Read Hmong Njua 2 Kevcai 19 Bible Online

2 Kevcai 19 - Hmong Njua bible

2 Kevcai 19

¹“Thaus tug TSWV kws yog mej tug Vaajtswv muab cov tuabneeg kws nyob huv lub tebchaws kws nwg yuav muab rua mej ua kuas puamtsuaj, hab thaus mej moog nyob huv puab tej nroog hab puab tej tsev,

²mej muab lub tebchaws faib ua peb feem, tu ib lub nroog huv ib feem kws nyob rua qhov chaw moog rua huv yoojyim. Yog muaj ib tug twg tua yuam kev raug lwm tug tuag, nwg txhaj tau kev tsiv moog cawm sav huv cov nroog ntawd ib lub.

⁴Yog ib tug twg tua yuam kev raug lwm tug tuag kws tsi yog nwg tug yeebncuab, nwg tsiv moog cawm sav huv cov nroog ntawd ib lub, kuas luas tsi xob muab nwg tua.

⁵Yog has tas, muaj ob tug tuabneeg ua ke moog txav ntoo huv haav zoov, thaus ib tug taabtom ntuv ntoo, nwg raab taus hle moog raug ib tug tuag lawm, nwg ca le tsiv moog cawm sav huv cov nroog ntawd ib lub, kuas luas tsi xob muab nwg tua.

⁶Yog muaj ib lub nroog cawm sav xwb, nyob tsaam txujkev moog rua lub nroog ntawd dleb heev, yog has tas tug tuag cov kwvtij chim, puab yuav lawv qaab moog nteg tau nwg, ces puab yuav ca le muab tug kws tsi muaj txim ntawd tua. Qhov kws tug ntawd tuag yog nwg yuam kev xwb, tsi yog txhobtxwm tua, rua qhov obtug tsi yog yeebncuab.

⁷Yog le ntawd, kuv txhaj kuas mej tshwj peb lub nroog cawm sav tseg.

⁸“Thaus tug TSWV kws yog mej tug Vaajtswv pub kuas mej tau lub tebchaws dlaav zuj zug ntxiv lawv le nwg coglug rua mej cov yawmkoob lawm has tas nwg yuav muab rua mej,

⁹mej rov xaiv dlua peb lub nroog ca ua nroog cawm sav. (Yog mej ua lawv tej lug kws nub nua kuv qha rua mej, hlub tug TSWV kws yog mej tug Vaajtswv, hab ua lawv le nwg tej kevcai txhua nqai, nwg yuav muab taagnrho lub tebchaws rua mej.)

¹⁰Mej yuavtsum ua le nuav, tug tuabneeg kws tsi muaj txim txhaj tsi raug tua tuag rua huv lub tebchaws kws tug TSWV muab rua mej, mej txhaj tsi tau ris nwg lub txim.

¹¹“Tabsis yog leejtwg moog tog kev muab nwg tug yeebncuab tua tuag, ces txawm yog nwg tsiv moog kaum rua huv cov nroog cawm sav ntawd lub twg los xij,

¹²cov kev txwjlaug kws nyob huv lub nroog ntawd yuav tso tuabneeg moog nteg nwg rov lug cob rua tug tuag cov kwvtij, puab yuav muab nwg tua povtseg pauj qhov kws nwg tua tuabneeg.

¹³Mej tsi xob hlub nwg. Ca le muab nwg tshem tawm huv cov Yixalayees moog, mej txhaj tau nyob kaaj sab lug.

¹⁴“Mej tsi xob naam mej cov kwvtij tug nrimteb kws tej laug tu tseg, thaus mej nyob huv lub tebchaws kws tug TSWV kws yog mej tug Vaajtswv yuav muab rua mej.

¹⁵“Yog ib tug ua timkhawv ntxo lwm tug kws ua txhum xwb tsi txaus; yuavtsum yog muaj ob lossis peb leeg ua timkhawv txhaj le ntseeg tau.

¹⁶Yog muaj leejtwg ua timkhawv cuav ntxo ib tug twg has tas, tug ntawd tau ua txhum,

¹⁷kuas obtug moog rua ntawm lub chaw pehawm tug TSWV, ca cov povthawj hab cov txav txim tu plaub rua obtug.

¹⁸Cov txav txim yuavtsum ua tuab zoo taug rooj plaub ntawd; yog tug ntawd laam ua timkhawv cuav ntxo nwg tug kwvtij Yixalayees xwb,

¹⁹mej yuavtsum tau rau txim rua tug kws ua timkhawv cuav ntawd ib yaam le lub txim kws nwg ntxo lwm tug. Mej ua le ntawd, mej txhaj tshem tau tej kev phem kev qas nuav moog.

²⁰Thaus kws txhua tug nov, puab txhaj yuav ntshai hab tsi ua txhum le ntawd ntxiv lawm.

²¹Mej tsi xob hlub nwg le; yuavtsum ca sav pauj sav, qhovmuag pauj qhovmuag, nav pauj nav, teg pauj teg hab kutaw pauj kutaw.