Read Hmong Njua Lukas 11 Bible Online

Lukas 11 - Hmong Njua bible

Lukas 11

¹Muaj ib zag Yexus moog thov Vaajtswv ntawm ib qhov chaw. Thaus nwg thov Vaajtswv taag lawm, nwg ib tug thwjtim lug has rua nwg tas, “Tug Tswv, thov koj qha kuas peb paub thov Vaajtswv ib yaam le Yauhaas qha nwg cov thwjtim lawm.”

²Yexus has rua nwg cov thwjtim has tas, “Thaus mej thov Vaajtswv, mej has le nuav: Leej Txiv: ‘Thov kuas suavdlawg fwm koj lub npe; thov koj lug kaav tuabneeg lub sab.

³Thov koj naj nub pub mov rua peb noj.

⁴Thov koj zaam txim rua peb, rua qhov peb tub zaam txim rua txhua tug kws ua txhum rua peb lawm. Thov tsi xob ca tej kev sim sab ntxag tau peb.’ ”

⁵Hab Yexus has rua nwg cov thwjtim has tas, “Thaus ib taag mo, yog mej cov muaj ib tug moog rua tom nwg tug phoojywg tsev hab thov has tas, ‘Phoojywg, thov txais koj peb lub ncuav rua kuv.

⁶Rua qhov kuv tug phoojywg dlua kev tuaj su huv kuv tsev, kuv tsi muaj mov rua nwg noj!’

⁷Yog tug phoojywg kws nyob huv tsev teb has tas, ‘Tsi xob tuaj txob kuv! Kuv tub laag qhovrooj, kuv hab kuv cov mivnyuas tub pw taag lawm. Kuv yuav tsi sawv moog muab mov rua koj.’

⁸Yog le ntawd, kuv qha rua mej has tas, txawm yog obtug yog phoojywg zoo npaum le caag los nwg yuav tsi sawv moog muab mov rua nwg tug phoojywg, tabsis vim qhov kws nwg tug phoojywg pheej thov tsi paub txaajmuag le. Nwg yuav tau moog muab tej kws nwg tug phoojywg xaav tau rua tug phoojywg.

⁹Yog le ntawd, kuv qha rua mej has tas: Mej thov, mej txhaj yuav tau; mej nrhav, mej txhaj yuav ntsib; hab mej khob, luas txhaj yuav qheb qhovrooj rua mej.

¹⁰Rua qhov txhua tug kws thov, yeej yuav tau, txhua tug kws nrhav yeej yuav ntsib, hab txhua tug kws khob, luas yeej yuav qheb qhovrooj rua nwg.

¹¹Mej cov kws yog leej txiv, yog mej tej mivnyuas thov ntseg, mej yuav muab naab rua los?

¹²Lossis mej tej mivnyuas thov qai, mej yuav muab raubris teb rua los?

¹³Txawm yog mej yog tuabneeg txhum los mej tseem paub muab yaam zoo rua mej tej mivnyuas. Yog le ntawd, mej leej Txiv tug kws nyob sau ntuj ceebtsheej, nwg yimfuab yuav muab Vaaj Ntsujplig tug Dlawbhuv rua txhua tug kws thov nwg!”

¹⁴Yexus ntab tug dlaab kws ua rua ib tug txivneej has tsi tau lug tawm lawm; tug txivneej ntawd txawm rov has tau lug. Cov tuabneeg coob coob kws nyob ntawd xaav tsi thoob le.

¹⁵Tabsis muaj qee leej xaav has tas, “Yog Npexenpus kws yog dlaab tug thawj pub fwjchim rua nwg, nwg txhaj ntab tau dlaab.”

¹⁶Muaj qee leej xaav sim Yexus, puab txawm kuas Yexus ua ib yaam txujci tseemceeb rua suavdlawg saib has tas, nwg yog tug kws Vaajtswv khaiv lug.

¹⁷Yexus tub paub tej kws puab xaav, hab nwg has rua puab tas, “Yog ib lub tebchaws twg tawg ua ob peb paab, hab cov tuabneeg ntawd sis ntaus sis tua, ces lub tebchaws ntawd yuav puamtsuaj moog; hab tsev tuabneeg twg kws tsi sis hum, ces tsev tuabneeg ntawd yeej yuav tawg taag moog.

¹⁸Yog cov tuabneeg kws dlaab Ntxwgnyoog kaav sis ntau sis tua, puab yuav nyob taug ua ke ntev le caag? Mej has tas yog Npexenpus pub fwjchim rua kuv, kuv txhaj ntab tau dlaab.

¹⁹Yog le ntawd, leejtwg pub fwjchim rua mej cov tuabneeg kws ntab tau dlaab, ntab dlaab? Mej cov tuabneeg kws ntab tau dlaab, yog cov kws yuav txav txim rua mej!

