Read Hmong Njua Lukas 12 Bible Online

Lukas 12 - Hmong Njua bible

Lukas 12

¹Thaus muaj tuabneeg ntau txheeb leej tuaj nyob ua ke sis txiv qev, Yexus has rua Yexus cov thwjtim has tas, “Mej yuavtsum ceevfaaj cov Falixais cov keeb. Kuv has le nuav yog kuv has txug cov Falixais kws ntsejmuag ncaaj sab nkhaus.

²Tej kws tuabneeg muab npog ca lawm, yuav muaj tug muab nthuav lug rua suavdlawg saib, hab tej kws tsi muaj leejtwg paub, yuav muaj tug muab lug qha rua suavdlawg.

³Yog le ntawd, txhua yaam kws mej has huv qhov tsaus ntuj, thaus kaaj ntug yuav muaj tug muab tej ntawd qha rua suavdlawg, hab tej kws mej sis ntxhi huv tsev, yuav muaj tug muab tej ntawd coj moog qha nrov nrov rua nrau zoov.

⁴“Kuv cov phoojywg, kuv qha rua mej has tas, mej tsi xob ntshai tug kws tua tau mej lub cev, tabsis tom qaab ntawd nwg ua tsi tau dlaabtsi tshaaj qhov ntawd lawm.

⁵Kuv yuav qha tug kws mej yuavtsum ntshai rua mej. Mej yuavtsum ntshai Vaajtswv tug kws tua tau mej hab muaj cuabkaav muab mej pov rua huv ntuj tawg. Kuv qha rua mej has tas, mej yuavtsum ntshai Vaajtswv!

⁶“Tsib tug noog tsev, luas muag ob xus xwb puas yog? Txawm yog ib tug noog tsev xwb los Vaajtswv yeej saib ntsoov.

⁷Txawm yog mej tej plaubhau los Vaajtswv suav txhua txuj huv tuabsi. Yog le ntawd, mej tsi xob ntshai; mej muaj nqes heev dlua ntau tug noog tsev.

⁸“Kuv qha tseeb rua mej has tas, tug kws leeg taabmeeg suavdlawg has tas nwg yog kuv le, Tuabneeg Leej Tub yuav leeg tug ntawd taabmeeg Vaajtswv cov timtswv ib yaam le ntawd.

⁹Tabsis tug kws tsi leeg kuv taabmeeg suavdlawg, Tuabneeg Leej Tub yuav tsi leeg yuav tug ntawd taabmeeg Vaajtswv cov timtswv.

¹⁰“Yog leejtwg thuam Tuabneeg Leej Tub, Vaajtswv zaam txim tau rua tug ntawd. Tabsis yog leejtwg thuam Vaaj Ntsujplig tug Dlawbhuv, Vaajtswv yuav zaam txim tsi tau rua tug ntawd.

¹¹“Thaus puab coj mej moog rua huv tej tsev saablaaj lossis coj mej moog cuag tej numtswv, mej tsi xob txhawj has tas mej yuav has dlaws mej zaaj le caag.

¹²Rua qhov thaus ntawd Vaaj Ntsujplig tug Dlawbhuv yuav qha rua mej paub has tas, mej yuav has le caag txhaj zoo.”

¹³Muaj ib tug txivneej nyob huv paab tuabneeg coob coob ntawd has rua Yexus has tas, “Xwbfwb, thov koj has kuas kuv tug tijlaug faib kuv nam kuv txiv tej qubtxeeg qubteg rua kuv hab.”

¹⁴Yexus teb has tas, “Phoojywg, leejtwg tsaa kuv ua tug txav txim hab faib qubtxeeg qubteg rua meb?”

¹⁵Yexus has rua suavdlawg tas, “Mej txhua tug yuavtsum ceevfaaj tsi xob ntshaw yaam nuav yaam u. Txawm yog mej muaj nyaj ntxag hab qhov txhua chaw ntau npaum le caag los tej ntawd yeej paab tsi tau kuas mej muaj txujsa nyob ntev.”

¹⁶Yexus has ib zaaj lug pevtxwv rua puab has tas, “Muaj ib tug txivneej npluanuj, nwg muaj laj muaj teb zoo hab sau tau qoobloo ntau heev.

¹⁷Nwg xaav has tas, ‘Kuv yuav ua le caag? Kuv tsi muaj chaw txaus ntim kuv tej qoobloo nuav.’

¹⁸Nwg xaav has tas, ‘Kuv yuav ua le nuav. Kuv yuav lauj kuv lub txhaab, hab muab ua kuas luj dlua, txhaj txaus ntim kuv tej qoobloo hab qhov txhua chaw.

¹⁹Ces kuv yuav has rua kuv lub sab has tas, koj muaj moo heev! Koj tub muaj txhua yaam txhij zog kws kaav ntau xyoo lawm. Koj ca le su nyob noj nyob haus!’

