Read Hmong Njua Lukas 18 Bible Online

Lukas 18 - Hmong Njua bible

Lukas 18

¹Yexus has ib zaaj lug pevtxwv rua nwg cov thwjtim has tas, kuas puab naj nub thov Vaajtswv tsi xob qaug zug.

²Yexus has tas, “Nyob huv ib lub nroog, muaj ib tug txav txim kws tsi ntshai Vaajtswv hab tsi fwm leejtwg le.

³Nyob huv lub nroog ntawd muaj ib tug puj ntsuag kws naj nub tuaj thov tug txav txim ntawd has tas ‘Thov koj paab has rooj plaub kws luas kom kuv!’

⁴Thaus chivthawj tug txav txim tsi kaam has, tabsis tom qaab ntawd, nwg xaav has tas, ‘Txawm yog kuv tsi ntshai Vaajtswv hab tsi fwm leejtwg le los

⁵tug puj ntsuag nuav pheej tuaj txob kuv, kuv yuav tau paab nwg has kuas taag, nwg txhaj yuav tsi naj nub tuaj txob kuv kuas kuv ntxhuv sab!’ ”

⁶Tug Tswv has rua puab ntxiv tas, “Mej tub nov tug txav txim kws sab tsi ncaaj ntawd tej lug lawm.

⁷Vaajtswv tsaav tuabneeg kws naj nub naj mo thov Vaajtswv paab, Vaajtswv yuav tsi paab has puab zaaj los? Vaajtswv yuav tog ntev maam le paab puab los?

⁸Kuv qha rua mej has tas, ‘Vaajtswv yeej yuav paab has puab zaaj sai sai. Thaus Tuabneeg Leej Tub lug, cov tuabneeg kws nyob huv nplajteb nuav puas yuav muaj tug kws ntseeg nwg lawm?’ ”

⁹Hab Yexus has ib zaaj lug pevtxwv rua cov tuabneeg kws khaav has tas, puab yog tuabneeg ncaaj hab puab saib tsi taug lwm tug le nuav,

¹⁰“Muaj ib zag ob tug txivneej moog thov Vaajtswv huv lub Tuamtsev: ib tug yog tug Falixais hab ib tug yog tug sau se.

¹¹“Tug Falixais sawv ntsug hab nwg thov has tas, ‘Vaajtswv, kuv ua koj tsaug, kuv zoo tsi thooj le lwm tug, kuv tsi ua tuabneeg sab hlub, kuv yog tuabneeg ncaaj nceeg, kuv tsi zig luas tej quaspuj, hab kuv tsi zoo le tug sau se ntawd.

¹²Xyaa nub twg kuv ua kevcai yoo mov ob zag, hab tej nyaj kws kuv khwv tau lug, kuv muab ib feem kaum rua koj.’

¹³“Tabsis tug sau se sawv nrug dleb mivntsiv, nwg tsi tsaa qhovmuag saib sau ntuj, nwg ntaus nwg lub hauvsab hab has tas, ‘Vaajtswv, kuv yog tuabneeg txhum, thov koj taabncuab kuv!’

¹⁴Yexus has tas, ‘Kuv qha rua mej has tas, thaus obtug rov moog tsev lawm, tug sau se yog tug kws ua hum Vaajtswv sab, tsi yog tug Falixais. Rua qhov tug kws khaav has tas, nwg muaj fwjchim, tug ntawd yuav poob fwjchim, tabsis tug kws txu fwjchim, tug ntawd yuav tau fwjchim.’ ”

¹⁵Muaj tuabneeg coj puab cov mivnyuas tuaj cuag Yexus hab thov nwg cev teg plhw puab tej mivnyuas. Thaus cov thwjtim pum le ntawd, puab txwv tsi pub cov tuabneeg ua le ntawd,

¹⁶tabsis Yexus hu cov mivnyuas yau lug cuag nwg hab has tas, “Ca le tso cov mivnyuas yau lug cuag kuv, tsi xob txwv puab, rua qhov Vaajtswv lub Tebchaws yog cov tuabneeg kws muaj lub sab zoo le cov mivnyuas yau nuav tug.

¹⁷Kuv qha rua mej has tas, yog leejtwg tsi txais yuav Vaajtswv lub Tebchaws ib yaam le cov mivnyuas yau nuav, ces tug ntawd yuav tsi tau moog rua huv Vaajtswv lub Tebchaws le.”

¹⁸Cov Yudais ib tug thawjcoj tuaj nug Yexus has tas, “Tug Xwbfwb kws muaj lub sab zoo, kuv yuav ua le caag kuv txhaj tau txujsa ntev dlhawv moog ibtxhis?”

¹⁹Yexus nug nwg has tas, “Vim le caag koj hu kuv has tas, tug kws muaj lub sab zoo? Yeej tsi muaj leejtwg sab zoo le, tsuas yog Vaajtswv tuab leeg xwb.

