Read Hmong Njua Lukas 2 Bible Online

Lukas 2 - Hmong Njua bible

Lukas 2

¹Lub sijhawm ntawd Vaajntxwv Aunkuxatus has kuas cov pejxeem kws nyob thoob plawg txhua lub tebchaws kws yog cov numtswv Loos kaav, kuas suavdlawg tuaj sau npe,

²thawj zag kws muaj sau npe nuav, yog lub sijhawm kws Kulini-us ua nom kaav tebchaws Xilias.

³Txhua tug nyag txawm moog sau npe rua huv nyag lub nroog.

⁴Yauxej tawm huv lub nroog Naxales kws nyob peg Kalilais moog rua huv lub nroog Npelehees kws nyob nraag lub xeev Yudas kws thaus u yug Vaajntxwv Daviv. Yauxej moog rua huv lub nroog ntawd, rua qhov nwg yog Daviv xeebntxwv.

⁵Yauxej coj Malis tug kws nwg tub qhab lawm nrug nwg moog sau npe. Thaus ntawd Malis suab ib plaab mivnyuas.

⁶Thaus obtug tseem nyob huv lub nroog Npelehees, tub txug caij kws Malis yug mivnyuas lawm.

⁷Malis yug nwg tug mivtub hlub, nwg muab khaub dluag qhwv tug mivnyuas hab muab tso pw rua huv ib lub dlaab zaub, rua qhov tej tsev su, tuabneeg tub su puv taag lawm.

⁸Nyob thaaj tsaam ntawd muaj ib cov tuabneeg yug yaaj moog zuv puab cov yaaj tom teb thaus tsaus ntuj.

⁹Tug Tswv ib tug timtswv lug cuag puab, hab tug Tswv tug tshwjchim ci ntsaa ab tuaj rua puab, puab poob sab hab ntshai kawg le,

¹⁰tabsis tug timtswv ntawd has rua puab tas, “Mej tsi xob ntshai! Kuv lug ntawm nuav yog coj txujmoo zoo kws yog txujkev zoo sab kawg nkaus rua txhua tsaav tuabneeg lug qha rua mej paub.

¹¹Nub nua mej tug Cawmseej tub yug lug rua huv Daviv lub nroog lawm, nwg yog Khetos kws yog tug Tswv!

¹²Mej yuav pum ib tug mivnyuas mog qhwv khaub dluag pw huv lub dlaab zaub, qhov ntawd yog lub cim kws qha has tas, tug ntawd yog tug kws kuv has.”

¹³Taamsim ntawd muaj ib paab timtswv ceebtsheej coob coob lug nrug tug timtswv ntawd hu nkauj qhuas Vaajtswv le nuav:

¹⁴“Thov kuas Vaajtswv tug kws nyob sau ntuj ceebtsheej tau koob meej, hab thov kuas cov tuabneeg kws nyob huv nplajteb txhua tug kws ua hum Vaajtswv sab tau nyob kaaj sab lug!”

¹⁵Thaus cov timtswv ncaim puab rov qaab moog rua sau ntuj ceebtsheej lawm, cov tuabneeg yug yaaj txawm sis thaam has tas, “Peb ca le moog rua huv lub nroog Npelehees hab moog saib tej kws tug Tswv qha rua peb lawm.”

¹⁶Puab ceev nrooj moog rua huv lub nroog, puab pum Malis hab Yauxej, hab pum tug mivnyuas pw huv ib lub dlaab zaub.

¹⁷Thaus cov yug yaaj pum tug mivnyuas lawm, puab qha zaaj kws tug timtswv ceebtsheej qha rua puab has txug tug mivnyuas ntawd rua Malis hab Yauxej noog.

¹⁸Txhua tug kws nov zaaj kws cov tuabneeg yug yaaj has ntawd, suavdlawg xaav tsi thoob le.

¹⁹Malis khaws tej lug ntawd hab xaav ntsoov rua nruab sab.

²⁰Thaus cov yug yaaj rov qaab moog, puab hu nkauj qhuas Vaajtswv, rua qhov puab nov hab pum lawv le tug timtswv tau qha rua puab lawm.

²¹Thaus tug mivnyuas ntawd muaj yim nub lawm, yog nub kws muab nwg ua kevcai txav tawv lawv le txuj kevcai txav hab tis nwg lub npe hu ua Yexus, lawv le tug timtswv ceebtsheej qha tseg rua Malis thaus tseem tsi tau xeeb tug mivtub ntawd.

²²Thaus txug lub sijhawm kws Yauxej hab Malis moog ua kevcai ntxuav lawv le Mauxes txuj kevcai, obtug txawm coj tug mivtub Yexus moog peg lub nroog Yeluxalees hab muab nwg fij rua Vaajtswv.

²³Lawv le muaj lug sau tseg rua huv tug Tswv txuj kevcai lawm has tas: “Yuavtsum muab txhua tug tub hlub fij rua tug Tswv.”

²⁴Hab obtug nqaa ib nkawm nquab taug lossis nquab nyeg moog fij lawv le tub muaj lug sau tseg rua huv tug Tswv txuj kevcai lawm.

²⁵Lub sijhawm ntawd muaj ib tug txivneej hu ua Xime-oos nyob huv lub nroog Yeluxalees. Nwg yog ib tug tuabneeg ncaaj nceeg, nwg fwm Vaajtswv hab naj nub tog lub sijhawm kws Vaajtswv lug cawm cov tuabneeg Yixalayees. Vaaj Ntsujplig tug Dlawbhuv nrug nraim Xime-oos,

²⁶hab qha rua nwg has tas, nwg yuav tsi tuag ua ntej kws nwg pum tug Mexiyas kws Vaajtswv coglug tseg.

