Read Hmong Njua Lukas 15 Bible Online

Lukas 15 - Hmong Njua bible

Lukas 15

¹Muaj ib zag cov tuabneeg sau se hab cov tuabneeg txhum tuaj noog Yexus qha,

²cov Falixais hab cov xwbfwb kws qha Vaajtswv txuj Kevcai txawm ywg has tas, “Tug nuav nrug cov tuabneeg txhum ua ke hab nrug puab noj mov!”

³Yog le ntawd, Yexus txhaj has ib zaaj lug pevtxwv rua puab noog has tas,

⁴“Mej cov yog leejtwg muaj ib puas tug yaaj, yog ib tug pluj lawm, tug tswv yuav ua le caag? Nwg yeej yuav tso cuaj caum cuaj tug rua tom haav zaub, hab moog nrhav tug yaaj kws pluj lawm kuas tau.

⁵Thaus nwg nrhav tau lawm, nwg zoo sab heev, nwg muab tsaws hlo rua sau xubpwg,

⁶hab kwv lug tsev. Ces nwg hu nwg cov kwvtij hab tej tuabneeg zej zog tuaj hab has rua puab tas, ‘Mej ca le nrug kuv zoo sab, rua qhov kuv tub moog nrhav tau kuv tug yaaj kws pluj lawm!’

⁷Ib yaam nkaus le ntawd, kuv qha rua mej has tas, yog ib tug tuabneeg txhum tso nwg tej kev txhum tseg lawm, cov timtswv ceebtsheej yuav zoo sab rua tug ntawd heev dlua le zoo sab rua cuaj caum cuaj tug kws puab khaav has tas, puab yog tuabneeg ncaaj nceeg.

⁸“Lossis muaj ib tug quaspuj muaj kaum lub nyaj, yog ib lub poob lawm, nwg yuav ua le caag? Nwg yuav taws teeb, cheb tsev, hab tshawb nrhav txhua qhov kuas tau lub nyaj ntawd.

⁹Thaus nwg nrhav tau nwg lub nyaj lawm, nwg hu nwg cov kwvtij hab tej tuabneeg zej zog tuaj, hab nwg has rua puab tas, ‘Kuv tub nrhav tau kuv lub nyaj kws poob lawm, mej ca le nrug kuv zoo sab!’

¹⁰Ib yaam le ntawd, kuv qha rua mej has tas, yog ib tug tuabneeg txhum tso nwg tej kev txhum tseg, Vaajtswv cov timtswv yuav zoo sab kawg nkaus rua tug tuabneeg txhum kws tso nwg tej kev txhum tseg.”

¹¹Yexus has ntxiv has tas, “Muaj ib tug txivneej muaj ob tug tub.

¹²Tug tub yau has rua leej txiv has tas, ‘Txiv, thov koj muab koj lub cuabtaam cov kws yog kuv feem faib rua kuv.’ Leej txiv muab nwg lub cuabtaam tej kws yog nwg tug, faib rua nwg ob tug tub.

¹³Tau ob peb nub tom qaab, tug tub yau muab tej kws yog nwg tug muag tau nyaj, ces nwg txawm tsiv moog rua lwm lub tebchaws dleb dleb lawm, nwg tsi txuag nwg tej nyaj,

¹⁴nwg ywj sab siv ua dlog ua dlig, nwg muab nwg tej nyaj phob taag lawm, thaus ntawd muaj kev tshaib plaab thoob plawg lub tebchaws, nwg tsi tshuav dlaabtsi le lawm.

¹⁵Nwg txhaj moog nrug ib tug txivneej huv lub nroog ntawd nyob, tug ntawd khaiv nwg moog zuv npua tom teb.

¹⁶Nwg xaav noj cov plhaub taum kws npua noj, kuas tsau nwg plaab los tsi muaj leejtwg pub rua nwg noj.

¹⁷Thaus nwg ncu dlheev txug has tas, ‘Kuv txiv cov tub zug muaj noj muaj haus tsi taag, ua le caag kuv yuav tuaj yoo tshaib ntawm nuav?

¹⁸Kuv yuav rov moog cuag kuv txiv hab has tas, “Txiv, kuv ua txhum rua Vaajtswv hab ua txhum rua koj lawm.

¹⁹Kuv tsi tsimnyog ua koj tug tub lawm; thov koj suav kuv ib yaam le kuv yog koj ib tug tub zug xwb.” ’

²⁰Ces nwg txawm sawv tseeg taug kev rov moog cuag nwg txiv. “Thaus nwg lug tsi tau txug kws tseem nyob hov dleb, nwg txiv pum nwg hab hlub nwg kawg; nwg txiv dlha loo moog puag nkaus tug tub nwj.

²¹Tug tub has rua leej txiv has tas, ‘Txiv, kuv ua txhum rua Vaajtswv hab ua txhum rua koj lawm. Kuv tsi tsimnyog ua koj tug tub lawm!’

²²Tabsis leej txiv has rua cov tubkhai has tas, ‘Mej kawgkag nqaa cev rig tsho kws zoo zoo tuaj rua nwg naav. Nqaa nplhaib tuaj rua nwg coj, muab khau tuaj rua nwg rau.

²³Hab moog muab tug mivnyuas nyuj kws rog rog coj lug tua ua ib rooj mov rua suavdlawg noj ua kev zoo sab.

²⁴Rua qhov kuv tug tub nuav tub tuag lawm, tabsis nwgnuav nwg caj rov lug; nwg tub pluj lawm, tabsis nwgnuav nwg rov lug.’ Ces suavdlawg txawm noj haus zoo sab.

²⁵“Thaus ntawd tug tub hlub nyob tom teb. Nwg rov tom teb lug txug ntawm tog tsev, nwg nov suab raaj suab nkauj nogncaas hab suab seev cev huv tsev tuaj.

²⁶Nwg hu ib tug tubkhai tuaj, hab nug has tas, ‘Puab ua dlaabtsi huv tsev?’

²⁷Tug tubkhai ntawd teb has tas, ‘Koj tug kwv rov qaab lug lawm. Koj txiv tua tug mivnyuas nyuj rog rog rua koj tug kwv noj, rua qhov koj tug kwv rov lug, nwg tseem noj qaab nyob zoo.’

²⁸Tug tijlaug chim heev, nwg tsi kaam moog rua huv tsev. Nwg txiv txhaj tawm tuaj thov kuas nwg moog huv tsev.

²⁹Nwg teb nwg txiv has tas, ‘Txiv, koj sim xaav saib, kuv ua num rua koj ib yaam le tug qhev tau ntau xyoo, kuv tsi tau tawv koj ib zag le. Koj tub tsi pub ib yaam dlaabtsi rua kuv. Txawm yog ib tug nyuas mivnyuas tshis los koj tub tsi muab rua kuv tua pub kuv cov phoojywg noj ib pluag zoo sab le!

³⁰Tabsis koj tug tub nuav, coj koj tej nyaj moog ndlav namndlav hab phob phuam laam taag. Nwg rov qaab lug, koj tsua muab tug mivnyuas nyuj rog rog tua rua nwg noj hab!’

³¹Leej txiv teb has tas, ‘Mivtub, koj yeej ibtxwm nrug kuv nyob, txhua yaam kws kuv muaj puavleej yog koj le.

³²Yeej tsimnyog peb ua ib rooj mov noj hab zoo sab, rua qhov koj tug kwv tub tuag lawm, tabsis nwgnuav nwg caj rov lug, nwg tub pluj lawm, tabsis nwgnuav nwg rov lug.’ ”