Read Hmong Njua Lukas 6 Bible Online

Lukas 6 - Hmong Njua bible

Lukas 6

¹Nub Xanpataus Yexus hab nwg cov thwjtim taabtom moog txug huv ib dlaim teb npleg, Yexus cov thwjtim txawm dle nplej tev noj.

²Cov Falixais qee leej nug has tas, “Vim le caag mej ua tej kws peb txuj Kevcai txwv tsi pub ua rua Nub Xanpataus?”

³Yexus teb puab has tas, “Mej tsi tau nyeem zaaj kws Daviv ua thaus Daviv hab nwg cov tuabneeg tshaib plaab los?

⁴Daviv moog rua huv Vaajtswv lub Tuamtsev, nwg muab tej ncuav kws tub muab fij rua Vaajtswv lawm noj, hab muab faib rua nwg cov tuabneeg noj. Tabsis peb txuj kevcai yeej tsi pub leejtwg noj tej ncuav ntawd, tsuas yog cov povthawj txhaj noj tau xwb.”

⁵Hab Yexus xaus lug has tas, “Tuabneeg leej Tub yog tug Tswv Nub Xanpataus.”

⁶Muaj dlua ib nub yog nub Xanpataus, Yexus moog qhuab qha huv ib lub tsev saablaaj. Muaj ib tug txivneej kws saab teg xis qhuav, nwg tuaj nyob huv hab.

⁷Cov xwbfwb kws qha Vaajtswv txuj Kevcai hab cov Falixais xaav nrhav txim rua Yexus, puab txawm saib Yexus puas khu mob nub Xanpataus.

⁸Tabsis Yexus tub paub tej kws puab xaav lawm, nwg txhaj has rua tug tuabneeg qhuav teg ntawd has tas, “Koj ca le sawv lug tom hauv ntej nuav” Tug txivneej ntawd txawm sawv tseeg lug.

⁹Yexus has rua puab tas, “Kuv nug mej saib, peb txuj Kevcai qha has tas nub Xanpataus ca peb ua zoo lossis ua phem? Cawm tuabneeg txujsa lossis ca txujsa tu?”

¹⁰Yexus tig moog saib cov tuabneeg ntawd txhua tug, Yexus has rua tug txivneej ntawd tas, “Koj ca le xyaab hlo koj txhais teg.” Nwg txawm xyaab hlo nwg txhais teg, ces nwg txhais teg txawm zoo le qub lawm.

¹¹Puab cov ntawd chim heev, puab txawm saablaaj saib yuav ua le caag rua Yexus.

¹²Tom qaab ntawd, muaj ib nub Yexus moog thov Vaajtswv peg roob, hab nwg nyob peg thov Vaajtswv ib mos.

¹³Thaus kaaj ntug Yexus hu cov thwjtim lug ntawm nwg, nwg xaiv puab kaum ob leeg, nwg hu puab ua cov timthawj.

¹⁴Puab cov ntawd yog: Ximoos, (tug kws Yexus tis npe hu ua Petus) hab nwg tug kwv Aadales; Yakaunpaus, Yauhaas, Filis, Npataulaumais,

¹⁵Mathais, Thaumas, Yakaunpaus kws yog Alafais tug tub, Ximoos (tug kws xaav kuas nwg tsaav tuabneeg muaj kev ywjpheej),

¹⁶Yudas kws yog Yakaunpaus tug tub, hab Yudas Ixakali-us tug kws ntxeev sab rua Yexus.

¹⁷Yexus hab nwg cov timthawj nqeg peg roob lug nrug nwg ib paab thwjtim coob coob sawv ua ke ntawm ib qhov chaw taj taj. Muaj tuabneeg coob coob tuaj huv lub xeev Yudas, huv lub nroog Yeluxalees, huv lub nroog Tiles hab huv lub nroog Xidoos kws nyob ntawm ntug havtxwv tuaj,

¹⁸puab tuaj noog Yexus qhuab qha hab thov kuas Yexus khu puab tej mob. Cov tuabneeg kws raug dlaab tsimtxom los tuaj cuag Yexus, hab Yexus khu puab txhua tug zoo huv tuabsi.

