Read Hmong Njua Yauhaas 12 Bible Online

Yauhaas 12 - Hmong Njua bible

Yauhaas 12

¹Tshuav rau nub maam txug lub caij ua Kevcai Hlaa Dlhau, Yexus txawm moog rua huv lub zog Npethanis, Laxalus tug kws Yexus tsaa sawv huv qhov tuag rov qaab lug nyob huv lub zog ntawd.

²Puab ua ib pluag mo rua Yexus noj, Mathas ua tug txhaab zaub mov, Laxalus yog ib tug ntawm cov tuabneeg kws nrug Yexus nyob ua ke ntawm rooj mov hab.

³Ces Malis txawm muab tau ib fwj roj tsw qaab kim heev kws yog muab nroj naludas ua lug laub rua Yexus ob txhais kutaw, hab muab nwg cov plaubhau so. Cov roj ntawd tsw thoob plawg huv tsev.

⁴Thaus Yexus cov thwjtim tug kws hu ua Yudas Ixakali-us, tug kws yuav ntxeev sab rua Yexus pum le ntawd, nwg txawm has tas,

⁵“Ua le caag tsi muab fwj roj tsw qaab nuav coj moog muag peb puas lub nyaj, hab muab cov nyaj ntawd coj moog pub rua cov tuabneeg pluag?”

⁶Yudas has le ntawd, tsi yog vim nwg hlub cov tuabneeg pluag, tabsis vim nwg yog tubsaab. Nwg yog tug ceev lub naab nyaj hab nwg pheej qee coj moog siv.

⁷Tabsis Yexus has tas, “Ca nwg ua nwg! Nwg npaaj tej nuav tseg rua nub kws log kuv.

⁸Yuav muaj cov tuabneeg pluag nrug mej nyob moog le, tabsis kuv yuav tsi nrug mej nyob moog le.”

⁹Cov Yudais muaj ntau leej nov has tas, Yexus tuaj nyob huv lub zog Npethanis, yog le ntawd puab txawm tuaj rua huv hab, tsi yog puab xaav pum Yexus xwb, tabsis puab xaav pum Laxalus tug kws Yexus tsaa sawv huv qhov tuag rov qaab lug.

¹⁰Vim le ntawd, cov thawj ntawm cov povthawj txhaj tuavhuv yuav muab Laxalus tua povtseg hab,

¹¹vim has tas qhov kws Yexus tsaa Laxalus sawv ntawd, ua rua cov Yudais coob leej ntseeg Yexus hab tso cov povthawj tseg lawm.

¹²Nub tom qaab cov tuabneeg coob coob kws tuaj ua Kevcai Hlaa Dlhau nov has tas, Yexus taabtom tuaj rua huv lub nroog Yeluxalees.

¹³Yog le ntawd, puab txawm moog txav tej nplooj toovlaaj nqaa moog tog Yexus, hab puab has nrov nrov has tas, “Ca le qhuas Vaajtswv! Thov Vaajtswv foom koob moov rua tug kws Vaajtswv khaiv lug! Thov Vaajtswv foom koob moov rua cov Yixalayees tug Vaajntxwv!”

¹⁴Yexus pum ib tug neeg luav hab nwg caij tug neeg luav ntawd tuaj, lawv le Vaajtswv txujlug tau sau tseg lawm has tas,

¹⁵“Lub nroog Xi-oos, koj tsi xob ntshai. Koj saib, koj tug Vaajntxwv taabtom caij ib tug mivnyuas neeg luav lug cuag koj.”

¹⁶Thaus ntawd Yexus cov thwjtim tsi totaub le; tabsis thaus Vaajtswv tsaa Yexus sawv huv qhov tuag rov qaab lug tau koob meej lawm, cov thwjtim ncu dlheev txug Vaajtswv txujlug kws has txug Yexus hab tej kws tuabneeg tau ua rua nwg lawm.

¹⁷Cov tuabneeg kws nrug Yexus ua ke thaus Yexus tsaa Laxalus sawv huv qhov tuag hab hu Laxalus tawm huv qhov ntxaa lug, puab tub moog pav tej ntawd rua suavdlawg noog lawm.

¹⁸Yog le ntawd, txhaj muaj tuabneeg coob coob tuaj tog Yexus, rua qhov puab nov has tas Yexus ua tau tej txujci tseemceeb.

