Read Hmong Njua 2 Kevcai 11 Bible Online

2 Kevcai 11 - Hmong Njua bible

2 Kevcai 11

¹“Mej yuavtsum hlub tug TSWV kws yog mej tug Vaajtswv, hab naj nub ua lawv le nwg tej Kevcai.

²Mej yuavtsum ncu ntsoov tej kws tug TSWV qhuab ntuag mej. Tub yog mej lub qhovmuag pum tej txujci tseemceeb kws tug TSWV ua, tsi yog mej tej mivnyuas pum. Mej pum tug TSWV lub fwvxyeej, nwg lub fwjchim kws luj kawg nkaus, nwg tug zug luj zug nchaav

³hab nwg tej txujci tseemceeb. Mej pum tej kws tug TSWV rau txim rua Falaus kws yog cov Iziv tug vaajntxwv hab taagnrho nwg lub tebchaws.

⁴Mej pum tug TSWV ua rua cov Iziv tej tubrog tuag taag rua huv Havtxwv Lab, thaus puab caum mej qaab tuaj, tsi has puab cov neeg hab puab tej tsheb neeg los puamtsuaj taag huv tuabsi.

⁵Mej paub has tas, thaus mej tseem nyob ntawm taj suabpuam ua ntej kws mej lug nyob ntawm nuav, tug TSWV tau paab mej npaum le caag.

⁶Nyaj mej tseem ncu tau tej kws tug TSWV rau txim rua Eli-as kws yog xeem Lunpees ob tug tub, Dathaas hab Anpilaas obtug. Tug TSWV ua rua aav qheb hlo nqog kag obtug, obtug quaspuj mivnyuas, vaaj tse, tej tubqhe hab tej tsaj txhu huv tuabsi taabmeeg mej.

⁷Mej lub qhovmuag tub pum tej txujci tseemceeb kws tug TSWV tau ua lawm.

⁸“Mej yuavtsum ua lawv le tej lug kws nub nua kuv has rua mej txhua lu huv tuabsi, mej txhaj yuav tau hlaa dlej moog tua lub tebchaws kws mej taabtom yuav moog nyob ntawd.

⁹Mej txhaj muaj sa nyob ntev huv lub tebchaws kws aav rog hab zoo qoob kws tug TSWV tau coglug tseg yuav muab rua mej cov yawmkoob hab puab cov xeebntxwv.

¹⁰Lub tebchaws kws mej taabtom yuav moog nyob ntawd, zoo tsi thooj le lub tebchaws Iziv kws mej nyob lug lawm. Thaus mej nyob nraag tebchaws Iziv, mej yuav tau khawb kwj tso dlej lug rua huv mej tej laj tej teb khwv kawg le, mej txhaj cog tau qoobloo.

¹¹Tabsis lub tebchaws kws mej yuav moog nyob ntawd, muaj roob muaj haav, muaj dlej muaj naag hab aav noo zaws.

¹²Tug TSWV kws yog mej tug Vaajtswv, tu hab saib lub tebchaws ntawd taag naj taag xyoo.

¹³“Mej yuavtsum ua lawv le tej lug kws nub nua kuv qha rua mej lawm. Hlub tug TSWV kws yog mej tug Vaajtswv hab ua nwg teg num kuas kawg sab kawg ntsws.

¹⁴Yog mej ua le ntawd, nwg yuav tso naag lug rua mej lub tebchaws, tsi has lub caij nplooj ntoos zeeg hab lub caij nplooj ntoos hlaav, mej yuav muaj qoobloo, muaj cawv txiv maab, muaj roj txiv ntoo

¹⁵hab muaj tshaav zaub rua mej tej tsaj noj. Mej yuav muaj zaub mov noj txaus sab txaus ntsws.

¹⁶Mej tsi xob ca leejtwg ntxag tau mej tso tug TSWV tseg moog pe luas tej vaajtswv.

