Read Hmong Njua 2 Kevcai 17 Bible Online

2 Kevcai 17 - Hmong Njua bible

2 Kevcai 17

¹“Mej tsi xob coj tug nyuj lossis tug yaaj kws dligmuag lossis cegtawv tuaj fij rua tug TSWV kws yog mej tug Vaajtswv; tug TSWV ntxub qhov kws mej ua le nuav.

²Yog has tas, huv mej tej nroog muaj ib tug quaspuj lossis ib tug txivneej ua txhum rua tug TSWV hab rhuav nwg tej lug cog tseg,

³moog pe lwm tug vaajtswv, pe lub nub, lub hli lossis pe tej nubqub kws tug TSWV txwv tsi pub pe.

⁴Yog muaj tuabneeg qha tej ntawd rua mej, mej yuavtsum ua tuab zoo tshuaj saib, yog muaj tug ua phem le ntawd nyob rua huv cov Yixalayees tag,

⁵mej ca le coj tug ntawd moog rua saab nrau ntug nroog hab muab pobzeb ntaus nwg kuas tuag.

⁶Yog muaj ob lossis peb leeg ua timkhawv has tas tug ntawd ua txhum, mej txhaj muaj cai muab nwg tua; yog muaj ib leeg ua timkhawv xwb, mej tsi xob muab nwg tua.

⁷Cov kws ua timkhawv yuavtsum xub muab pobzeb ntaus tug kws ua txhum, suavdlawg maam le muab pobzeb ntaus tom qaab. Mej yuavtsum ua le ntawd txhaj tshem tau txujkev phem huv mej moog.

⁸“Yog has tas, nyob huv mej lub nroog muaj tej rooj plaub nyuaj kws tsi pum qaab txav txim kws yog plaub sis txeeb teb, plaub sis ntaus nqaj ndluag ntshaav nrug lossis plaub tua tuabneeg. Thaus muaj le ntawd, mej ca le coj moog rua ntawm qhov chaw kws tug TSWV kws yog mej tug Vaajtswv tau xaiv ca ua lub chaw pehawm nwg.

⁹Mej ca le peev lug rua cov povthawj hab cov txav txim kws yog cov tu plaub noog, puab yuav taug hab tu rooj plaub ntawd.

¹⁰Puab yog cov kws yuav txav txim sab, mej yuavtsum ua lawv le puab kuas mej ua.

¹¹Mej ca le yuav lawv le puab tu hab ua lawv puab has rua mej txhua yaam huv tuabsi.

¹²Yog leejtwg tsi noog tug povthawj lossis tug tu plaub lub sijhawm ntawd has, ca le muab tug ntawd tua, mej ua le nuav txhaj tshem tau txujkev phem tawm huv cov Yixalayees moog.

¹³Thaus suavdlawg nov zaaj nuav, puab yuav ntshai hab tsi ua phem le ntawd lawm.

¹⁴“Thaus mej moog nyob huv lub tebchaws kws tug TSWV kws yog mej tug Vaajtswv muab rua mej, mej yuav has tas, ‘Peb yuav tsaa kuas muaj vaajntxwv lug kaav peb ib yaam le luas lwm tsaav tuabneeg kws nyob puagncig peb.’

¹⁵Mej ca le tsaa tug kws tug TSWV kws yog mej tug Vaajtswv xaiv ca ua vaajntxwv kaav mej. Yog tsaa mej cov kwvtij ib tug ua vaajntxwv; tsi yog tsaa lwm tsaav tuabneeg.

¹⁶Tug vaajntxwv tsi xob muaj neeg coob dlhau rua nwg cov tubrog, hab tsi xob khaiv nwg cov tuabneeg moog yuav neeg nraag tebchaws Iziv, rua qhov tug TSWV txwv tsi pub mej rov moog nraag tebchaws Iziv le lawm.

¹⁷Tug vaajntxwv tsi xob yuav ntau tug quaspuj, nyob tsaam nwg tso tug TSWV tseg; hab nwg tsi xob ua kuas nwg npluanuj, muaj nyaj muaj kub ntau dlhau.

¹⁸Thaus nwg ua vaajntxwv kaav lub tebchaws, nwg kuas tuabneeg moog muab phoo ntawv kws sau Vaajtswv tej lug hab tej kevcai ntawm cov Levis kws ua povthawj lug theej dlua ib phoo lawv nraim le thawj phoo rua nwg.

¹⁹Nwg yuavtsum khaws phoo ntawv nuav hab naj nub nyeem moog taag nwg simneej, nwg txhaj le paub fwm tug TSWV hab ua lawv le txhua yaam kws qha tseg rua huv phoo ntawv ntawd.

²⁰Yog nwg ua le ntawd, nwg yuav tsi khaav has tas nwg yog tug zoo tshaaj nwg cov kwvtij Yixalayees, hab nwg txhaj tsi tso tug TSWV txuj kevcai tseg. Nwg yuav tau ua vaajntxwv kaav ntev, hab nwg caajceg txhaj yuav tau ua vaajntxwv kaav cov Yixalayees moog ntau tam.