Read Hmong Njua 2 Kevcai 4 Bible Online

2 Kevcai 4 - Hmong Njua bible

2 Kevcai 4

¹Ces Mauxes has rua cov Yixalayees has tas, “Mej yuavtsum coj lawv le tej lug kws kuv qha rua mej, mej txhaj muaj sa nyob ntev, hab kaav lub tebchaws kws tug TSWV kws yog mej cov yawmkoob tug Vaajtswv muab pub rua mej.

²Mej tsi xob ntxiv ib lu lug rua tej lug kws kuv has tseg rua mej lossis rhu ib lu lug tseg le. Mej yuavtsum ua lawv le tug TSWV kws yog mej tug Vaajtswv tej lug kws kuv has rua mej txhua lu huv tuabsi.

³Mej puavleej pum tej kws tug TSWV ua sau Roob Pe-aus lawm. Tug TSWV tua cov tuabneeg kws pe tug mlom Npa-aas txhua tug povtseg huv tuabsi,

⁴tabsis mej cov kws muab sab npuab tug TSWV kws yog mej tug Vaajtswv, mej suavdlawg puavleej tseem ua neej nyob lug txug naj nub nua.

⁵“Kuv tub qha tug TSWV kws yog mej tug Vaajtswv tej kevcai kws nwg kuas kuv qha rua mej taag lawm, thaus mej moog nyob huv lub tebchaws kws mej taabtom yuav moog tua, mej yuavtsum ua lawv le tej kevcai ntawd.

⁶Mej yuavtsum muab sab npuab hab ua lawv le tej kevcai nuav, luas lwm tsaav tuabneeg txhaj pum has tas, mej muaj tswvyim. Thaus luas nov txug tej kevcai nuav, luas yuav has nchaa lug tas, ‘Tsaav tuabneeg nuav muaj tswvyim hab txawj ntse kawg le!’

⁷“Tsi muaj ib tsaav tuabneeg twg kws muaj tug tswv nrug puab nyob hab paab puab ib yaam le tug TSWV kws yog peb tug Vaajtswv, nrug peb hab paab peb, txawm yog tsaav tuabneeg ntawd muaj fwjchim luj npaum twg los xij, yeej tsi muaj ib tug kws yuav paab puab le. Tabsis thaus twg peb tsaa ncauj thov tug TSWV, nwg yeej paab peb.

⁸Tsi muaj ib tsaav tuabneeg tseemceeb twg kws muaj tej kevcai ncaaj nceeg le tej kws nub nua kuv qha rua mej.

⁹Mej yuavtsum ceevfaaj hab ncu ntsoov tej kws mej qhovmuag pum nuav moog taag mej simneej. Mej yuavtsum muab pav qha rua mej tej tubki hab tej xeebntxwv noog

¹⁰txug tej xwm kws nub mej moog cuag tug TSWV kws yog mej tug Vaajtswv sau lub Roob Xinais. Nub ntawd nwg has rua kuv tas, ‘Koj ca le hu cov pejxeem tuaj ua ke, kuv xaav qha kuv tej lug rua puab noog, kuas puab txhaj paub fwm hab noog kuv lug moog taag puab tam neej hab puab txhaj paub qha puab tej tubki kuas noog kuv tej lug.’

¹¹“Mej yuavtsum pav qha rua mej tej mivnyuas noog has tas, nub ntawd mej moog sawv ntawm taw roob, muaj fuab tsaus nti le paa tawg hab muaj nplaim tawg cig nto ntuj.

¹²Mej qha rua puab has tas, tug TSWV has lug huv cov nplaim tawg tuaj rua mej. Nwg has le caag rua mej los mej yeej nov txhua lu, tabsis mej tsi pum nwg.

¹³Nwg qha tej kws mej yuavtsum tau ua rua mej, mej txhaj yuav coj tau lawv le tej lug kws nwg cog tseg rua mej lawm. Nwg has kuas mej ua lawv le Kaum Nqai Kevcai kws nwg tau sau rua ntawm ob dlaim txag zeb.

¹⁴Tug TSWV kuas kuv qha nwg tej kevcai rua mej paub hab mej yuavtsum coj, thaus mej moog nyob huv lub tebchaws kws mej taabtom moog tua ntawd.

¹⁵“Thaus tug TSWV has lug huv cov nplaim tawg kws nyob sau Roob Xinais tuaj rua mej, mej tsi pum nwg. Yog mej xaav tau zoo, mej yuavtsum ceevfaaj

¹⁶tsi xob puab ib tug mlom dlaabtsi hlo le, tsi has zoo le quaspuj lossis zoo le txivneej,

¹⁷tsi has zoo le tug tsaj lossis zoo le tug noog,

¹⁸tsi has zoo le tug naab lossis zoo le tug ntseg. Yog mej puab tej ntawd, ces mej ua txhum ntaag.

