Read Hmong Njua 2 Kevcai 7 Bible Online

2 Kevcai 7 - Hmong Njua bible

2 Kevcai 7

¹“Tug TSWV kws yog mej tug Vaajtswv yuav coj mej moog nyob huv lub tebchaws kws mej taabtom yuav moog tua, hab nwg yuav ntab ntau tsaav tuabneeg tsiv tawm moog. Thaus mej moog tua, nwg yuav ntab xyaa tsaav tuabneeg kws luj hab muaj zug tshaaj mej tsiv tawm moog, cov tuabneeg ntawd yog cov Hitis, cov Nkinkasis, cov Amaules, cov Kana-aas, cov Pelixes, cov Hivis hab cov Yenpus.

²Thaus tug TSWV kws yog mej tug Vaajtswv muab tej tsaav tuabneeg ntawd, cob rua mej teg hab mej tua yeej puab lawm, mej yuavtsum tua puab kuas tu noob nrho, mej tsi xob nrug puab sis raug zoo lossis taabncuab puab hlo le.

³Mej tsi xob moog yuav puab tej ntxhais lug rua mej tej tub, hab tsi xob ca mej tej ntxhais moog yuav puab tej tub,

⁴rua qhov puab yuav ua rua mej tej tub tej ntxhais tso tug TSWV tseg hab moog pe luas tej vaajtswv. Yog mej ua le ntawd, tug TSWV yuav chim rua mej hab yuav ua kuas mej puamtsuaj taamsim ntawd.

⁵Mej ca le rhuav puab tej thaaj, tsoo puab tej ncej zeb dlaab, ntuv puab tej ncej Aselas, hab hlawv puab tej mlom huv tuabsi povtseg.

⁶Mej yuavtsum ua le nuav, rua qhov mej yog tug TSWV kws yog mej tug Vaajtswv tsaav tuabneeg. Nwg tau xaiv mej tawm ntawm txhua tsaav tuabneeg huv nplajteb nuav lug ua nwg tsaav tuabneeg kws nwg hlub heev.

⁷“Tug TSWV hlub mej hab xaiv mej, tsi yog vim mej yog ib tsaav tuabneeg kws coob tshaaj lwm tsaav; qhov tseeb, mej yog ib tsaav tuabneeg kws tsawg kawg nkaus huv nplajteb nuav.

⁸Tabsis nwg hlub mej hab nwg ua lawv le tej lug kws nwg tau cog tseg rua mej cov yawmkoob lawm. Tub yog vim le nuav, nwg txhaj siv nwg lub fwjchim kws luj kawg nkaus cawm mej hab tso mej dlim, mej txhaj tsi tau ua Falaus kws yog cov Iziv tug vaajntxwv qhev lawm.

⁹Mej yuavtsum ncu ntsoov has tas, tug TSWV kws yog mej tug Vaajtswv tuab leeg xwb txhaj yog Vaajtswv hab nwg yog tug ncaaj nceeg. Nwg yuav ua lawv le tej lug kws nwg tau cog tseg, nwg hlub tug kws noog nwg lug hab muab sab npuab nwg moog txug ib txheeb tam tuabneeg,

¹⁰tabsis nwg yuav rau txim rua cov kws ntxub nwg.

¹¹Yog le ntawd, mej yuavtsum ua lawv le tej kws kuv qha mej; hab coj lawv le tej kevcai txhua nqai kws nub nua kuv muab cob rua mej.

¹²“Yog mej noog hab ua lawv le tej kevcai nuav, tug TSWV kws yog mej tug Vaajtswv yuav ua lawv le tej lug kws nwg tau cog tseg rua mej, nwg yuav hlub mej moog ibtxhis lawv le nwg tau coglug tseg rua mej cov yawmkoob lawm.

¹³Nwg yuav hlub hab foom koob moov rua mej, mej yuav fuamvaam muaj tubki coob. Nwg yuav foom koob moov rua mej tej laj teb, mej yuav muaj qoobloo ntau, muaj cawv txiv maab hab roj txiv ntoo. Nwg yuav foom koob moov rua mej, kuas muaj nyuj, muaj yaaj hab muaj tshis coob. Nwg yuav foom tej koob moov nuav rua mej, thaus mej moog nyob huv lub tebchaws kws nwg tau coglug tseg rua mej cov yawmkoob lawm has tas, nwg yuav muab rua mej.