²⁰Tabsis Vaajtswv has rua tug npluanuj ntawd tas, ‘Tug tuabneeg ruag, mo nuav koj txujsa tub yuav tu; yog le ntawd, tej qhov txhua chaw kws koj npaaj tseg yuav yog leejtwg tug?’ ”

²¹Yexus xaus lug has tas, “Tug kws npaaj nyaj txag qhov txhua chaw lug ua nwg tug kuas nwg npluanuj, Vaajtswv tsi suav has tas tug ntawd yog tuabneeg npluanuj.”

²²Ces Yexus has rua nwg cov thwjtim has tas, “Yog le ntawd, kuv txhaj qha rua mej kuas mej tsi xob txhawj has tas mej yuavtsum muaj zaub mov noj txhaj muaj sa nyob lossis yuavtsum muaj rig tsho naav.

²³Rua qhov txujsa tseemceeb dlua tej zaub mov, hab lub cev tseemceeb dlua tej rig tsho.

²⁴Mej ua tuab zoo saib tej uab laag: uab laag tsi cog qoob cog loo, hab tsi hlais tsi sau; puab tsi muaj txhaab tsi muaj phawv ntim qoobloo ca; Vaajtswv tub yug tej uab laag! Mej tseem muaj nqes heev dlua tej noog ntawd!

²⁵Mej tej kev txhawj puas yuav paab tau kuas mej muaj sa nyob ob peb xyoos ntxiv?

²⁶Yog tej yaam miv miv nuav mej tub ua tsi tau, mej tseem yuav moog txhawj lwm yaam ua dlaabtsi?

²⁷Mej ua tuab zoo xaav saib, tej paaj ntoos tawg le caag? Puab tub tsi ua num, tsi ntus ntaub naav. Tabsis kuv qha rua mej has tas, txawm yog Vaajntxwv Xalumoos npluanuj kawg le los nwg tub tsi tau naav ib cev rig tsho zoo npaum le tej paaj ntoos ntawd ib lub. Ua le caag mej kev ntseeg yuav tsawg ua luaj?

²⁸Tej nroj tsuag kws tsuas nyob nub nua xwb, pigkig luas tub yuav muab pov hlawv rua huv qhovcub, ua cav Vaajtswv tub pub rua tej paaj ntoos ntawd zoo nkauj ua luaj. Yog le ntawd, Vaajtswv hajyam yuav pub rua mej muaj naav zoo dlua tej nroj tsuag ntawd!

²⁹“Yog le ntawd, mej tsi xob txhawj has tas, mej yuav moog nrhav dlaabtsi lug noj lug haus,

³⁰(cov tuabneeg kws tsi ntseeg Vaajtswv huv nplajteb nuav naj nub nrhav tej nuav.) Mej leej Txiv yeej paub has tas mej yuavtsum muaj tej nuav.

³¹Tabsis mej yuavtsum xub nrhav Vaajtswv lub Tebchaws tsaiv, nwg maam le muab tej nuav ntxiv rua mej.

³²“Cov mivnyuas yaaj, txawm yog mej tsi coob los mej tsi xob ntshai, rua qhov mej leej Txiv tub txaus sab muab nwg lub tebchaws rua mej lawm.

³³Ca le muab mej tej qhov txhua chaw muag, hab muab tej ntawd faib rua cov tuabneeg pluag. Ca le xaws lub naab rau nyaj kws tsi txawj ndluag ntim mej tej nyaj rua sau ntuj ceebtsheej, qhov ntawd mej tej nyaj yuav tsi pluj, rua qhov tubsaab nyag tsi tau, hab ntsaum kaabrwg tsi noj.

³⁴Mej tej nyaj txag hab qhov txhua chaw nyob qhov twg, mej lub sab yeej nyob qhov ntawd.

³⁵“Mej yuavtsum naav rig tsho khov kho tog hab taws teeb ca,

³⁶ib yaam le cov tubkhai kws npaaj tog puab tug tswv kws moog noj tshoob yuav rov lug. Thaus tug tswv lug txug hab hu, taamsim ntawd cov tubkhai yuav qheb qhovrooj rua nwg.

³⁷Thaus tug tswv rov lug pum cov tubkhai tseem zuv tog, cov tubkhai ntawd yuav tau ntsejmuag! Kuv qha rua mej has tas, tug tswv ntawd yuav sa hlaab khov kho, hab yuav kuas cov tubkhai nyob quastsawg ntawm rooj, hab nwg yuav ua tug txhaab zaub txhaab mov rua puab noj.

³⁸Txawm yog tug tswv lug thaus ib taag mo lossis lug thaus yuav kaaj ntug, yog nwg pum cov tubkhai tseem zuv tog, cov tubkhai ntawd yuav tau ntsejmuag!

³⁹Mej ncu ntsoov has tas, yog tug tswv tsev paub has tas thaus twg tubsaab yuav tuaj, nwg yeej yuav zuv tog, tsi pub kuas tubsaab lug tau rua huv nwg tsev.

