Read Hmong Njua 2 Kevcai 27 Bible Online

2 Kevcai 27 - Hmong Njua bible

2 Kevcai 27

¹Mauxes hab cov txwjlaug has rua cov Yixalayees has tas, “Mej yuavtsum ua lawv le tug TSWV txuj kevcai kws nub nua kuv qha rua mej lawm.

²Nub kws mej yuav hlaa tug Dlej Yauladees moog rua huv lub tebchaws kws tug TSWV kws yog mej tug Vaajtswv muab rua mej, mej muab ob peb lub pobzeb luj lug teeb, hab muab moov sib leem rua txhua lub,

³hab mej muab tej kevcai nuav sau rua ntawm cov pobzeb ntawd. Thaus mej moog rua huv lub tebchaws aav rog hab zoo qoob kws tug TSWV kws yog mej cov yawmkoob tug Vaajtswv tau coglug muab rua mej,

⁴hab thaus mej hlaa tug Dlej Yauladees moog rua saab tim lawm, mej muab cov pobzeb ntawd teeb rua sau lub Roob Enpales lawv le nub nua kuv has rua mej, hab muab moov sib leem rua.

⁵Mej muab pobzeb teeb ua ib lub thaaj fij khoom rua tug TSWV, tsi xob muab cuabyeej hlau txaug cov pobzeb ntawd,

⁶rua qhov cov pobzeb kws mej muab ua lub thaaj rua tug TSWV kws yog mej tug Vaajtswv, yuavtsum tsi pub muab cuabyeej hlau txaug le, tom qaab ntawd mej maam hlawv tau khoom fij rua sau lub thaaj,

⁷hab mej muab tej khoom kws fij ua kev sis raug zoo, hab noj zoo sab taabmeeg tug TSWV kws yog mej tug Vaajtswv nyob qhov ntawd.

⁸Mej sau Vaajtswv txuj kevcai txhua nqai kuas meej rua ntawm cov pobzeb ntawd.”

⁹Mauxes hab cov povthawj has rua cov Yixalayees tas, “Mej ca le nyob tuabywv hab noog kuv has, nub nua mej tau ua tug TSWV kws yog mej tug Vaajtswv tsaav tuabneeg lawm;

¹⁰yog le ntawd, mej yuavtsum noog tug TSWV lug, hab ua lawv le Vaajtswv tej kevcai kws nub nua kuv qha rua mej lawm.”

¹¹Nub ntawd Mauxes has rua cov Yixalayees has tas,

¹²Thaus mej suavdlawg hlaa tug Dlej Yauladees moog rua saab tid lawm, kuas xeem Xime-oos, Levis, Yudas, Ixakhas, Yauxej hab Npeenyamees moog sawv sau lub Roob Kelixees foom koob moov rua cov pejxeem.

¹³Hab kuas xeem Lunpees, Khas. Aseles, Xenpuloos, Daas hab Nathalis moog sawv sau lub Roob Enpales foom phem rua cov pejxeem.

¹⁴Cov Levis yuav has nrov nrov rua cov Yixalayees has tas,

¹⁵“Yog leejtwg puab mlom, tsi has mlom pobzeb, mlom ntoo, lossis mlom tooj hab moog pe tej mlom ntawd nraim nkoog; Vaajtswv yuav foom phem rua tug ntawd, rua qhov tug TSWV ntxub cov tuabneeg pe mlom le ntawd.” Taagnrho cov Yixalayees yuav thooj txhij teb has tas, “Amees!”

¹⁶“Yog leejtwg saib tsi taug nwg nam nwg txiv, Vaajtswv yuav foom phem rua tug ntawd.” Taagnrho cov Yixalayees yuav thooj txhij teb has tas, “Amees!”

¹⁷“Yog leejtwg naam dlhau nwg cov kwvtij tug nrimteb, Vaajtswv yuav foom phem rua tug ntawd.” Taagnrho cov Yixalayees yuav thooj txhij teb has tas, “Amees!”

¹⁸“Yog leejtwg dlaag cov tuabneeg dligmuag moog yuam kev, Vaajtswv yuav foom phem rua tug ntawd.” Taagnrho cov Yixalayees yuav thooj txhij teb has tas, “Amees!”

¹⁹“Yog leejtwg yuam cov tuabneeg txawv tebchaws, cov mivnyuas ntsuag hab tej puj ntsuag txuj cai, Vaajtswv yuav foom phem rua tug ntawd.” Taagnrho cov Yixalayees yuav thooj txhij teb has tas, “Amees!”

²⁰“Yog leejtwg ntxag nwg txiv tug quaspuj, rhuav nwg txiv ntsejmuag, Vaajtswv yuav foom phem rua tug ntawd.” Taagnrho cov Yixalayees yuav thooj txhij teb has tas, “Amees!”

²¹“Yog leejtwg ntxag tej tsaj, Vaajtswv yuav foom phem rua tug ntawd.” Taagnrho cov Yixalayees yuav thooj txhij teb has tas, “Amees!”

²²“Yog leejtwg ntxag nwg tug muam, tsi has koom nam tsi koom txiv lossis koom txiv tsi koom nam, Vaajtswv yuav foom phem rua tug ntawd.” Taagnrho cov Yixalayees yuav thooj txhij teb has tas, “Amees!”

²³“Yog leejtwg ntxag nwg nam tais, Vaajtswv yuav foom phem rua tug ntawd.” Taagnrho cov Yixalayees yuav thooj txhij teb has tas, “Amees!”

²⁴“Yog leejtwg nyag tua tuabneeg, tsi muaj leejtwg paub, Vaajtswv yuav foom phem rua tug ntawd.” Taagnrho cov Yixalayees yuav thooj txhij teb has tas, “Amees!”

²⁵“Yog leejtwg ca luas ndlav nwg moog tua tug tuabneeg kws tsi muaj txim tuag, Vaajtswv yuav foom phem rua tug ntawd.” Taagnrho cov Yixalayees yuav thooj txhij teb has tas, “Amees!”

²⁶“Yog leejtwg tsi ua lawv le Vaajtswv tej kevcai nuav, Vaajtswv yuav foom phem rua tug ntawd.” Taagnrho cov Yixalayees yuav thooj txhij teb has tas, “Amees!”