Read Hmong Njua 2 Kevcai 20 Bible Online

2 Kevcai 20 - Hmong Njua bible

2 Kevcai 20

¹“Thaus mej moog tua mej cov yeebncuab, yog mej pum puab muaj tsheb neeg, neeg hab tubrog coob tshaaj mej los mej tsi xob ntshai puab. Tug TSWV kws yog mej tug Vaajtswv, tug kws cawm mej dlim nraag tebchaws Iziv lug, yuav nrug nraim mej.

²Ua ntej mej yuav moog ntaus rog, ib tug povthawj yuav tuaj has rua cov tubrog tas,

³‘Ib tsoom tubrog Yixalayees, mej noog kuv has! Nub nua mej yuav sawv kev moog tua rog, tabsis mej tsi xob ntshai mej cov yeebncuab, tsi xob ntaus sab yau lossis txhawj.

⁴Tug TSWV kws yog mej tug Vaajtswv yuav nrug mej moog hab paab kuas mej tua yeej.’

⁵“Ces cov numtswv yuav has rua mej tas, ‘Puas muaj leejtwg ua tau tsev, tabsis tsi tau muab fij rua tug TSWV? Yog muaj, nwg ca le rov moog tsev. Nyob tsaam nwg moog raug tua tuag rua huv tshaav rog, ces lwm tug yuav tau muab nwg lub tsev fij rua tug TSWV.

⁶Puas muaj leejtwg nyavnyuas moog cog tau txiv maab, tabsis tsi tau moog dle ib zag le? Yog muaj, nwg ca le rov moog tsev, nyob tsaam nwg moog raug tua tuag rua huv tshaav rog, ces lwm tug yuav zoo sab kws tau noj nwg tej txiv maab ntawd.

⁷Puas muaj leejtwg qhab tau ib tug hluas nkauj, tabsis tsi tau yuav? Yog muaj, nwg ca le rov moog tsev. Nyob tsaam nwg moog raug tua tuag rua huv tshaav rog, ces lwm tug yuav tau yuav tug hluas nkauj ntawd.’

⁸“Cov numtswv rov has rua cov tubrog tas, ‘Puas muaj leejtwg ntshai ua rua nwg ib ce tuag taag? Yog muaj, nwg ca le rov moog tsev. Nyob tsaam nwg ua rua lwm tug tubrog qaug zug.’

⁹Tom qaab kws cov numtswv tuaj has rua cov tubrog taag lawm, puab maam xaiv cov thawjcoj kws saib tej paab tubrog ntawd.

¹⁰“Thaus mej moog tua mej cov yeebncuab tej nroog, mej yuavtsum ca sijhawm rua cov tuabneeg huv lub nroog tsaa teg thov mej.

¹¹Yog puab qheb roojvaag hab tsaa teg thov mej, puab yuav tau ua mej qhev hab ua num rua mej.

¹²Tabsis yog puab tsi tsaa teg thov mej, puab yuav nrug mej sis tua, mej cov tubrog ca le vij puab lub nroog.

¹³Thaus tug TSWV kws yog mej tug Vaajtswv ca mej txeeb tau puab lub nroog lawm, mej ca le muab txhua tug txivneej kws nyob huv lub nroog ntawd tua huv tuabsi.

¹⁴Txawm le ntawd los pub mej coj puab tej quaspuj mivnyuas, tej tsaj txhu hab tej khoom kws nyob huv lub nroog lug. Mej siv tau txhua yaam kws yog mej cov yeebncuab le. Tej ntawd yog tug TSWV kws yog mej tug Vaajtswv muab rua mej.

¹⁵Mej yuavtsum ua le ntawd rua cov nroog kws nyob dleb lub tebchaws kws mej taabtom yuav moog nyob ntawd.

¹⁶“Thaus mej moog txeeb tau tej nroog huv lub tebchaws kws tug TSWV kws yog mej tug Vaajtswv muab rua mej, mej yuavtsum muab cov tuabneeg kws nyob huv tua huv tuabsi.

¹⁷Mej yuavtsum tua cov Hitis, cov Amaules, cov Kana-aas, cov Pelixes, cov Hivis hab cov Yenpus, kuas tuag taag lawv le tug TSWV has rua mej lawm.

¹⁸Mej ua le ntawd puab txhaj tsi coj mej moog pe puab tej vaajtswv, kuas mej ua txhum tawmtsaam tug TSWV.

¹⁹“Thaus mej moog tua ib lub nroog twg, txawm yog yuav siv sijhawm moog vij ntev los mej tsi xob ntuv tej txiv maab txiv ntoo povtseg. Mej noj tej txiv, tabsis mej tsi xob muab tsob ntoo ntuv; rua qhov tsob ntoo tsi yog mej cov yeebncuab.

²⁰Mej ntuv tau lwm yaam ntoo lug thaiv ua chaw tiv sis tua moog txug thaus mej txeeb tau lub nroog.