Read Hmong Njua Lukas 24 Bible Online

Lukas 24 - Hmong Njua bible

Lukas 24

¹Nubkaaj thaus kaaj ntug txoog, cov quaspuj txawm nqaa tej tshuaj tsw qaab kws puab tub npaaj tseg hab puab moog rua tom lub qhov ntxaa.

²Puab pum dlaim txag zeb kws npug lub rooj ntxaas tub dlov rua ib saab lawm,

³puab moog saib huv; tabsis tsi pum Tswv Yexus lub cev lawm.

⁴Puab sawv ntsug huv hab xaav tsi thoob le, taamsim ntawd muaj ob tug txivneej naav rig tsho ci ntsaa ab lug sawv ntawm puab ib saab.

⁵Cov quaspuj ntawd ntshai kawg, hab nyo taubhau rua huv aav saib tsi taug ob tug txivneej ntawd le, ob tug txivneej ntawd has rua puab tas, “Ua le caag mej tuaj nrhav tug tuabneeg caj ntawm cov tuabneeg tuag nuav?

⁶Nwg tsi nyob ntawm nuav; nwg tub sawv lawm. Mej ncu ntsoov tej lug kws nwg has rua mej, thaus tseem nyob peg lub xeev Kalilais has tas,

⁷‘Yeej yuav muaj tuabneeg nteg Tuabneeg Leej Tub coj moog rua cov tuabneeg txhum muab nwg ntsa rua sau ntoo khaublig, hab peb nub tom qaab, nwg yuav sawv huv qhov tuag rov qaab lug.’ ”

⁸Cov quaspuj ntawd ncu dlheev txug Yexus tej lug,

⁹hab puab tawm huv lub qhov ntxaa rov lug qha tej ntawd rua kaum ib tug thwjtim hab cov tuabneeg kws nrug puab nyob noog.

¹⁰Cov quaspuj ntawd yog, Malis Madalas, Yau-anas, hab Malis kws yog Yakaunpaus nam; hab muaj dlua ob peb tug quaspuj lug qha tej nuav rua cov timthawj.

¹¹Tabsis cov thwjtim xaav has tas, tej kws cov quaspuj ntawd has yog tso dlaag xwb, puab txhaj tsi ntseeg cov quaspuj ntawd tej lug.

¹²Tabsis Petus ca le sawv tseeg dlha moog rua tom lub qhov ntxaa; nwg nyo xauj huv lub qhov ntxaa, ua cav tsi pum dlaabtsi, tsuas pum cov ntaub kws qhwv Yexus lub cev nyob huv xwb. Nwg rov qaab lug tsev, hab xaav tsi thoob rua tej kws nwg pum ntawd.

¹³Tuab nub ntawd Yexus ob tug thwjtim taabtom taug kev moog rua peg lub zog Ema-us kws nyob nrug dleb ntawm lub nroog Yeluxalees kwvlaam le kaum ib kilumev,

¹⁴hab obtug sis thaam txug tej kws tub tshwm muaj lawm.

¹⁵Thaus obtug tseem sis thaam hab sis nug txug zaaj ntawd, Yexus txawm lug nrug obtug taug kev moog;

¹⁶obtug pum Yexus, tabsis zoo le muaj tej yaam ua rua obtug cim tsi tau nwg.

¹⁷Yexus nug obtug has tas, “Meb pheej thaam dlaabtsi taug kev?” Obtug txawm nreg ua ntsejmuag mluag mlob.

¹⁸Ob tug ntawd, tug kws hu ua Kelupas, nug Yexus has tas, “Taagnrho cov tuabneeg kws nyob huv lub nroog Yeluxalees, puavleej paub tej kws nyavnyuas muaj tau ob peb nub lug nuav huv tuabsi, tsuas yog koj tuab leeg txhaj tsi paub tej ntawd xwb los?”

¹⁹Yexus nug obtug has tas, “Tej ntawd yog dlaabtsi?” Obtug teb has tas, “Tej ntawd yog tej xwm kws Yexus tug kws yog tuabneeg Naxales tub raug lawm. Nwg yog ib tug cev Vaajtswv lug. Vaajtswv hab tej tuabneeg suavdlawg puavleej pum has tas, nwg tej lug muaj fwjchim hab nwg ua tau tej txujci tseemceeb.

²⁰Peb cov thawj ntawm cov povthawj hab cov numtswv muab nwg rua Philaj txav txim tua nwg povtseg, hab puab muab nwg ntsa rua sau ntoo khaublig.

²¹Peb ca sab has tas nwg yog tug kws yuav paab cov Yixalayees dlim! Dlua le ntawd, txij le muaj tej ntawd lug, tub tau peb nub rua nub nua lawm.

²²Cov quaspuj kws yog peb paab qee leej tau ua rua peb xaav tsi thoob le; thaus kaaj ntug txoog puab moog rua tom lub qhov ntxaa,

²³tabsis puab tsi pum Yexus lub cev lawm. Puab rov lug qha rua suavdlawg has tas, puab pum cov timtswv ceebtsheej qha rua puab has tas, Yexus tub rov muaj sa lawm.

²⁴Peb cov muaj qee leej moog saib lub qhov ntxaa, hab pum muaj lawv le cov quaspuj ntawd has tag, tabsis puab tsi pum Yexus.”

²⁵Ces Yexus has rua obtug tas, “Ua le caag meb yuav ruag ua luaj le, ua le caag meb tsi ntseeg tej kws cov cev Vaajtswv lug tau qha tseg lawm!

