Read Hmong Njua Lukas 1 Bible Online

Lukas 1 - Hmong Njua bible

Lukas 1

¹The-aufilaus, muaj ntau leej tau sau qha tej kws tub muaj huv peb lawm,

²lawv le kws muaj qee leej pum tej ntawd thaus nyavnyuas pib muaj lug, puab yog cov kws qha Txujmoo Zoo hab qha tej ntawd rua peb paub.

³Kuv tub ua tuab zoo saib tej ntawd txhij txhua thaus hauvpaug lug lawm. Yog le ntawd, The-aufilaus, koj yog tug kws paub qaabhau, kuv txhaj sau tej ntawd txhua zaaj, txij thaus hauvpaug moog txug thaus kawg rua koj paub.

⁴Koj txhaj yuav paub tseeb txhua zaaj kws puab qha rua koj lawm.

⁵Lub sijhawm kws Helauj ua vaajntxwv kaav lub xeev Yudas, muaj ib tug povthawj hu ua Xakhaliyas, nwg yog Anpiyas paab povthawj. Nwg tug quaspuj hu ua Elixanpes. Elixanpes yog Aloos ib tug xeebntxwv.

⁶Vaajtswv pum has tas obtug yog tuabneeg ncaaj nceeg, noog Vaajtswv lug hab ua lawv le Vaajtswv txuj kevcai txhua nqai, tsi muaj ib qho kws luas yuav thuam tau obtug.

⁷Obtug tsi muaj mivnyuas, rua qhov Elixanpes yeej ibtxwm xeeb tsi taug tub, hab obtug tub laug laug lawm.

⁸Muaj ib nub Xakhaliyas taabtom ua nwg teg num huv lub Tuamtsev lawv le cov povthawj naj nub ua.

⁹Lawv le cov povthawj txuj kevcai, puab rhu ntawv tau Xakhaliyas moog hlawv moov tshuaj tsw qaab rua sau lub thaaj huv lub Tuamtsev.

¹⁰Yog le ntawd, nwg txhaj moog rua huv tug Tswv lub Tuamtsev, lub sijhawm kws Xakhaliyas hlawv moov tshuaj tsw qaab, cov tuabneeg nyob saab nrau thov Vaajtswv.

¹¹Tug Tswv ib tug timtswv lug sawv ntawm lub thaaj kws hlawv moov tshuaj tsw qaab saab xis.

¹²Thaus Xakhaliyas pum dlheev tug timtswv ntawd, nwg poob sab hab ntshai kawg le.

¹³Tabsis tug timtswv has rua Xakhaliyas has tas, “Koj tsi xob ntshai! Vaajtswv tub nov koj tej lug thov lawm. Koj tug quaspuj yuav yug ib tug mivtub rua koj. Koj yuav tis nwg lub npe hu ua Yauhaas.

¹⁴Thaus yug tau tug mivtub ntawd, koj yuav zoo sab kawg le, hab yuav muaj tuabneeg coob coob nrug koj zoo sab, rua qhov tug Tswv suav has tas,

¹⁵nwg yog ib tug tuabneeg tseemceeb. Nwg yuav tsi haus cawv txiv maab lossis cawv ntxws hlo le. Nwg yuav puv npo Vaaj Ntsujplig tug Dlawbhuv huv nruab thab lug,

¹⁶nwg yuav coj cov Yixalayees coob leej rov lug cuag tug Tswv kws yog puab tug Vaajtswv.

¹⁷Nwg yuav muaj tswvyim hab muaj fwjchim ib yaam le Eliyas tug kws cev Vaajtswv lug, nwg yuav ua tug Tswv ntej moog ua kuas tej txiv tub rov sis hum; nwg yuav ua kuas cov tuabneeg kws tawv ncauj hloov ua tuabneeg ncaaj nceeg; hab nwg yuav npaaj ib cov tuabneeg rua tug Tswv.”

¹⁸Xakhaliyas nug tug timtswv ntawd has tas, “Yuav ua le caag kuv txhaj paub tej kws koj has ko? Kuv tub laug heev, hab kuv tug quaspuj los tub laug laug lawm.”

