Read Hmong Njua Lukas 10 Bible Online

Lukas 10 - Hmong Njua bible

Lukas 10

¹Tom qaab ntawd tug Tswv xaiv dlua xyaa caum ob leeg, hab khaiv puab ob leeg moog ib qho, ua Yexus ntej moog rua txhua lub nroog hab txhua lub zog kws Yexus yuav moog.

²Yexus has rua puab tas, “Cov nplej kws zoo hlais lawm muaj ntau, tabsis cov tuabneeg kws hlais muaj tsawg. Mej ca le thov tug tswv teb kuas nwg khaiv dlua ib cov tuabneeg moog paab hlais nwg cov nplej.

³Mej ca le moog! Kuv khaiv mej moog ib yaam le paab yaaj kws yuav moog rua huv paab maa.

⁴Mej tsi xob nqaa naab nyaj lossis naab thoobpuab lossis khau; Yog mej ntsib leejtwg ntawm kev, mej tsi xob nrug tug ntawd thaam.

⁵Thaus mej moog rua huv leejtwg tsev, mej yuavtsum xub has tas, ‘Thov Vaajtswv foom koob moov rua mej.’

⁶Yog tsev tuabneeg ntawd muaj ib tug xaav tau Vaajtswv txuj koob moov, ces tug ntawd yuav tau lawv le kws mej has. Tabsis yog tsi muaj tug kws xaav tau Vaajtswv txuj koob moov, ces lu lug koob moov ntawd yuav rov lug rua ntawm mej.

⁷Mej ca le nyob huv lub tsev ntawd, puab pub rua mej noj hab haus le caag, Mej ca le noj hab haus le ntawd. Rua qhov yeej tsimnyog tug kws ua num tau nqe zug. Tsi xob tawm huv lub tsev ntawd moog pw dlua lwm lub tsev.

⁸Thaus mej moog txug lub nroog twg, yog cov tuabneeg ntawd pub mej su, tej zaub mov kws puab ua rua mej noj, mej ca le noj,

⁹mej ca le khu tej tuabneeg kws muaj mob huv lub nroog ntawd, hab qha rua puab paub has tas, ‘Vaajtswv lub Tebchaws tub lug ze mej lawm.’

¹⁰Tabsis thaus mej moog txug huv lub nroog twg, yog cov tuabneeg ntawd tsi pub mej su, mej ca le moog rua tom tej kev hab qha has tas,

¹¹‘Txawm yog tej nyuas plauv aav huv mej lub nroog kws lu peb kutaw los peb yuav so huv tuabsi, kuas mej paub has tas mej yuav raug kev puamtsuaj. Tabsis kuas mej ncu ntsoov has tas Vaajtswv lub Tebchaws tub lug ze mej lawm!’

¹²Kuv has tseeb rua mej has tas, Nub kws Vaajtswv Txav Txim, nwg yuav rau txim rua lub nroog ntawd nyaav dlua le nwg rau txim rua lub nroog Xaudoos!

¹³“Lub nroog Khaulaxis, koj yuav raug kev puamtsuaj! lub nroog Npexaidas, koj yuav raug kev puamtsuaj! Tej txujci tseemceeb kws luas tub ua rua meb pum lawm, yog ua tej ntawd rua huv lub nroog Tiles hab lub nroog Xidoos, ces cov tuabneeg kws nyob huv ob lub nroog ntawd, tub xub muab naab tsaaj lug npua, nyob huv qhov tshauv hab tsuab tshauv lug nphoo rua ib ce ntxuv lug lawm. Puab ua le ntawd, kuas suavdlawg paub has tas, puab tub tso puab tej kev txhum tseg lawm!

¹⁴Nub kws Vaajtswv txav txim, nwg yuav rau txim rua meb nyaav dlua le kws nwg rau txim rua lub nroog Tiles hab lub nroog Xidoos.

¹⁵Lub nroog Kapena-us, koj yuav tsaav koj lub fwjchim kuas moog txij ntuj los? Kuv yuav muab koj pov moog rua huv ntuj tawg!”

¹⁶Yexus has rua nwg cov thwjtim has tas, “Tug kws noog mej lug, tug ntawd yeej noog kuv lug. Tug kws tsi leeg paub mej, tug ntawd yeej tsi leeg paub kuv; hab tug kws tsi leeg paub kuv, tug ntawd yeej tsi leeg paub tug kws khaiv kuv lug.”

¹⁷Thaus xyaa caum ob leeg thwjtim rov qaab lug, puab zoo sab kawg le. Puab has rua Yexus has tas, “Tug Tswv, thaus peb tuav koj lub npe ntab dlaab, dlaab kuj noog peb lug hab!”

¹⁸Yexus teb puab has tas, “Kuv pum dlaab Ntxwgnyoog poob sau ntuj lug ib yaam le tsaglig xub laim.

¹⁹Mej ua tuab zoo noog! Kuv tub pub fwjchim rua mej lawm, mej yuav tsuj tau naab hab raubris teb, hab mej yuav muaj fwjchim kovyeej dlaab Ntxwgnyoog, hab yuav tsi muaj dlaabtsi ua rua mej raug mob.

²⁰Tabsis mej tsi xob zoo sab rua qhov kws dlaab noog mej lug ntawd; mej ca le zoo sab rua qhov kws Vaajtswv tub sau mej lub npe ca rua sau ntuj ceebtsheej lawm.”

