Read Hmong Njua Malakaus 9 Bible Online

Malakaus 9 - Hmong Njua bible

Malakaus 9

¹Yexus has ntxiv rua puab tas, “Kuv qha tseeb rua mej has tas, cov tuabneeg kws nyob ntawm nuav muaj qee leej yuav tsi tau tuag ua ntej puab pum Vaajtswv lub Tebchaws nrug Vaajtswv lub fwjchim lug.”

²Tom qaab ntawd rau nub, Yexus coj Petus, Yakaunpaus, hab Yauhaas nrug Yexus moog rua sau ib lub roob sab, tsi muaj lwm tug nrug puab moog. Thaus peb tug thwjtim taabtom saib ntsoov Yexus, Yexus lub cev txawm hloov hlo,

³hab Yexus cev rig tsho ci ntsaa ab dlawb paug, tej tuabneeg kws nyob huv nplajteb nuav, tsi muaj leejtwg yuav ntxhua tau ib cev rig tsho dlawb npaum le ntawd.

⁴Peb tug thwjtim ntawd pum Eliyas hab Mauxes nrug Yexus thaam.

⁵Petus txawm has rua Yexus has tas, “Xwbfwb, peb tuaj nyob ntawm nuav zoo kawg le! Peb yuav ua peb lub tsev pheebsuab, ib lub rua koj, ib lub rua Mauxes, hab ib lub rua Eliyas.”

⁶Petus puab ntshai kawg le, Petus txhaj has le ntawd.

⁷Muaj ib tauv fuab lug nroog puab, hab muaj ib lub suab has huv tauv fuab ntawd tuaj has tas, “Tug nuav yog kuv tug Tub kws kuv hlub, mej ca le noog nwg lug!”

⁸Taamsim ntawd cov thwjtim txawm xaam ncig leeg, tabsis tsi pum leejtwg le; tsuas pum Yexus tuab leeg nrug puab nyob xwb.

⁹Thaus Yexus hab nwg peb tug thwjtim nqeg peg roob lug, Yexus txwv peb tug thwjtim ntawd has tas, “Mej tsi xob qha tej kws mej pum ntawd rua leejtwg paub moog txug thaus kws Tuabneeg leej Tub sawv huv qhov tuag rov qaab lug tsaiv.”

¹⁰Ces puab txawm khaws Yexus tej lug rua nruab sab. Puab tsi qha rua leejtwg le. Tabsis puab sis thaam has tas, “Qhov kws nwg has tas, ‘sawv huv qhov tuag rov qaab lug,’ yog nwg has txug dlaabtsi?”

¹¹Ces puab txhaj nug Yexus has tas, “Vim le caag cov xwbfwb kws qha Vaajtswv txuj Kevcai has tas, Eliyas yuav xub lug?”

¹²Yexus teb has tas, “Eliyas yeej xub lug tag, nwg lug npaaj txhua yaam ca. Vim le caag Vaajtswv txujlug has tas, Tuabneeg leej Tub yuav raug tsimtxom hab suavdlawg yuav saib tsi taug nwg?

¹³Tabsis kuv qha tseeb rua mej has tas, Eliyas tub lug lawm, tej tuabneeg ua phem rua nwg lawv le puab lub sab xaav ua, hab lawv le Vaajtswv txujlug sau tseg has tas, puab yuav ua le ntawd rua nwg.”

¹⁴Thaus Yexus hab peb tug thwjtim rov lug txug ntawm Yexus cov thwjtim, puab pum muaj tuabneeg coob coob tuaj nyob puagncig cov thwjtim, hab muaj cov xwbfwb kws qha Vaajtswv txuj Kevcai qee leej taabtom nrug cov thwjtim sis caav.

¹⁵Thaus cov tuabneeg ntawd pum dlheev Yexus, puab xaav tsi thoob le, ces suavdlawg txawm dlha zum zawg moog rua ntawm Yexus hab hawm nwg.

¹⁶Yexus nug nwg cov thwjtim has tas, “Mej nrug puab sis caav txug dlaabtsi?”

