Read Hmong Njua 2 Kevcai 28 Bible Online

2 Kevcai 28 - Hmong Njua bible

2 Kevcai 28

¹“Yog mej noog tug TSWV kws yog mej tug Vaajtswv lug hab ua lawv le nwg tej kevcai kws nub nua kuv qha rua mej, tug TSWV yuav tsaa mej ua tsaav tuabneeg kws muaj fwjchim luj dlua lwm tsaav tuabneeg huv nplajteb nuav.

²Yog mej noog tug TSWV kws yog mej tug Vaajtswv lug, mej yuav tau tej koob moov nuav:

³“Tug TSWV yuav foom koob moov rua mej tej nroog hab tej laj teb.

⁴“Tug TSWV yuav foom koob moov kuas mej muaj tubki, muaj nyuj, muaj yaaj coob hab muaj qoobloo ntau.

⁵“Tug TSWV yuav foom koob moov rua mej tej qoobloo hab tej zaub mov kws mej khwv tau lug.

⁶“Tug TSWV yuav foom koob moov rua txhua yaam kws mej ua.

⁷“Tug TSWV yuav ua rua mej cov yeebncuab swb thaus puab tuaj tua mej. Puab ua ke tuaj tua mej, tabsis puab yuav tawg ua saab ua sua rov qaab.

⁸“Tug TSWV kws yog mej tug Vaajtswv yuav foom koob moov rua tej kws mej ua hab pub kuas mej tau nplej ntau puv txhaab. Nwg yuav foom koob moov rua lub tebchaws kws nwg muab rua mej lawm.

⁹“Yog mej noog tug TSWV kws yog mej tug Vaajtswv lug hab ua lawv le nwg tej kevcai, tug TSWV yuav ca mej ua nwg tsaav tuabneeg lawv le nwg tau coglug tseg lawm.

¹⁰Txhua tsaav tuabneeg kws nyob thoob nplajteb yuav pum has tas, tug TSWV tub xaiv mej lug ua nwg tsaav tuabneeg lawm, puab suavdlawg yuav ntshai mej.

¹¹Tug TSWV yuav pub kuas mej muaj tubki, muaj nyuj hab muaj qoobloo ntau nyob huv lub tebchaws kws tug TSWV tau coglug rua mej cov yawmkoob has tas, nwg yuav muab rua mej.

¹²Tug TSWV yuav qheb rooj ntug tso naag lug lawv caij lawv nyoog hab foom koob moov rua tej kws mej ua, mej yuav muaj qev rua ntau lub tebchaws, tabsis mej yuav tsi tau moog txais luas.

¹³Yog mej ua lawv le tug TSWV kws yog mej tug Vaajtswv tej kevcai txhua nqai kws kuv qha rua mej, tug TSWV yuav tsaa mej ua ntau tsaav tuabneeg tug thawj, tsi yog ua tug kws lawv luas qaab; yog mej ua lawv le tug TSWV tej lug kws nub nua kuv qha rua mej, tej kws mej ua yuav vaammeej.

¹⁴Tabsis mej yuavtsum tsi xob tso tej kws nub nua kuv qha rua mej lossis moog pe luas tej Vaajtswv.

¹⁵“Yog mej tsi noog tug TSWV kws yog mej tug Vaajtswv lug, tsi muab sab npuab nwg, hab tsi ua lawv le nwg tej kevcai kws nub nua kuv qha rua mej, ces mej yuav raug tej kev phem nuav.

¹⁶“Tug TSWV yuav foom phem rua mej tej nroog hab tej laj teb.

¹⁷“Tug TSWV yuav foom phem rua mej tej nplej hab tej zaub mov kws mej khwv tau lug.

¹⁸“Tug TSWV yuav foom kuas mej tsi muaj tubki coob, tej qoobloo tsi zoo hab tej nyuj tej yaaj tsi fuamvaam.

¹⁹“Tug TSWV yuav foom phem rua txhua yaam kws mej ua.

