Read Hmong Njua 2 Kevcai 34 Bible Online

2 Kevcai 34 - Hmong Njua bible

2 Kevcai 34

¹Mauxes tawm huv lub taj nraag Mau-am moog rua sau Roob Nenpaus, hab nwg nce moog txug rua sau lub ncov Roob Pinkas kws nyob saab nubtuaj ntawm lub nroog Yelikaus; thaus Mauxes nce moog txug sau lawm, tug TSWV kuas nwg tsaa qhovmuag saib thoob plawg lub tebchaws. Nwg pum lub tebchaws Nkile-as thoob plawg moog ti nkaus lub nroog Daas;

²nwg saib pum taagnrho tej cheebtsaam kws Nathalis, Efalayees, Manaxes hab Yudas nyob moog rua saab Nubpoob ti nkaus rua Havtxwv Meditelanees;

³nwg pum taagnrho tebchaws Yudas saab qaabteb, hab lub taj nraag txij ndlua ntawm lub nroog Xau-as moog ti nkaus lub nroog Yelikaus kws muaj toovlaaj ntau heev.

⁴Tug TSWV has rua Mauxes tas, “Lub tebchaws nuav yog lub kws kuv tau coglug tseg rua Anplahaas, Ixaj hab Yakhauj has tas, kuv yuav muab rua puab cov xeebntxwv. Kuv pub rua koj pum, tabsis tsi pub koj moog nyob.”

⁵Tug TSWV tug tubkhai Mauxes txhaj tuag rua huv tebchaws Mau-am lawv le tug TSWV tau has tseg lawm.

⁶Tug TSWV muab Mauxes log rua huv ib lub haav huv tebchaws Mau-am kws nyob ncaaj lub nroog Npepe-aus, tabsis txij thaus ntawd lug txug naj nub nua, yeej tsi muaj leejtwg paub has tas tug TSWV muab Mauxes lub cev coj moog log rua qhov twg lawm.

⁷Thaus Mauxes tuag, nwg noobnyoog muaj ib puas neeg nkaum xyoo; txawm yog nwg laug heev los nwg tseem muaj zug hab qhovmuag pum kev zoo.

⁸Cov Yixalayees quaj nyav Mauxes tau peb caug nub huv lub taj nraag Mau-am.

⁹Noos tug tub Yausuas muaj tswvyim, Mauxes txhaj tsaa nwg ua tug hloov Mauxes chaw. Cov Yixalayees noog Yausuas lug lawv le tej lug kws tug TSWV kuas Mauxes qha rua puab.

¹⁰Txij thaus ntawd lug cov Yixalayees tsi muaj ib tug cevlug zoo npaum le Mauxes kws tug TSWV nrug nwg thaam tim ntsej tim muag le lawm.

¹¹Tsi muaj ib tug cevlug twg kws ua tau tej txujci tseemceeb hab xaav tsi thoob ib yaam le tej kws tug TSWV kuas Mauxes ua rua Falaus, nwg cov numtswv hab nwg cov pejxeem huv lub tebchaws Iziv pum.

¹²Tsi muaj ib tug cevlug twg kws ua tau tej txujci tseemceeb hab txaus ntshai ib yaam le tej kws Mauxes ua rua cov Yixalayees pum lawm.