Read Hmong Njua 2 Kevcai 25 Bible Online

2 Kevcai 25 - Hmong Njua bible

2 Kevcai 25

¹“Yog muaj ob tug Yixalayees muaj lug sis kom moog rua huv tsev tu plaub, tug txav txim phua has tas ib tug txhum hab ib tug tsi txhum,

²ces yog yuav nplawm tug kws tau ua txhum, tug txav txim yuavtsum has kuas tug ntawd pw khwb rwg tsaiv maam le nplawm; hab tsuas pub nplawm lawv le nwg txujkev txhum xwb,

³nplawm heev kawg, tsuas pub nplawm plaub caug nplawm xwb, tsi pub nplawm tshaaj ntawd. Yog mej nplawm tshaaj ntawd, yuav rhuav nwg ntsejmuag heev.

⁴“Thaus mej taabtom muab nyuj moog tsuj nplej huv tshaav nplej, mej tsi xob muab naab looj nyuj qhovncauj.

⁵“Yog muaj ob kwvtij nyob ua ib tse, ib tug moog yuav tau quaspuj, tabsis tug ntawd tuag thaus nwg tug quaspuj tseem tsi tau muaj tub, tug quaspuj ntawd tsi xob moog yuav lwm tug saab nrau, ca le muab nwg txis rua nwg tug quasyawg kws tuag lawm tug kwv xwb.

⁶Thawj tug tub kws tug quaspuj ntawd yug, yuavtsum suav has tas yog tug quasyawg kws tuag lawm tug tub. Tug tuag lawm txhaj muaj caajceg nyob huv tsaav tuabneeg Yixalayees moog lawm yaav tom ntej.

⁷Tabsis yog has tas, tug quasyawg kws tuag lawm, tug kwv tsi kaam yuav tug quaspuj ntawd, ces tug quaspuj ca le moog has rua cov txwjlaug huv lub nroog ntawd tas, ‘Kuv tug quasyawg tug kwv tsi kaam yuav kuv; kuas kuv tug quasyawg kws tuag lawm muaj caajceg tseg rua huv tsaav tuabneeg Yixalayees.’

⁸Cov txwjlaug huv lub nroog ntawd hu tug kwv tuaj nug saib nwg puas yuav los tsi yuav. Yog has tas nwg tsi kaam yuav tug namtij ntawd,

⁹ces kuas tug quaspuj ntawd moog muab tug kwv ib saab khau hle, nti quavncaug rua tug kwv lub ntsejmuag taabmeeg cov txwjlaug hab has tas, ‘Tug kws tsi ca nwg tug tijlaug muaj caajceg yeej tsimnyog raug le nuav.’

¹⁰Cov Yixalayees yuav hu tug txivneej ntawd tsev tuabneeg has tas, ‘Tsev tuabneeg ntawm tug txivneej kws luas muab khau hle.’

¹¹“Yog muaj ob tug txivneej sis ntaus, hab ib tug ntawm ob tug ntawd, tug quaspuj lug paab nwg tug quasyawg, yog tug quaspuj ntawd xyaab teg moog chua lwm tug txivneej chaw xis,

¹²mej ca le muab tug quaspuj ntawd txhais teg txav povtseg, tsi xob hlub nwg le.

¹³“Mej tsi xob muab raab teev ntxo hab lub kawm kws tsi txwm luj rua luas.

¹⁵Mej yuavtsum siv raab teev kws tsi ntxo hab lub kawm kws txwm lug luj xwb, mej txhaj yuav muaj sa ua neej nyob ntev huv lub tebchaws kws tug TSWV kws yog mej tug Vaajtswv muab rua mej,

¹⁶rua qhov tug TSWV ntxub cov tuabneeg kws ua tsi ncaaj le ntawd.

¹⁷“Mej ncu ntsoov tej kws thaus mej tsiv nraag tebchaws Iziv lug, cov Amalej tau ua rua mej lawm.

¹⁸Puab tsi paub ntshai Vaajtswv, puab txhaj nyaag tuaj tom qaab tua mej, thaus kws mej qaug zug hab tsaug muas heev, hab puab tua mej cov tuabneeg kws nyob tom qaab tuag taag.

¹⁹Yog le ntawd, thaus tug TSWV kws yog mej tug Vaajtswv muab lub tebchaws rua mej hab ua rua mej nyob tso sab lug tsi ntshai mej tej yeebncuab kws nyob puagncig mej, mej ncu ntsoov muab cov Amalej tua kuas tuag taag, txhaj tsi muaj leejtwg ncu txug puab ntxiv lawm. Mej yuavtsum ncu ntsoov tej nuav!