¹⁹Tug timtswv teb has tas, “Kuv yog Khali-ees, kuv nyob ntawm Vaajtswv xubndlag, Vaajtswv khaiv kuv lug qha txuj xuv zoo nuav rua koj.

²⁰Thaus txug lub sijhawm lawm yeej yuav muaj lawv le kuv has nuav tag, tabsis vim koj tsi ntseeg kuv tej lug, koj yuav has tsi tau lug moog txug nub kws muaj lawv le tej kws kuv tub has rua koj lawm.”

²¹Thaus ntawd cov tuabneeg kws nyob saab nrau tog Xakhaliyas, puab xaav tsi thoob sov yog ua le caag Xakhaliyas yuav nyob huv lub Tuamtsev ntev ua luaj le.

²²Thaus nwg tawm lug, nwg txawm has tsi tau lug rua puab le, nwg ua ruag pav rua puab xwb. Puab xaav has tas tej zag yog muaj ib yaam dlaabtsi tshwm lug rua nwg pum huv lub Tuamtsev.

²³Thaus Xakhaliyas ua num huv lub Tuamtsev taag lawm, nwg rov qaab moog tsev.

²⁴Tom qaab ntawd tsi ntev, Elixanpes kws yog Xakhaliyas tug quaspuj txawm xeeb tub, Elixanpes nyob huv tsev tau tsib lub hlis, nwg tsi tawm moog qhov twg le.

²⁵Elixanpes has tas, “Nwgnuav tug Tswv paab kuv hab nwg ua rua kuv tsi txaajmuag rua leejtwg le lawm!”

²⁶Thaus Elixanpes xeeb tub tau rau lub hlis lawm, Vaajtswv khaiv nwg tug timtswv Khali-ees lug rua huv lub nroog Naxales kws nyob huv lub xeev Kalilais.

²⁷Tug timtswv ntawd lug cuag ib tug nkaujxwb hu ua Malis, tug kws Yauxej kws yog Vaajntxwv Daviv tug xeebntxwv tub qhab tseg lawm.

²⁸Tug timtswv lug has rua Malis has tas, “Koj yuav tau zoo nyob kaaj sab lug! Tug Tswv nrug nraim koj nyob hab foom koob moov ntau kawg rua koj lawm!”

²⁹Thaus Malis nov tug timtswv has le ntawd, nwg nyuaj sab heev, nwg xaav tsi thoob le, sov tug timtswv has le ntawd, yog has txug dlaabtsi.

³⁰Tug timtswv has rua Malis has tas, “Malis, koj tsi xob ntshai, Vaajtswv tub foom koob moov rua koj lawm.

³¹Koj yuav xeeb tub hab yuav yug tau ib tug mivtub, koj yuav tis nwg lub npe hu ua Yexus.

³²Nwg yuav ua tug tseemceeb, hab suavdlawg yuav hu nwg lub npe has tas, nwg yog Vaajtswv tug kws muaj Fwjchim Luj kawg nkaus tug Tub. Tug Tswv kws yog Vaajtswv yuav tsaa nwg ua vaajntxwv, ib yaam le nwg yawmkoob Daviv,

³³nwg yuav ua vaajntxwv kaav Yakhauj cov xeebntxwv moog ibtxhis; hab nwg lub tebchaws yuav nyob moog tsi paub kawg le!”

³⁴Malis nug tug timtswv has tas, “Kuv yog ib tug nkaujxwb, yuav ua le caag muaj tau le ntawd?”

³⁵Tug timtswv teb has tas, “Vaaj Ntsujplig tug Dlawbhuv yuav lug rua sau koj, hab Vaajtswv lub fwjchim yuav roog koj. Vim le nuav suavdlawg txhaj yuav hu tug mivtub kws dlawbhuv kws yuav yug lug ntawd has tas, nwg yog Vaajtswv tug Tub.

³⁶Koj saib koj tug pujnyaaj Elixanpes kws suavdlawg has tas, nwg ibtxwm xeeb tsi taug tub, txawm yog nwg laug laug lawm los nwgnuav nwg tub xeeb tub tau rau lub hlis lawm,

³⁷rua qhov yeej tsi muaj ib yaam dlaabtsi kws Vaajtswv yuav ua tsi tau le.”

