Read Hmong Njua Lukas 19 Bible Online

Lukas 19 - Hmong Njua bible

Lukas 19

¹Yexus tuaj txug huv lub nroog Yelikaus, hab yuav dlhau moog.

²Nyob huv muaj ib tug txivneej hu ua Xakhais, nwg yog cov sau se tug thawj hab nwg muaj nyaj heev.

³Xakhais xaav pum saib Yexus yog tug twg, tabsis muaj tuabneeg coob coob thaiv nwg, nwg saib tsi pum Yexus, rua qhov nwg yog tuabneeg qegtaub.

⁴Xakhais txhaj dlha fuas suavdlawg ntej moog nce ib tsob ntoo xikamaus, kuas nwg pum Yexus, rua qhov Yexus yuav taug txujkev ntawd tuaj.

⁵Thaus Yexus tuaj txug ntawd, Yexus tsaa qhovmuag saib hab has rua Xakhais has tas, “Xakhais, koj ca le nqeg lug, rua qhov nub nua kuv yuav moog su huv koj tsev.”

⁶Xakhais txawm nqeg nrawm nroog lug tog txais Yexus, hab zoo sab kawg le.

⁷Cov tuabneeg kws pum le ntawd, puab thuam has tas, “Ua le caag Yexus yuav moog su huv tug tuabneeg txhum tsev!”

⁸Xakhais sawv ntsug hab has rua Yexus has tas, “Tug Tswv, koj noog kuv has! Kuv yuav muab tej kws kuv muaj ib nraab faib rua cov tuabneeg pluag. Hab yog kuv tau muab leejtwg ib yaam dlaabtsi lug yuav lawm, kuv yuav them plaub npaug rov qaab rua tug ntawd.”

⁹Yexus has tas, “Nub nua txujkev cawm dlim tub lug rua huv tug txivneej nuav lub tsev lawm. Tug txivneej nuav yog Anplahaas ib tug xeebntxwv hab.

¹⁰Tuabneeg leej Tub yeej lug nrhav cov tuabneeg kws yuam kev lawm hab cawm kuas puab dlim.”

¹¹Thaus cov tuabneeg tseem taabtom noog Yexus has ntawd, Yexus txawm has ib zaaj lug pevtxwv rua puab noog. Thaus nwg moog yuav txug huv lub nroog Yeluxalees, hab tej tuabneeg xaav has tas, Vaajtswv lub Tebchaws tub lug yuav txug.

¹²Yexus has tas, “Muaj ib tug nom taabtom yuav sawv kev moog rua lwm lub tebchaws dleb dleb, kuas luas muab nwg tsaa ua vaajntxwv, nwg maam le rov qaab lug.

¹³Thaus nwg yuav moog, nwg hu nwg kaum tug tubkhai lug, hab nwg muab nyaj rua puab ib leeg ib choj; hab has rua puab tas, ‘Mej ca le coj cov nyaj nuav moog ua laag ua luam, kuas txug nub kuv rov lug.’

¹⁴Tabsis cov pejxeem kws nyob huv tug nom ntawd lub tebchaws ntxub nwg, puab txawm khaiv tuabneeg lawv qaab moog has tas, ‘Peb tsi yuav tug nom nuav ua peb tug vaajntxwv.’

¹⁵“Thaus luas tsaa tug nom ntawd ua vaajntxwv lawm, nwg rov qaab lug, hab hu kuas cov tubkhai kws nwg muab nyaj rua tuaj cuag nwg, saib puab moog ua luam ib leeg tsaam pistsawg.

¹⁶Thawj tug tubkhai lug has tas, ‘Tug tswv, choj nyaj kws koj muab rua kuv, kuv coj moog ua luam tsaam kaum choj.’

¹⁷Tug tswv has tas, ‘Zoo heev, koj yog tug tubkhai kws noog lug! Vim koj ua ncaaj rua tej yaam miv miv nuav, kuv yuav tsaa koj ua tug kws saib kaum lub nroog.’

¹⁸Tug tubkhai ob lug has tas, ‘Tug tswv, choj nyaj kws koj muab rua kuv, kuv coj moog ua luam tsaam tsib choj.’

¹⁹Tug tswv has rua tug tubkhai ntawd has tas, ‘Koj yuav tau ua tug saib tsib lub nroog.’

²⁰Muaj dlua ib tug tubkhai lug has tas, ‘Tug tswv, choj nyaj kws koj muab rua kuv nyob ntawm nuav; kuv muab phuam qhwv khaws ca zoo zoo.

²¹Kuv ntshai koj, rua qhov koj yog ib tug tuabneeg nyaum heev. Koj ibtxwm hlais tej kws tsi yog koj cog, hab sau tej kws tsi yog koj tseb.’

²²Tug tswv has rua tug tubkhai ntawd has tas, ‘Tug tubkhai kws sab phem! Kuv yuav rau txim rua koj lawv le tej lug kws koj has! Koj tub paub has tas, kuv yog ib tug tuabneeg kws nyaum heev, kuv ibtxwm hlais tej kws tsi yog kuv cog, hab sau tej kws tsi yog kuv tseb.

²³Ua le caag koj tsi muab kuv choj nyaj coj moog tso rua huv txhaab nyaj? thaus kuv rov qaab lug, kuv txhaj tau kuv choj nyaj hab tau tej paaj ntxiv?’