¹⁷Muaj ib tug txivneej ntawm cov tuabneeg coob coob ntawd teb has tas, “Xwbfwb, kuv coj kuv tug mivtub tuaj thov koj paab khu, rua qhov nwg raug dlaab hab has tsi tau lug.

¹⁸Txhua zag kws dlaab tuaj, dlaab ua rua nwg qaug rua huv aav, nwg npuag ncauj tawm plawg, nwg zum nav nrov pis qawj hab nwg ib ce txhaav taag. Kuv thov koj cov thwjtim ntab dlaab tawm, tabsis puab ntab tsi tau.”

¹⁹Yexus has rua puab tas, “Ua le caag mej cov tuabneeg tam nuav pheej tsi ntseeg hlo le! Kuv tseem yuav nrug mej nyob ntev le caag hab? Hab kuv tseem yuav ua sab ntev rua mej moog txug thaus twg? Ca le coj tug mivtub lug rua kuv!”

²⁰Puab txawm coj tug mivtub lug rua Yexus. Thaus dlaab pum dlheev Yexus, dlaab txawm ua rua tug mivtub ntawd fuam ib thaaj, qaug kag rua huv aav nti moog nti lug, hab npuag ncauj nto plawg.

²¹Yexus nug tug mivtub ntawd leej txiv has tas, “Nwg ua le nuav tau hov ntev lug lawm?” Leej txiv teb has tas, “Nwg tub ua le nuav thaus miv miv lug lawm.

²²Muaj ntau zag dlaab ua rua nwg qaug rua huv qhovcub hab rua huv dlej kuas nwg tuag. Yog koj paab tau, thov koj hlub hab paab wb ob txiv tub!”

²³Yexus has rua tug mivtub ntawd leej txiv tas, “Ua le caag koj has tas, ‘Yog koj paab tau!’ Yog leejtwg ntseeg, kuv yeej ua tau txhua yaam huv tuabsi.”

²⁴Taamsim ntawd tug mivtub leej txiv has tas, “Kuv ntseeg, tabsis tsi txaus, thov koj paab kuas kuv muaj kev ntseeg ntxiv!”

²⁵Thaus Yexus pum cov tuabneeg coob coob txaav lug ze quas zug, Yexus txawm has rua tug dlaab ntawd tas, “Ua le caag koj ua rua tug mivtub nuav laag ntseg hab has tsi tau lug? Kuv has rua koj tas, koj ca le tawm huv tug mivtub nuav moog, tsi xob rov qaab lug rua huv nwg ib zag le lawm!”

²⁶Dlaab qw nrov nrov hab ua rua tug mivtub fuam ib thaaj heev heev, ces tug dlaab txawm tawm plawg lawm. Tug mivtub ntawd zoo le ib tug tuabneeg tuag, suavdlawg txawm has zum zawg tas, “Nwg tuag lawm!”

²⁷Tabsis Yexus cev teg moog tuav nkaus tug mivtub txhais teg hab nqug nwg sawv, ces nwg txawm sawv tseeg sawv ntsug.

²⁸Thaus Yexus moog rua huv tsev lawm, nwg cov thwjtim nug nwg tuabywv has tas, “Vim le caag peb ntab tsi tau tug dlaab ntawd tawm?”

²⁹Yexus teb has tas, “Yaam dlaab nuav, yug yuavtsum thov Vaajtswv txhaj ntab tau tawm.”

³⁰Yexus hab nwg cov thwjtim tawm qhov ntawd hlaa dlhau plawg Kalilais moog. Yexus tsi xaav pub leejtwg paub has tas, nwg nyob qhov twg,

³¹rua qhov nwg taabtom qha rua nwg cov thwjtim has tas, “Yuav muaj tuabneeg muab Tuabneeg Leej Tub coj moog rua luas tua, tabsis tom qaab ntawd peb nub nwg yuav sawv huv qhov tuag rov qaab lug.”

³²Cov thwjtim tsi totaub lub ntsab lug kws Yexus qha, tabsis puab ntshai nug nwg.

³³Yexus hab nwg cov thwjtim moog txug huv lub nroog Kapena-us, hab moog rua huv tsev, Yexus txawm nug cov thwjtim has tas, “Puastaab thaus peb taug kev tuaj, mej pheej sis caav has txug dlaabtsi?”

