Read Hmong Njua 2 Kevcai 1 Bible Online

2 Kevcai 1 - Hmong Njua bible

2 Kevcai 1

¹Phoo ntawv nuav yog tej lug kws Mauxes has tseg rua cov Yixalayees thaus puab tseem nyob huv taj suabpuam ntawm ntug Dlej Yauladees saab nubtuaj. Puab nyob ntawm lub Haav Yauladees kws ze Xufes, ntu nruab nraab ntawm lub nroog Palaas, Taufees, Lanpaas, Haxelaus hab Dixahas.

²(Yog sawv kev ntawm roob Xinais taug kev hlaa cov pov roob huv tebchaws Edoos moog rua Kades Npane-as mas yog kaum ib nub txhaj txug).

³Nub xab ib lub kaum ib hlis ntuj, xyoo plaub caug tom qaab kws cov Yixalayees tawm nraag tebchaws Iziv lug, Mauxes muab Vaajtswv tej lug txhua nqai qha rua cov Yixalayees.

⁴Tej nuav yog tom qaab kws tug TSWV tau paab cov Yixalayees tua yeej tug Vaajntxwv Xihoos kws kaav cov Amaules huv lub nroog Hesenpoos hab Vaajntxwv Aunkas kws kaav lub nroog Asetalus hab Edeles huv tebchaws Npasaas.

⁵Thaus cov Yixalayees lug nyob huv tebchaws Mau-am ntawm tug Dlej Yauladees saab nubtuaj, Mauxes muab Vaajtswv tej Kevcai lug qha hab ntuag puab. Mauxes has tas,

⁶“Thaus peb tseem nyob nraag Roob Xinais, tug TSWV kws yog peb tug Vaajtswv has rua peb tas, ‘Mej lug nyob ntawm lub Roob nuav ntev heev lawm;

⁷ca le lauj mej tej tsevntaub hab tsiv tawm qhov chaw nuav moog. Mej moog rua ntawm lub laaj roob huv tebchaws Amaules hab tej cheebtsaam kws nyob ibncig ntawd, moog rua huv lub Haav Yauladees, moog rua sau lub pov roob hab huv tej taj nraag, moog rua cheebtsaam kws nyob saab qaabteb, hab moog rua tom ntug Havtxwv Meditelanees. Moog kuas txug rua tebchaws Kana-aas hab dlhau moog rua peg tej roob huv tebchaws Lenpanoos, hab moog kuas txug rua ntawm tug Dlej Efalates.

⁸Taagnrho tej nuav yog lub tebchaws kws kuv kws yog tug TSWV tau coglug yuav muab rua mej yawmkoob Anplahaas, Ixaj, Yakhauj hab puab tej xeebntxwv. Mej ca le moog nyob huv lub tebchaws ntawd.’ ”

⁹Mauxes has rua cov pejxeem tas, “Thaus peb tseem nyob nraag Roob Xinais, kuv has rua mej tas, kuv teg num ntau dlhau hwv lawm, ‘Kuv tuab leeg xwb ua tsi taag.

¹⁰Tug TSWV kws yog mej tug Vaajtswv pub rua mej fuamvaam coob npaum le tej nubqub sau nruab ntug.

¹¹Thov tug TSWV kws yog mej cov yawmkoob tug Vaajtswv, pub kuas mej fuamvaam ib txheeb npaug ntxiv, hab kuas mej lub neej vaammeej lawv le Vaajtswv tau coglug tseg lawm.

¹²Tabsis kuv ib leeg yuav ua le caag txav txim tau rua mej, thaus mej muaj kev sis caav sis tshe?

¹³Mej ca le xaiv ib cov tuabneeg txawj ntse kws paub qaabhau, cov txivneej kws muaj tswvyim hab paub ua num ntawm txhua xeem tuaj rua kuv. Kuv yuav tsaa puab ua cov thawj saib mej.’

¹⁴Mej teb kuv has tas, mej pum zoo le kuv has ntawd.

