Read Hmong Njua Lukas 20 Bible Online

Lukas 20 - Hmong Njua bible

Lukas 20

¹Muaj ib nub thaus Yexus qhuab qha cov tuabneeg huv lub Tuamtsev, hab qha Txujmoo Zoo, cov thawj ntawm cov povthawj, cov xwbfwb kws qha Vaajtswv txuj Kevcai, hab cov txwjlaug tuaj

²nug Yexus has tas, “Koj qha rua peb saib, ua le caag koj muaj cai ua tej nuav? Leejtwg tso cai rua koj?”

³Yexus teb puab has tas, “Kuv yuav nug mej ib lus. Mej qha rua kuv saib,

⁴leejtwg tso cai rua Yauhaas muab tuabneeg ua kevcai raus dlej, Vaajtswv lossis tuabneeg?”

⁵Puab txawm sis thaam has tas, “Peb yuav has le caag? Yog peb has tas ‘Vaajtswv kuas Yauhaas ua,’ nwg yuav has rua peb tas, ‘Ua le caag mej tsua tsi ntseeg Yauhaas tej lug?’

⁶Yog peb has tas, ‘Tuabneeg kuas Yauhaas ua,’ Cov tuabneeg coob coob kws nyob ntawd nuav yuav muab pobzeb ntaus peb, rua qhov suavdlawg yeej paub has tas, Yauhaas yog ib tug cev Vaajtswv lug.”

⁷Puab teb has tas, “Peb tsi paub, sov leejtwg tso cai rua nwg.”

⁸Yexus has rua puab tas, “Yog le ntawd, kuv yuav tsi qha rua mej has tas, leejtwg tso cai rua kuv ua tej nuav.”

⁹Yexus has ib zaaj lug pevtxwv rua suavdlawg noog has tas, “Muaj ib tug txivneej cog tau ib vaaj txiv maab. Nwg muab tso rua ib cov tuabneeg tu sis faib cov txiv. Ces nwg txawm moog rua lwm tebchaws tau ntev loo.

¹⁰Thaus txug lub caij dle txiv maab, nwg khaiv ib tug tubkhai moog cuag cov tuabneeg kws tu lub vaaj hab sau tej txiv maab kws yog nwg tug lug rua nwg. Tabsis cov tuabneeg kws tu lub vaaj muab tug tubkhai ntawd ntaus, hab ntab tug tubkhai ntawd rov qaab lug tsev teg dlawb teg nplag.

¹¹Tug tswv vaaj tsua khaiv dlua ib tug tubkhai moog, tabsis cov tuabneeg kws tu lub vaaj muab tug tubkhai ntawd ntaus, ua limham rua nwg, hab kuas nwg rov qaab lug teg dlawb teg nplag.

¹²Tug tswv vaaj rov khaiv dlua tug tubkhai peb moog, cov tuabneeg kws tu lub vaaj muab tug tubkhai ntawd ntaus nqaj ndluag ntshaav nrug, hab muab nwg pov rua saab ntug vaaj nrau.

¹³Ces tug tswv vaaj has tas, ‘Kuv yuav ua le caag? Yog kuv khaiv kuv tug tub kws kuv hlub moog, nyaj puab yuav fwm kuv tug tub!’

¹⁴Tabsis thaus cov tuabneeg kws tu lub vaaj pum tug tswv tug tub tuaj, puab txawm sis ntxhi has tas, ‘Tug nuav yog tug tswv vaaj tug tub, peb ca le muab nwg tua povtseg, peb txhaj tau nwg lub vaaj!’

¹⁵Cov tuabneeg kws tu lub vaaj muab tug tub ntawd thawb rua saab ntug vaaj nrau, hab muab nwg tua povtseg.” Yexus nug has tas, “Tug tswv vaaj yuav ua le caag rua cov tuabneeg kws tu lub vaaj ntawd?

¹⁶Tug tswv vaaj yeej yuav muab cov tuabneeg kws tu lub vaaj tua povtseg, hab muab lub vaaj ntawd rua lwm cov tu.” Thaus suavdlawg nov Yexus has le ntawd, puab has tas, “Nyaj yuav tsi muaj le ntawd.”

¹⁷Yexus saib puab hab nug has tas, “Vaajtswv txujlug has le caag? ‘Lub pobzeb kws cov kws ua tsev muab povtseg, lub ntawd tub lug ua lub thawj lawm.’

¹⁸Yog leejtwg qaug moog tsoo lub pobzeb ntawd, tug ntawd lub cev yuav tawg taag; yog lub pobzeb ntawd poob lug tsoo leejtwg, tug ntawd lub cev yuav ntsoog taag huv tuabsi.”

¹⁹Cov xwbfwb kws qha Vaajtswv txuj Kevcai hab cov thawj ntawm cov povthawj xaav nteg Yexus, rua qhov puab paub has tas, zaaj lug pevtxwv kws Yexus has ntawd, yog nwg tshev puab; tabsis puab ntshai cov pejxeem.

²⁰Puab tog saib puas muaj sijhawm zoo nteg Yexus. Puab ndlav qee leej kuas ua txuj ua le tuabneeg ncaaj nceeg moog nug Yexus, saib nwg puas yuav has txhum, puab txhaj zoo nteg nwg coj moog rua tug tswv xeev kws muaj fwjchim.