³⁸Malis has tas, “Kuv yog Vaajtswv tug ntxhais qhev, thov kuas muaj lawv le koj has ko rua kuv.” Ces tug timtswv txawm ncaim Malis moog lawm.

³⁹Tsi ntev tom qaab ntawd, Malis txawm sawv kev hab rau sab ntso moog txug ntawm ib lub nroog kws nyob sau laaj roob huv lub xeev Yudas,

⁴⁰nwg moog rua huv Xakhaliyas tsev hab has noj qaab nyob zoo rua Elixanpes.

⁴¹Thaus Elixanpes nov dlheev Malis lub suab has rua nwg, ces nwg tug mivnyuas huv plaab txawm nti cuag dlaabtsi. Hab Elixanpes puv npo Vaaj Ntsujplig tug Dlawbhuv,

⁴²hab Elixanpes has nrov nrov rua Malis has tas, “Koj yog tug kws tau koob moov ntau tshaaj plawg txhua tug quaspuj huv tuabsi, hab koj tug mivnyuas huv plaab los tau koob moov hab.

⁴³Vim le caag kuv yuav tau txais txujkev hlub luj npaum le nuav, kuv tug Tswv leej nam tseem tuaj saib kuv hab?

⁴⁴Thaus kuv nov dlheev tej lug kws koj has rua kuv, kuv tug mivnyuas kws nyob huv kuv plaab zoo sab hab nti cuag dlaabtsi.

⁴⁵Koj yuav zoo sab heev, rua qhov koj tub ntseeg has tas, yuav muaj lawv le tej lug kws tug Tswv has rua koj lawm!”

⁴⁶Malis has tas, “Kuv lub sab ca le qhuas tug Tswv;

⁴⁷Vaajtswv kws yog kuv tug Cawmseej, nwg ua rua kuv zoo sab kawg le.

⁴⁸Rua qhov kuv yog nwg ib tug ntxhais qhev kws tsi tseemceeb los nwg tseem ncu txug kuv hab! Txij nuav moog txhua tsaav tuabneeg yuav hu kuv has tas tug kws tau koob moov,

⁴⁹vim tej kws Vaajtswv tug kws muaj Fwjchim Luj kawg nkaus tau ua rua kuv lawm. Nwg lub npe dlawbhuv kawg nkaus;

⁵⁰Vaajtswv hlub txhua tug kws fwm nwg ib tam dlhau ib tam.

⁵¹Nwg tsaa nwg txhais teg kws muaj fwjchim ua kuas cov tuabneeg kws khaavtheeb tsi sis hum hab tawg paab tawg pawg.

⁵²Vaajtswv muab cov vaajntxwv kws muaj fwjchim txu ntawm puab lub zwmtxwv, hab Vaajtswv muab cov tuabneeg kws tsi muaj fwjchim tsaa rua qhov chaw sab.

⁵³Vaajtswv pub tej zaub mov zoo rua cov tuabneeg kws tshaib nqhes tau noj tsau npo. Nwg ntab cov tuabneeg npluanuj tsiv moog teg dlawb teg nplag.

⁵⁴Nwg ua lawv le nwg tau coglug tseg rua peb cov yawmkoob lawm, hab nwg tau lug paab cov tuabneeg Yixalayees kws yog nwg cov tubkhai.

⁵⁵Nwg ncu ntsoov hlub Anplahaas hab Anplahaas cov xeebntxwv moog ibtxhis le!”

⁵⁶Malis nrug Elixanpes nyob yuav laug tau peb lub hlis, nwg maam le rov moog tsev.

⁵⁷Thaus txug caij kws Elixanpes yug mivnyuas, nwg yug tau ib tug mivtub.

⁵⁸Nwg cov kwvtij neejtsaa hab tej tuabneeg zej zog nov has tas, tug Tswv foom koob moov rua nwg lawm, puab nrug nwg zoo sab kawg le.

⁵⁹Thaus tug mivnyuas ntawd muaj yim nub lawm, puab tuaj muab nwg ua kevcai txav tawv, hab puab yuav tis nwg lub npe hu ua Xakhaliyas lawv le nwg txiv.

