Read Hmong Njua 2 Kevcai 29 Bible Online

2 Kevcai 29 - Hmong Njua bible

2 Kevcai 29

¹Ntawm nuav yog tej lug cog tseg kws tug TSWV kuas Mauxes has rua cov Yixalayees thaus puab tseem nyob huv tebchaws Mau-am; cov lug cog tseg nuav yog has ntxiv rua cov kws tug TSWV has rua puab ntawm Roob Xinais.

²Mauxes hu cov Yixalayees tuaj hab has rua puab tas, “Mej tub pum yaam kws tug TSWV ua rua Falaus, nwg cov numtswv hab nwg lub tebchaws.

³Mej tub pum tej kev siv kev npug, hab tej txujci tseemceeb kws tug TSWV ua lawm.

⁴Tabsis lug txug rua naj nub nua, tug TSWV tseem tsi tau pub mej totaub txug tej kws mej pum taag lug lawm.

⁵Thaus tug TSWV coj mej lug hlaa taj suabpuam tau plaub caug xyoo ntawd, mej tej rig tsho hab tej khau tub tsi ndluag le.

⁶Mej tsi muaj mov noj, tsi muaj cawv txiv maab lossis cawv ntxws haus los tug TSWV tseem npaaj txhua yaam ntawd pub rua mej tau noj tau haus, mej txhaj paub has tas nwg yog mej tug Vaajtswv.

⁷Thaus peb lug txug ntawm nuav, Vaajntxwv Xihoos kws kaav lub nroog Hesenpoos hab Vaajntxwv Aunkas kws kaav lub tebchaws Npasaas tau tuaj tua peb, tabsis peb tua puab swb,

⁸txeeb tau puab lub tebchaws, hab muab faib rua xeem Lunpees, xeem Khas hab ib nraab xeem Manaxes.

⁹Yog le ntawd, mej yuavtsum muab sab npuab hab ua lawv le tug TSWV tej lug cog tseg nuav txhua lu huv tuabsi, tej kws mej ua txhaj yuav vaammeej.

¹⁰“Nub nua taagnrho mej suavdlawg sawv taabmeeg tug TSWV kws yog mej tug Vaajtswv, cov txwjlaug, cov numtswv, cov txivneej,

¹¹cov quaspuj mivnyuas hab lwm tsaav tuabneeg kws nrug mej nyob, cov kwv dlej hab txav tawg rua mej.

¹²Nub nua mej tuaj sawv ntawm nuav, yog nrug tug TSWV kws yog mej tug Vaajtswv sis coglug, hab leeg has tas mej yuav ua lawv le tej lug nuav,

¹³tug TSWV txhaj txais yuav mej ua nwg tsaav tuabneeg, hab nwg yuav ua mej tug Vaajtswv, lawv le nwg coglug tseg rua mej yawmkoob Anplahaas, Ixaj hab Yakhauj lawm.

¹⁴Tug TSWV tsi yog coglug rua mej cov kws nyob ntawm nuav xwb,

¹⁵tabsis nwg coglug rua cov kws tsi nyob ntawm nuav hab mej tej xeebntxwv kws tseem tsi tau yug lug huv tuabsi.

¹⁶“Mej paub has tas, peb nyob le caag nraag tebchaws Iziv, hab peb hlaa dlhau ntau lub tebchaws lug le caag.

¹⁷Mej tub pum puab tej mlom phem qas kws puab muab ntoo, pobzeb, nyaj hab kub ua lawm.

¹⁸Mej ceevfaaj nyob tsaam muaj tej tug txivneej, tej tug quaspuj, tej tsev tuabneeg lossis ib xeem twg kws nub nua tuaj sawv ntawm nuav tso tug TSWV kws yog mej tug Vaajtswv tseg moog pe lwm tsaav tuabneeg tej vaajtswv. Yog mej ua le ntawd, mej yuav zoo le tug caag tshuaj ab kws tuaj huv mej tsaav tuabneeg.

¹⁹Mej ceevfaaj tsi xob pub mej cov ntawm nuav, ib tug twg kws tau nov Vaajtswv tej lug cog tseg lawm, xaav has tas ua le nwg lub sab phem xaav los nwg tseem yuav tau lub neej zoo. Tabsis yog nwg ua le ntawd yuav ua rua mej tug zoo tug phem puamtsuaj huv tuabsi.

²⁰Tug TSWV yuav tsi zaam txim rua tug ntawd. Tug TSWV txujkev chim kws kub cuag nplaim tawg yuav tawmtsaam tug ntawd, hab tej lug foom phem kws sau rua huv phoo ntawv nuav yuav raug tug ntawd moog txug nub kws tug TSWV muab tug ntawd rhuav puamtsuaj taag.

²¹Tug TSWV yuav rau txim rua tug ntawd, qha rua cov Yixalayees txhua xeem hab tug ntawd yuav raug tej lug foom phem kws teev rua huv phoo ntawv kws yog tug TSWV tej lug.

²²“Mej tej tubki yaav tom ntej hab lwm tsaav tuabneeg kws nyob dleb yuav nov tej kev txomnyem hab kev siv kev npug kws tug TSWV tso lug rua mej lub tebchaws.

²³Mej lub tebchaws yuav qhuav ua leejfaaj hab ua ntsev; cog tsi tau ib yaam dlaabtsi, hab nroj tsuag los tuaj tsi taug le. Mej lub tebchaws yuav zoo ib yaam le lub nroog Xaudoos, lub nroog Kaumaulas, lub nroog Amas hab lub nroog Xenpauyees kws tug TSWV chim hab muab rhuav puamtsuaj taag lawm.

²⁴Tej tuabneeg thoob nplajteb yuav nug has tas, ‘Vim le caag tug TSWV ua le nuav rua puab lub tebchaws? Yog vim le caag Tug TSWV txhaj chim ua luaj?’

²⁵Luas yuav teb has tas, ‘Rua qhov tug TSWV tsaav tuabneeg rhuav tej lug kws puab nrug tug TSWV kws yog puab cov yawmkoob tug Vaajtswv kws coj puab tsiv nraag tebchaws Iziv lug lawm.

²⁶Puab pe tej vaajtswv kws puab tsi tau pe dlua le, yog tej vaajtswv kws tug TSWV txwv tsi pub puab pe.

²⁷Vim le nuav tug TSWV txhaj chim heev rua nwg tsaav tuabneeg, hab tso tej kev siv kev npug kws teev tseg rua huv phoo ntawv nuav lug rua puab lub tebchaws.

²⁸Tug TSWV npautawg heev, nwg txhaj muab puab ntab tawm huv puab lub tebchaws moog nyob rua luas tej tebchaws kws nwgnuav puab tseem nyob ntawd.’

²⁹“Muaj tej yaam kws tug TSWV kws yog peb tug Vaajtswv tsi qha rua leejtwg paub; tabsis nwg tub qha nwg tej kevcai rua suavdlawg, kuas peb hab peb tej xeebntxwv ua lawv le tej kevcai ntawd moog ibtxhis.”