Read Hmong Njua 2 Kevcai 12 Bible Online

2 Kevcai 12 - Hmong Njua bible

2 Kevcai 12

¹“Tej nuav yog tej kevcai kws mej yuav tau coj moog taag mej simneej nyob huv lub tebchaws kws tug TSWV kws yog mej cov yawmkoob tug Vaajtswv muab rua mej, mej yuavtsum ua lawv le ntawd!

²Thaus mej moog nyob huv lub tebchaws ntawd, mej yuavtsum muab lwm tsaav tuabneeg tej chaw kws puab teev puab tej vaajtswv sau tej roob sab, tej pov roob hab huv tej qaab ntoo kws muaj nplooj ntxoov nyog, rhuav kuas puamtsuaj taag huv tuabsi.

³Ca le rhuav puab tej thaaj hab tsoo puab tej ncej zeb tseemceeb kuas tawg taag huv tuabsi. Hlawv puab tej mlom Aselas kuas kub nyab hab tsoo puab tej mlom kuas tawg ntsoog ntxawg. Puab txhaj tsi tau chaw teev puab tej vaajtswv lawm.

⁴“Mej tsi xob pehawm tug TSWV kws yog mej tug Vaajtswv ib yaam le cov tuabneeg ntawd pe puab tej vaajtswv xwb.

⁵Tug TSWV xaiv ib thaaj chaw huv mej lub tebchaws lug ua qhov chaw rua suavdlawg tuaj cuag nwg hab pehawm nwg.

⁶Mej yuavtsum coj mej tej khoom tuaj fij rua ntawm qhov chaw ntawd, tsi has mej tej khoom kws hlawv fij theej txhoj hab lwm yaam khoom fij, tej khoom fij sis raug zoo, tej ib feem kaum, tej khoom fij kws mej coglug rua tug TSWV, tej khoom fij kws mej txaus sab muab hab thawj tug mivnyuas nyuj hab mivnyuas yaaj.

⁷Nyob huv lub tebchaws ntawd, mej hab mej tsev tuabneeg yuav tau noj hab haus txaus sab rua tej qoobloo kws tug TSWV foom koob moov rua mej khwv tau lug, taabmeeg tug TSWV kws yog mej tug Vaajtswv.

⁸“Thaus txug lub sijhawm ntawd, mej yuav tsi tau ua ywj sab ib yaam le mej tau ua yaav taag lug. Txij thaus u lug txug naj nub nua, mej tsuas pehawm lawv le mej lub sab nyam xwb,

⁹rua qhov mej tseem tsi tau moog nyob huv lub tebchaws kws tug TSWV kws yog mej tug Vaajtswv muab rua mej, qhov ntawd mej yuav tau nyob kaaj sab lug.

¹⁰Thaus mej hlaa dlhau tug Dlej Yauladees moog rua saab tid lawm, tug TSWV yuav muab lub tebchaws ntawd rua mej nyob ua mej tug. Nwg yuav paab kuas mej dlim ntawm mej cov yeebncuab, hab mej yuav tau nyob kaaj sab lug.

¹¹Tug TSWV yuav xaiv ib thaaj chaw ca ua qhov chaw rua mej moog pehawm nwg, hab mej yuavtsum coj txhua yaam kws kuv tau qha rua mej lawm, tuaj fij rua tug TSWV: mej tej khoom hlawv fij theej txhoj hab lwm yaam khoom fij, tej ib feem kaum, tej khoom fij sis raug zoo hab tej khoom kws mej coglug fij tshwjxeeb rua tug TSWV.

¹²Mej, mej tej quaspuj mivnyuas, mej tej tubqhe hab cov Levis kws nrug mej nyob huv mej tej nroog, ca le zoo sab taabmeeg tug TSWV; mej yuavtsum ncu ntsoov has tas, cov Levis yuav tsi muaj aav ua puab tug.

¹³Mej tsi xob coj mej tej khoom moog fij rua ntawm qhov chaw kws mej nyam;

¹⁴mej yuavtsum coj mej tej khoom moog fij rua ntawm qhov chaw kws tug TSWV xaiv ntawm mej ib xeem le aav, hab mej moog hlawv khoom fij rua ntawm qhov chaw kws tug TSWV qha rua mej lawm xwb.

¹⁵“Tabsis tej tsaj kws mej tua noj, mej nyob qhov twg, mej tua rua qhov ntawd los tau. Mej noj tau lawv le tug TSWV pub rua mej muaj. Cov tuabneeg kws huv hab tsi huv los puavleej noj tau tej tsaj ntawd, ib yaam le mej noj tej nqaj kauv hab nqaj muaslwj.