²¹Cov tuabneeg kws puab ndlav moog nug Yexus has tas, “Xwbfwb, peb paub has tas tej lug kws koj has, hab tej kws koj qha puavleej yog huv tuabsi. Peb paub has tas koj tsi xaiv leejtwg ntsejmuag le, tabsis koj qha Vaajtswv txujlug tseeb rua suavdlawg.

²²Koj sim qha rua peb saib, yog peb them se rua Xixas puas txhum peb txuj kevcai los tsi txhum?”

²³Tabsis Yexus tub xub paub puab lub sab lawm, nwg has rua puab tas,

²⁴“Mej ca le muab ib lub nyaj rua kuv saib, lub ntsejmuag hab lub npe kws sau rua ntawm lub nyaj nuav yog leejtwg lub?” Puab teb has tas, “Yog Xixas lub.”

²⁵Yexus has rua puab tas, “Yaam kws yog Xixas le, mej ca le muab rua Xixas, hab yaam kws yog Vaajtswv le, mej ca le muab rua Vaajtswv.”

²⁶Puab nrhav tsi tau ib qho kuas Yexus has txhum taabmeeg suavdlawg; puab xaav tsi thoob rua tej lug kws Yexus has ntawd, puab txawm nyob tuabywv lawm.

²⁷Cov Xadukais qee leej kws tsi ntseeg has tas tuabneeg yuav sawv huv qhov tuag rov qaab lug, puab tuaj cuag Yexus hab nug has tas,

²⁸“Xwbfwb, Mauxes sau txuj Kevcai nuav qha peb has tas, ‘Yog tug quasyawg tuag lawm, nwg tug quaspuj tseem tsi tau muaj mivnyuas, nwg tug kwv yuavtsum yuav tug namtij, tug tijlaug txhaj muaj xeebntxwv.’

²⁹Thaus muaj xyaa tug kwvtij, tug tijlaug yuav quaspuj tabsis tsi tau muaj mivnyuas, tug tijlaug tuag lawm,

³⁰tug kwv yuav tug namtij,

³¹tug kwv peb yuav tug namtij ntawd hab. Xyaa leej kwvtij puavleej yuav tug quaspuj ntawd, puab puavleej tuag taag, tsi tau muaj ib tug mivnyuas le.

³²Thaus kawg tug quaspuj ntawd txawm tuag lawm hab.

³³Yog le ntawd, nub kws cov tuabneeg tuag sawv rov qaab lug, tug quaspuj ntawd yuav yog leejtwg tug quaspuj? Rua qhov puab xyaa leej puavleej tau yuav nwg huv tuabsi lawm.”

³⁴Yexus teb has tas, “Cov quaspuj hab quasyawg tam nuav txhaj le sis yuav xwb,

³⁵tabsis cov quaspuj hab cov quasyawg kws tsimnyog sawv lug tau txujsa hab moog nyob tam tom ntej, cov ntawd tsi sis yuav le lawm.

³⁶Puab yuav zoo ib yaam le cov timtswv ceebtsheej hab yuav tsi tuag le. Puab yog Vaajtswv cov mivnyuas, rua qhov puab tub sawv huv qhov tuag rov qaab lug lawm.

³⁷Thaus Mauxes has txug cov nplaim tawg kws cig ntawm tsob ntoo, nwg hu tug Tswv has tas, ‘Anplahaas tug Vaajtswv, Ixaj tug Vaajtswv, hab Yakhauj tug Vaajtswv.’

³⁸Zaaj kws nwg has ntawd tub qha rua suavdlawg has tas, cov tuabneeg kws tuag lawm, yeej yuav sawv rov qaab lug tau txujsa. Vaajtswv yog cov tuabneeg caj tug Vaajtswv, nwg tsi yog cov tuabneeg tuag tug Vaajtswv. Lawv le Vaajtswv saib, txhua tug puavleej muaj sa nyob.”

³⁹Cov xwbfwb kws qha Vaajtswv txuj Kevcai qee leej has tas, “Xwbfwb, koj teb yog lawm!”

⁴⁰Puab has le ntawd vim puab tsi muaj cuabkaav nug ntxiv lawm.

⁴¹Yexus nug puab has tas, “Yuav ua le caag has tau tas, tug Mexiyas yog Daviv tug Tub?

⁴²Rua qhov Daviv sau tseg rua huv phoo Ntawv Nkauj has tas: ‘Tug Tswv has rua kuv tug Tswv has tas: Koj ca le lug nyob ntawm kuv saab xis

⁴³moog txug thaus kuv muab koj cov yeebncuab lug rua koj tsuj.’

⁴⁴Daviv tub hu nwg has tas ‘Tug Tswv;’ yuav ua le caag has tau tas, tug Mexiyas yog Daviv tug Tub?”

⁴⁵Thaus cov tuabneeg taabtom noog Yexus qha, Yexus has rua nwg cov thwjtim has tas,

⁴⁶“Mej yuavtsum ceevfaaj, tsi xob ua le cov xwbfwb kws qha Vaajtswv txuj Kevcai, puab nyam naav tej tsho ntev moog rua nuav rua u, hab thaus puab moog tom tej kab, puab nyam kuas suavdlawg fwm puab; thaus puab moog huv tej tsev saablaaj lossis moog nrug luas noj luas haus, puab moog xaiv nyob lub chaw zoo xwb;

⁴⁷Puab txhaav tej puj ntsuag tug yuav, hab puab thov Vaajtswv ntev ntev kuas suavdlawg qhuas puab! Puab yeej yuav raug txim nyaav dlua lwm tug huv tuabsi!”