²⁰Koj yeej paub Vaajtswv txuj Kevcai kws has tas, ‘Tsi xob ntxag luas quaspuj luas quasyawg; tsi xob tua tuabneeg; tsi xob ua tubsaab; tsi xob ua timkhawv tsi tseeb, hab fwm koj nam koj txiv.’ ”

²¹Tug txivneej ntawd teb has tas, “Tej kevcai kws koj has ko kuv tub coj txhua nqai thaus kuv tseem yau lug lawm.”

²²Thaus Yexus nov nwg has le ntawd, Yexus has rua nwg tas, “Tseem tshuav ib yaam kws koj tsi tau ua. Koj ca le moog muab koj tej qhov txhua chaw muag huv tuabsi, hab muab cov nyaj ntawd faib rua cov tuabneeg pluag, koj txhaj yuav yog tug kws npluanuj nyob sau ntuj ceebtsheej; tom qaab ntawd, koj ca le tuaj nrug kuv moog.”

²³Thaus tug txivneej ntawd nov Yexus has le ntawd, nwg nyuaj sab kawg le, rua qhov nwg npluanuj heev.

²⁴Thaus Yexus pum tug ntawd nyuaj sab heev, Yexus has tas, “Cov tuabneeg npluanuj yuav moog Vaajtswv lub tebchaws mas nyuaj kawg le!

²⁵Ib tug ntxhuav nkaag lub qhov koob tseem yoojyim dlua ib tug tuabneeg pluanuj yuav moog rua Vaajtswv lub Tebchaws.”

²⁶Cov tuabneeg kws nov Yexus has le ntawd, puab nug Yexus has tas, “Yog le ntawd, leejtwg txhaj yuav dlim tau?”

²⁷Yexus teb has tas, “Tej kws tuabneeg ua tsi tau, Vaajtswv ua tau.”

²⁸Ces Petus has rua Yexus has tas, “Peb tub tso vaaj tse tseg hab tuaj nrug koj moog lawm.”

²⁹Yexus has rua puab tas, “Kuv qha tseeb rua mej has tas, yog leejtwg tso vaaj tse, tso quaspuj mivnyuas, tso kwvtij hab tso nam tso txiv tseg, vim nwg xaav tau Vaajtswv lub Tebchaws,

³⁰tam nuav nwg yuav tau ntau dlua tej kws nwg muab tso tseg lawm, hab lwm tam, nwg yuav tau txujsa ntev dlhawv moog ibtxhis.”

³¹Yexus coj nwg kaum ob tug thwjtim moog rua ib qho hab nwg has rua puab tas, “Mej ua tuab zoo noog! Peb yuav moog rua nraag lub nroog Yeluxalees, kuas txhua yaam tav lawv le tej kws cov cev Vaajtswv lug tau sau has txug Tuabneeg Leej Tub lawm.

³²Yuav muaj tuabneeg nteg nwg coj moog rua lwm tsaav tuabneeg, puab yuav saib tsi taug nwg, thuam nwg hab nti quavncaug rua nwg.

³³Puab yuav muab nwg nplawm hab muab nwg tua povtseg, tabsis tom qaab ntawd peb nub, nwg yuav sawv rov qaab lug.”

³⁴Cov thwjtim tsi totaub tej kws Yexus has; Yexus tsi qha lub ntsab lug rua puab, puab txhaj tsi paub sov Yexus has txug dlaabtsi.

³⁵Thaus Yexus moog yuav txug lub nroog Yelikaus, muaj ib tug txivneej dligmuag nyob quastsawg ntawm ntug kev thov khawv.

³⁶Thaus tug dligmuag nov muaj tuabneeg coob coob thaam zum zawg taug kev tuaj, nwg nug has tas, “Mej ua dlaabtsi?”

³⁷Puab qha rua nwg has tas, “Yexus tug kws yog tuabneeg Naxales taabtom taug kev tuaj.”

³⁸Tug dligmuag ntawd hu nrov nrov has tas, “Yexus kws yog Daviv tug Tub! Thov koj taabncuab kuv!”

³⁹Cov tuabneeg kws nyob ntawm nwg hauv ntej txwv kuas nwg nyob tuabywv tsi xob qw. Tabsis nwg hajyam qw nrov nrov has tas, “Daviv tug Tub, thov koj taabncuab kuv!”

⁴⁰Yog le ntawd, Yexus txawm nreg hab kuas puab coj tug dligmuag lug cuag nwg. Thaus tug dligmuag lug ze lawm, Yexus nug nwg has tas,

⁴¹“Koj xaav kuas kuv ua dlaabtsi rua koj?” Tug dligmuag teb has tas, “Tug Tswv, thov paab kuas kuv pum kev.”

⁴²Yexus has rua nwg has tas, “Koj ca le pum kev! Koj txujkev ntseeg tub ua rua koj pum kev lawm.”

⁴³Taamsim ntawd nwg txawm pum kev, nwg nrug Yexus moog hab ua Vaajtswv tsaug. Thaus cov tuabneeg coob coob pum le ntawd, puab qhuas Vaajtswv kawg le.