³⁴Tabsis puab tsi teb Yexus le, rua qhov thaus taug kev tuaj, puab sis caav has txug qhov kws leejtwg yuav tau ua tug luj dlua.

³⁵Thaus Yexus nyob quastsawg lawm, nwg hu nwg kaum ob tug thwjtim lug cuag nwg hab nwg has rua puab tas, “Yog leejtwg xaav ua tug thawj, tug ntawd yuavtsum nyob tom tw, hab ua suavdlawg qhev.”

³⁶Yexus moog coj ib tug mivnyuas yau lug sawv ntawm cov thwjtim xubndlag. Yexus puag tug mivnyuas yau ntawd hab has rua cov thwjtim tas,

³⁷“Tug kws leeg yuav cov mivnyuas yau nuav ib tug ntawm kuv lub npe, kuj yog tug ntawd leeg yuav kuv; hab leejtwg leeg yuav kuv, tsi yog nwg leeg yuav kuv tuab leeg xwb, tabsis yog nwg leeg yuav tug kws khaiv kuv lug hab.”

³⁸Yauhaas has rua Yexus has tas, “Xwbfwb, peb pum ib tug txivneej tuav koj lub npe ntab dlaab, peb txwv tsi pub nwg ua le ntawd, rua qhov nwg tsi yog peb cov.”

³⁹Yexus has rua puab tas, “Tsi xob txwv nwg, leejtwg tuav kuv lub npe ua tej txujci tseemceeb, tom qaab ntawd nwg yeej yuav tsi thuam kuv.”

⁴⁰Tug kws tsi tawmtsaam peb, tug ntawd yog peb cov.

⁴¹Kuv qha tseeb rua mej has tas, tug kws muab ib khob dlej rua mej haus, vim nwg paub has tas, mej yog kuv cov thwjtim, ces nwg yeej yuav tau nqe zug.

⁴²“Yog leejtwg ua rua cov mivnyuas kws ntseeg kuv nuav ib tug ua txhum, ca le muab hlua khi ib txhib zeb kws luj dlai rua tug ntawm cejdlaab, hab coj nwg moog pov rua huv havtxwv yuav zoo dlua.

⁴³Yog koj txhais teg ua rua koj ua txhum, ca le muab koj txhais teg ntawd txav povtseg! Koj muaj ib saab teg xwb, koj tau txujsa, zoo dlua le koj muaj ob saab teg, koj poob moog rua huv ntuj tawg qhov kws muaj suavtawg cig tsi paub tuag le.

⁴⁴Qhov ntawd, tej kaas kws noj puab ntawd tsi txawj tuag, hab suavtawg yuav cig moog ibtxhis le.

⁴⁵Hab yog koj ib txhais kutaw ua rua koj ua txhum, ca le muab koj txhais kutaw ntawd txav povtseg! Koj tu ib saab kutaw, koj tau txujsa, zoo dlua le koj muaj ob txhais kutaw, koj poob moog rua huv ntuj tawg.

⁴⁶Qhov ntawd tej kaas kws noj puab ntawd tsi txawj tuag, hab suavtawg yuav cig moog ibtxhis le.

⁴⁷Hab yog koj ib saab qhovmuag ua rua koj ua txhum, ca le muab koj saab qhovmuag ntawd kaus povtseg! Koj muaj ib saab qhovmuag xwb, koj tau moog Vaajtswv lub Tebchaws, zoo dlua le ca koj muaj ob saab qhovmuag, koj poob moog rua huv ntuj tawg.

⁴⁸“Qhov ntawd ‘tej kaas kws noj puab ntawd tsi txawj tuag, hab suavtawg yuav cig moog ibtxhis le.’

⁴⁹“Vaajtswv yuav muab suavtawg hlawv txhua tug kuas huv ib yaam le cov nqaj kws muab ntsev laag yuav coj moog fij.

⁵⁰“Ntsev yog yaam kws zoo, tabsis yog ntsev tsuag lawm, mej yuav ua le caag kuas rov qaab ntsev tau? “Mej yuavtsum ua le cov ntsev kws zoo, hab mej yuavtsum nyob sis hum.”