Read Hmong Njua Lukas 8 Bible Online

Lukas 8 - Hmong Njua bible

Lukas 8

¹Tom qaab ntawd Yexus moog txhua nrho huv tej nroog hab tej zog, Yexus qha Txujmoo Zoo kws has txug Vaajtswv lub Tebchaws. Yexus kaum ob tug thwjtim nrug nwg moog,

²hab cov quaspuj qee leej kws yaav taag lug raug dlaab kws Yexus ntab dlaab tawm hab khu puab tej mob zoo lawm. Cov quaspuj ntawd yog Malis (kws hu ua Madalas), nwg yog tug kws yaav taag lug, Yexus ntab xyaa tug dlaab tawm lawm;

³Yau-anas kws yog Khuxas tug quaspuj. Khuxas yog tug kws zuv Helauj lub tsev; Xuxaanas, hab muaj dlua ob peb tug quaspuj, puab yog cov kws pheej muab puab tej nyaj hab qhov txhua chaw paab Yexus hab nwg cov thwjtim.

⁴Pheej muaj tuabneeg tuaj huv tej nroog tuaj cuag Yexus tsi tu ncua le. Thaus cov tuabneeg tuaj ua ke coob coob lawm, Yexus has ib zaaj lug pevtxwv rua puab has tas,

⁵“Muaj ib tug txivneej nqaa noob nplej moog tseb, thaus nwg tseb cov noob nplej rua huv dlaim teb, muaj qee lub poob rua huv plawv kev qhov kws tuabneeg tsuj moog tsuj lug, hab noog txawm lug khaws noj lawm.

⁶Muaj qee lub poob rua ntawm qhov aav kws huv muaj pobzeb tiv lawm, thaus lub nplej tuaj kaug, tug kaug ca le qhuav lawm, rua qhov aav tsi noo.

⁷Muaj qee lub poob rua huv qaab tsob xuavpaug, ces tsob xuavpaug hlub tuaj laum tsob nplej tuag taag lawm.

⁸Hab muaj qee lub poob rua ntawm qhov aav zoo. Cov ntawd tuaj zoo hab txhawv taug, ib naab twg txi tau ib puas lub.” Yexus xaus lug has tas, “Yog leejtwg muaj qhovntsej, ca le noog.”

⁹Yexus cov thwjtim nug Yexus saib, zaaj lug pevtxwv kws Yexus has ntawd txhais le caag.

¹⁰Yexus teb has tas, “Zaaj kws tuabneeg tsi tau paub has txug Vaajtswv lub Tebchaws, kuv tub qha rua mej paub lawm, tabsis dlua le lwm tug, kuv ua lug pevtxwv qha xwb, txawm yog puab saib los puab yuav tsi pum, txawm yog puab noog los puab yuav tsi totaub.

¹¹“Zaaj lug pevtxwv nuav txhais has tas: cov noob nplej yog pev txug Vaajtswv txujlug.

¹²Cov noob nplej kws poob rua ntawm txujkev, pev txug Vaajtswv txujlug kws tuabneeg nov, tabsis dlaab Ntxwgnyoog txawm lug txeeb txujlug ntawd tawm huv puab lub sab lawm, kuas puab tsi ntseeg hab tsi tau txujkev cawm dlim.

¹³Cov noob nplej kws poob rua ntawm qhov aav kws huv muaj pobzeb tiv lawm, pev txug Vaajtswv txujlug kws thaus tuabneeg nov dlheev, puab txaus sab hlo txais yuav, tabsis txujlug ntawd cog tsi ruaj rua huv puab lub sab; puab ntseeg ib ntus xwb, thaus puab raug kev sim sab, ces puab ca le thim rov qaab lawm.

¹⁴Cov noob nplej kws poob rua huv qaab tsob xuavpaug, pev txug Vaajtswv txujlug kws tuabneeg nov; tabsis puab tej kev ntxhuv sab, kev ntshaw nyaj, hab kev lomzem huv nplajteb nuav, hlub tuaj laum Vaajtswv txujlug lawm, puab txujkev ntseeg txhaj tsi luj hlub.

¹⁵Cov noob nplej kws poob rua ntawm qhov aav zoo, pev txug Vaajtswv txujlug kws tuabneeg nov, puab muaj lub sab mog muas, sab dlawb sab zoo khaws txujlug ntawd ca rua huv puab lub sab, hab ua sab ntev moog txug nub kws txujlug ntawd tawg paaj hab txi txiv.

¹⁶“Tsi muaj leejtwg taws teeb hab muab phab khwb rua lossis muab txawb rua huv qaab txaag. Tabsis tsuas muaj yuav muab txawb rua sau qhov chaw sab xwb, kuas cov tuabneeg kws tuaj huv tsev txhaj pum kev.

¹⁷“Tej kws muab zais ca lawm, yeej yuav muaj tuabneeg pum, hab tej kws muab npog ca lawm, yeej yuav muaj tug muab nthuav lug qha rua suavdlawg.