¹⁷Yog mej ua le ntawd, tug TSWV yuav chim rua mej. Nwg yuav tsi tso naag lug rua mej lub tebchaws, aav yuav qhuav, qoobloo yuav tuaj tsi taug. Txawm yog lub tebchaws kws tug TSWV muab rua mej nyob ntawd, ibtxwm zoo qoob los yuav tsi zoo lawm. Mej moog nyob tsi ntev, ces mej yuav tuag taag.

¹⁸“Mej yuavtsum ncu ntsoov tej lug nuav ca rua nruab sab, muab paav rua ntawm mej ncej npaab hab dlai rua ntawm mej hauvplaj, mej txhaj yuav ncu ntsoov.

¹⁹Mej yuavtsum muab pav qha rua mej tej mivnyuas, hab naj nub has txug tej lug nuav, tsi has thaus mej nyob huv tsev hab thaus mej taug kev, thaus mej su hab thaus mej ua num.

²⁰Mej ca le muab tej lug nuav sau rua ntawm mej tej ncej qhovrooj hab ntawm tej roojvaag.

²¹Mej hab mej tej tubki txhaj yuav muaj sa ua neej nyob ntev rua huv lub tebchaws kws tug TSWV kws yog mej tug Vaajtswv tau coglug yuav muab rua mej cov yawmkoob. Yog tseem muaj lub ntuj lub teb, ces mej yuav nyob huv lub tebchaws nuav moog ibtxhis.

²²“Mej yuavtsum muab sab rau ua lawv le tej lug kws kuv qha rua mej: hlub tug TSWV kws yog mej tug Vaajtswv, ua lawv le nwg tej lug txhua lu huv tuabsi hab muab sab npuab nwg

²³tug TSWV txhaj le ntab txhua tsaav tuabneeg tsiv tawm ua ntej mej moog tua, mej yuav tau kaav lwm tsaav tuabneeg kws luj hab muaj zug dlua mej lub tebchaws.

²⁴Txhua thaaj aav kws mej txhais kutaw moog tsuj puavleej yog mej tug. Mej tug nrimteb saab qaabteb txij ndlua ntawm taj suabpuam moog ti nkaus peg Roob Lenpanoos kws nyob saab qaumteb, hab saab nubtuaj txij ndlua ntawm tug Dlej Efalates moog ti nkaus ntawm Havtxwv Meditelanees kws nyob saab nubpoob.

²⁵Lub tebchaws ntawd txhua qhov kws mej moog, tug TSWV kws yog mej tug Vaajtswv yuav ua kuas cov tuabneeg kws nyob huv ntshai mej, lawv le tug TSWV tub coglug tseg lawm, yuav tsi muaj leejtwg txwv tau mej le.

²⁶“Nub nua kuv yuav ca mej xaiv saib, mej yuav tej lug foom koob moov lossis yuav tej lug foom phem,

²⁷yog mej ua lawv le tug TSWV kws yog mej tug Vaajtswv tej lug kws nub nua kuv qha rua mej, mej yuav tau koob moov;

²⁸tabsis yog mej tsi ua le ntawd, mej tseem moog pe lwm tsaav tuabneeg tej vaajtswv kws mej tsi tau pe dlua le, ces mej yuav raug foom tsi zoo.

²⁹Thaus tug TSWV coj mej moog nyob huv lub tebchaws kws mej taabtom yuav moog nyob ntawd, mej yuavtsum qha tej lug foom koob moov sau lub Roob Nkelixees hab qha tej lug foom phem sau lub Roob Enpales.

³⁰(Ob lub roob nuav nyob ntawm tug Dlej Yauladees saab nubpoob huv tebchaws Kana-aas. Cov tuabneeg ntawd nyob huv lub taj nraag Yauladees saab nubpoob, tsi dleb ntawm tsob Ntoo Xeeb Maules kws ze lub nroog Nkilenkas.)

³¹Mej taabtom yuav hlaa tug Dlej Yauladees moog tua hab nyob lub tebchaws kws tug TSWV kws yog mej tug Vaajtswv yuav muab rua mej. Thaus mej moog tua yeej hab nyob huv lawm,

³²mej yuavtsum ua lawv le tej kevcai kws nub nua kuv qha rua mej.