⁶⁰Tabsis Elixanpes teb has tas, “Tsi yog le ntawd! Yuavtsum tis nwg lub npe hu ua Yauhaas.”

⁶¹Puab has rua Elixanpes has tas, “Koj tub tsi muaj ib tug kwvtij npe hu le ntawd los sav!”

⁶²Puab txawm ua ruag pav rua tug mivtub leej txiv nug saib nwg nyam tis tug mivtub ntawd lub npe hu le caag.

⁶³Xakhaliyas kuas puab muab ib dlaim ntawv lug rua nwg, hab nwg sau has tas, “Tug mivtub nuav lub npe hu ua Yauhaas.” Puab xaav tsi thoob le!

⁶⁴Taamsim ntawd Xakhaliyas txawm rov has tau lug, hab nwg ua Vaajtswv tsaug.

⁶⁵Tej tuabneeg zej zog ntshai kawg le, hab zaaj ntawd txawm nrov nchaa moog thoob plawg tej zej zog kws nyob peg tej laaj roob huv lub xeev Yudas.

⁶⁶Cov tuabneeg kws nov zaaj nuav txawm khaws zaaj nuav ca rua nruab sab hab puab sis thaam has tas, “Tug mivnyuas nuav luj hlub lug nwg yuav ua dlaabtsi?” Rua qhov Vaajtswv lub fwjchim nrug nraim tug mivnyuas nuav.

⁶⁷Xakhaliyas kws yog Yauhaas txiv puv npo Vaaj Ntsujplig tug Dlawbhuv, hab nwg qha ib zaaj kws yuav muaj lug yaav tom ntej has tas:

⁶⁸“Peb ca le ua tug Tswv kws yog cov Yixalayees tug Vaajtswv tsaug! Rua qhov nwg lug paab nwg tsaav tuabneeg hab nwg tub tso puab dlim lawm.

⁶⁹Vaajtswv khaiv ib tug Cawmseej kws muaj fwjchim lug paab peb. Nwg yog Vaajtswv tug tubkhai Daviv ib tug xeebntxwv.

⁷⁰Lawv le Vaajtswv tau coglug tseg rua cov cev Vaajtswv lug kws dlawbhuv thaus u lug lawm has tas,

⁷¹nwg yuav cawm kuas peb dlim ntawm peb cov yeebncuab txhais teg. Hab dlim ntawm txhua tug kws ntxub peb.

⁷²Vaajtswv has tas, nwg yuav hlub peb cov yawmkoob hab yuav ncu ntsoov tej lug tseemceeb kws nwg tau cog tseg lawm.

⁷³Nwg coglug tseeb tseg rua peb yawmkoob Anplahaas has tas nwg yuav paab kuas peb dlim ntawm peb cov yeebncuab txhais teg, hab yuav paab kuas peb muaj sab tawv ua tau nwg teg num tsi ntshai le,

⁷⁴

⁷⁵kuas peb ua tau tuabneeg zoo hab ncaaj nceeg lawv le Vaajtswv lub sab nyam moog taag peb tam neej.

⁷⁶“Kuv tug Mivtub, suavdlawg yuav hu koj has tas, koj yog ib tug cev Vaajtswv tug kws muaj Fwjchim Luj kawg nkaus lug. Koj yuav ua tug Tswv ntej moog khu kev tog nwg,

⁷⁷Hab qha rua Vaajtswv tsaav tuabneeg, kuas puab paub has tas, Vaajtswv yuav zaam puab lub txim kuas puab dlim.

⁷⁸Rua qhov peb tug Vaajtswv yog tug kws hlub peb kawg nkaus. Nwg txujkev cawm dlim ci tuaj rua peb ib yaam le tug dluab tshaav ntuj ci thaus sawv ntxuv,

⁷⁹hab yuav ci moog rua txhua tug kws nyob huv qhov tsaus ntuj kws yog txujkev tuag, txhaj yuav coj tau peb moog taug txujkev kws peb yuav tau nyob kaaj sab lug.”

⁸⁰Tug mivtub ntawd luj hlub zoo hab nwg muaj tswvyim heev zuj zug, hab nwg nyob tom roob mojsaab qhua moog txug nub kws nwg tawm lug rua cov Yixalayees pum.