Read Hmong Njua 2 Kevcai 15 Bible Online

2 Kevcai 15 - Hmong Njua bible

2 Kevcai 15

¹“Txhua xyaa lub xyoo twg, mej yuavtsum xuam tej nyaj kws luas tshuav mej nqe.

²Tej kws mej yuav tau xuam yog le nuav: tej nyaj kws mej qev rua mej ib tug kwvtij Yixalayees, yuavtsum xuam rua nwg. Mej tsi xob tsib cov nyaj ntawd rov qaab; rua qhov tug TSWV kuas mej xuam tej nuj nqes ntawd.

³Mej tsib tau tej nyaj kws mej qev rua cov tuabneeg txawv tebchaws, tabsis mej tsi xob tsib cov nyaj kws mej cov kwvtij tshuav mej nqe.

⁴“Tug TSWV kws yog mej tug Vaajtswv yuav foom koob moov rua mej thaus mej moog nyob huv lub tebchaws kws nwg coglug muab rua mej. Nwg yuav tsi pub mej ib tug twg pluag le.

⁵Yog mej fwm tug TSWV hab ua lawv le tej lug kws nub nua kuv qha rua mej,

⁶tug TSWV yuav foom koob moov rua mej, lawv le nwg tau coglug tseg lawm. Mej yuav muaj nyaj qev rua ntau tsaav tuabneeg, mej yuav tsi moog txais nyaj ntawm ib tsaav tuabneeg twg le, mej yuav kaav ntau tsaav tuabneeg, tabsis yuav tsi muaj ib tsaav tuabneeg twg kaav mej.

⁷“Thaus mej moog nyob huv lub tebchaws kws tug TSWV kws yog mej tug Vaajtswv muab rua mej, yog mej cov kwvtij Yixalayees ib tug twg txomnyem nyob huv mej tej nroog, mej tsi xob ua tuabneeg cuamkhum hab tsi kaam paab tug ntawd.

⁸Tabsis mej yuavtsum ua tuabneeg sab dlawb sab zoo hab qev nyaj rua nwg kuas txaus le nwg xaav yuav.

⁹Txawm yog tub ze rua xyoo kws xuam nuj nqes lawm los mej yuavtsum qev rua nwg. Mej tsi xob muaj lub sab xaav phem. Yog mej tsi kaam qev, nwg yuav quaj thov tug TSWV foom phem rua mej, ces mej yuav raug txim.

¹⁰Mej yuavtsum zoo sab hlo muab rua nwg ntawm lub sab dlawb paug, tug TSWV txhaj yuav foom koob moov rua txhua yaam kws mej ua.

¹¹Mej muaj cov kwvtij Yixalayees txomnyem kws nrug mej nyob. Yog le ntawd, kuv has rua mej tas, mej yuavtsum ua sab dlawb sab zoo rua puab.

¹²“Yog cov Yixalayees muaj ib tug twg, tsi has quaspuj lossis txivneej muab nwg muag rua mej ua mej tug qhev, thaus kws nwg ua num rua mej puv rau lub xyoo lawm, xyoo xyaa, mej yuavtsum tso nwg moog.

¹³Thaus mej tso nwg moog, tsi xob ca nwg moog teg dlawb teg nplag.

¹⁴Mej yuavtsum ua sab dlawb sab zoo, muab tej kws tug TSWV foom koob moov rua mej muaj kws yog: yaaj, nplej hab cawv txiv maab pub rua nwg coj moog.

¹⁵Ncu ntsoov has tas, thaus mej nyob nraag tebchaws Iziv, mej ua luas qhev, tug TSWV kws yog mej tug Vaajtswv tau tso mej dlim; tub yog vim le ntawd, nub nua kuv txhaj qha tej nuav rua mej.

¹⁶“Tabsis yog has tas mej tug qhev tsi kaam moog; vim nwg ncawg mej tsev tuabneeg hab thov nrug mej nyob,

¹⁷mej coj nwg moog rua ntawm qhovrooj, hab muab nwg pobntseg tho; ces nwg yuav ua mej qhev moog taag nwg simneej. Mej ua ib yaam le ntawd rua mej tug ntxhais qhev hab,

¹⁸tsi xob nyuaj sab thaus kws mej yuav tso ib tug qhev tawm moog, rua qhov nwg ua num rua mej rau lub xyoo, nwg tsuas tau nqe zug npaum le ib nraab ntawm tug kws mej ndlav ua num xwb. Mej yuavtsum ua le nuav, tug TSWV kws yog mej tug Vaajtswv txhaj yuav foom koob moov rua tej kws mej ua.

¹⁹“Mej yuavtsum xaiv thawj tug mivnyuas nyuj hab mivnyuas yaaj kws yog tug txiv tshwj rua ib caag ca fij rua tug TSWV kws yog mej tug Vaajtswv; tsi xob siv cov mivnyuas nyuj ntawd ua num, hab tsi xob muab cov mivnyuas yaaj ntawd txav plaub.

²⁰Txhua xyoo mej hab mej tej quaspuj mivnyuas yuavtsum noj tej nqaj ntawd taabmeeg tug TSWV ntawm qhov chaw kws mej pehawm nwg.

²¹Tabsis yog has tas, tej tsaj ntawd cegtawv, dligmuag lossis muaj mob, mej tsi xob muab tug tsaj ntawd moog fij rua tug TSWV kws yog mej tug Vaajtswv.

²²Mej tua cov tsaj ntawd noj tau huv mej tej tsev, tsi has cov tuabneeg huv hab tsi huv, puavleej noj tau ib yaam le noj tej nqaj kauv lossis nqaj muaslwj.

²³Tabsis mej yuavtsum tsi xob noj cov ntshaav; mej yuavtsum muab laub povtseg ib yaam le laub dlej.