¹⁶Tabsis mej tsi xob noj tej tsaj ntawd cov ntshaav; mej yuavtsum muab laub povtseg ib yaam le laub dlej.

¹⁷Tsi pub mej nqaa tej khoom kws mej muab fij rua tug TSWV lawm lug noj huv mej tej tsev, tsi has tej ib feem kaum kws yog mej tej qoobloo, tej cawv txiv maab, tej roj txiv ntoo, lossis thawj tug mivnyuas nyuj hab mivnyuas yaaj, tej khoom kws mej coglug muab fij rua tug TSWV, tej khoom kws mej txaus sab muab fij lossis lwm yaam khoom fij.

¹⁸Mej hab mej tej quaspuj mivnyuas, mej tej tubqhe hab cov Levis kws nrug mej nyob huv mej tej nroog, mej tsuas noj tau tej khoom fij nuav taabmeeg tug TSWV kws yog mej tug Vaajtswv rua ntawm qhov chaw kws tug TSWV kws yog mej tug Vaajtswv xaiv tseg ua qhov chaw pehawm nwg xwb. Mej ca le txaus sab rua tej kws Vaajtswv foom koob moov rua mej moog khwv tau lug.

¹⁹Tam twg kws mej tseem nyob huv lub tebchaws ntawd, mej tsi xob tso cov Levis tseg le.

²⁰“Thaus tug TSWV kws yog mej tug Vaajtswv pub mej tau lub tebchaws dlaav ntxiv, lawv le nwg tub coglug tseg rua mej lawm, mej yuav tua mej tej tsaj noj thaus twg los tau lawv le mej sab nyam.

²¹Yog has tas, qhov chaw kws mej moog pehawm tug TSWV nyob dleb mej heev lawm, mej xaav tua tej nyuj hab tej yaaj kws tug TSWV pub rua mej muaj, mej ca le tua hab noj tau huv mej tej tsev lawv le kuv qha rua mej lawm.

²²Mej txhua tug, tsi has cov tuabneeg huv hab tsi huv los puavleej noj tau cov nqaj ntawd, ib yaam le mej noj tej nqaj kauv hab nqaj muaslwj.

²³Tabsis tsi xob noj tej nqaj kws txhaam ntshaav, rua qhov ntshaav yog txujsa. Mej tsi xob noj txujsa nrug cov nqaj.

²⁴Mej tsi xob muab ntshaav ua zaub noj, tabsis mej ca le muab laub povtseg ib yaam le laub dlej.

²⁵Yog mej ua lawv le kuv tej lug qha nuav, tug TSWV yuav txaus sab rua mej, mej hab mej tej xeebntxwv yuav noj qaab nyob zoo.

²⁶Ca le coj mej tej khoom fij hab mej tej khoom pub kws mej coglug moog fij rua tug TSWV ntawm qhov chaw kws mej pehawm nwg.

²⁷Ca le coj mej tej khoom fij kws muab hlawv taagnrho, tej nqaj hab tej ntshaav moog hlawv rua sau tug TSWV lub thaaj. Hab tej khoom fij kws mej noj tej nqaj, mej muab cov ntshaav laub rua sau lub thaaj.

²⁸Mej yuavtsum muab sab rau ua lawv le tej lug kws kuv qha rua mej, mej hab mej tej xeebntxwv txhaj yuav noj qaab nyob zoo moog ibtxhis, rua qhov mej ua lawv le tug TSWV kws yog mej tug Vaajtswv lub sab nyam.

²⁹“Tug TSWV kws yog mej tug Vaajtswv yuav ua kuas tej tsaav tuabneeg kws mej taabtom yuav moog tua puab hab puab lub tebchaws kuas puamtsuaj taag, mej yuav tau lub tebchaws ntawd nyob ua mej tug.

³⁰Tom qaab kws tug TSWV ua rua tej tsaav tuabneeg ntawd puamtsuaj taag lawm, mej ncu ntsoov tsi xob pe mlom le puab, nyob tsaam mej raug puamtsuaj. Tsi xob laam moog xauj, saib puab pe puab tej vaajtswv le caag, ces mej txawm yuav pe mej tug Vaajtswv le ntawd.

³¹Mej tsi xob pehawm tug TSWV kws yog mej tug Vaajtswv ib yaam le puab pe puab tej vaajtswv, rua qhov thaus puab pe puab tej vaajtswv, puab ua tej kev phem kev qas kws tug TSWV ntxub heev. Puab muab puab tej mivnyuas tua hlawv fij rua sau puab tej thaaj.

³²“Mej yuavtsum ua txhua yaam lawv le tej lug kws kuv qha rua mej lawm; mej tsi xob ntxiv lossis rhu ib lus le.