²¹Thaus ntawd Vaaj Ntsujplig tug Dlawbhuv ua rua Yexus zoo sab kawg le, Yexus has tas, “Kuv Txiv, koj yog tug kws kaav lub ntuj hab lub nplajteb nuav! Kuv ua koj tsaug, rua qhov koj tub muab tej nuav zais ca tsi qha rua cov tuabneeg kws muaj tswvyim hab txawj ntse paub, tabsis koj qha tej ntawd rua cov tuabneeg kws tsi txawj tsi ntse paub xwb. Txiv, koj yeej pum zoo ua le ntawd.

²²“Kuv Txiv tub muab ib puas tsaav yaam rua kuv lawm. Tsi muaj leejtwg paub leej Tub, tsuas yog leej Txiv txhaj paub xwb, hab tsi muaj leejtwg paub leej Txiv, tsuas yog leej Tub txhaj paub xwb, tsuas yog leej Tub hab cov kws leej Tub pum zoo qha rua txhaj paub xwb.”

²³Yexus txawm tig moog has tuabywv rua cov thwjtim has tas, “Tej kws mej pum nuav, yog mej muaj moo kawg, mej txhaj pum!

²⁴Kuv qha rua mej has tas, ‘Cov kws cev Vaajtswv lug hab cov vaajntxwv ntau leej xaav pum tej kws mej pum, tabsis puab tsi pum, puab xaav nov tej kws mej nov, tabsis puab tsi tau nov.’ ”

²⁵Muaj ib tug xwbfwb qha Vaajtswv txuj Kevcai tuaj nrug Yexus thaam, hab sim saib Yexus yuav teb le caag. Nwg nug Yexus has tas, “Xwbfwb, kuv yuav ua le caag, kuv txhaj tau txujsa ntev dlhawv moog ibtxhis tsi kawg?”

²⁶Yexus teb nwg has tas, “Vaajtswv Txujlug qha le caag? Tej kws koj nyeem ntawd koj totaub le caag?”

²⁷Tug txivneej ntawd teb has tas, “Hlub tug Tswv kws yog koj tug Vaajtswv kuas kawg sab kawg ntsws, kawg plaab kawg plawv, hab kawg tug dlaag tug zug. ‘Hab hlub koj tej kwvtij zej zog ib yaam le yug hlub yug lub cev.’ ”

²⁸Yexus teb has tas, “Yog le koj has lawm; koj ca le ua le ntawd, koj txhaj yuav tau txujsa.”

²⁹Tabsis tug xwbfwb kws qha Vaajtswv Kevcai khaav has tas, nwg yog tuabneeg ncaaj nceeg, nwg txhaj nug Yexus has tas, “Tug twg txhaj yog kuv tej kwvtij zej zog?”

³⁰Yexus teb has tas, “Muaj ib tug txivneej taug kev ntawm lub nroog Yeluxalees moog rua nraag lub nroog Yelikaus, thaus nwg moog txug ib tog kev, txawm muaj ib paab tubsaab muab nwg tej rig tsho lwg taag, hab muab nwg ntaus yuav laug tuag tso rua ntawm kev.

³¹Ces muaj ib tug povthawj taug txujkev ntawd tuaj, thaus nwg pum tug ntawd, nwg txawm tshuv kev dlub muag txig moog lawm.

³²Tom qaab ntawd muaj ib tug Levis taug kev tuaj txug ntawd hab, nwg moog saib tug ntawd ib muag, nwg txawm tshuv kev dlub muag txig moog lawm hab.

³³Tabsis muaj ib tug tuabneeg Xamalis taug kev tuaj txug ntawd, thaus nwg pum tug kws tubsaab ntaus, nwg hlub tug ntawd heev.

³⁴Nwg txaav zog moog saib, nwg muab roj hab muab cawv txiv maab laub rua tug mob ntawd tej qhov txhaab hab muab ntaub qhwv; nwg tsaws tug mob ntawd caij nwg tug neeg luav, nwg coj tug mob moog pw tom ib lub tsev su, hab tu tug mob ntawd.

³⁵Thaus kaaj ntug tug tuabneeg Xamalis muab tau ob lub nyaj rua tug tswv tsev ntawd hab has tas, ‘Thov koj paab tu tug tuabneeg mob nuav, yog koj siv tshaaj ob lub nyaj nuav, thaus kuv rov qaab lug, kuv maam le ntxiv rua koj.’ ”

³⁶Yexus nug has tas, “Koj sim xaav saib, peb tug nuav, tug twg yog tug kws tubsaab ntaus ntawd tug kwvtij?”

³⁷Tug xwbfwb kws qha Vaajtswv txuj Kevcai teb has tas, “Tub yog tug kws hlub tug kws tubsaab ntaus ntawd ntaag.” Yexus has rua nwg tas, “Koj ca le moog ua ib yaam le ntawd.”

³⁸Thaus Yexus hab nwg cov thwjtim moog txug huv ib lub zog, muaj ib tug quaspuj hu ua Mathas, txawm hu Yexus moog su huv nwg tsev.

³⁹Mathas muaj ib tug nam hluas hu ua Malis, Malis lug nyob ntawm Yexus kutaw hab noog Yexus qha.

⁴⁰Mathas ntxhuv sab rua tej num ntau kws nwg kov tsi yeej, nwg lug has rua Yexus has tas, “Tug Tswv, koj tsi paub has tas kuv tug nam hluas ca kuv tuab leeg ua num xwb los? koj has kuas nwg ca le lug paab kuv ua num!”

⁴¹Tug Tswv teb has tas, “Mathas, Mathas! Koj txhawj hab ntxhuv sab rua ntau yaam num kawg le,

⁴²tabsis tsuas muaj ib yaam zoo xwb. Malis tub xaiv yaam zoo ntawd lawm, tsi muaj leejtwg yuav txeeb tau yaam kws nwg muaj ntawd moog le.”