¹⁹Cov tuabneeg coob coob ntawd kov Yexus, rua qhov muaj fwjchim tawm ntawm Yexus tuaj khu txhua tug kws muaj mob zoo huv tuabsi.

²⁰Yexus tsaa qhovmuag saib nwg cov thwjtim hab has rua puab tas, “Mej cov kws txomnyem, mej tau koob moov, rua qhov Vaajtswv lub Tebchaws yog mej tug!

²¹Mej cov kws nwgnuav tshaib nqhes mej yuav tau koob moov, rua qhov mej yuav tau noj tsau npo! Mej cov kws nwgnuav quaj ntsuag; mej yuav tau koob moov, rua qhov mej yuav muaj lub ntsejmuag luag.

²²“Thaus luas ntxub mej, hab ntab kuas mej tsiv, thuam mej hab has tas mej yog cov tuabneeg ua phem, vim mej ntseeg Tuabneeg leej Tub, mej yuav tau koob moov!

²³Thaus muaj le ntawd, mej ca le zoo sab hab dlha luag ntxhi, rua qhov Vaajtswv tub npaaj nqe zug ntau kawg le ca sau ntuj ceebtsheej rua mej lawm. Rua qhov puab cov yawmkoob tub ua ib yaam le ntawd rua cov kws cev Vaajtswv lug thaus u lawm hab.

²⁴Mej cov kws nwgnuav npluanuj mej yuav raug kev txomnyem, rua qhov mej tub tau zoo lug lawm!

²⁵Mej cov kws nwgnuav tau noj tsau npo mej yuav raug kev txomnyem, rua qhov mej yuav tshaib nqhes. Mej cov kws nwgnuav muaj lub ntsejmuag luag, mej yuav raug kev txomnyem, rua qhov mej yuav muaj kev nyuaj sab quaj ntsuag!

²⁶“Thaus muaj tuabneeg qhuas mej, mej yuav raug kev txomnyem, rua qhov mej tej yawmkoob tub has ib yaam nkaus le ntawd rua cov kws cevlug tsi tseeb thaus u lawm hab.

²⁷“Tabsis kuv has rua mej cov kws noog kuv qha has tas, hlub mej cov yeebncuab hab ua zoo rua cov kws ntxub mej,

²⁸foom koob moov rua cov tuabneeg kws tshev mej, hab thov Vaajtswv paab rua cov tuabneeg kws tsimtxom mej.

²⁹Yog leejtwg ntaus koj ib saab plhu, koj ca le tig saab tod rua nwg ntaus hab. Yog leejtwg txhaav koj lub tsho kws naav tuaj saab nrau, koj ca le hle lub tsho kws naav tuaj saab huv rua nwg hab.

³⁰Txhua tug kws thov mej ib yaam dlaabtsi, mej ca le muab rua puab, hab yog leejtwg muab mej ib yaam dlaabtsi lawm, mej tsi xob kuas nwg xaa rov qaab tuaj rua mej.

³¹Yog mej xaav kuas lwm tug ua le caag rua mej, mej yuavtsum ua ib yaam le ntawd rua lwm tug hab.

³²“Yog mej tsuas hlub cov kws hlub mej xwb, mej xaav has tas mej yuav tau koob moov nua los? Txawm yog cov tuabneeg txhum los puab tub paub hlub cov kws hlub puab hab!

³³Yog mej tsuas ua zoo rua cov kws ua zoo rua mej xwb, mej xaav has tas, mej yuav tau koob moov nua los? Txawm yog cov tuabneeg txhum los puab tub paub ua le ntawd hab!

³⁴Hab yog mej tsuas qev rua cov kws mej ca sab has tas, puab yuav them taug rov rua mej xwb, mej xaav has tas, mej yuav tau koob moov nua los? Txawm yog cov tuabneeg txhum los puab ib leeg tub kaam qev rua ib leeg hab, hab puab ca sab has tas yuav tau rov qaab puv ntoob le qub.

³⁵Tabsis mej yuavtsum hlub mej cov yeebncuab hab ua zoo rua puab; mej ca le qev rua puab tsi xob ca sab has tas yuav tau puv ntoob le qub rov qaab. Yog mej ua le ntawd, mej yuav tau nqe zug ntau, hab mej yuav tau ua Vaajtswv tug kws muaj Fwjchim Luj kawg nkaus cov mivnyuas. Rua qhov Vaajtswv tseem hlub cov tuabneeg kws ua phem hab cov kws tsi ncu Vaajtswv tshaav ntuj.

