Read Hmong Njua 2 Kevcai 8 Bible Online

2 Kevcai 8 - Hmong Njua bible

2 Kevcai 8

¹“Mej yuavtsum ua lawv le tej kevcai kws nub nua kuv qha rua mej txhua nqai, mej txhaj muaj sa nyob ntev, muaj tubki coob hab tau moog nyob huv lub tebchaws kws tug TSWV coglug tseg rua mej cov yawmkoob lawm.

²Mej yuavtsum ncu ntsoov has tas, tug TSWV kws yog mej tug Vaajtswv coj mej kev hlaa taj suabpuam tau plaub caug xyoo lug le caag, nwg ca mej raug kev txomnyem ntau yaam sim mej sab saib mej puas ua taug sab ntev, hab saib mej puas yuav ua lawv le nwg tej lug.

³Nwg ca mej tshaib, nwg maam le muab cov manas kws mej hab mej cov yawmkoob tsi tau noj dlua rua mej noj. Nwg ua le ntawd, tub yog nwg qha kuas mej paub has tas, tsi yog mov xwb txhaj cawm tau tuabneeg txujsa, tabsis tug TSWV tej lug txhua lu txhaj cawm tau tuabneeg txujsa.

⁴Lub sijhawm plaub caug xyoo ntawd mej tej tsoog tsho yeej tsi ndluag hab mej tej kutaw yeej tsi mob tsi o le.

⁵Mej yuavtsum ncu ntsoov has tas, tug TSWV kws yog mej tug Vaajtswv qhuab ntuag hab rau txim rua mej ib yaam le leej txiv qhuab ntuag nwg tej mivnyuas.

⁶Yog le ntawd, mej yuavtsum ua lawv le tug TSWV tej lug kws qha rua mej has tas: mej yuavtsum ua lub neej lawv le tug TSWV tej kevcai hab fwm tug TSWV.

⁷“Tug TSWV kws yog mej tug Vaajtswv taabtom coj mej moog nyob huv lub tebchaws aav rog hab zoo qoob, yog lub tebchaws kws muaj dlej, muaj qhovdlej txhawv, muaj dlej cag ndlwg laub lug huv tej kwj haa hab sau tej roob,

⁸lub tebchaws ntawd luas cog nplej hab mog, cog txiv maab, txiv ncuav pas, txiv ntsab pobkws, txiv ntoo roj hab muaj zib ntaab ntau heev.

⁹Thaus mej moog nyob huv lub tebchaws ntawd, mej yuav tsi tshaib tsi nqhes hab tsi pluag le. Lub tebchaws ntawd tej roob zeb roob tsuas muaj qhov tooj qhov hlau.

¹⁰Mej yuav muaj txaus noj txaus haus. Mej yuav ua tug TSWV kws yog mej tug Vaajtswv tsaug, vim nwg muab lub tebchaws kws aav rog hab zoo qoob rua mej.

¹¹“Mej yuavtsum ncu ntsoov tug TSWV kws yog mej tug Vaajtswv; mej yuavtsum ua lawv le nwg tej kevcai kws nub nua kuv muab cob rua mej.

¹²Thaus mej muaj noj muaj haus txaus, hab ua tau vaaj tau tsev rua mej nyob,

¹³muaj nyuj, muaj yaaj, muaj nyaj muaj kub hab ib puas tsaav yaam ntau zuj zug tuaj,

¹⁴mej yuavtsum tsi xob khaavtheeb hab tso tug TSWV kws yog mej tug Vaajtswv kws coj mej tawm nraag tebchaws Iziv qhov chaw kws mej ua luas qhev lug tseg.

¹⁵“Nwg coj mej lug hlaa taj suabpuam kws yog taj tuag tshaib tuag nqhes, muaj tej naab muaj taug hab raubris teb. Thaus mej tseem nyob nraag taj suabpuam kws qhuav nkig nkuav hab tsi muaj dlej haus, nwg ua dlej tawm huv pobzeb lug rua mej haus.

¹⁶Tug TSWV muab cov manas kws mej cov yawmkoob tsi tau noj dlua rua mej noj nraag taj suabpuam. Tug TSWV tso ntau yaam kev txomnyem lug sim mej sab, thaus kawg nwg txhaj pub yaam kws zoo rua mej.

¹⁷Mej tsi xob xaav has tas, yog mej tug dlaag tug zug hab mej lub tswvyim khwv mej txhaj muaj txag npluanuj.

¹⁸Mej yuavtsum ncu ntsoov has tas, tug TSWV kws yog mej tug Vaajtswv, yog tug pub rua mej npluanuj. Nwg ua le ntawd, yog nwg ua lawv le tej lug kws nwg cog tseg rua mej cov yawmkoob hab nwg tseem ua zoo rua mej le ntawd lug txug naj nub nua.

¹⁹Mej yuavtsum ncu ntsoov tug TSWV kws yog mej tug Vaajtswv, mej tsi xob tso nwg tseg hab moog pe luas tej vaajtswv. Nub nua kuv ntuag mej has tas, yog mej tsi noog lug mej yuav raug puamtsuaj xwb.

²⁰Yog mej tsi noog tug TSWV lug, mej yuav raug puamtsuaj ib yaam le txhua tsaav tuabneeg kws tug TSWV yuav ua kuas puab raug puamtsuaj thaus mej moog txeeb puab lub tebchaws.