²⁰“Yog mej ua kev phem kev qas hab tso tug TSWV tseg, nwg yuav tso kev puamtsuaj, kev covnyom, hab kev ntxhuv sab lug rua txhua yaam kws mej ua, moog txug nub kws mej raug puamtsuaj taag.

²¹“Nwg yuav tso kaab mob ib yaam taag ib yaam tuaj rua mej, moog txug nub kws mej puamtsuaj taag rua huv lub tebchaws kws mej yuav moog nyob ntawd.

²²Tug TSWV yuav tso mob phem, mob rwj hab mob npaws lug rua mej; nwg yuav ua kuas muaj ntuj qhua teb nkig hab tso cua nplawm mej tej qoobloo kuas qhuav taag. Tej siv npug nuav yuav lug raug mej moog txug nub kws mej tuag taag.

²³Yuav tsi muaj naag lug rua mej lub tebchaws, mej lub tebchaws yuav qhuav hab tawv cuag hlau.

²⁴Tug TSWV yuav tsi tso naag lug, tabsis nwg yuav tso moov aav hab xuabzeb sau ntuj lug rua mej, moog txug thaus mej tuag taag.

²⁵“Tug TSWV yuav ca mej cov yeebncuab tuaj tua yeej mej. Mej yuav ua ib paab moog tua yeebncuab, tabsis mej yuav swb hab tsiv ua saab ua sua. Thaus txhua tsaav tuabneeg thoob nplajteb pum mej raug tej xwm nuav puab yuav ntshai tshee nyo.

²⁶Thaus mej tuag, tej noog hab tej tsaj nruab nraag yuav noj mej lub cev, hab yuav tsi muaj leejtwg lawv tej tsaj ntawd kuas tsiv.

²⁷Tug TSWV yuav ua rua mej mob rwj, ib yaam le nwg ua rua cov Iziv lawm. Nwg yuav ua kuas mej lub cev tawg pleb, mob txhaab qawj ua paug mag, hab txob thoob ib ce khu tsi zoo le.

²⁸Tug TSWV yuav ua kuas mej lub tswvyim pluj xaav tsi tawm dlaabtsi le; nwg yuav ua kuas mej qhovmuag faam hab tsi pum qaab ua dlaabtsi.

²⁹Txawm yog nruab nub nrig los mej yuav moog kev ib yaam le tej tuabneeg dligmuag. Mej yuav nrhav tsi tau txuj hauv kev moog. Tej kws mej ua yuav tsi vaammeej. Luas yuav fuab mej tej khoom, hab tsimtxom mej taag moog le, yuav tsi muaj leejtwg tuaj paab mej.

³⁰“Mej qhab tau luas ib tug ntxhais los lwm tug yuav tuaj txeeb yuav. Mej ua tau tsev los mej yuav tsi tau nyob, mej cog tau txiv maab los mej yuav tsi tau noj.

³¹Luas yuav muab mej tej nyuj tua taabmeeg mej los mej yuav tsi tau noj. Luas yuav tuaj caab mej tug neeg luav taabmeeg mej, hab tsi xaa rov qaab rua mej, luas yuav tuaj muab mej tej yaaj tej tshis coj moog pub mej cov yeebncuab, yuav tsi muaj leejtwg tuaj paab mej.

³²Luas yuav taabmeeg coj mej tej tub tej ntxhais moog ua cov tuabneeg txawv tebchaws qhev. Mej yuav naj nub tog saib kev ntsoov, tabsis tsi pum luas xaa mej tej mivnyuas rov lug le.

³³Lwm tsaav tuabneeg yuav tuaj txeeb mej tej qoobloo kws mej ua khwv khwv, kuas mej tsi tau noj, mej tseem yuav raug luas tsimtxom hab quab yuam taag moog le.

³⁴Mej raug luas tsimtxom le ntawd, yuav ua rua mej sab ntsws puag taag.

³⁵Tug TSWV yuav ua kuas mej mob rwj ntawm hauvcaug, ntawm txhais ceg hab thoob plawg sau taubhau ti huv kutaw ua paug mag khu tsi zoo le.