⁴⁰Yog le ntawd, mej los yuavtsum zuv tog, rua qhov Tuabneeg Leej Tub yuav lug lub sijhawm kws mej tsi ceevfaaj.”

⁴¹Petus nug Yexus has tas, “Tug Tswv, zaaj lug pevtxwv kws koj has nuav, yog koj has rua peb lossis koj has rua txhua tug?”

⁴²Tug Tswv teb has tas, “Tug tubkhai ncaaj nceeg hab muaj tswvyim. Tug tswv yuav tsaa nwg ua tug luj kws saib tug tswv cov tubkhai. Thaus txug sijhawm noj, tug ntawd yuav ua tug kws faib zaub faib mov rua cov tubkhai noj.

⁴³Thaus tug tswv rov lug tsev hab pum tug tubkhai ntawd taabtom ua tej num zoo nuav. Ces tug tubkhai ntawd yuav tau ntsejmuag.

⁴⁴Kuv qha rua mej has tas, tug tswv yuav tsaa tug tubkhai ntawd ua tug saib tug tswv tej qhov txhua chaw.

⁴⁵Tabsis yog tug tubkhai ntawd xaav has tas, tseem tshuav ntev kuv tug tswv maam lug, ces nwg txawm muab cov tubkhai ntaus, tsi has quaspuj lossis txivneej huv tuabsi, hab nwg noj tsau haus qaug,

⁴⁶Nwg tsi paub has tas lub sijhawm twg nwg tug tswv yuav lug txug, nwg txhaj tsi ceevfaaj. Tug tswv yuav muab tug tubkhai ntawd hlais ua tej dlaim, hab muab nwg pov moog nyob nrug cov tuabneeg kws tsi noog lug.

⁴⁷“Tug tubkhai kws paub nwg tug tswv lub sab lawm, tabsis nwg tsi ua lawv le tug tswv xaav kuas nwg ua. Tug tubkhai ntawd yuav maag nplawm.

⁴⁸Tabsis tug tubkhai kws tsi paub nwg tug tswv lub sab, txawm yog nwg ua txhum txaus nplawm los nwg yuav tsi maag nplawm ntau. Tug kws tau ntau, tug ntawd yuavtsum pauj ntau. Tug kws tau ntau dlua, tug ntawd yuavtsum pauj ntau dlua.

⁴⁹“Qhov kws kuv lug yog coj suavtawg lug hlawv lub nplajteb, hab kuv xaav kuas suavtawg tub cig lawm!

⁵⁰Kuv nyuaj sab kawg le, vim kuv yuav raug kev tsimtxom, hab kuv yuav nyuaj sab moog txug thaus lub sijhawm ntawd dlhau lawm.

⁵¹Mej xaav has tas, kuv coj kev sis humxeeb lug rua huv lub nplajteb nua los? Kuv qha rua mej has tas, tsi yog le ntawd, kuv lug ua kuas tuabneeg nyob tsi sis hum.

⁵²Txij nuav moog tsev tuabneeg kws muaj tsib leeg yuav tsi sis hum, peb leeg yuav tawmtsaam ob leeg, hab ob leeg yuav tawmtsaam peb leeg.

⁵³Txiv yuav tawmtsaam tub, tub yuav tawmtsaam txiv; nam yuav tawmtsaam ntxhais, ntxhais yuav tawmtsaam nam; puj yuav tawmtsaam nyaab, hab nyaab yuav tawmtsaam puj.”

⁵⁴Yexus has rua suavdlawg tas, “Thaus mej pum fuab tsaus nti saab nubpoob lug, taamsim ntawd mej has tas, yuav lug naag, ces txawm muaj le ntawd.

⁵⁵Hab thaus mej pum cua ntsawj saab qaabteb tuaj, mej has tas, tub yuav txug lub caij ntuj kub, ces txawm muaj le ntawd.

⁵⁶Cov tuabneeg ntsejmuag ncaaj sab nkhaus! Mej saib fuab saib cua, mej paub has tas yuav tshaav ntuj lossis yuav lug naag, tabsis ua le caag tej kws naj nub nua muaj, mej tsua tsi paub?”

⁵⁷“Vim le caag mej tsi ua tuab zoo xaav saib yuav ua yaam twg txhaj zoo?

⁵⁸Yog leejtwg xyuam phaaj kom koj rua huv tsev tu plaub, hab yuav coj koj moog has plaub, ua ntej kws tsi tau moog has plaub, koj ca le thov nwg kuas meb rov sis hum, nyob tsaam nwg yuav coj koj moog cuag tug txav txim, ces tug txav txim yuav muab koj cob rua tug ceevxwm, hab tug ceevxwm yuav muab koj kaw rua huv tsev lojcuj.

⁵⁹Kuv qha tseeb rua koj has tas, koj yuav tawm tsi tau huv tsev lojcuj moog txug thaus kws koj them nqe taag.”