²⁶Puas yog tug Mexiyas yeej yuav raug tsimtxom hab tom qaab ntawd nwg yuav tau nwg tug tshwjchim kws ci ntsaa ab?”

²⁷Yexus txawm pav Vaajtswv txujlug kws has txug nwg, nwg xub pib qha tej kws Mauxes sau hab tej kws cov cev Vaajtswv lug txhua tug sau tseg lawm.

²⁸Thaus puab moog yuav txug lub zog kws puab moog ntawd, Yexus txawm ua le nwg yuav dlhau plawg moog.

²⁹Tabsis obtug cheem has tas, “Koj nrug wb su ntawm nuav, rua qhov tub yuav tsaus ntuj.” Yexus txhaj moog nrug obtug su.

³⁰Thaus Yexus nrug obtug nyob noj mov ntawm rooj, Yexus muab ib lub ncuav lug, nwg ua Vaajtswv tsaug, hab muab faib rua obtug noj.

³¹Yaam kws plooj ntawm obtug lub qhovmuag txawm tshem hlo lawm, obtug txhaj paub has tas yog Yexus. Taamsim ntawd Yexus ca le pluj ndlais ntawm obtug moog lawm.

³²Obtug sis thaam has tas, “Thaus peb taug kev tuaj, nwg nrug wb thaam hab pav Vaajtswv txujlug rua wb noog, mas wb lub sab kub lug cuag le suavtawg hlawv puas yog?”

³³Taamsim ntawd obtug txawm sawv tseeg rov qaab moog rua nraag lub nroog Yeluxalees, hab moog rua ntawm kaum ib tug thwjtim, hab lwm tug kws tuaj nyob ua ke ntawd,

³⁴hab puab sis thaam has tas, “Tug Tswv tub sawv rov lug lawm tag tag! Nwg tub lug tshwm rua Ximoos pum lawm!”

³⁵Obtug txawm pav tej kws obtug pum thaus obtug taug kev moog, hab thaus tug Tswv muab ncuav ndlais faib rua obtug noj, obtug txhaj paub has tas Yog Yexus tag rua puab noog.

³⁶Thaus obtug tseem taabtom pav txug tej kws obtug pum lawm rua cov thwjtim noog, taamsim ntawd tug Tswv lug sawv nruab nraab ntawm puab, hab has rua puab tas, “Mej ca le nyob kaaj sab lug.”

³⁷Puab poob sab hab ntshai kawg, puab xaav has tas yog puab pum dlaab.

³⁸Tabsis Yexus has rua puab tas, “Ua le caag mej ntshai ua luaj le? Vim le caag mej tsi ntseeg?

³⁹Mej ca le saib kuv txhais teg hab kuv txhais kutaw, mej txhaj yuav paub has tas yog kuv tag. Mej ca le cev teg kov kuv, mej txhaj le yuav paub, rua qhov dlaab tsi muaj nqaj tsi muaj txhaa le kws mej pum kuv muaj nuav.”

⁴⁰Thaus Yexus has le ntawd, nwg txawm xyaab hlo nwg txhais teg hab txhais kutaw rua puab saib.

⁴¹Puab zoo sab kawg hab xaav tsi thoob le, tabsis puab tseem tsi tau ntseeg tag; Yexus nug puab has tas, “Nyob ntawm nuav mej puas muaj dlaabtsi noj?”

⁴²Puab muab ib dlaim nqaj ntseg ci cev rua Yexus,

⁴³Yexus txais moog noj taabmeeg puab suavdlawg.

⁴⁴Yexus has rua puab tas, “Tej nuav yog tej kws kuv tub qha rua mej thaus kuv tseem nrug mej nyob: rua qhov txhua yaam kws Mauxes has hab tej kws cov cev Vaajtswv lug sau tseg rua huv phoo Ntawv Nkauj kws has txug kuv ntawd puavleej yuav tav.”

⁴⁵Yexus txawm ua rua puab totaub Vaajtswv txujlug,

⁴⁶hab Yexus has rua puab tas, “Tub muaj lug sau tseg lawm has tas: Tug Mexiyas yeej yuav raug kev tsimtxom hab peb nub tom qaab, nwg yuav sawv huv qhov tuag rov qaab lug,

⁴⁷mej yuavtsum tuav nwg lub npe moog qha txujmoo zoo rua txhua tsaav tuabneeg huv qaab ntuj nuav has tas, Vaajtswv yuav zaam txim rua tug kws tso nwg tej kev txhum tseg. Mej ca le pib qha huv lub nroog Yeluxalees.

⁴⁸Mej yuavtsum ua timkhawv qha tej nuav rua suavdlawg paub.

⁴⁹Kuv yuav muab yaam kws kuv Txiv coglug tseg lawm rua mej. Tabsis mej yuavtsum nyob huv lub nroog Yeluxalees tog moog txug thaus kws mej tau lub fwjchim kws yuav lug sau ntuj lug.”

⁵⁰Yexus coj puab tawm huv lub nroog Yeluxalees moog txug nraag lub zog Npethanis. Nwg tsaa teg foom koob moov rua puab.

⁵¹Thaus nwg taabtom foom koob moov rua puab, Vaajtswv txawm coj nwg ncaim puab moog rua sau ntuj lawm.

⁵²Puab pehawm nwg hab rov moog rua peg lub nroog Yeluxalees, puab zoo sab kawg le,

⁵³hab puab naj nub moog nyob huv lub Tuamtsev ua Vaajtswv tsaug.