³⁶“Tug TSWV yuav coj mej hab mej tug vaajntxwv moog nyob lwm lub tebchaws kws mej hab mej cov yawmkoob tsi tau moog nyob dlua le. Nyob huv lub tebchaws ntawd, mej yuav pe luas tej vaajtswv kws muab ntoo hab pobzeb ua.

³⁷Cov tuabneeg kws nyob huv tej tebchaws kws tug TSWV kws yog mej tug Vaajtswv muab mej ntab moog nyob, yuav xaav tsi thoob tej kws tug TSWV ua rua mej; puab yuav luag mej plig hab txobthuam mej.

³⁸“Mej cog qoobloo ntau, tabsis sau tau tsawg, rua qhov yuav muaj kooj txomfaav noj mej tej qoob.

³⁹Mej cog txiv maab hab tu zoo heev, tabsis mej yuav tsi tau dle tej txiv hab tsi tau haus tej cawv txiv maab, rua qhov kaab muab tej maab noj taag lawm.

⁴⁰Mej cog txiv ntoo roj thoob mej lub tebchaws, tabsis mej tsi tau roj, rua qhov tej txiv zeeg taag lawm.

⁴¹Mej muaj tub muaj ntxhais, tabsis puab yuav tsi nrug mej nyob, rua qhov luas yuav nteg puab moog.

⁴²Kaab yuav noj mej tej ntoo hab mej tej qoobloo kws nyob huv mej lub tebchaws taag.

⁴³“Lwm tsaav tuabneeg kws nrug mej nyob huv mej lub tebchaws yuav muaj fwjchim luj zuj zug, tabsis mej yuav poob fwjchim zuj zug.

⁴⁴Puab yuav muaj nyaj qev rua mej, tabsis mej yuav tsi muaj nyaj qev rua puab. Thaus kawg puab yuav tswjfwm mej.

⁴⁵“Tej kev siv kev npug nuav yuav lug raug mej, moog txug thaus mej puamtsuaj taag, rua qhov mej tsi noog tug TSWV kws yog mej tug Vaajtswv lug, hab tsi ua lawv le tej kevcai kws tug TSWV qha rua mej.

⁴⁶Tej xwmtxheej nuav yog lub cim kws qha txug Vaajtswv txujkev txav txim rua mej hab mej tej xeebntxwv moog taag ibtxhis le.

⁴⁷Tug TSWV tub foom koob moov rua tej kws mej ua lawm, tabsis mej tsi muab sab npuab hab mej tsi muaj lub sab dlawb paug pehawm nwg.

⁴⁸Tug TSWV yuav tso mej cov yeebncuab tuaj yuam mej ua puab qhev, mej yuav tshaib plaab, nqhes dlej, labqaab hab mej yuav ntshaw ib puas tsaav yaam. Tug TSWV yuav muab tug quabtwg hlau kws nyaav heev lug tso rua sau mej cejdlaab, moog txug thaus kws mej puamtsuaj taag.

⁴⁹Tug TSWV yuav ca lwm tsaav tuabneeg kws nyob tim qaab ntuj kawg tuaj tawmtsaam mej, yog tsaav tuabneeg kws mej tsi paub puab tej lug. Puab yuav yaa ib yaam le dlaav tuaj tawmtsaam mej.

⁵⁰Tsaav tuabneeg ntawd yuav tsi taabncuab hab tsi txuag leejtwg, tsi has tug laug lossis tug hluas le.

⁵¹Puab yuav noj mej tej tsaj txhu hab mej tej qoob taag, mej yuav tuag tshaib. Puab yuav tsi tseg mej tej nplej, cawv txiv maab, roj txiv ntoo, nyuj lossis yaaj rua mej le; ces mej yuav tuag taag.

⁵²Puab yuav tuaj tua txhua lub nroog huv lub tebchaws kws tug TSWV kws yog mej tug Vaajtswv muab rua mej; tej chaw tsomfaaj kws sab hab tej ntsaa yeej kws mej tso sab rua los yuav pob puag taag.

⁵³“Thaus mej cov yeebncuab tuaj vij mej tej nroog, mej yuav tshaib plaab heev, mej yuav noj mej tej mivnyuas kws tug TSWV kws yog mej tug Vaajtswv muab rua mej.

