Read Hmong Njua 2 Kevcai 31 Bible Online

2 Kevcai 31 - Hmong Njua bible

2 Kevcai 31

¹Mauxes has rua cov Yixalayees tas,

²“Nwgnuav kuv noobnyoog muaj ib puas neeg nkaum xyoo, kuv ua tsi taug mej tug thawj moog ntxiv lawm. Dlua le ntawd, tug TSWV has rua kuv tas, kuv yuav tsi tau hlaa tug dlej Yauladees moog rua saab tim u.

³Tug TSWV kws yog mej tug Vaajtswv yuav moog ua mej ntej hab nwg yuav tua txhua tsaav tuabneeg kws nyob tid, mej txhaj yuav ntaus tau puab lub tebchaws rua mej nyob; txij nuav moog Yausuas yuav ua mej tug thawjcoj, lawv le tug TSWV tau has tseg lawm.

⁴Tug TSWV yuav ua rua cov tuabneeg kws nyob tid puamtsuaj, ib yaam le nwg tau ua rua Xihoos hab Aunkas kws ua vaajntxwv kaav cov Amaules lub tebchaws puamtsuaj taag.

⁵Tug TSWV yuav pub kuas mej moog tua yeej cov tuabneeg ntawd, hab mej yuavtsum muab puab tua kuas tuag taag lawv le tej lug kws kuv has rua mej lawm.

⁶Mej yuavtsum ua sab tawv hab ua sab ruaj nreeg tsi xob ntshai cov tuabneeg ntawd. Tug TSWV kws yog mej tug Vaajtswv yuav nrug nraim mej, nwg yuav tsi ncaim mej lossis tso mej tseg le.”

⁷Tom qaab ntawd, Mauxes hu Yausuas lug cuag nwg, hab nwg has rua Yausuas taabmeeg cov Yixalayees tas, “Koj ca le ua sab tawv hab ua sab ruaj nreeg tsi xob ntshai; koj yog tug yuav coj cov tuabneeg nuav moog tua lub tebchaws kws tug TSWV tau coglug tseg rua puab cov yawmkoob lawm.

⁸Tug TSWV yuav moog ua koj ntej hab nrug nraim koj. Nwg yuav tsi ncaim koj lossis tso koj tseg, koj tsi xob poob sab lossis ntshai.”

⁹Mauxes sau Vaajtswv tej kevcai tseg hab muab rua cov povthawj kws saib lub Phijxaab kws ntim Vaajtswv tej lug cog tseg hab cov Yixalayees tej thawjcoj.

¹⁰Mauxes has rua puab tas, “Xyaa lub xyoo twg kws yog txwm rua xyoo xuam nuj nqes, mej ca le nyeem phoo ntawv nuav rua cov Yixalayees suavdlawg noog, thaus mej ua Kevcai nyob Tsev Pheebsuab.

¹¹Thaus cov Yixalayees tuaj ua ke rua ntawm qhov chaw pehawm tug TSWV kws yog mej tug Vaajtswv, mej ca le nyeem rua suavdlawg noog.

¹²Mej ca le hu suavdlawg tsi has quaspuj txivneej, tug hlub tug yau hab lwm tsaav tuabneeg kws nrug mej nyob tuaj huv tuabsi, suavdlawg txhaj nov hab fwm tug TSWV kws yog mej tug Vaajtswv hab muab sab npuab ua lawv le nwg tej lug.

¹³Yog mej ua le ntawd, mej tej xeebntxwv kws tsi tau nov dlua tug TSWV kws yog mej tug Vaajtswv tej kevcai txhaj tau nov hab paub noog tug TSWV lug moog taag puab simneej kws nyob huv lub tebchaws kws mej yuav hlaa tug Dlej Yauladees moog tua hab txeeb nyob ntawd.”

¹⁴Tom qaab ntawd tug TSWV has rua Mauxes tas, “Koj yuav ua neej nyob tsi ntev lawm. Koj ca le hu Yausuas tuaj cuag koj hab coj nwg moog rua huv kuv lub Tsevntaub sis ntsib, kuv yuav qha nwg.” Ces Mauxes hab Yausuas txawm moog rua huv lub Tsevntaub sis ntsib,

¹⁵hab tug TSWV lug rua obtug pum nyob huv tauv fuab ntawm lub qhovrooj Tsevntaub.