³⁶Mej yuavtsum muaj lub sab taabncuab ib yaam le mej leej Txiv tug kws muaj lub sab taabncuab.

³⁷“Mej tsi xob txav txim rua lwm tug, Vaajtswv txhaj yuav tsi txav txim rua mej; mej tsi xob rau txim rua lwm tug, Vaajtswv txhaj yuav tsi rau txim rua mej; zaam txim rua lwm tug, Vaajtswv txhaj yuav zaam txim rua mej.

³⁸Mej pub rua lwm tug, Vaajtswv txhaj yuav pub rua mej. Vaajtswv yuav foom koob moov nplua mag rua mej, kuas mej muaj nplua mag siv tsi taag. Mej muab lub luaj le caag luj rua lwm tug lawm, Vaajtswv yuav muab lub luaj le ntawd luj rua mej.”

³⁹Hab Yexus qha ib zaaj lug pevtxwv rua puab has tas: “Ib tug dligmuag yeej coj tsi tau ib tug dligmuag kev le; yog nwg ua le ntawd, obtug yeej yuav moog poob kwj dleg xwb.

⁴⁰Tsi muaj ib tug tub kawm ntawv kws yuav paub tshaaj nwg tug xwbfwb; tabsis txhua tug kws kawm tav lawm, nwg yeej yuav paub ib yaam le nwg tug xwbfwb.

⁴¹“Vim le caag koj yuav saib qhov nyuas moov ntoo kws nyob huv koj tug kwvtij lub qhovmuag, tabsis koj tub tsi paub has tas muaj ib yaav ntoo nyob huv koj lub qhovmuag?

⁴²Ua le caag koj tseem yuav has rua koj tug kwvtij has tas, ‘Ca kuv paab muab qhov nyuas moov ntoo huv koj lub qhovmuag tawm,’ tabsis koj tub tsi pum yaav ntoo kws nyob huv koj lub qhovmuag. Tug tuabneeg ntsejmuag ncaaj sab nkhaus! Koj ca le xub muab yaav ntoo kws nyob huv koj lub qhovmuag tawm tsaiv, koj txhaj yuav pum kev moog muab qhov nyuas moov ntoo kws nyob huv koj tug kwvtij lub qhovmuag.

⁴³“Tsob ntoo zoo yeej tsi txi cov txiv phem lossis tsob ntoo phem yeej txi tsi tau cov txiv zoo.

⁴⁴Yog yug pum cov txiv, yug yeej paub has tas, tsob ntoo ntawd yog tsob phem lossis tsob zoo. Yug yeej tsi dle txiv ncuav pas ntawm tsob ntoo xuavpaug paaj ntshaa, hab tsi dle txiv maab ntawm tsob xuavpaug nqai hlau.

⁴⁵Tug tuabneeg sab zoo yeej has tej lug zoo. Tug tuabneeg sab phem yeej has tej lug phem, rua qhov nwg lub sab xaav le caag, nwg lub ncauj has le ntawd.

⁴⁶“Vim le caag mej hu kuv has tas, ‘Tug Tswv, tug Tswv,’ tabsis mej tsua tsi ua lawv le kuv tej lug?

⁴⁷Txhua tug kws lug cuag kuv, noog kuv lug hab ua lawv le kuv qha, kuv yuav qha rua mej paub has tas, tug ntawd zoo le caag?

⁴⁸Tug ntawd zoo ib yaam le tug kws ua tsev, nwg khawb qhov ncej tub tub, muab pobzeb lug pua, maam le muab ncej lug txhus rua. Thaus dlej fuam lug ntaus lub tsev ntawd, lub tsev tsi ua zug, rua qhov nwg ua lub tsev ntawd khov heev lawm.

⁴⁹Tug kws nov kuv tej lug, tabsis tsi ua lawv le, tug ntawd zoo ib yaam le tug kws ua tsev kws khawb qhov ncej tsi tub. thaus dlej fuam lug ntaus lub tsev, lub tsev ntawd txawm qaug hab puamtsuaj taag huv tuabsi lawm.”