Read Hmong Njua 2 Kevcai 24 Bible Online

2 Kevcai 24 - Hmong Njua bible

2 Kevcai 24

¹“Yog ib tug txivneej twg yuav quaspuj lawm, tabsis tom qaab ntawd nwg tsi xaav yuav nwg tug quaspuj, rua qhov nwg pum tug quaspuj ntawd ua tej yaam tsi hum nwg sab, ces nwg ca le sau ib dlaim ntawv nrauj rua tug quaspuj, has kuas tug quaspuj tawm huv nwg tsev moog.

²Tug quaspuj ntawd moog yuav dlua lwm tug quasyawg,

³yog tug quasyawg tshab los tsi xaav yuav nwg hab, tug quasyawg tshab ca le ua ntawv nrauj rua nwg, hab kuas nwg tawm moog. Lossis yog has tas, tug quasyawg tshab ntawd tuag lawm.

⁴Txawm le ntawd los thawj tug quasyawg tsi xob rov moog yuav tug quaspuj ntawd ib zag ntxiv le lawm. Nwg yuavtsum suav has tas, tug quaspuj ntawd yog tuabneeg tsi huv. Yog nwg rov yuav tug quaspuj ntawd dlua, yuav ua rua tug TSWV ntxub nwg heev. Mej tsi xob ua txhum le nuav nyob huv lub tebchaws kws tug TSWV kws yog mej tug Vaajtswv muab rua mej.

⁵“Thaus muaj ib tug txivneej twg nyavnyuas yuav tau quaspuj, tsi xob coj tug ntawd moog tua rog, lossis tsi xob ca nwg ua ib yaam dlaabtsi rua numtswv; tabsis ca nwg nyob huv tsev ib xyoos, kuas nwg tug quaspuj muaj kev zoo sab.

⁶“Thaus mej qev nyaj rua luas, mej tsi xob kuas luas muab luas lub zeb lossis txhib zeb saab sau lug yuam nqe, rua qhov lub zeb ntawd yog lub kws luas naj nub siv ua noj ua haus yug luas tsev tuabneeg.

⁷“Yog leejtwg moog nyag nwg cov kwvtij Yixalayees ib tug lug ua nwg qhev, lossis muab muag moog ua luas qhev, yuavtsum muab tug kws nyag ntawd tua povtseg. Mej ua le ntawd txhaj tshem tau tej kev phem kev qas tawm huv mej moog.

⁸“Yog mej cov muaj ib tug mob ruas, tug ntawd yuavtsum ua lawv le cov povthawj kuas nwg ua, hab ua lawv le tej lug kws kuv qha rua puab lawm.

⁹Mej ncu ntsoov qhov kws tug TSWV kws yog mej tug Vaajtswv tau ua rua Milias, thaus mej tsiv tawm nraag tebchaws Iziv lug.

¹⁰“Thaus mej qev ib yaam dlaabtsi rua ib tug twg, mej tsi xob moog rua huv nwg tsev hab muab lub tsho kws nwg muab yuam nqe rua mej,

¹¹mej nyob nrau zoov tog ca nwg maam nqaa tuaj rua mej xwb.

¹²Yog tug ntawd txomnyem, mej tsi xob coj nwg lub tsho moog khaws ca ib mos;

¹³tabsis txhua nub thaus yuav tsaus ntuj, mej ca le xaa rov qaab rua nwg, nwg txhaj tau naav pw. Yog mej ua le nuav, nwg txhaj yuav ncu mej txaj ntsig, hab tug TSWV kws yog mej tug Vaajtswv yuav txaus sab rua mej.

¹⁴“Tsi xob sej tej nqe zug kws cov tuabneeg txomnyem tuaj ua zug ntawm mej, tsi has mej tug kwvtij Yixalayees lossis tug tuabneeg txawv tebchaws kws nyob huv mej tej nroog,

¹⁵mej ca le muab nqe zug rua tug ntawd txhua nub ua ntej lub nub poob qho, rua qhov nwg tog rawv tej nqe zug kws nwg ua nub ntawd. Yog mej tsi muab rua nwg, nwg yuav thov tug TSWV foom phem rua mej, ces mej yuav muaj txim.

¹⁶“Yog mivnyuas ua txhum, tsi xob muab nam txiv tua theej mivnyuas, hab yog nam txiv ua txhum, tsi xob muab mivnyuas tua theej nam txiv; tug twg ua txhum tsuas ca tug ntawd tuag xwb.

¹⁷“Mej tsi xob txwv cov tuabneeg txawv tebchaws hab cov mivnyuas ntsuag txuj cai; hab tsi xob muab tug puj ntsuag lub tsho lug yuam tej nqe kws nwg txais.

¹⁸Mej ncu ntsoov qhov kws mej tau ua luas qhev nraag tebchaws Iziv, tug TSWV kws yog mej tug Vaajtswv tau tso mej dlim; tub yog le ntawd, kuv txhaj qha kuas mej ua le nuav.

¹⁹“Thaus mej sau qoobloo, yog mej sau tsi txhua qee teg nplej kws mej hlais, mej tsi xob rov moog sau dlua lawm; tseg tej ntawd rua cov tuabneeg txawv tebchaws, cov mivnyuas ntsuag hab tej puj ntsuag, tug TSWV kws yog mej tug Vaajtswv txhaj yuav foom koob moov rua tej kws mej ua.

²⁰Thaus mej moog dle tej txiv ntoo roj thawj lwm taag, mej tsi xob rov moog dle tej ntxaib ntxiv lawm, tseg tej ntawd rua cov mivnyuas ntsuag, cov puj ntsuag hab tej tuabneeg txawv tebchaws dle.

²¹Thaus mej moog dle tej txiv maab thawj lwm taag, mej tsi xob rov moog dle tej ntxaib ntxiv lawm, tseg tej ntawd rua cov mivnyuas ntsuag, cov puj ntsuag hab tej tuabneeg txawv tebchaws dle.

²²Mej ncu ntsoov has tas, mej tau ua luas qhev nyob nraag tebchaws Iziv; tub yog vim le ntawd kuv txhaj qha kuas mej ua le nuav.