¹⁸“Yog le ntawd, mej yuavtsum ceevfaaj hab ua tuab zoo noog, rua qhov tug kws muaj lawm, yuav muab ntxiv kuas tug ntawd muaj nplua mag, tabsis tug kws tsi muaj, txawm yog nwg xaav has tas nwg muaj mivntsiv los yuav muab rhu ntawm nwg moog.”

¹⁹Yexus nam hab Yexus cov kwv yuav tuaj cuag Yexus, tabsis muaj tuabneeg coob coob, puab tsi tau kev moog cuag nwg.

²⁰Muaj ib tug lug has rua Yexus has tas, “Koj nam hab koj cov kwv tuaj sawv saab nrau, puab xaav ntsib koj.”

²¹Yexus has rua suavdlawg has tas, “Cov kws nov Vaajtswv txujlug hab ua lawv le txujlug ntawd, txhaj yog kuv nam hab kuv cov kwv.”

²²Muaj ib nub Yexus hab nwg cov thwjtim nce moog rua huv nkoj, Yexus has rua puab tas, “Peb ca le hlaa havtxwv moog rua saab tim u.” Ces puab txawm moog.

²³Thaus puab taabtom nkuam nkoj hlaa havtxwv moog, Yexus txawm pw tsaug zug lawm. Taamsim ntawd txawm muaj cua dlaaj cua dlub hlub heev ntsawj dlej ndlaas lug rua huv lub nkoj, puab txhua tug ntshai nyob tsaam lub nkoj tog.

²⁴Cov thwjtim moog tsaa Yexus hab has tas, “Tug Tswv, Tug Tswv, peb tub yuav tuag!” Yexus sawv tseeg lug txwv cua hab dlej; Ces cua txawm tu hab dlej havtxwv kws nphau tej nam twv txawm tug tsi ndlaas lawm.

²⁵Yexus has rua cov thwjtim has tas, “Mej kev ntseeg dlua twg taag lawm?” Cov thwjtim xaav tsi thoob hab ntshai kawg le, puab sis thaam has tas, “Tug nuav yog leejtwg, nwg yuav txwv tau cua hab dlej, cua hab dlej kuj noog nwg lug hab!”

²⁶Yexus hab nwg cov thwjtim caij nkoj moog txug ntawm cheebtsaam Nkelaxas kws nyob saab Havtxwv Kalilais tim u.

²⁷Thaus Yexus tawm lug rua tim ntug, nwg ntsib ib tug txivneej raug dlaab kws nyob huv nroog tuaj. Nwg tsi naav rig tsho hab tsi nyob huv tsev lug ntev lawm, nwg nyob tom roob toj ntxaas xwb.

²⁸Thaus nwg pum Yexus, nwg quaj qw txhus caug ndlua ntawm Yexus xubndlag, hab has nrov nrov has tas, “Yexus kws yog Vaajtswv tug muaj Fwjchim Luj kawg nkaus tug Tub! Koj tuaj thaab kuv ua dlaabtsi? Kuv thov koj tsi xob tsimtxom kuv!”

²⁹Nwg has le ntawd, rua qhov Yexus tub has kuas dlaab ca le tawm ntawm nwg moog. Dlaab nkaag rua huv nwg ntau zag, txawm yog muab saw hlau khi nwg teg nwg taw hab tso tuabneeg zuv los nwg muab ntag tu taag huv tuabsi, hab dlaab yuam nwg moog rua tom roob mojsaab qhua.

³⁰Yexus nug nwg has tas, “Koj lub npe hu le caag?” Nwg teb has tas, “Kuv lub npe hu ua Coob.” Rua qhov muaj ntau tug dlaab nyob rua huv nwg.

³¹Cov dlaab ntawd thov Yexus has tas, “Tsi xob ntab peb moog rua huv ntuj tawg.”

³²Nyob ze ntawd muaj ib paab npua coob coob taabtom nrhav noj ntawm ib ntaa toj. Cov dlaab ntawd thov Yexus has tas, “Ca peb moog rua huv paab npua ntawd.” Ces Yexus txawm ca puab moog.

³³Dlaab tawm plawg huv tug txivneej ntawd moog nkaag rua huv paab npua. Paab npua ca le dlha moog poob tsaag tsua rua huv havtxwv tuag taag huv tuabsi lawm.

³⁴Thaus cov tuabneeg zuv npua pum le ntawd, puab txawm dlha rov qaab moog qha tej ntawd rua cov tuabneeg kws nyob huv tej zog kws nyob ibncig lub nroog ntawd.

³⁵Ces suavdlawg txawm tawm tuaj moog saib muaj le caag tag, thaus puab tuaj txug ntawm Yexus, puab pum tug txivneej raug dlaab ntawd, nwg feeb meej lawm, nwg naav rig tsho hab nwg nyob ntawm Yexus kutaw; puab ntshai kawg le.

³⁶Cov tuabneeg kws pum tej nuav, puab qha rua suavdlawg paub has tas, ua le caag tug raug dlaab ntawd zoo lawm.

