Read Hmong Njua 2 Kevcai 26 Bible Online

2 Kevcai 26 - Hmong Njua bible

2 Kevcai 26

¹“Thaus mej moog txeeb tau lub tebchaws kws tug TSWV kws yog mej tug Vaajtswv muab rua mej, hab mej ua zej ua zog nyob rua huv lawm,

²mej suavdlawg nyag muab nyag thawj cov qoob ib yaam mivntsiv ntim rua huv kawm coj moog rua ntawm qhov chaw pehawm tug TSWV kws yog mej tug Vaajtswv.

³Mej moog cuag tug povthawj kws ua num lub sijhawm ntawd. Mej txhua tug nyag has nyag rua nwg tas, ‘Kuv thov leeg rua tug TSWV kws yog kuv tug Vaajtswv tas, kuv tub tau lug nyob huv lub tebchaws kws nwg coglug muab rua peb cov yawmkoob lawm.’

⁴“Tug povthawj yuav txais mej tej kawm qoob coj moog tso rua ntawm tug TSWV kws yog mej tug Vaajtswv lub thaaj.

⁵Tom qaab ntawd, mej nyag yuav pav nyag tej lug rua tug TSWV has tas: ‘Kuv yawmkoob yog tuabneeg Alames, nwg tsiv ncig teb ncig chaw, nwg txhaj coj nwg tsev tuabneeg moog nyob nraag tebchaws Iziv. Thaus puab moog nyob nraag puab muaj tsawg, tabsis puab fuamvaam coob hab yog ib tsaav tuabneeg kws muaj zug heev.

⁶Cov tuabneeg Iziv tsimtxom peb ua lwj ua lam hab yuam peb ua puab qhev,

⁷peb txhaj le tsaa ncauj thov tug TSWV kws yog peb cov yawmkoob tug Vaajtswv paab peb. Nwg nov peb tej lug thov, pum peb tej kev txomnyem, tej kev khwv hab raug luas tsimtxom.

⁸Nwg lub fwjchim hab tug zug luj zug nchaav tso peb dlim nraag tebchaws Iziv lug. Nwg ua tej txujci luj hab tseemceeb kws xaav tsi thoob rua peb pum.

⁹Nwg coj peb lug nyob ntawm nuav hab muab lub tebchaws kws aav rog hab zoo qoob rua peb.

¹⁰Yog le ntawd, nwgnuav kuv txhaj coj thawj cov qoob kws tug TSWV pub rua kuv ua tau ibtxha tuaj fij rua nwg.’ “Tom qaab ntawd muab cov qoobloo tso rua ntawm lub thaaj hab pehawm tug TSWV qhov ntawd.

¹¹Mej ca le zoo sab, rua qhov tug TSWV kws yog mej tug Vaajtswv tub muab txhua yaam kws zoo pub rua mej hab mej tsev tuabneeg lawm. Ca cov Levis hab cov tuabneeg txawv tebchaws kws nrug mej nyob, koom nrug mej zoo sab.

¹²“Peb lub xyoo twg mej yuavtsum muab tej qoobloo kws yog ib feem kaum pub rua cov Levis, cov tuabneeg txawv tebchaws, cov mivnyuas ntsuag hab tej puj ntsuag ib zag; txawm yog puab yuav nrug paab twg pawg twg nyob los puab txhaj muaj noj muaj haus. Thaus mej ua tej nuav lawm,

¹³mej has rua tug TSWV tas, ‘Kuv tej qoobloo tsi tshuav ib feem kaum kws yog koj tug nyob huv kuv tsev lawm. Kuv tub muab taagnrho rua cov Levis, cov tuabneeg txawv tebchaws, cov mivnyuas ntsuag hab tej puj ntsuag lawv le tej lug kws koj has kuas kuv ua lawm. Kuv ncu ntsoov ua lawv le koj tej kevcai kws qha txug ib feem kaum txhua nqai huv tuabsi, tsi tso ib nqai tseg le.

¹⁴Thaus kuv muaj kev quaj ntsuag, kuv tsi noj tej qoobloo kws yog koj feem ib qho le; thaus kuv tsi tau ua kevcai ntxuav, kuv yeej tsi coj tej qoobloo tawm huv kuv tsev moog; hab kuv tsi muab tej ntawd coj moog fij rua tej tuag. Tug TSWV, kuv noog koj lug hab ua txhua yaam lawv le kws koj qha txug ib feem kaum lawm.

¹⁵Thov koj tug kws nyob qhov chaw dlawbhuv sau ntuj tsaa muag saib peb hab foom koob moov rua koj tsaav tuabneeg Yixalayees; hab lub tebchaws aav rog hab zoo qoob kws koj muab rua peb lawv le koj tau coglug rua peb cov yawmkoob lawm.’

¹⁶“Nub nua tug TSWV kws yog mej tug Vaajtswv has kuas mej ua lawv le nwg tej kevcai txhua nqai huv tuabsi; mej ca le muab sab npuab hab ua lawv le ntawd kuas kawg sab kawg ntsws.

¹⁷Nub nua mej tub leeg yuav tug TSWV ua mej tug Vaajtswv lawm. Mej coglug has tas mej yuav noog nwg lug, coj lawv le nwg tej kevcai txhua nqai, hab ua lawv le tej kws nwg has txhua lu huv tuabsi.

¹⁸Nub nua tug TSWV yuav mej ua nwg tsaav tuabneeg lawv le tej lug kws nwg tau cog tseg rua mej lawm; hab nwg has kuas mej coj lawv le tej kevcai ntawd txhua nqai.

¹⁹Nwg yuav ua kuas mej caj ua ib tsaav tuabneeg tseemceeb tshaaj lwm tsaav tuabneeg kws nwg tsim huv tuabsi, hab mej yuav ua rua suavdlawg qhuas hab fwm nwg lub npe. Mej yuav tau ua nwg tsaav tuabneeg lawv le nwg tau coglug tseg rua mej lawm.”