¹⁵Yog le ntawd, kuv txhaj tsaa cov tuabneeg txawj ntse, cov thawjcoj kws paub ua num kws mej xaiv huv mej tej xeem tuaj ua cov coj mej. Ibtxha saib ib txheeb leej, ibtxha saib ib puas leej, ibtxha saib tsib caug leej hab ibtxha saib kaum leej. Hab kuv tseem tsaa ntau tug numtswv ua cov kaav mej txhua xeem.

¹⁶“Thaus ntawd, kuv qha rua puab has tas, ‘Mej noog tej lug sis caav sis tshe ntawm cov pejxeem, mej yuavtsum txav txim kuas ncaaj thaus puab muaj kev sis caav sis tshe, tsi has mej tsaav tuabneeg lossis lwm tsaav tuabneeg kws nrug mej nyob.

¹⁷Thaus mej txav txim, mej tsi xob xaiv ntsejmuag, mej yuavtsum txav txim ncaaj nceeg rua txhua tug, txawm yog nwg yuav yog leejtwg los xij. Mej tsi xob ntshai leejtwg le, rua qhov tej kws mej txav txim sab, yog lug ntawm Vaajtswv. Yog has tas muaj tej rooj plaub kws mej has tsi tau lawm, mej coj tuaj cuag kuv. Kuv maam le has rooj plaub ntawd.’

¹⁸Tuab lub sijhawm ntawd, kuv qha txhua yaam kws mej yuav tau ua rua mej.

¹⁹“Peb ua txhua yaam lawv le tug TSWV kws yog peb tug Vaajtswv has kuas peb ua. Peb tawm ntawm Roob Xinais moog hlaa lub taj suabpuam kws dlaav hab txaus ntshai, moog rua lub laaj roob huv tebchaws Amaules. Thaus peb lug txug rua huv Kades Npane-as,

²⁰kuv has rua mej tas, ‘Nwgnuav mej lug txug rua ntawm lub laaj roob huv tebchaws Amaules kws tug TSWV kws yog peb tug Vaajtswv hab yog peb cov yawmkoob tug Vaajtswv muab rua peb lawm. Mej tsaa muag saib lub tebchaws ntawd. Mej ca le moog nyob huv lawv le tug TSWV has rua mej lawm. Mej tsi xob ntaus sab yau lossis ntshai.’

²¹

²²“Tabsis mej tuaj cuag kuv hab has tas, ‘Ca peb tso ib paab txivneej moog soj lub tebchaws hab rov qaab lug qha rua peb, peb txhaj le paub kev moog, hab saib puab tej nroog zoo le caag.’

²³“Peb pum has tas qhov ntawd yog qhov kws zoo hab tsimnyog ua, kuv txhaj le xaiv tau kaum ob leeg txivneej, ib xeem ib leeg.

²⁴Puab taug lub laaj roob moog txug rua ntawm lub Haav Esekaus, hab soj thoob plawg lub haav ntawd.

²⁵Puab dle tau tej txiv maab txiv ntoo huv lub tebchaws ntawd coj lug qha rua peb, hab has rua peb tas, lub tebchaws kws tug TSWV kws yog peb tug Vaajtswv muab rua peb ntawd, aav rog hab zoo qoobloo kawg le.

²⁶“Tabsis mej ntxeev sab hab tsi noog tug TSWV kws yog mej tug Vaajtswv tej lug, hab tsi kaam moog rua huv lub tebchaws ntawd.

²⁷Mej ib leeg ywg rua ib leeg huv mej tej tsevntaub has tas, ‘Yog tug TSWV ntxub peb, nwg txhaj coj peb tawm nraag tebchaws Iziv lug hab muab peb cob rua cov tuabneeg Amaules, kuas puab muab peb tua tuag taag xwb!

²⁸Peb yuav moog rua huv lub tebchaws ntawd ua dlaabtsi? Peb ntshai kawg le. Thaus peb nov cov tuabneeg kws peb tso moog ntawd, rov lug qha rua peb has tas, cov tuabneeg kws nyob huv lub tebchaws ntawd, puab luj sab hab muaj zug tshaaj peb. Puab tej nroog muaj ntsaa yeej xov sab rua sau nruab ntug, hab puab pum cov tuabneeg ntawd luj kawg le.’

²⁹“Tabsis kuv has rua mej tas, ‘Tsi xob ntshai cov tuabneeg ntawd.