¹⁹Mej tsi xob teev lossis pe tej kws mej pum nyob sau nruab ntug, tsi has lub nub lossis lub hli hab tej nubqub. Tug TSWV kws yog mej tug Vaajtswv ca lwm tsaav tuabneeg pe tej ntawd.

²⁰Tabsis Vaajtswv coj mej tawm nraag tebchaws Iziv kws zoo le lub cubtawg lug ua nwg tsaav tuabneeg, ib yaam le naj nub nua mej yog nwg tsaav tuabneeg.

²¹Tug TSWV kws yog mej tug Vaajtswv chim rua kuv, tub yog vim mej ntaag, tug TSWV txhaj has tas, nwg tsi pub kuv hlaa tug Dlej Yauladees moog nyob tim lub tebchaws aav rog hab zoo qoob kws nwg taabtom muab pub rua mej.

²²Kuv yuav tuag rua huv lub tebchaws nuav, kuv yuav tsi tau hlaa tug Dlej Yauladees moog rua saab tid, tabsis mej yuav tau hlaa moog nyob huv lub tebchaws kws aav rog hab zoo qoob ntawd.

²³Mej yuavtsum ncu ntsoov tug TSWV kws yog mej tug Vaajtswv tej lug kws nwg cog tseg rua mej lawm. Mej yuavtsum noog tug TSWV tej lug kws qha rua mej has tas, ‘Tsi xob puab ib yaam mlom dlaabtsi rua mej pehawm hlo le,’

²⁴rua qhov tug TSWV kws yog mej tug Vaajtswv khib mej heev. Nwg zoo ib yaam le tej nplaim tawg kws cig laim lag.

²⁵“Txawm yog mej moog nyob huv lub tebchaws ntawd tau ntev, hab muaj tub muaj ki, muaj xeebntxwv lawm los mej tsi xob puab ib yaam mlom dlaabtsi le. Yog mej puab mlom, ces mej ua txhum lawm ntaag. Qhov kws tuabneeg puab mlom yog kev txhum kws ua rua tug TSWV chim.

²⁶Nub nua kuv thov lub ntuj hab lub teb nrug kuv ua timkhawv, yog mej tsi noog kuv lug, tsi ntev mej yuav puamtsuaj taag rua huv lub tebchaws ntawd. Mej yuav tsi tau nyob ntev huv lub tebchaws kws mej taabtom yuav hlaa tug dlej Yauladees moog nyob ntawd. Mej yuav puamtsuaj taag huv tuabsi.

²⁷Tug TSWV yuav ua rua mej tawg ua saab ua sua moog nrug lwm tsaav tuabneeg nyob, mej cov tuabneeg tsuas tshuav cov tsawg txhaj dlim kev puamtsuaj hab muaj sa ua neej nyob xwb.

²⁸Mej yuav tau teev luas tej mlom huv tej tebchaws kws mej moog nyob ntawd, tsi has tej mlom kws yog ntoo lossis pobzeb. Tej mlom ntawd yeej tsi nov lug hab tsi pum kev, tsi txawj noj hab tsi nov ntxhab dlaabtsi le.

²⁹Thaus mej moog nyob huv luas tej tebchaws, yog mej muab sab rau nrhav tug TSWV kws yog mej tug Vaajtswv tag, mej yeej yuav ntsib nwg.

³⁰Thaus tej xwm nuav lug raug mej hab mej raug kev txomnyem ntxhuv sab, thaus ntawd mej yuav tig rov lug cuag tug TSWV hab noog nwg lug.

³¹Nwg yog tug Vaajtswv kws muaj kev taabncuab, nwg yuav tsi tso mej tseg lossis ua rua mej puamtsuaj, nwg yuav ncu ntsoov tej lug kws thaus u nwg tau cog tseg rua mej cov yawmkoob lawm.

³²“Mej sim moog nug saib tam thaus u kws tseem tsi tau yug mej, suav txij thaus Vaajtswv tsim muaj tuabneeg nyob rua lub nplajteb nuav lug puas muaj tej xwm luj npaum le tej kws mej pum nuav los tsi muaj? Mej sim moog nug thoob nplajteb saib, puas muaj leejtwg nov tej xwm zoo le nuav los tsi nov?

³³Puas muaj leejtwg nov Vaajtswv has lug huv cov nplaim tawg tuaj, hab nwg tseem caj sa nyob ib yaam le thaus mej nov Vaajtswv has, mej tseem muaj sa nyob?