¹⁴Tej tuabneeg kws nyob huv nplajteb nuav, tsi muaj ib tsaav tuabneeg kws yuav tau koob moov npaum le mej. Mej tej quaspuj hab tej tsaj txhu tsi muaj ib tug mooj kws muaj tsi taug mivnyuas le.

¹⁵Tug TSWV yuav tsomkwm tsi pub kuas mej muaj mob muaj nkeeg hab nwg yuav tsi tso tej mob phem kws mej pum nraag tebchaws Iziv lug raug mej le, tabsis nwg yuav tso tej ntawd lug raug mej tej yeebncuab txhua tug.

¹⁶Mej yuavtsum tua txhua tsaav tuabneeg kws tug TSWV kws yog mej tug Vaajtswv muab cob rua mej teg kuas puamtsuaj taag, mej tsi xob hlub puab hlo le. Mej tsi xob pe puab tej vaajtswv, yog mej pe mej yuav raug kev puamtsuaj.

¹⁷“Mej tsi xob xaav has tas, cov tuabneeg nuav coob dlua mej, mej yuav lawv tsi tau puab tsiv tawm.

¹⁸Mej tsi xob ntshai puab, mej yuavtsum ncu ntsoov tej xwm kws tug TSWV kws yog mej tug Vaajtswv ua rua Falaus hab cov Iziv.

¹⁹Mej yuavtsum ncu ntsoov tej sub tawg sub ntshaa kws mej qhovmuag pum, tej txujci tseemceeb hab tug TSWV kws yog mej tug Vaajtswv lub fwjchim hab tug zug luj zug nchaav kws tso mej dlim, mej txhaj tsi tau ua luas qhev. Tug TSWV yuav ua rua cov tuabneeg kws nwgnuav mej ntshai heev ntawd kuas puamtsuaj taag ib yaam le nwg ua rua cov Iziv raug puamtsuaj lawm.

²⁰Tug TSWV yuav tso sub tawg sub ntshaa lug rua tej tsaav tuabneeg ntawd, txawm yog cov kws tsiv moog nkaum los yuav raug puamtsuaj taag huv tuabsi.

²¹Yog le ntawd, mej tsi xob ntshai tej tuabneeg ntawd. Tug TSWV kws yog mej tug Vaajtswv yuav nrug nraim mej; nwg yog Vaajtswv tug kws muaj fwjchim luj kawg nkaus, tsimnyog suavdlawg fwm hab ntshai nwg.

²²Thaus mej moog tua puab, tug TSWV kws yog mej tug Vaajtswv yuav ntab puab tawm zuj zug moog. Mej tsi xob ua tuab zag tua kuas puab puamtsuaj taag huv tuabsi. Yog mej ua le ntawd, yuav muaj tsaj nruab nraag coob heev tuaj txuv mej.

²³Tug TSWV yuav muab mej tej yeebncuab cob rua mej, nwg yuav ua kuas puab ceeb hab tawg tsiv moog txug nub kws puab raug kev puamtsuaj taag.

²⁴Tug TSWV yuav muab puab tej vaajntxwv cob rua mej teg. Mej yuav tua tej vaajntxwv ntawd tuag taag, hab puab tej koob meej yuav pluj moog. Yeej tsi muaj leejtwg yuav tiv taug mej. Mej yuav tua puab tuag taag huv tuabsi.

²⁵Mej yuavtsum muab puab tej mlom hlawv povtseg. Mej tsi xob ntshaw tej nyaj tej kub kws luas muab vuam rua tej mlom ntawd. Hab mej tsi xob coj tej ntawd lug ua mej tug. Yog mej coj lug, mej yuav raug puamtsuaj, rua qhov tug TSWV kws yog mej tug Vaajtswv ntxub tej mlom ntawd heev.

²⁶Mej tsi xob coj tej mlom ntawd ib tug lug tso rua huv mej tej tsev, nyob tsaam mej yuav raug foom tsi zoo ib yaam le tej mlom ntawd. Mej yuavtsum ntxub hab saib tej mlom ntawd tsi muaj nqes, rua qhov tug TSWV tub foom tsi zoo rua tej mlom ntawd lawm.