²⁴Nwg has rua cov tuabneeg kws sawv ntawd has tas, ‘Mej ca le muab nwg choj nyaj coj moog ntxiv rua tug tubkhai kws muaj kaum choj.’

²⁵Puab has rua tug tswv has tas, ‘Tug tswv, tug ntawd tub muaj kaum choj lawm!’

²⁶Tug tswv teb has tas, ‘Kuv qha rua mej has tas, txhua tug kws muaj lawm, yeej yuav muab ntxiv kuas nwg muaj ntau dlua, tabsis tug kws tsi muaj, txawm yog nwg muaj mivntsiv xwb los yuav muab rhu tawm ntawm nwg moog.

²⁷Ca le coj kuv cov yeebncuab kws tsi yuav kuv ua puab tug vaajntxwv lug ntawm nuav, hab muab puab tua taabmeeg kuv!’ ”

²⁸Thaus Yexus has le nuav taag, nwg txawm ua puab ntej moog rua nraag lub nroog Yeluxalees.

²⁹Thaus Yexus moog yuav txug lub zog Npefakhes hab lub zog Npethanis kws nyob ntawm lub roob txiv ntoo roj, nwg txawm khaiv ob tug thwjtim ua nwg ntej moog,

³⁰hab qha obtug has tas, “Meb ca le ncaaj nraim moog rua huv lub zog kws nyob tom meb hauv ntej; thaus meb moog txug, meb yuav pum ib tug mivnyuas neeg luav kws tsi tau muaj tuabneeg caij dlua le, khi ca qhov ntawd. Meb ca le dlaws caab lug rua kuv ntawm nuav.

³¹Yog muaj leejtwg nug has tas, ‘Meb yuav dlaws caab moog ua dlaabtsi?’ Meb teb tug ntawd has tas, ‘Tug Tswv xaav siv.’ ”

³²Obtug moog pum txhua yaam lawv le Yexus qha rua obtug.

³³Thaus obtug taabtom dlaws tug mivnyuas neeg luav, tug tswv txawm nug obtug has tas, “Meb yuav dlaws caab moog ua dlaabtsi?”

³⁴Obtug teb has tas, “Tug Tswv xaav siv.” Obtug caab tug mivnyuas neeg luav lug rua Yexus.

³⁵Obtug hle obtug ob lub tsho ntev lug pua tug mivnyuas neeg luav nrausqaum rua Yexus caij.

³⁶Thaus Yexus caij tug mivnyuas neeg luav taug kev moog, tej tuabneeg suavdlawg hle puab tej tsho lug pua huv kev.

³⁷Thaus Yexus moog yuav txug lub nroog Yeluxalees, ntawm txujkev kws nqeg peg lub Roob Txiv Ntoo Roj lug, cov tuabneeg coob coob kws yog Yexus cov thwjtim txawm ua Vaajtswv tsaug, vim tej txujci tseemceeb kws puab tau pum, hab puab qhuas Vaajtswv nrov nrov has tas,

³⁸“Thov Vaajtswv foom koob moov rua tug vaajntxwv kws Vaajtswv khaiv lug! Thov kuas sau ntuj muaj kev kaaj sab lug, hab kuas suavdlawg fwm Vaajtswv tug kws muaj tshwjchim ci ntsaa ab!”

³⁹Cov Falixais qee leej kws nrug cov tuabneeg coob coob ntawd has rua Yexus has tas, “Xwbfwb, koj has kuas koj cov thwjtim nyob tuabywv!”

⁴⁰Yexus teb puab has tas, “Kuv qha rua mej has tas, yog puab cov nuav nyob tuabywv lawm, tej pobzeb yeej yuav qw.”

⁴¹Thaus Yexus tuaj ze lub nroog Yeluxalees, nwg pum lub nroog, nwg quaj,

⁴²nwg has tas, “Kheev laam koj paub tej kws yuav paab kuas koj nyob kaaj sab lug! Tabsis nwgnuav koj tsi paub tej ntawd.

⁴³Rua qhov muaj ib nub koj cov yeebncuab yuav tuaj puab ntsaa yeej vij koj, hab yuav tuaj txhua ceg kaum tuaj puav koj.

⁴⁴Puab yuav ua rua koj hab koj cov tuabneeg kws nyob huv koj, kuas puamtsuaj taag huv tuabsi. Puab yuav tsi ca ob lub pobzeb nyob sis tsuam ua ke, rua qhov koj tsi ncu txug lub sijhawm kws Vaajtswv lug paab koj lawm.”

⁴⁵Yexus moog rua ntawm lub Tuamtsev hab ntab tej tuabneeg kws tuaj ua luam kuas tawm moog,

⁴⁶hab nwg has rua puab tas, “Vaajtswv txujlug sau tseg has tas, ‘Kuv lub Tuamtsev yog qhov chaw thov Vaajtswv.’ Tabsis mej muab ua chaw rua tubsaab nkaum.”

⁴⁷Yexus naj nub qha huv lub Tuamtsev, cov thawj ntawm cov povthawj, cov xwbfwb kws qha Vaajtswv txuj Kevcai, hab cov thawjcoj ntawm cov pejxeem xaav muab Yexus tua povtseg,

⁴⁸tabsis puab ua tsi tau le caag rua Yexus, rua qhov suavdlawg nyam noog tej kws Yexus qha heev.