Read Hmong Njua 2 Kevcai 2 Bible Online

2 Kevcai 2 - Hmong Njua bible

2 Kevcai 2

¹Peb txawm rov qaab moog rua taj suabpuam, taug kev moog rua Havtxwv Lab lawv le tug TSWV tau has lawm. Peb tau ncig moog ncig lug ntev loo ntawm lub laaj roob huv tebchaws Edoos.

²“Tug TSWV has rua kuv tas,

³mej tub ncig moog ncig lug ntawm tej laaj roob nuav tau ntev loo lawm, mej ca le moog rua saab qaumteb.

⁴Nwg kuas kuv qha rua mej has tas, ‘Mej taabtom yuav moog rua ntawm lub laaj roob huv tebchaws Edoos, yog mej cov kwvtij kws yog Exaus cov xeebntxwv lub tebchaws, puab yuav ntshai mej heev,

⁵tabsis mej tsi xob moog ua rog rua puab, kuv yuav tsi muab puab lub tebchaws ib thaaj aav luaj xibteg rua mej le. Kuv tub muab lub tebchaws Edoos ntawd rua Exaus cov xeebntxwv lawm.

⁶Mej tsuas yuav tau mov noj hab dlej haus ntawm puab xwb.’

⁷“Mej ncu ntsoov has tas tug TSWV kws yog mej tug Vaajtswv tau foom koob moov rua txhua yaam kws mej ua taag lug lawm. Nwg tau tsomkwm mej thaus mej taug kev lug hlaa lub taj suabpuam kws dlaav heev, nwg nrug nraim mej tau plaub caug xyoo hab pub txhua yaam rua mej kuas muaj txaus.

⁸“Peb txawm ncaim peb cov kwvtij kws yog Exaus cov xeebntxwv huv tebchaws Edoos, ntawm lub nroog Elas hab Exi-oosnkenpes taug txujkev Alanpas moog rua peg taj suabpuam Mau-am lawm.

⁹Tug TSWV has rua kuv tas, ‘Mej tsi xob moog thaab plaub nrug cov tuabneeg Mau-am lossis ua rog rua puab, rua qhov puab yog Lauj cov xeebntxwv. Kuv tub muab lub nroog Ales rua puab lawm, kuv yuav tsi muab lub tebchaws ntawd ib qho rua mej le.’ ”

¹⁰(Muaj ib tsaav tuabneeg hu ua Emis, yog cov tuabneeg kws luj hab sab heev, puab ibtxwm nyob huv lub nroog Ales ntawd. Cov tuabneeg Emis luj hab sab ib yaam le cov tuabneeg Anakees kws yog ib tsaav tuabneeg luj hab sab heev.

¹¹Cov tuabneeg Emis muaj dlua ib lub npe hu ua Lefayees, ib yaam le cov tuabneeg Anakees; tabsis cov tuabneeg Mau-am hu cov tuabneeg ntawd ua Emis.

¹²Thaus xubthawj cov tuabneeg Haulis nyob huv lub tebchaws Edoos, tabsis Exaus cov xeebntxwv muab puab lawv tawm, rhuav tshem puab tsaav tuabneeg hab lug nyob huv puab lub tebchaws, ib yaam le cov Yixalayees muab puab cov yeebncuab lawv tawm huv puab lub tebchaws kws tug TSWV muab rua puab lawm.)

¹³“Peb txhaj hlaa tug Dlej Zeles moog rua saab tim u lawv le tug TSWV tau has rua peb lawm.

¹⁴Thaus peb tsiv huv Kades Npane-as lug txug thaus peb hlaa tug Dlej Zeles tau peb caug yim xyoo. Cov txivneej kws ua taug tubrog tam ntawd tuag taag lawv le tug TSWV tau has tseg lawm tas, puab yuav tuag taag le ntawd.

¹⁵Tug TSWV tau tawmtsaam puab huv lub yeej kws puab nyob, ua rua puab puamtsuaj taag huv tuabsi.

¹⁶“Tom qaab kws cov txivneej ntawd tuag taag lawm,

¹⁷tug TSWV has rua kuv tas,

¹⁸‘Nub nua mej hlaa kuas dlhau cheebtsaam Ales huv tebchaws Mau-am.

¹⁹Mej tub moog yuav txug cov tuabneeg Amoos kws yog Lauj cov xeebntxwv lub tebchaws. Mej tsi xob thaab plaub lossis ua rog rua puab, rua qhov kuv yuav tsi muab lub tebchaws kws kuv muab rua puab lawm, ib qho rua mej le.’ ”

²⁰(Cheebtsaam nuav lawv le suavdlawg paub, mas yog cov tuabneeg Lefayees lub tebchaws. Yog tsaav tuabneeg kws ibtxwm nyob huv lub tebchaws ntawd lub npe; cov tuabneeg Amoos hu cov tuabneeg kws nyob huv lub tebchaws ntawd ua “Xaaxumis.”

