, kuv yuav tsi ua tej txujci tseemceeb rua cov tuabneeg nuav pum le!”

¹³Yexus txawm tso puab tseg, hab nce moog rua huv nkoj, caij hlaa moog rua saab tim u lawm.

¹⁴Cov thwjtim tsi ncu ntim mov moog, puab tsuas muaj ib lub ncuav nyob huv lub nkoj xwb.

¹⁵Yexus has rua puab tas, “Mej yuavtsum ceevfaaj cov Falixais hab Helauj cov keeb.”

¹⁶Cov thwjtim txawm sis thaam has tas, “Ntshai yog peb tsi ntim mov tuaj, nwg txhaj has le ntawd.”

¹⁷Yexus tub paub tej kws puab sis thaam ntawd lawm, nwg txawm has rua puab tas, “Ua le caag mej sis thaam has txug qhov kws mej tsi ntim mov tuaj? Mej tseem tsi pum hab tsi totaub los? Ua le caag mej yuav ruag ua luaj le?

¹⁸Mej tub muaj qhovmuag, mej tsi pum los? Mej tub muaj qhovntsej, mej tsi nov los? Mej tsi ncu qaab

¹⁹thaus kuv muab tsib lub ncuav ndlais faib rua tsib txheeb leej noj, mej sau tej kws seem ntawd tau pistsawg tawb?” Puab teb has tas, “Peb sau tau kaum ob tawb.”

²⁰“Hab thaus kuv muab xyaa lub ncuav ndlais faib rua plaub txheeb leej noj, mej khaws tej kws seem tau pistsawg tawb?” Puab teb has tas, “Peb sau tau xyaa tawb.”

²¹Yexus nug puab has tas, “Mej tseem tsi totaub hab los?”

²²Yexus hab nwg cov thwjtim moog txug huv lub nroog Npexaidas. Muaj tuabneeg coj ib tug txivneej dligmuag tuaj cuag Yexus hab thov Yexus khu tug dligmuag ntawd.

²³Yexus tuav tug txivneej ntawd teg hab coj nwg moog rua tom ntug zog. Yexus nti quavncaug pleev tug ntawd ob lub qhovmuag hab cev teg kov. Yexus nug nwg has tas, “Koj pum dlaabtsi?”

²⁴Tug txivneej ntawd tsaa qhovmuag saib hab has tas, “Kuv pum tuabneeg moog moog lug lug, tabsis puab zoo le tej ntoo.”

²⁵Yexus rov cev teg moog kov tug ntawd ob lub qhovmuag dlua ib zag. Nwg qheb tau qhovmuag, nwg lub qhovmuag zoo lawm, hab nwg pum kev tseeb.

²⁶Yexus kuas nwg ca le moog tsev hab has tas, “Koj tsi xob rov moog rua huv zog lawm.”

²⁷Tom qaab ntawd Yexus hab nwg cov thwjtim moog rua peg tej zog kws nyob ibncig lub nroog Xixaleyas Filipis. Thaus puab taabtom taug kev moog, Yexus nug cov thwjtim has tas, “Mej qha kuv saib, suavdlawg has tas kuv yog leejtwg?”

²⁸Cov thwjtim teb has tas, “Muaj qee leej has tas, koj yog Yauhaas tug kws muab tuabneeg ua kevcai raus dlej, muaj qee leej has tas, koj yog Eliyas, hab muaj qee leej has tas, koj yog ib tug kws cev Vaajtswv lug.”

²⁹Yexus nug has tas, “Mej ne, mej has tas kuv yog leejtwg?” Petus teb has tas, “Koj yog tug Mexiyas.”

³⁰Yexus txwv puab has tas, “Mej tsi xob moog qha rua leejtwg has tas, kuv yog tug Mexiyas.”

³¹Tom qaab ntawd, Yexus txawm pib qha rua nwg cov thwjtim has tas, “Tuabneeg leej Tub yuav raug tsimtxom ntau yaam, cov txwjlaug, cov thawj ntawm cov povthawj, hab cov xwbfwb kws qha Vaajtswv txuj Kevcai yuav tsi leeg yuav nwg. Puab yuav muab nwg tua povtseg, tabsis tom qaab ntawd peb nub nwg yuav sawv huv qhov tuag rov qaab lug.”

³²Yexus qha zaaj nuav tseeb tseeb rua cov thwjtim, ces Petus txawm coj Yexus moog rua ib caag hab cheem Yexus.

³³Tabsis Yexus tig lug saib nwg cov thwjtim hab tshev Petus has tas, “Dlaab Ntxwgnyoog, koj ca le tsiv ntawm kuv moog. Tej kws koj has ko tsi yog lawv le Vaajtswv lub sab, tabsis yog has lawv le tuabneeg lub sab xwb.”

³⁴Yexus txawm hu cov tuabneeg coob coob ntawd hab nwg cov thwjtim lug cuag nwg, nwg has rua puab tas, “Yog leejtwg xaav nrug kuv moog, tug ntawd yuavtsum tswj nwg lub sab hab kwv nwg tug ntoo khaublig nrug kuv moog.

³⁵Rua qhov tug kws khauvxwm nwg txujsa, tug ntawd yuav tsi tau txujsa. Tabsis tug kws tsi khauvxwm nwg txujsa, vim nwg ntseeg kuv, hab moog qha Txujmoo Zoo, tug ntawd yuav tau txujsa.

³⁶Yog leejtwg tau ib puas tsaav yaam huv nplajteb nuav lug ua nwg tug, tabsis nwg txujsa tu lawm, tej ntawd yuav muaj nqes dlaabtsi rua nwg?

³⁷Yeej tsi muaj ib yaam dlaabtsi kws nwg yuav coj moog txhwv tau txujsa rov qaab lug!

³⁸Yog leejtwg txaajmuag qha kuv lub npe hab kuv tej lug rua cov tuabneeg sab phem tam nuav, ces thaus Tuabneeg Leej Tub tug kws muaj leej Txiv tug tshwjchim ci ntsaa ab nrug cov timtswv kws dlawbhuv lug sau ntuj lug, nwg yuav txaajmuag leeg has tas, tug ntawd yog nwg le.”