³⁰Tug TSWV kws yog mej tug Vaajtswv yuav coj mej kev moog hab nwg yuav paab kuas mej tua cov yeebncuab ntawd ib yaam le mej pum nwg ua nyob nraag tebchaws Iziv,

³¹hab nraag taj suabpuam. Mej tub pum has tas, nwg coj mej taug kev kaaj sab lug lug txug rua ntawm nuav, ib yaam le leej txiv puag rawv nwg tug mivnyuas.’

³²Tabsis mej tsi noog tej lug kws kuv has, hab tsi ca sab rua tug TSWV,

³³txawm le ntawd los tug TSWV tseem moog ua mej ntej, nrhav chaw rua mej su. Nwg moog ua mej ntej coj mej txuj hauv kev, nwg ua tug nplaim tawg rua mej pum kev thaus tsaus ntuj, hab ua tauv fuab roog mej thaus nruab nub.

³⁴“Tug TSWV nov tej lug kws mej ywg lawm, nwg chim heev, nwg txhaj le coglug has tas,

³⁵‘Mej tam tuabneeg sab phem nuav yuav tsi muaj ib tug tau moog nyob huv lub tebchaws aav rog hab zoo qoob kws kuv coglug tseg yuav muab rua mej cov yawmkoob le.

³⁶Tsuas yog Yefunes tug tub Kalej txhaj yuav tau moog nyob huv lub tebchaws ntawd xwb. Nwg muab sab npuab kuv, hab kuv yuav muab lub tebchaws kws nwg moog soj ntawd rua nwg hab nwg cov xeebntxwv.’

³⁷Tub yog vim mej, tug TSWV txhaj chim rua kuv hab has tas, ‘Mauxes, koj yuav tsi tau moog nyob huv lub tebchaws ntawd.

³⁸Tabsis koj yuav tau txhawb noos tug tub Yausuas zug, nwg yog tug paab koj, nwg yuav coj cov Yixalayees moog nyob huv lub tebchaws ntawd.’

³⁹“Ces tug TSWV has rua peb suavdlawg tas, ‘Mej cov mivnyuas tseem yau kws tsi tau paub qhov phem qhov zoo, yog cov mivnyuas kws mej has tas yuav raug mej cov yeebncuab nteg, puab txhaj yog cov kws yuav tau moog nyob huv lub tebchaws ntawd. Kuv yuav muab lub tebchaws ntawd rua puab, hab puab yuav tau moog nyob huv.

⁴⁰Tabsis mej cov ko, mej ca le tig rov qaab moog rua tom taj suabpuam kws yog txujkev rov moog rua Havtxwv Lab.’

⁴¹“Mej teb has tas, ‘Mauxes, peb tau ua txhum rua tug TSWV lawm tag! Tabsis nwgnuav peb yuav moog tua hab txeeb lub tebchaws ntawd lawv le tug TSWV kws yog peb tug Vaajtswv tau has rua peb lawm.’ Ces mej txhua tug txawm ca le npaaj moog ua rog, rua qhov mej xaav has tas, nce moog puav lub laaj roob ntawd yuav yoojyim heev.

⁴²“Tabsis tug TSWV has rua kuv tas, ‘Koj yuavtsum txwv tsi xob pub puab moog tua cov yeebncuab, rua qhov kuv tsi nrug puab, nyob tsaam puab cov yeebncuab tua yeej puab.’

⁴³Kuv has rua mej lawv le tug TSWV kuas kuv has, tabsis mej tsi tig qhovntsej noog le. Mej ntxeev sab rua tug TSWV, hab vim mej khaavtheeb mej txhaj nce moog rua sau lub laaj roob lawm.

⁴⁴Cov Amaules kws nyob sau tej laaj roob tuaj tawmtsaam mej ib yaam le xub ntaab yaa tuaj. Puab caum mej tua lug ti nkaus rua ntawm Haumas hab puab tua yeej mej sau lub laaj roob huv tebchaws Edoos.

⁴⁵Mej txhaj le quaj thov tug TSWV paab, tabsis nwg tsi noog hab tsi quavntsej mej le.

⁴⁶Tom qaab kws mej nyob huv Kades Npane-as tau ib ntus ntev loo.