Read Hmong Njua 2 Kevcai 14 Bible Online

2 Kevcai 14 - Hmong Njua bible

2 Kevcai 14

¹“Mej yog tug TSWV kws yog mej tug Vaajtswv tsaav tuabneeg, thaus mej moog nyav tej tuabneeg tuag, mej tsi xob hlais mej lub cev lossis chais mej cov plaubhau ntawm hauvplaj ib yaam le lwm tsaav tuabneeg ua.

²Mej yog tsaav tuabneeg tseemceeb rua tug TSWV kws yog mej tug Vaajtswv; nwg tau xaiv mej tawm ntawm ntau tsaav tuabneeg huv nplajteb nuav lug ua nwg tsaav tuabneeg.

³“Mej tsi xob noj tej tsaj kws tug TSWV has tas, yog tsaj tsi huv.

⁴Mej noj tau tej tsaj nuav: nyuj, yaaj, tshis,

⁵muaslwj, nyuj kau, sai lossis kauv

⁶hab txhua yaam tsaj kws rau taw ncau hab zum zaub.

⁷tabsis tej tsaj kws rau taw tsi ncau hab tsi zum zaub, mas mej tsi xob noj le. Mej tsi xob noj ntxhuav, luav lossis loobtswb. Cov tsaj nuav yog tsaj tsi huv; cov tsaj nuav rau taw ncau tabsis tsi zum zaub.

⁸Mej tsi xob noj nqaj npuas. Npua yog tsaj tsi huv; npua rau taw ncau tabsis tsi zum zaub. Mej tsi xob noj cov tsaj nuav lossis kov cov tsaj ntawd lub cev tuag.

⁹“Mej noj tau tej ntseg kws muaj xab hab muaj khum,

¹⁰tabsis tej tsaj nyob huv dlej kws tsi muaj xab hab tsi muaj khum, mej tsi xob noj; cov ntawd yog tsaj tsi huv.

¹¹“Mej noj tau tej noog kws huv.

¹²Tej noog nuav yog tej kws tsi huv mej tsi xob noj: dlaav, plaas, laj, kaub kiyaaj, tsaw nqeeb, dlaav npoj, uab laag, noog ntxhuav, noog havtxwv, noog paag hawv, noog noj ntseg, roov dlev, us dlej, kus ntxhuav hab puav.

¹⁹“Txhua yaam kaab muaj tis kws tsi huv, mej tsi xob noj.

²⁰Tabsis txhua yaam kaab muaj tis kws huv mej noj tau.

²¹“Mej tsi xob noj tej tsaj kws mob tuag, ca cov tuabneeg txawv tebchaws kws nrug mej nyob noj xwb lossis muab muag rua cov tuabneeg txawv tebchaws; rua qhov mej yog tsaav tuabneeg kws dlawbhuv rua tug TSWV kws yog mej tug Vaajtswv. “Mej tsi xob muab mivnyuas yaaj lossis mivnyuas tshis cov nqaj hau nrug leej nam cov kua mig.

²²“Mej yuavtsum tshwj ib feem kaum ntawm tej qoobloo kws mej ua hab sau tau huv ib lub xyoos

²³coj moog rua ntawm qhov chaw kws tug TSWV kws yog mej tug Vaajtswv xaiv tseg ca ua qhov chaw pehawm nwg; hab mej noj tej ib feem kaum kws yog nplej, cawv txiv maab, roj txiv ntoo, thawj tug mivnyuas nyuj hab mivnyuas yaaj taabmeeg tug TSWV. Mej ua le nuav txhaj yog mej fwm tug TSWV kws yog mej tug Vaajtswv moog ibtxhis le.

²⁴Yog lub chaw kws pehawm tug TSWV nyob dleb heev, mej coj tsi tau mej tej ib feem kaum ntawm mej tej qoobloo kws mej tug TSWV foom koob moov rua mej ua hab sau tau lug moog fij rua nwg, ces mej ua le nuav:

²⁵Mej muab tej qoob ib feem kaum ntawd muag hab coj cov nyaj moog fij rua tug TSWV ntawm qhov chaw pehawm tug TSWV.

²⁶Mej muab cov nyaj ntawd yuav nqaj nyuj, nqaj yaaj, cawv txiv maab cawv ntxws hab lwm yaam kws mej xaav yuav. Ces mej hab mej tsev tuabneeg noj haus hab zoo sab taabmeeg tug TSWV kws yog mej tug Vaajtswv qhov ntawd.

²⁷“Mej tsi xob tso cov Levis kws nrug mej nyob huv mej tej nroog tseg, rua qhov puab tsi muaj aav ua puab tug.

²⁸Txhua peb lub xyoos twg, coj ib feem kaum ntawm tej qoobloo kws mej ua hab sau tau lug tso rua huv mej tej nroog.

²⁹Tej qoobloo ntawd yog muab rua cov Levis, rua qhov puab tsi muaj aav ua puab tug, hab muab rua cov tuabneeg txawv tebchaws, cov mivnyuas ntsuag hab cov puj ntsuag kws nrug mej nyob huv mej tej nroog kuas puab txhaj tau tej ntawd noj. Mej ua le nuav tug TSWV kws yog mej tug Vaajtswv txhaj foom koob moov rua txhua yaam kws mej ua.