³⁷Cov tuabneeg kws nyob huv cheebtsaam Nkelaxas thov kuas Yexus ca le tawm huv cheebtsaam ntawd moog, rua qhov puab ntshai heev. Yog le ntawd, Yexus txawm nce rua huv nkoj hab moog lawm.

³⁸Tug txivneej kws Yexus ntab dlaab tawm ntawd, nwg thov Yexus has tas, “Ca kuv nrug koj moog.” Tabsis Yexus kuas nwg rov qaab moog hab has rua nwg tas,

³⁹“Koj ca le rov qaab moog tsev, hab qha tej kws Vaajtswv paab koj lawm rua suavdlawg noog.” Tug txivneej ntawd txawm moog thoob plawg lub nroog, hab qha tej kws Yexus paab nwg lawm rua suavdlawg noog.

⁴⁰Thaus Yexus rov lug txug saab ntug havtxwv tim nuav, muaj tuabneeg coob coob tuaj nyob qhov ntawd tog nwg, thaus puab pum nwg puab zoo sab kawg le.

⁴¹Muaj ib tug txivneej hu ua Yailus,; nwg yog tug kws saib num huv lub tsev saablaaj huv lub nroog ntawd. Thaus nwg tuaj txug, nwg txhus caug ndlua ntawm Yexus kutaw hab thov kuas Yexus moog rua tom nwg lub tsev,

⁴²rua qhov nwg tug ntxhais kws muaj noobnyoog kaum ob xyoos, mob heev tub yuav tuag. Thaus Yexus taabtom taug kev moog, muaj tuabneeg coob coob nrug Yexus moog si nphoo quas tshua.

⁴³Muaj ib tug quaspuj kws coj khaub dluag tau kaum ob xyoos tsi tu, hab nwg txomnyem kawg le. Nwg muab taagnrho nwg tej nyaj moog ndlav kws tshuaj khu, tabsis tsi muaj ib tug kws tshuaj khu tau nwg le.

⁴⁴Nwg txiv ntag lug rua tom Yexus nrausqaum, nwg cev teg moog kov Yexus lub tw tsho, taamsim ntawd ntshaav txawm tu nrho lawm.

⁴⁵Yexus nug has tas, “Leejtwg kov kuv?” Tabsis tsi muaj leejtwg leeg le. Petus teb has tas, “Tug Tswv, cov tuabneeg coob coob kws nyob puagncig koj chwv koj xwb.”

⁴⁶Tabsis Yexus has tas, “Yeej muaj ib tug kov kuv xwb, rua qhov kuv paub has tas fwjchim tub tawm ntawm kuv lawm.”

⁴⁷Tug quaspuj ntawd paub has tas Yexus paub lawm. Nwg txawm lug txhus caug ndlua ntawm Yexus kutaw ua ib ce tshee nyo. Nwg qha rua Yexus taabmeeg suavdlawg has tas, vim le caag nwg kov Yexus lub tw tsho, hab yog le caag, nwg tug mob txhaj zoo lawm.

⁴⁸Yexus has rua nwg tas, “Mivntxhais, koj tug mob zoo lawm, tub yog vim koj ntseeg. Koj ca le moog kaaj sab lug.”

⁴⁹Thaus Yexus taabtom has le ntawd, muaj ib tug tuaj tom Yailus tsev tuaj qha rua Yailus has tas, “Koj tug ntxhais tub tuag lawm, koj tsi xob taabkaum Xwbfwb ntxiv lawm.”

⁵⁰Thaus Yexus nov le ntawd, Yexus has rua Yailus has tas, “Koj tsi xob ntshai; ca le ntseeg, koj tug ntxhais yeej yuav caj.”

⁵¹Thaus Yexus moog txug huv Yailus tsev lawm, nwg tsi pub leejtwg nrug nwg moog rua huv txaaj, tsuas pub Petus, Yauhaas hab Yakaunpaus, hab tug ntxhais nam hab txiv nrug nwg moog xwb.

⁵²Cov tuabneeg kws nyob huv tsev, quaj nyav tug ntxhais ntawd ntsoog qeeg. Yexus has rua puab has tas, “Mej tsi xob quaj quaj; tug mivntxhais nuav tsi tuag, nwg pw tsaug zug xwb!”

⁵³Cov tuabneeg ntawd luag Yexus zum zawg, rua qhov puab yeej paub has tas, tug ntxhais ntawd tuag lawm tag.

⁵⁴Tabsis Yexus moog tuav nkaus tug ntxhais ntawd teg hab has tas, “Mivntxhais, koj ca le sawv!”

⁵⁵Tug ntxhais ntawd txawm rov muaj sa hab sawv tseeg taamsim ntawd. Yexus kuas puab muab mov lug rua tug ntxhais noj.

⁵⁶Tug ntxhais ntawd nam hab txiv xaav tsi thoob le, tabsis Yexus txwv tsi pub obtug qha tej nuav rua leejtwg.