Read Hmong Njua 2 Kevcai 3 Bible Online

2 Kevcai 3 - Hmong Njua bible

2 Kevcai 3

¹“Dlhau ntawd, peb moog rua peg tebchaws Npasaas, Vaajntxwv Aunkas txawm coj nwg paab tubrog tuaj tua peb ze rua ntawm lub nroog Ediles.

²Tabsis tug TSWV has rua kuv tas, ‘Koj tsi xob ntshai nwg. Kuv yuav muab nwg, nwg cov tubrog hab nwg lub tebchaws cob rua mej. Koj ca le ua rua Aunkas ib yaam le koj ua rua Xihoos kws yog cov Amaules tug vaajntxwv kws kaav lub nroog Hesenpoos.’

³“Yog le ntawd, tug TSWV txhaj muab Vaajntxwv Aunkas hab nwg cov pejxeem cob rua peb, hab peb muab puab tua tuag taag huv tuabsi.

⁴Thaus ntawd peb moog txeeb tau nwg tej nroog taagnrho tsi tseg ib lub le. Taagnrho cov nroog kws peb txeeb tau huv cheebtsaam Alenkaus kws Vaajntxwv Aunkas kws nyob huv tebchaws Npasaas kaav muaj rau caum lub.

⁵Taagnrho cov nroog ntawd puavleej muaj ntsaa yeej sab heev, tej roojvaag los muab laag hlau laag, hab ntau lub zog tsi muaj ntsaa yeej.

⁶Peb rhuav txhua lub nroog puamtsuaj taag, hab tua cov quaspuj, txivneej hab mivnyuas tuag taag huv tuabsi, ib yaam le peb ua rua Vaajntxwv Xihoos huv lub nroog Hesenpoos lawm.

⁷Peb coj puab tej tsaj txhu hab fuab puab tej khoom huv puab tej nroog moog taag.

⁸“Thaus ntawd peb moog txeeb tau lub tebchaws kws cov Amaules ob tug vaajntxwv kaav ntawm tug dlej Yauladees saab nubtuaj, txij ndlua ntawm tug Dlej Alenoos moog txug rua peg lub Roob Helemoos.

⁹(Lub Roob Helemoos, cov tuabneeg Xidoos hu ua Roob Xili-oos, hab cov tuabneeg Amaules hu ua Roob Xeniles).

¹⁰Peb txeeb tau taagnrho cheebtsaam kws Vaajntxwv Aunkas kaav huv tebchaws Npasaas: cov nroog kws nyob huv taj nraag cheebtsaam Nkile-as hab Npasaas, hab dlhau moog rua lub nroog Xalekas hab Ediles kws nyob saab nubtuaj.

¹¹(“Aunkas yog tug vaajntxwv kawg ntawm tsaav tuabneeg Lefayees. Nwg lub txaaj yog muab hlau ua, dlaav plaub tshim, hab ntev cuaj tshim, lawv le luas ibtxwm ntsuag. Naj nub nua lub txaaj ntawd tseem nyob huv cov tuabneeg Amoos lub nroog Lanpas.)

¹²“Thaus peb txeeb tau lub tebchaws ntawd lug ua peb tug lawm, kuv muab cheebtsaam ntawm lub nroog Alu-es, saab qaumteb kws nyob ze tug dlej Alenoos lub laaj roob huv Nkile-as nrug tej nroog ib nraab faib rua xeem Lunpees hab xeem Khas.

¹³Kuv muab cheebtsaam Nkile-as kws seem hab lub nroog Npasaas kws Aunkas kaav nrug rua cheebtsaam Alenkaus taagnrho faib rua xeem Manaxes ib nraab.” (Lawv le suavdlawg paub, Npasaas yog cov Lefayees lub tebchaws.

¹⁴Yais kws yog xeem Manaxes tau taagnrho cheebtsaam Alenkaus kws yog Npasaas, moog txug ndlua ntawm cov Nkesus hab cov Ma-akas nrimteb. Yales muab nwg tej zog tis npe lawv le nwg lub npe, naj nub nwgnuav luas tseem hu ua Yais tej zog.)

¹⁵“Kuv muab cheebtsaam Nkile-as faib rua Makhis cuab kwvtij kws yog xeem Manaxes.