²⁷Nub ntawd Vaaj Ntsujplig coj Xime-oos moog rua huv lub Tuamtsev. Thaus ntawd Yauxej hab Malis coj obtug tug mivtub Yexus tuaj ua kevcai huv lub Tuamtsev lawv le txuj kevcai qha tseg,

²⁸Xime-oos muab tug mivtub lug puag hab ua Vaajtswv tsaug has tas:

²⁹“Tug Tswv, nwgnuav koj tub ua lawv le koj coglug tseg lawm. Thov koj coj kuv kws yog koj tug tubkhai moog kaaj sab lug,

³⁰rua qhov kuv lub qhovmuag tub pum koj txujkev cawm dlim

³¹kws koj npaaj rua txhua tsaav tuabneeg lawm.

³²Nwg yog lub teeb kws yuav ci moog rua lwm tsaav tuabneeg pum kev, hab yuav ua rua cov tuabneeg Yixalayees kws yog koj tsaav tuabneeg tau ntsejmuag.”

³³Thaus Yexus nam hab txiv nov Xime-oos has txug tug mivtub le ntawd, obtug xaav tsi thoob le.

³⁴Xime-oos foom koob moov rua puab hab has rua Malis kws yog Yexus nam has tas, “Vaajtswv xaiv tug mivtub nuav lug ua kuas cov Yixalayees ntau leej qaug hab ntau leej sawv. Nwg yog ib tug tseemceeb kws Vaajtswv khaiv lug, hab yuav muaj ntau leej tawmtsaam nwg,

³⁵hab nwg yuav muab tej kws tuabneeg xaav huv nruab sab qha rua suavdlawg paub, hab yuav mob koj sab ib yaam le raab ntaaj chob.”

³⁶Muaj ib tug puj ntsuag hu ua Aanas, nwg yog ib tug cev Vaajtswv lug, nwg yog Fanu-ees kws yog xeem Aseles tug ntxhais. Nwg laug heev lawm, thaus nwg tseem hluas, nwg yuav quasyawg tau xyaa xyoo xwb, nwg tug quasyawg tuag lawm. Nwgnuav nwg noobnyoog muaj yim caum plaub xyoos. Nwg naj nub naj mo moog pehawm Vaajtswv huv lub Tuamtsev. Nwg ua kevcai yoo mov hab thov Vaajtswv, nwg tsi tawm moog qhov twg le.

³⁷

³⁸Taamsim ntawd Aanas txawm tuaj txug, hab nwg ua Vaajtswv tsaug hab has txug tug mivtub ntawd rua txhua tug kws taabtom tog Vaajtswv lug cawm cov tuabneeg kws nyob huv lub nroog Yeluxalees kuas dlim moog.

³⁹Thaus Yauxej hab Malis ua txhua yaam tav lawv le tug Tswv txuj kevcai lawm, obtug rov qaab moog tsev rua peg lub nroog Naxales kws nyob huv lub xeev Kalilais.

⁴⁰Tug mivtub ntawd luj hlub zoo, nwg muaj tswvyim hab Vaajtswv foom koob moov rua nwg.

⁴¹Yexus nam hab txiv naj xyoo moog ua Kevcai Hlaa Dlhau nraag lub nroog Yeluxalees.

⁴²Thaus Yexus noobnyoog muaj kaum ob xyoos, puab txawm rov moog ua kevcai nraag lub nroog Yeluxalees lawv le obtug ibtxwm ua lug lawm.

⁴³Thaus dlhau lub sijhawm ua kevcai Hlaa Dlhau lawm, obtug rov qaab moog tsev, tabsis tug mivtub Yexus tseem nyob huv lub nroog Yeluxalees. Nwg nam hab nwg txiv tsi paub.

⁴⁴Obtug xaav has tas Yexus nrug cov tuabneeg kws nrug obtug tuaj rov qaab moog lawm, obtug moog tau ib nub ke, obtug maam le nrhav saib nwg puas nrug obtug cov kwvtij hab cov phoojywg.

⁴⁵Tabsis obtug nrhav tsi pum nwg, obtug txhaj rov qaab moog nrhav nraag lub nroog Yeluxalees.

⁴⁶Ces nub peb obtug txhaj nrhav tau nwg nyob huv lub Tuamtsev, nwg nrug cov xwbfwb nyob ua ke, nwg noog puab qha hab nug puab.

⁴⁷Txhua tug kws nov nwg teb, xaav tsi thoob rua nwg tej kev txawj ntse ntawd le.

⁴⁸Thaus Yexus nam hab txiv pum nwg, obtug kuj xaav tsi thoob le hab. Nwg nam txawm has rua nwg tas, “Mivtub, ua le caag koj yuav ua le nuav rua wb? Koj txiv wb nrhav koj hab txhawj koj kawg le.”

⁴⁹Nwg teb obtug has tas, “Meb yuav nrhav kuv ua dlaabtsi? Meb tsi paub has tas kuv yuav nyob huv kuv Txiv lub tsev nua los?”

⁵⁰Tabsis obtug tsi totaub tej lug kws nwg has ntawd.

⁵¹Yexus nrug obtug rov qaab moog rua peg lub nroog Naxales, hab nwg noog obtug lug. Nwg nam khaws tej lug ntawd rua nruab sab.

⁵²Yexus luj hlub zoo, muaj tswvyim, nwg ua hum Vaajtswv sab hab hum tuabneeg sab.