²¹Puab yog cov tuabneeg kws luj hab sab ib yaam le cov tuabneeg Anakees. Puab yog tsaav tuabneeg kws muaj zug hab coob heev. Tabsis tug TSWV muab puab rhuav puamtsuaj taag, yog le ntawd, cov Amoos txhaj moog txeeb tau puab lub tebchaws nyob.

²²Tug TSWV ua ib yaam le ntawd rua Exaus cov xeebntxwv kws yog tuabneeg Edoos kws nyob sau lub laaj roob huv tebchaws Edoos. Tug TSWV rhuav cov tuabneeg Haulis puamtsuaj taag. Yog le ntawd, cov Edoos txhaj moog txeeb tau lub tebchaws ntawd ua puab tug hab moog nyob rua huv. Puab tseem nyob huv lub tebchaws ntawd lug txug naj nub nua.

²³Tabsis cov tuabneeg kws nyob huv koog Povtxwv Kaletes, lug nyob saab tebchaws kws lawv ntug Havtxwv Meditelanees. Puab lug tua cov tuabneeg Avimes kws ibtxwm nyob huv lub tebchaws ntawd tuag taag. Hab txeeb tau taagnrho lub tebchaws ntawd moog ti nkaus rua lub nroog Nkaxas ua puab tug.)

²⁴“Thaus peb lug dlhau tebchaws Mau-am lawm, tug TSWV has rua peb tas, ‘Mej ca le hlaa tug Dlej Alenoos moog rua saab tim u. Kuv tub muab cov Amaules tug vaajntxwv Xihoos kws kaav lub nroog Hesenpoos, hab nwg lub tebchaws cob rua mej lawm. Mej ca le moog tua hab nyob huv nwg lub tebchaws.

²⁵Txij nub nua moog, kuv yuav ua kuas tej tuabneeg kws nyob txhua qhov ntshai mej. Txhua tug yuav ntshai tshee nyo thaus puab nov mej lub npe.’

²⁶“Kuv txhaj tso tuabneeg ntawm taj suabpuam Kedemaus moog cuag Vaajntxwv Xihoos kws nyob huv Hesenpoos, hab nrug nwg cog phoojywg le nuav:

²⁷‘Thov ca peb hlaa mej lub tebchaws moog, peb yuav taug kev ncaaj nraim xwb, tsi moog rua saab xis lossis saab txhumphem le.

²⁸Peb yuav them nqe rua cov dlej kws peb haus hab tej zaub mov kws peb noj. Peb tsuas thov koj tso kev rua peb hlaa koj lub tebchaws

²⁹moog txug thaus peb hlaa dlhau tug Dlej Yauladees rua tim lub tebchaws kws tug TSWV kws yog peb tug Vaajtswv muab rua peb lawm, ib yaam le Exaus cov xeebntxwv kws nyob huv tebchaws Edoos hab cov Mau-am kws nyob huv lub nroog Ales, tau tso kev rua peb hlaa puab lub tebchaws lug lawm.’

³⁰“Tabsis Vaajntxwv Xihoos tsi pub peb hlaa huv nwg lub tebchaws moog le, rua qhov tug TSWV kws yog peb tug Vaajtswv ua rua nwg muaj lub sab tawv heev, kuas peb txhaj tua yeej nwg hab txeeb tau nwg lub tebchaws kws peb tseem nyob naj nub nua.

³¹“Tug TSWV has rua kuv tas, ‘Mej saib, kuv tub muab Xihoos hab nwg lub tebchaws cob rua mej lawm; ca le moog txeeb nwg lub tebchaws rua mej nyob.’

³²Vaajntxwv Xihoos hab nwg paab tubrog tuaj tua peb ze rua ntawm lub nroog Yahas.

³³Tabsis tug TSWV kws yog peb tug Vaajtswv tub muab nwg cob rua peb lawm, peb txhaj tua tau nwg, nwg cov tub hab taagnrho nwg cov tubrog.

³⁴Thaus ntawd, peb txeeb tau nwg lub tebchaws, rhuav txhua lub nroog hab tua txhua tug tuabneeg, tsi has quaspuj, txivneej hab mivnyuas, peb tsi tseg ib tug muaj sa nyob le.

³⁵Peb coj puab tej tsaj txhu hab fuab puab tej khoom huv tej nroog moog taag.

³⁶Tug TSWV kws yog peb tug Vaajtswv ca peb moog txeeb tau taagnrho cov nroog kws txij ndlua ntawm Alu-es kws nyob npuab lub Haav Alenoos, hab lub nroog kws nyob huv plawv lub haav ntawd, moog txug ntawm Nkile-as. Tsi muaj ib lub nroog twg muaj ntsaa yeej khov kws peb yuav tsoo tsi tau le.

³⁷Tabsis peb yeej tsi moog ze rua ntawm cheebtsaam kws cov Amoos nyob, lossis moog ze rua ntawm tug ntug dlej Yanpaus, lossis tej nroog kws nyob rua sau laaj roob, lossis txhua qhov chaw kws tug TSWV kws yog peb tug Vaajtswv tsi pub peb moog.