¹⁶Kuv muab cheebtsaam ntawm Nkile-as moog ti nkaus rua ntawm tug dlej Alenoos faib rua xeem Lunpees hab xeem Khas. Ob xeem ntawd tug nrimteb saab qaabteb phua plhawv tug dlej Alenoos, hab saab qaumteb tug nrim txij ndlua ntawm tug Dlej Yanpaus kws yog cov Amoos tug nrimteb.

¹⁷Saab nubpoob tug nrim moog txug ndlua tug Dlej Yauladees, txij ndlua ntawm Havtxwv Kalilais kws nyob saab qaumteb moog txug rua nraag Havtxwv Tuag kws nyob saab qaabteb hab moog txug rua ntawm lub taw Roob Pinkas kws nyob saab nubtuaj.

¹⁸“Thaus ntawd kuv has le nuav rua puab tas, ‘Tug TSWV kws yog peb tug Vaajtswv tub muab lub tebchaws kws nyob ntawm tug Dlej Yauladees saab nubtuaj rua mej lawm. Mej ca le txhij mej cov tubrog hab kuas puab hlaa tug Dlej Yauladees moog rua saab tim u, moog ua mej cov kwvtij Yixalayees ntej, hab paab puab tua lub tebchaws.

¹⁹Kuv paub has tas mej muaj quaspuj mivnyuas hab muaj tsaj txhu coob. Yog le ntawd tsuas tseg mej cov quaspuj, mivnyuas hab tej tsaj txhu nyob huv cov nroog kws kuv tub muab faib rua mej lawm xwb.

²⁰Mej yuav tau moog paab mej cov kwvtij Yixalayees tua lub tebchaws kws tug TSWV muab rua puab kws nyob ntawm tug dlej Yauladees saab nubpoob, moog txug thaus tug TSWV pub rua puab nyob kaaj sab lug huv lub tebchaws ntawd ib yaam le tug TSWV tub pub rua mej lawm. Tom qaab ntawd mej maam le rov qaab lug nyob rua huv lub tebchaws kws kuv muab rua mej.’

²¹“Ces kuv has rua Yausuas has tas, ‘Koj tub pum tej kws tug TSWV kws yog koj tug Vaajtswv ua rua Vaajntxwv Xihoos hab Vaajntxwv Aunkas lawm; nwg yuav ua ib yaam le ntawd rua txhua lub tebchaws kws koj moog tua.

²²Koj tsi xob ntshai puab, rua qhov tug TSWV kws yog koj tug Vaajtswv yuav paab kuas koj tua yeej.’

²³“Thaus ntawd kuv thov Vaajtswv has tas,

²⁴‘Tug TSWV kws kaav ib puas tsaav yaam, koj tub qha tej txujci tseemceeb kws koj yuav ua rua kuv paub thaus chivkeeb lug lawm, yeej tsi muaj dlua lwm tug Vaajtswv kws nyob sau ntuj lossis huv nplajteb nuav yuav muaj cuabkaav ua tej txujci tseemceeb npaum le koj tau ua taag lug lawm!

²⁵Tug TSWV, thov pub kuv hlaa tug dlej Yauladees moog rua saab tim u, kuas kuv tau pum lub tebchaws aav rog hab zoo qoob, tej laaj roob kws zoo nkauj hab tej roob sab huv tebchaws Lenpanoos.’

²⁶“Tabsis tub yog vim mej ntaag, tug TSWV txhaj le chim rua kuv, hab tsi noog kuv tej lug thov. Nwg has rua kuv tas, ‘Koj lug txug ntawm nuav xwb ces tau lawm! Tsi xob has qhov kws koj yuav moog rua tebchaws Kana-aas le!

²⁷Koj ca le nce moog rua sau lub ncov Roob Pinkas hab tsaa muag saib saab qaumteb, saab qaabteb, saab nubtuaj hab saab nubpoob. Koj ua tuab zoo saib tej kws koj qhovmuag pum, rua qhov koj yuav tsi tau hlaa tug dlej Yauladees.

²⁸Koj yuavtsum qha Yausuas hab txhawb nwg tug zug, kuas nwg muaj lub sab tawv, rua qhov nwg yog tug kws yuav coj kuv tsaav tuabneeg hlaa tug Dlej Yauladees moog nyob lub tebchaws kws koj pum ntawd.’

²⁹“Yog le ntawd, peb tseem nyob huv lub haav kws saib ntsoov lub nroog Npepe-aus.”