¹⁶Tug TSWV has rua Mauxes tas, “Tshuav tsi ntev koj yuav tuag, thaus koj tuag lawm, cov Yixalayees yuav tsi muab sab npuab kuv, puab yuav tsi ua lawv le tej lug kws kuv has rua puab. Puab yuav tso kuv tseg hab moog pe lwm tsaav tuabneeg tej vaajtswv huv lub tebchaws kws kuv yuav muab rua mej nyob.

¹⁷Thaus muaj tej nuav tshwm lawm, kuv yuav chim rua puab; kuv yuav muab puab tso tseg, hab puab yuav raug kev puamtsuaj. Yuav muaj ntau yaam kev siv kev npug lug raug puab, thaus ntawd puab yuav paub has tas, qhov kws puab raug tej ntawd, vim kuv kws yog puab tug Vaajtswv tsi nrug puab nyob lawm,

¹⁸thaus ntawd kuv yuav tsi paab puab, rua qhov puab moog ua kev phem kev qas hab moog pe luas tej vaajtswv lawm.

¹⁹“Koj ca le sau zaaj nkauj nuav tseg, hab qha rua cov Yixalayees, txhaj muaj lug kom puab tej kev txhum.

²⁰Kuv yuav coj puab moog rua huv lub tebchaws kws aav rog hab zoo qoob kws kuv tau coglug tseg rua puab cov yawmkoob lawm. Puab yuav muaj noj muaj haus txaus hab nyob tso sab lug huv lub tebchaws ntawd. Tabsis puab yuav ntxeev sab rua kuv hab moog pe luas tej vaajtswv. Puab yuav tso kuv tseg hab tsi ua lawv le kuv tej lug,

²¹yuav muaj ntau yaam kev siv kev npug lug raug puab, tabsis puab tej xeebntxwv tseem yuav hu zaaj nkauj nuav tawmtsaam puab. Txawm yog kuv tseem tsi tau coj puab moog nyob huv lub tebchaws kws kuv coglug yuav muab rua puab los kuv tub paub puab lub sab lawm.”

²²Nub ntawd Mauxes txawm sau zaaj nkauj hab qha rua cov Yixalayees.

²³Tom qaab ntawd tug TSWV has rua Noos tug tub Yausuas tas, “Koj ca le ua sab tawv qhawv tsi xob ntshai. Koj yuav ua tug coj cov Yixalayees moog nyob huv lub tebchaws kws kuv tau coglug tseg yuav muab rua puab, hab kuv yuav nrug nraim koj.”

²⁴Mauxes sau Vaajtswv tej kevcai rua huv ntawv tseg, nwg sau txhua nqai tsi tseg ib nqais le.

²⁵Thaus nwg sau tav lawm, nwg has rua cov povthawj saib lub Phijxaab kws ntim Vaajtswv tej lug cog tseg tas,

²⁶“Mej ca le coj Phoo Ntawv kws yog Vaajtswv tej Kevcai nuav moog tso rua ib saab ntawm lub Phijxaab kws ntim tug TSWV kws yog mej tug Vaajtswv tej lug cog tseg, ca nyob ntawd ua timkhawv kom nwg tsaav tuabneeg.

²⁷Kuv paub has tas, puab yog tuabneeg tawv ncauj hab ntxeev sab. Thaus kuv tseem ua neej nyob puab tub ntxeev sab hab tawmtsaam tug TSWV ntau zag lawm, tom qaab kuv tuag lawm ntshai puab hajyam yuav ntxeev sab ntxiv.

²⁸Mej ca le hu cov thawjcoj ntawm txhua xeem hab cov numtswv tuaj cuag kuv, kuv yuav qha tej lug nuav rua puab; kuv yuav thov lub ntuj lub teb ua timkhawv tawmtsaam puab tej kev txhum.

²⁹Kuv paub has tas thaus kuv tuag lawm, cov Yixalayees yuav ua kev phem kev qas, hab tsi kaam ua lawv le tej kws kuv tub qha rua puab lawm. Muaj ib nub puab yuav raug kev siv kev npug, rua qhov puab txhobtxwm ua tej kws tug TSWV txwv tsi pub puab ua, puab ua rua tug TSWV chim heev.”

³⁰Tom qaab ntawd Mauxes nyeem taagnrho zaaj nkauj rua cov Yixalayees noog.