Read Hmong Njua 2 Kevcai 16 Bible Online

2 Kevcai 16 - Hmong Njua bible

2 Kevcai 16

¹“Mej yuavtsum ua Kevcai Hlaa Dlhau rua thaus lub hlis Anpis, qhuas tug TSWV kws yog mej tug Vaajtswv; rua qhov lub hlis ntawd, muaj ib mos yog mo kws tug TSWV coj mej tawm nraag tebchaws Iziv lug.

²Mej ca le coj ib tug nyuj lossis ib tug yaaj moog rua ntawm qhov chaw pehawm tug TSWV, hab muab tua ua Kevcai Hlaa Dlhau qhuas tug TSWV kws yog mej tug Vaajtswv.

³Thaus mej noj cov nqaj ntawd, mej tsi xob noj cov ncuav kws xyaw keeb, xyaa nub ntawd mej yuavtsum noj cov ncuav kws tsi xyaw keeb ib yaam le thaus mej tawm nraag tebchaws Iziv lug, mej maaj heev, mej txhaj noj tej ncuav kws tsi xyaw keeb; cov ncuav ntawd hu ua ncuav txomnyem sab, mej ua le nuav mej txhaj yuav ncu ntsoov nub kws mej tawm nraag tebchaws Iziv qhov chaw kws mej raug kev txomnyem.

⁴Xyaa nub ntawd, tsi pub ib tug twg kws nyob huv mej lub tebchaws muaj tej keeb ncuav nyob huv tsev le; tug tsaj kws mej tua thawj mo, mej yuavtsum noj kuas taag dlu lug rua mo ntawd.

⁵“Tsuas pub mej tua tsaj ua Kevcai Hlaa Dlhau rua ntawm qhov chaw kws mej pehawm tug TSWV xwb, tsi pub mej tua rua lwm qhov huv lub tebchaws kws tug TSWV kws yog mej tug Vaajtswv muab rua mej. Mej ua rua thaus nub poob qho kws yog lub caij mej tawm nraag tebchaws Iziv lug.

⁷Mej hau cov nqaj ntawd noj rua ntawm qhov chaw kws mej pehawm tug TSWV; hab nub tom qaab sawv ntxuv mej maam le rov moog tsev.

⁸Rua qhov rau nub tom ntej mej yuav noj ncuav tsi xyaw keeb, hab nub xyaa mej yuavtsum tuaj ua ke pehawm tug TSWV kws yog mej tug Vaajtswv hab nub ntawd mej tsi xob ua num.

⁹“Mej suav xyaa lub limtam, txij nub kws mej pib sau qoobloo moog,

¹⁰mej maam le ua kevcai sau qoobloo qhuas tug TSWV kws yog mej tug Vaajtswv, hab coj tej khoom fij kws mej txaus sab muab rua tug TSWV lawv le nwg tau foom koob moov rua mej moog fij rua nwg.

¹¹Mej hab mej tej quaspuj mivnyuas, cov tubkhai, cov Levis, cov tuabneeg txawv tebchaws, cov mivnyuas ntsuag hab cov puj ntsuag kws nyob huv mej tej nroog, ca le noj zoo sab taabmeeg tug TSWV rua ntawm qhov chaw kws mej pehawm nwg.

¹²Mej yuavtsum ncu ntsoov ua lawv le tej lug qha nuav; hab ncu ntsoov qhov kws mej ua luas qhev nraag tebchaws Iziv.

¹³“Tom qaab kws mej ntaus nplej hab tsu kua txiv maab taag lawm, mej ca le ua kevcai nyob Tsev Pheebsuab xyaa nub.

¹⁴Mej hab mej tej quaspuj mivnyuas, cov tubkhai, cov Levis, hab tej tuabneeg txawv tebchaws, cov mivnyuas ntsuag hab cov puj ntsuag kws nrug mej nyob huv mej tej nroog,

¹⁵ca le ua Kevcai nyob Tsev Pheebsuab xyaa nub qhuas tug TSWV kws yog mej tug Vaajtswv, ntawm qhov chaw kws mej pehawm nwg. Mej ca le zoo sab rua qhov tug TSWV foom koob moov rua mej tej qoobloo hab tej num kws mej ua.

¹⁶“Mej tsaav tuabneeg txhua tug txivneej yuavtsum tuaj pehawm tug TSWV ntawm qhov chaw kws nwg xaiv ca ib xyoos peb zag: ua Kevcai Hlaa Dlhau, ua Kevcai Sau Qoobloo hab ua Kevcai nyob Tsev Pheebsuab. Txhua tug tsi xob tuaj teg dlawb teg nplag, nyag yuavtsum nqaa nyag ib yaam khoom

¹⁷tuaj fij rua tug TSWV, lawv le tug TSWV kws yog mej tug Vaajtswv tau foom koob moov rua mej lawm.

¹⁸“Mej yuavtsum tsaa ib paab tuabneeg ua cov txav txim hab tsaa ib cov numtswv ua cov tswjfwm nyob rua huv txhua lub nroog kws tug TSWV kws yog mej tug Vaajtswv muab rua mej lawm. Cov kws mej tsaa ntawd yuav txav txim ncaaj nceeg rua mej tsaav tuabneeg.

¹⁹Puab yuavtsum coj txujkev ncaaj nceeg tsi xob tso tseg, tsi xob txav txim tsi ncaaj, hab tsi xob yuav luas tej nyaj xab, rua qhov tej nyaj xab ntawd yuav ua rua cov tuabneeg ncaaj nceeg hab txawj ntse qhovmuag faam txav txim tsi ncaaj.

²⁰Mej yuavtsum ua ncaaj hab ua zoo nyob huv lub tebchaws kws tug TSWV kws yog mej tug Vaajtswv yuav muab rua mej, mej txhaj yuav muaj sa ua neej nyob ntev rua huv lub tebchaws ntawd.

²¹“Thaus mej ua ib lub thaaj rua tug TSWV kws yog mej tug Vaajtswv, mej tsi xob txhus tug mlom ntoo Aselas rua ntawm lub thaaj ib saab;

²²hab mej tsi xob txhus ncej zeb ua ib tug mlom rua mej pe; rua qhov tug TSWV ntxub tej mlom ntawd.