⁵⁴Txawm yog tug txivneej kws muaj sab dlawb sab zoo los thaus cov yeebncuab tuaj vij ntawd, nwg yuav tsi hlub hab tsi taabncuab leejtwg le. Nwg yuav noj nwg cov mivnyuas ib tug, nwg yuav tsi faib rua nwg tej kwvtij lossis nwg tug quaspuj kws nwg hlub, lossis nwg lwm tug mivnyuas noj le, rua qhov tsi muaj zaub mov noj lawm.

⁵⁵

⁵⁶Txawm yog tug quaspuj kws muaj lub sab dlawb sab zoo, hab muaj txag npluanuj, tsi tau taug kev moog kutaw le los nwg yuav ua ib yaam le ntawd. Thaus yeebncuab tuaj vij nwg lub nroog, nwg yuav tshaib plaab heev vim tsi muaj zaub mov noj le, nwg yuav muab nwg tug mivnyuas mog noj ntsag tu. Nwg yuav tsi faib rua nwg tug quasyawg kws nwg hlub lossis nwg lwm tug mivnyuas noj le.

⁵⁷

⁵⁸“Yog mej tsi noog hab tsi ua lawv le Vaajtswv tej lug qha kws sau tseg rua huv phoo ntawv nuav, hab yog mej tsi fwm tug TSWV kws yog mej tug Vaajtswv lub npe kws dlawbhuv,

⁵⁹ces nwg yuav tso tej kaab mob kws khu tsi zoo hab tej sub tawg sub ntshaa lug rua mej hab mej tej tubki.

⁶⁰Nwg yuav tso tej kaab mob phem kawg nkaus kws mej pum thaus mej nyob nraag tebchaws Iziv lug raug mej, mej yuav khu tsi zoo le.

⁶¹Tug TSWV tseem yuav tso ntau yaam kaab mob hab sub tawg sub ntshaa kws tsi tau teev tseg rua huv phoo ntawv kws sau Vaajtswv tej kevcai nuav, lug rua mej kuas mej puamtsuaj taag.

⁶²Txawm yog mej yuav fuamvaam coob le cov nubqub sau nruab ntug los tshuav qee leej seem xwb, rua qhov mej tsi noog tug TSWV kws yog mej tug Vaajtswv lug.

⁶³Tug TSWV txaus sab pub rua mej vaammeej hab fuamvaam coob le caag, nwg pum zoo yuav rhuav kuas mej puamtsuaj le ntawd. Nwg yuav ntab mej tawm huv lub tebchaws kws nwg muab rua mej.

⁶⁴“Tug TSWV yuav ntab mej moog nyob ua saab ua sua rua ntau lub tebchaws thoob qaab ntuj. Mej yuav moog pe luas tej vaajtswv kws muab ntoo hab pobzeb ua kws mej hab mej cov yawmkoob tsi tau pe dlua le.

⁶⁵Huv tej tebchaws kws mej moog nyob ntawd, mej yuav tsi muaj kev kaaj sab, hab tsi muaj aav ua mej tug le, tug TSWV yuav ua rua mej ntshai tshee nyo, qaug zug hab taag kev ca sab.

⁶⁶Mej lub neej yuav naj nub muaj kev ntxhuv sab, nruab nub mo ntuj los mej ntshai, hab tsi paub sov mej lub neej yuav xaus thaus twg.

⁶⁷Tej kws mej pum yuav ua rua mej lub sab ntshai tshee nyo. Thaus sawv ntxuv mej xaav kuas yog yuav tsaus ntuj, thaus yuav tsaus ntuj los mej xaav kuas yog thaus sawv ntxuv.

⁶⁸Txawm yog tug TSWV has tas nej yuav tsi rov moog nraag tebchaws Iziv ntxiv lawm los tug TSWV yuav muab nkoj xaa mej moog. Thaus mej nyob nraag, mej yuav muab mej muag rua mej cov yeebncuab ua puab qhev los tsi muaj leejtwg yuav mej le.”