²⁰Tsi yog le kws mej has, tabsis yog kuv muaj Vaajtswv lub fwjchim, kuv txhaj ntab tau dlaab, qhov ntawd qha rua mej paub has tas, Vaajtswv lub Tebchaws tub lug txug mej lawm.

²¹“Yog muaj ib tug txivneej kws muaj zug heev, nwg npaaj ntaaj hab rag khov kho zuv nwg lub tsev, yeej tsi muaj leejtwg yuav moog nyag tau nwg tej qhov txhua chaw.

²²Tabsis yog muaj ib tug kws muaj zug heev dlua nwg, ntaus yeej nwg, hab txeeb tau nwg tej ntaaj tej rag kws nwg ca sab rua, nqaa moog taag huv tuabsi, hab tej kws nwg fuab tau, nwg yuav coj moog sis faib.

²³“Tug kws tsi tuaj kuv tog, tug ntawd yeej tawmtsaam kuv; tug kws tsi koom nrug kuv, tug ntawd ua kuas tawg paab tawg pawg xwb.

²⁴“Thaus dlaab tawm huv ib tug tuabneeg lub cev moog lawm, tug dlaab ntawd txawm moog rua tom roob mojsaab qhua, hab yog nwg nrhav tsi tau chaw su, nwg yuav has tas, ‘Kuv yuav rov qaab moog rua tom kuv lub qub tse kws kuv tawm tuaj.’

²⁵Thaus nwg rov qaab lug txug nwg lub qub tse, ua cav tub tu dlu lug ca lawm.

²⁶Tug dlaab ntawd txawm moog coj dlua xyaa tug dlaab kws nyaum dlua nwg lug nrug nwg nyob huv lub tsev ntawd. Thaus kawg tug tuabneeg ntawd hajyam txomnyem dlua thaus chivthawj.”

²⁷Thaus Yexus has le ntawd taag, muaj ib tug quaspuj has nrov nrov huv paab tuabneeg coob coob ntawd tuaj has tas, “Tug quaspuj kws yug koj hab pub mig rua koj noj, yog tug kws tau koob moov!”

²⁸Tabsis Yexus teb has tas, “Tsi yog le ntawd, cov tuabneeg kws nov Vaajtswv txujlug hab ua lawv le txujlug ntawd, txhaj yog cov kws tau koob moov!”

²⁹Thaus cov tuabneeg coob coob tuaj sawv puagncig Yexus, Yexus has rua puab tas, “Cov tuabneeg tam nuav ua phem ua qas kawg le! Puab thov kuas kuv ua ib yaam txujci tseemceeb, tabsis kuv yuav tsi ua rua puab pum. Zaaj txujci tseemceeb kws puab yuav pum tsuas yog Yaunas zaaj xwb.

³⁰Yaunas zaaj ua ib lub cim rua cov tuabneeg kws nyob huv lub nroog Nineves pum le caag, Tuabneeg Leej Tub yuav ua lub cim rua cov tuabneeg tam nuav ib yaam le ntawd.

³¹Nub kws Vaajtswv Txav Txim, tug puj Vaajntxwv kws kaav tebchaws Senpas yuav sawv qha cov tuabneeg tam nuav tej kev txhum rua puab. Rua qhov nwg taug kev nraag nwg lub tebchaws tuaj noog Vaajntxwv Xalumoos pav nwg tej kev txawj ntse. Kuv qha rua mej has tas, muaj ib tug nyob ntawm nuav tseem muaj fwjchim luj dlua Xalumoos hab.

³²Nub kws Vaajtswv Txav Txim, cov tuabneeg kws nyob huv lub nroog Nineves yuav sawv qha mej tej kev txhum rua mej, rua qhov thaus puab nov Yaunas qha, puab tso puab tej kev txhum tseg. Kuv qha rua mej has tas, muaj ib tug nyob ntawm nuav, nwg tseem muaj fwjchim luj dlua Yaunas hab!

³³“Tsi muaj leejtwg taws teeb hab muab phab khwb rua; tsuas muaj yuav muab txawb rua qhov chaw sab xwb, kuas cov tuabneeg kws tuaj huv tsev txhaj pum kev.

³⁴Koj lub qhovmuag yog lub teeb kws ci rua koj lub cev pum kev. Yog koj lub qhovmuag pum kev tseeb, koj lub cev yeej yuav kaaj nrig. Tabsis yog koj lub qhovmuag pum kev tsi tseeb, taagnrho koj lub cev yeej yuav tsaus ntuj nti.

³⁵Koj yuavtsum ceevfaaj zoo, tsi xob pub qhov pum kev kws koj muaj tsaus.

³⁶Yog koj lub cev kaaj nrig txhua qhov, tsi muaj ib qho tsaus, koj yuav ci ntsaa ab thoob plawg, ib yaam le muaj dluab teeb ci tuaj rua koj.”

