Read Hmong Njua 2 Kevcai 23 Bible Online

2 Kevcai 23 - Hmong Njua bible

2 Kevcai 23

¹“Tug txivneej kws luas muab saam lossis txav chaw xis lawm, tsi muaj feem koom tug TSWV tsaav tuabneeg.

²“Tsi pub tug mivnyuas tsaub lossis nwg caajceg muaj feem koom nrug tug TSWV tsaav tuabneeg, txawm yog tom qaab kaum tam tuabneeg los tsi pub le.

³“Tsi pub cov Amoos lossis cov Mau-am lossis ib tug ntawm ob tsaav tuabneeg nuav caajceg muaj feem koom nrug tug TSWV tsaav tuabneeg, txawm yog tom qaab kaum tam tuabneeg los tsi pub le.

⁴Rua qhov thaus mej tsiv nraag tebchaws Iziv lug hlaa puab lub tebchaws, puab tsi kaam muab zaub mov rua mej noj hab muab dlej rua mej haus, puab tseem ndlav Npe-aus tug tub Npala-aas kws nyob huv lub nroog Pethaus peg tebchaws Mexuputamias tuaj foom phem rua mej hab.

⁵Tabsis tug TSWV kws yog mej tug Vaajtswv tsi noog Npala-aas tej lug, nwg txhaj muab tej lug kws foom phem hloov ua koob moov rua mej, vim nwg hlub mej.

⁶Tam twg kws mej tseem ua ib tsaav tuabneeg nyob, mej tsi xob paab cov tuabneeg ntawd lossis txhawb kuas puab vaammeej le.

⁷“Tabsis mej tsi xob tso cov Edoos tseg, rua qhov puab yog mej cov kwvtij. Mej tsi xob tso cov tuabneeg Iziv tseg, rua qhov mej tub tau nyob huv puab lub tebchaws ib zag lawm.

⁸Tom qaab kws dlhau peb tam tuabneeg lawm, ob tsaav tuabneeg nuav caajceg muaj feem koom nrug tug TSWV tsaav tuabneeg.

⁹“Thaus mej taabtom sis tua nyob huv lub yeej, mej yuavtsum txuag tsi pub kuas muaj ib yaam dlaabtsi ua rua mej tsi huv.

¹⁰Yog muaj ib tug txivneej nyob huv yeej ua npau suav nrug quaspuj pw, ua rua nwg lub rig ntub hab tsi huv, nwg yuavtsum tawm moog nyob saab nrau ntug yeej.

¹¹Thaus yuav tsaus ntuj, nwg yuavtsum ntxuav nwg lub cev kuas huv, ces thaus nub poob qho lawm, nwg maam le rov lug rua huv lub yeej.

¹²“Mej yuavtsum tshwj ib thaaj chaw rua saab nrau ntug yeej, mej txhaj tau chaw moog tawm rooj.

¹³Mej cov tubrog txhua tug nyag yuavtsum muaj nyag ib raab toomtxhob lossis ib raab hlau nrug nraim, thaus mej moog tawm rooj, mej txhaj tau siv khawb qhov faus.

¹⁴Mej yuavtsum tu mej lub yeej kuas huv si, rua qhov tug TSWV kws yog mej tug Vaajtswv nrug nraim mej nyob, tsomkwm mej hab paab kuas mej tua yeej mej cov yeebncuab. Tsi xob ua ib yaam dlaabtsi tsi huv kws ua rua tug TSWV tso mej tseg.”

¹⁵“Yog muaj ib tug qhev tsiv nwg tug tswv tuaj cuag mej, kuas mej paab nwg, mej tsi xob muab nwg xaa rov qaab moog rua tug tswv.

¹⁶Ca nwg nrug mej nyob huv mej tej nroog lub kws nwg nyam nyob, hab mej tsi xob tsimtxom nwg.

¹⁷“Tsi pub cov Yixalayees ib tug quaspuj lossis txivneej moog ua namndlav txivndlav nyob rua huv tsev teev mlom,

¹⁸hab tsi pub kuas coj cov nyaj kws nwg moog ua namndlav lossis txivndlav tau lug, tuaj tso rua huv tug TSWV kws yog mej tug Vaajtswv lub Tuamtsev lawv le nwg coglug lawm. Tug TSWV ntxub txujkev ua namndlav txivndlav le ntawd.

¹⁹“Thaus mej qev nyaj lossis txais zaub mov hab lwm yaam rua koj ib tug kwvtij Yixalayees, mej tsi xob tsub paaj rua nwg them.

²⁰Yog mej qev nyaj rua tug tuabneeg txawv tebchaws, mej tsub paaj rua nwg them los tau, tabsis mej tsi xob tsub paaj rua mej cov kwvtij Yixalayees them, mej yuavtsum ua lawv le txuj kevcai nuav, tug TSWV kws yog mej tug Vaajtswv txhaj foom koob moov rua txhua yaam kws mej ua huv lub tebchaws kws nwg muab rua mej.

²¹“Thaus mej coglug rua tug TSWV kws yog mej tug Vaajtswv, mej tsi xob rhuav tej lug cog tseg ntawd, tug TSWV yeej tsi tseev le, yog mej rhuav ces mej ua txhum.

²²Yog mej tsi tau coglug rua tug TSWV, mej yeej tsi muaj txim,

²³Tabsis yog mej zoo sab coglug rua tug TSWV lawm, mej yuavtsum ua kuas tav.

²⁴“Thaus mej moog txug ntawm luas tej vaaj txiv maab txiv ntoo, mej dle tau noj, tabsis tsi xob dle ris lug tsev.

²⁵Thaus mej moog txug ntawm luas tej teb npleg, mej dle tau tej naab nplej noj, tabsis tsi xob muab lag hlais.