³⁴Puas muaj ib tug Vaajtswv twg muaj cuabkaav coj tau ib tsaav tuabneeg tawm huv lwm tsaav tuabneeg lub tebchaws lug ua nwg tsaav tuabneeg le tug TSWV kws yog mej tug Vaajtswv tau coj mej tawm nraag tebchaws Iziv lug? Tub yog Vaajtswv lub fwjchim hab nwg tug zug, ua siv ua npug, ua tsuv ua rog, ua tej txujci tseemceeb kws luj kawg nkaus, hab ua tej xwmtxheej kws tuabneeg ntshai taabmeeg rua mej qhovmuag pum ntaag.

³⁵Tug TSWV ua tej nuav qha rua mej paub has tas, nwg tuab leeg xwb txhaj yog Vaajtswv, tsi muaj dlua lwm tug Vaajtswv.

³⁶Tug TSWV ua rua mej nov nwg lub suab has sau ntuj tuaj, nwg txhaj qha tau mej, hab ca mej pum nwg tej nplaim tawg kws tseemceeb huv nplajteb nuav. Mej nov nwg lub suab has lug huv tej nplaim tawg ntawd tuaj.

³⁷Nwg hlub mej cov yawmkoob, nwg txhaj xaiv mej hab nwg lub fwjchim kws luj kawg nkaus coj mej tawm nraag tebchaws Iziv lug.

³⁸Thaus mej txaav quas zug moog rua tom hauv ntej, tug TSWV ntab tej tsaav tuabneeg kws luj hab muaj zug dlua mej tsiv tawm ua ntej mej moog txug, nwg ua le ntawd tub yog nwg coj mej moog nyob huv puab lub tebchaws kws nwg muab pub rua mej nyob ua mej tug lawm.

³⁹Yog le ntawd, nub nua mej yuavtsum ncu ntsoov rua nruab sab has tas, tug TSWV kws yog Vaajtswv, nwg kaav sau ntuj hab huv nplajteb. Tsi muaj dlua lwm tug Vaajtswv nyob qhov twg le, tsuas yog muaj nwg tuab leeg xwb txhaj yog Vaajtswv.

⁴⁰Mej yuavtsum ua lawv le tug TSWV tej kevcai kws nub nua kuv qha rua mej txhua nqai. Mej hab mej tej tubki txhaj yuav noj qaab nyob zoo. Mej yuav muaj sa ua neej nyob ntev huv lub tebchaws kws tug TSWV kws yog mej tug Vaajtswv yuav muab rua mej ua mej tug moog ibtxhis.”

⁴¹Mauxes xaiv tau peb lub nroog kws nyob saab nubtuaj ntawm tug Dlej Yauladees

⁴²tseg rua tug kws yuam kev tua tug tuabneeg kws tsi yog nwg tug yeebncuab, tau tsiv moog cawm sav. Nwg tsiv moog nyob huv cov nroog ntawd ib lub, kuas luas tsi xob muab nwg tua.

⁴³Xeem Lunpees tau lub nroog Npexeles kws nyob ntawm taj suabpuam; xeem Khas tau lub nroog Lamaus kws nyob huv cheebtsaam Nkile-as; hab xeem Manaxes tau lub nroog Nkaulaas kws nyob huv cheebtsaam Npasaas.

⁴⁴Mauxes qha Vaajtswv tej kevcai rua cov Yixalayees.

⁴⁵Mauxes muab tug TSWV tej kevcai nuav qha rua puab, tom qaab kws puab tsiv nraag tebchaws Iziv lug nyob rua huv lub haav ntawm tug Dlej Yauladees saab nubtuaj kws saib ntsoov lub nroog Npepe-aus. Lub haav ntawd nyob huv cov Amaules tug Vaajntxwv Xihoos kws kaav lub nroog Hesenpoos lub tebchaws. Thaus Mauxes hab cov Yixalayees tsiv nraag tebchaws Iziv lug, puab tua yeej Vaajntxwv Xihoos.

⁴⁶

⁴⁷Puab kaav taagnrho Vaajntxwv Xihoos lub tebchaws, hab Vaajntxwv Aunkas lub tebchaws kws yog cheebtsaam Npasaas; Aunkas yog cov Amaules tug vaajntxwv kws nyob ntawm tug Dlej Yauladees saab nubtuaj.

⁴⁸Lub tebchaws nuav tug nrim txij ndlua ntawm lub nroog Alu-es kws nyob ntawm ntug Dlej Alenoos moog rua saab qaumteb ti nkaus lub nroog Xili-oos kws yog lub Roob Helemoos.

⁴⁹Hab taagnrho cheebtsaam kws nyob ntawm tug Dlej Yauladees saab nubtuaj, hab moog ti nkaus rua nraag Havtxwv Tuag kws nyob saab qaabteb hab moog txug ndlua ntawm taw roob Pinkas kws nyob saab nubtuaj.