³⁷Thaus Yexus qha taag, muaj ib tug Falixais hu Yexus moog nrug nwg noj mov; Yexus txawm moog huv nwg tsev, hab nyob quastsawg ntawm rooj mov.

³⁸Thaus tug Falixais pum has tas, Yexus tsi ntxuav teg lawv le kevcai tsaiv maam le noj, nwg xaav tsi thoob le.

³⁹Tug Tswv has rua nwg tas, “Mej cov Falixais ibtxwm ntxuav khob ntxuav phaaj saab nrau xwb, tabsis huv mej lub sab muaj kev phem kev qas puv nkaus.

⁴⁰Ua le caag mej yuav ruag ua luaj le! Mej tsi paub has tas Vaajtswv tug kws tsim saab nrau, nwg yog tug kws tsim saab huv hab?

⁴¹Mej ca le muab tej kws nyob huv mej tej khob hab tej phaaj pub rua cov tuabneeg pluag, txhua yaam kws mej muaj txhaj yuav huv lawv le kevcai.

⁴²“Cov Falixais, mej yuav raug kev puamtsuaj! Mej muab pumhum, luamlaws hab txhua yaam txumlom ib feem kaum coj tuaj fij rua Vaajtswv, tabsis mej tsua tsi ua tuabneeg ncaaj nceeg hab tsi hlub Vaajtswv. Mej yuavtsum ua tej nuav hab lwm yaam los mej yuav tau ua.

⁴³“Cov Falixais, Mej yuav raug kev puamtsuaj! Mej nyam xaiv tej chaw zoo huv tej tsev saablaaj nyob, thaus mej moog tom tej kab, mej nyam kuas suavdlawg fwm mej.

⁴⁴Mej yuav raug kev puamtsuaj! Mej zoo ib yaam le tej ntxaa kws tsi muaj dlaabtsi cim rua sau, tuabneeg tsuj moog tsuj lug, puab tsi paub has tas yog ntxaa.”

⁴⁵Muaj ib tug xwbfwb kws qha Vaajtswv txuj Kevcai has rua Yexus has tas, “Xwbfwb, koj has le ntawd, kuj yog koj thuam peb!”

⁴⁶Yexus teb has tas, “Cov xwbfwb kws qha Vaajtswv txuj Kevcai, mej yuav raug kev puamtsuaj hab! Mej muab lub nraa nyaav kws tsi yoojyim ris rua puab ris, tabsis mej tub tsi cev mej tug nyuas ntivteg moog paab thab tej nraa ntawd le.”

⁴⁷Mej yuav raug puamtsuaj! Mej txhim tej ntxaa kws log cov cev Vaajtswv lug kuas zoo nkauj. Cov cev Vaajtswv lug tub yog cov kws mej cov yawmkoob muab tua povtseg lawm.

⁴⁸Mej ua tej ntawd rua suavdlawg paub has tas, mej pum zoo tej kws mej cov yawmkoob ua lug lawm. Rua qhov mej cov yawmkoob yog cov kws tua cov cev Vaajtswv lug, hab mej yog cov kws txhim tej ntxaa ntawd.

⁴⁹Vim le nuav, Vaajtswv tug kws muaj tswvyim txhaj le has tas, “Kuv yuav khaiv cov kws cev Vaajtswv lug hab kuv cov timthawj moog qha puab, tabsis puab yuav muab cov cev Vaajtswv lug hab cov timthawj qee leej tua, hab yuav muab qee leej tsimtxom.”

⁵⁰Cov tuabneeg tam nuav yuav tau ris lub txim kws cov tuabneeg tam thaus u tua cov cev Vaajtswv lug, txij thaus tsim lub nplajteb lug txug naj nub nua,

⁵¹suav txij thaus Anpees raug tua lug txug thaus Xakhaliyas raug tua ntawm lub thaaj fij khoom rua Vaajtswv hab qhov chaw Dlawbhuv kis nruab nraab. Kuv qha rua mej has tas, cov tuabneeg tam nuav yuav tau ris cov tuabneeg kws tua cov cev Vaajtswv lug ntawd lub txim!

⁵²“Cov xwbfwb kws qha Vaajtswv txuj Kevcai, mej yuav raug kev puamtsuaj! Mej muab tug yumsij kws qheb kev txawj ntse zais ca lawm; txawm yog mej los mej tsi xaav moog rua huv, hab yog lwm tug yuav moog huv, mej tseem txwv tsi pub puab moog hab!”

⁵³Thaus Yexus tawm huv tug Falixais tsev moog, cov xwbfwb kws qha Vaajtswv txuj Kevcai hab cov Falixais txawm thuam Yexus heev hab nug Yexus ntau zaaj saib nwg puas has txhum,

⁵⁴puab txhaj yuav nrhav tau txim rua nwg.