Read Hmong Njua 2 Kevcai 10 Bible Online

2 Kevcai 10 - Hmong Njua bible

2 Kevcai 10

¹“Tom qaab ntawd tug TSWV has rua kuv tas, ‘Koj ca le txaug ob dlaim txag zeb zoo ib yaam le thawj ob dlaim, hab ua ib lub Phijxaab ntoo ntim ob dlaim txag zeb ntawd. Thaus ua tau tav lawm, koj ca le nqaa tuaj cuag kuv sau roob.

²Kuv yuav rov sau tej lug kws kuv tub xub sau rua ob dlaim txag zeb kws koj muab ntsawm tawg taag lawm rua huv ob dlaim txag zeb ntawd. Koj maam le coj moog ntim ca rua huv lub Phijxaab Ntoo.’

³“Yog le ntawd, kuv txhaj muab ntoo kubtwg ua tau ib lub Phijxaab hab txaug tau ob dlaim txag zeb zoo ib yaam le thawj ob dlaim hab nqaa moog sau roob.

⁴Tug TSWV rov sau cov lug kws nwg xub sau rua huv thawj ob dlaim txag zeb rua huv ob dlaim tshab ntawd. Tej lug ntawd yog Kaum Nqai Kevcai kws thaus mej moog ua ke ntawm lub roob hab tug TSWV has lug huv cov nplaim tawg tuaj rua mej. Tug TSWV muab ob dlaim txag zeb ntawd rua kuv.

⁵Kuv txhaj nqeg sau roob lug, hab muab ob dlaim txag zeb ntawd ntim rua huv lub Phijxaab kws kuv ua lawv le tug TSWV has rua kuv. Ob dlaim txag zeb ntawd tseem nyob huv lub Phijxaab lug txug nwgnuav.

⁶(“Cov Yixalayees tsiv tawm ntawm cov Ya-akaas tej qhov tshij lug nyob rua ntawm Mauxelas. Aloos tuag hab puab muab nwg log rua qhov ntawd. Aloos tug tub Ele-axas txhaj ua povthawj hloov Aloos chaw.

⁷Tom qaab ntawd puab tsiv lug txug ntawm Nkunkaudas, puab maam le lug nyob rua huv Yaunpathas kws yog lub tebchaws muaj dlej ntau heev.

⁸Thaus puab tseem nyob ntawm taw roob, tug TSWV tau tsaa xeem Levis ua cov kwv lub Phijxaab kws ntim Vaajtswv tej lug cog tseg kws yog Kaum Nqai Kevcai hab tsaa puab ua cov povthawj kws ua tug TSWV teg num, hab ua cov tuav tug TSWV lub npe foom koob moov rua suavdlawg. Puab tseem ua le ntawd lug txug naj nub nua.

⁹Yog le ntawd, xeem Levis txhaj tsi muaj feem nrug lwm xeem tau aav; tabsis puab tau ua tug TSWV teg num lawv le tug TSWV kws yog mej tug Vaajtswv tau coglug tseg lawm.)

¹⁰“Kuv nyob sau roob tau plaub caug nub plaub caug mo ib yaam le thawj zag. Tug TSWV noog kuv tej lug thov dlua ib zag, nwg txhaj tsi ua rua mej puamtsuaj.

¹¹Nwg has kuas kuv ca le moog hab coj mej moog, mej txhaj tau moog nyob huv lub tebchaws kws nwg tau coglug tseg yuav muab rua mej cov yawmkoob nyob.

¹²“Ib tsoom Yixalayees, mej ca le ua tuab zoo noog saib tug TSWV kws yog mej tug Vaajtswv has kuas mej ua dlaabtsi: nwg xaav kuas mej fwm hab ua lawv le nwg tej lug txhua lu. Nwg kuas mej muab sab npuab hab ua nwg teg num kawg sab kawg ntsws,

¹³hab coj lawv le nwg tej kevcai txhua nqai. Tej kevcai kws nub nua kuv muab cob rua mej, yuav muaj nqes rua mej.

¹⁴Lub ntuj kws nyob sau yog tug TSWV tug, lub nplajteb hab ib puas tsaav yaam kws nyob huv los puavleej yog tug TSWV tug huv tuabsi.

¹⁵Tug TSWV hlub mej cov yawmkoob heev, nwg txhaj xaiv mej lug ua nwg tsaav tuabneeg kws tseemceeb dlua lwm tsaav tuabneeg huv tuabsi, hab nwgnuav mej yog tsaav tuabneeg kws tug TSWV xaiv lawm.

¹⁶Yog le ntawd, txij nuav moog mej yuavtsum noog tug TSWV lug, hab tsi xob tawv ncauj lawm.

¹⁷Tug TSWV kws yog mej tug Vaajtswv yog tug luj dlua tej vaajtswv hab ib puas tsaav yaam kws muaj fwjchim huv tuabsi. Nwg muaj fwjchim luj hab tseemceeb kawg nkaus, suavdlawg yuavtsum fwm hab paub ntshai nwg. Nwg tsi xaiv leejtwg ntsejmuag hab tsi yuav leejtwg tej nyaj xab.

¹⁸Nwg tsomkwm cov mivnyuas ntsuag hab tej puj ntsuag tsi pub leejtwg ua phem rua puab; nwg hlub txhua tsaav tuabneeg kws nrug peb nyob. Nwg pub puab muaj rig tsho naav hab muaj zaub mov noj.

¹⁹Yog le ntawd, mej yuavtsum hlub lwm tsaav tuabneeg, rua qhov yaav taag lug kws mej nyob nraag tebchaws Iziv, luas hu mej ua tuabneeg txawv tebchaws.

²⁰Mej yuavtsum fwm tug TSWV kws yog mej tug Vaajtswv hab pehawm nwg tuab leeg xwb, mej yuavtsum muab sab npuab nwg hab tuav nwg lub npe coglug xwb.

²¹Mej yuavtsum ua nwg tsaug rua qhov nwg yog mej tug Vaajtswv. Mej lub qhovmuag tub pum tej txujci tseemceeb kws nwg ua paab mej lawm.

²²Thaus u mej cov yawmkoob moog nyob nraag tebchaws Iziv, puab tsuas muaj xyaa caum leej xwb, tabsis nwgnuav tug TSWV kws yog mej tug Vaajtswv pub rua mej fuamvaam coob ib yaam le tej nubqub sau nruab ntug lawm.