¹⁹Ces cov Falixais txawm sis thaam zum zawg has tas, “Mej saib, peb ua tsi tau dlaabtsi le lawm! Mej saib, taag teb taag chaw puavleej caum nwg lawm.”

²⁰Thaus lub sijhawm ntawd, cov tuabneeg kws tuaj ua kevcai huv lub nroog Yeluxalees, muaj qee leej yog cov tuabneeg Kilis.

²¹Puab moog cuag Filis tug kws nyob huv lub zog Npexaidas peg lub xeev Kalilais tuaj hab has tas, “Tug tswv, peb xaav ntsib Yexus.”

²²Filis moog has rua Aadales, ces obtug txawm moog has rua Yexus.

²³Yexus teb has tas: “Nwgnuav tub txug lub sijhawm kws Tuabneeg Leej Tub yuav tau txais koob meej lawm.

²⁴Kuv qha tseeb rua mej has tas: Yog tsi muab lub noob nplej faus rua huv aav kuas lwj, ces lub noob ntawd, nwg yuav nyob nwg tuab lub xwb. Yog lub noob nplej ntawd lwj txhaj yuav tuaj kaug hab txi tau ntau lub.

²⁵Tug kws khauvxwm nwg txujsa, tug ntawd yuav tsi tau txujsa; tug kws tsi khauvxwm nwg txujsa thaus nwg tseem ua neej nyob huv lub nplajteb nuav, tug ntawd yuav tau txujsa ibtxhis.

²⁶Tug kws xaav ua kuv tug tubkhai, tug ntawd yuavtsum nrug kuv moog, hab kuv nyob qhov twg, kuv tug tubkhai yuav nrug kuv nyob qhov ntawd. Kuv Txiv yuav qhuas tug kws ua kuv tug tubkhai.

²⁷“Nwgnuav kuv nyuaj sab kawg le, kuv yuav has le caag txhaj zoo? Kuv yuav has tas, ‘Txiv, thov tsi xob ca lub sijhawm nuav lug raug kuv.’ Tabsis tsi xob ua le ntawd, qhov kws kuv lug tub yog lug kuas raug txujkev txomnyem kws yuav lug ntawd ntaag.

²⁸Txiv, thov kuas koj lub npe tau koob meej!” Ces muaj ib lub suab has sau ntuj tuaj has tas, “Kuv tub ua rua kuv lub npe tau koob meej lawm, hab kuv yuav rov ua dlua.”

²⁹Cov tuabneeg coob coob kws sawv ntawd nov lub suab ntawd, muaj qee leej has tas yog xub nroo, muaj qee leej has tas, “Yog timtswv ceebtsheej nrug nwg thaam!”

³⁰Tabsis Yexus has tas, “Lub suab ntawd tsi yog has rua kuv, tabsis yog has rua mej.

³¹Nwgnuav tub txug lub sijhawm kws txav txim rua tuabneeg nplajteb lawm; nwgnuav luas tub yuav muab tug kws kaav lub nplajteb nuav ntab tawm moog.

³²Thaus luas muab kuv dlai, kuv yuav coj txhua tsaav tuabneeg lug cuag kuv.”

³³(Yexus has le ntawd, tub yog nwg qha has tas, nwg yuav tuag txomnyem le caag.)

³⁴Cov tuabneeg coob coob ntawd teb has tas, “Peb txuj Kevcai qha rua peb has tas, tug Mexiyas yuav nrug peb nyob moog ibtxhis le. Ua le caag koj tsua has tas, luas yuav muab Tuabneeg Leej Tub dlai? Tuabneeg Leej Tub yog leejtwg?”

³⁵Yexus teb has tas, “Qhov kaaj tseem yuav nrug mej nyob ib nyuas ntu ntxiv. Thaus kws tseem pum kev, mej ca le rau sab ntso ua mej lub neej, nyob tsaam tsaus mej ntuj; rua qhov tug kws maub mo ntuj, nwg yeej tsi paub has tas nwg taabtom moog qhov twg.

³⁶Yog le ntawd, thaus tseem muaj qhov kaaj, mej ca le ntseeg qhov kaaj, kuas mej txhaj tau ua cov tuabneeg kws nyob qhov kaaj.” Tom qaab kws Yexus has le ntawd taag, Yexus txawm tsiv moog nkaum kuas puab tsi pum nwg.

³⁷Txawm yog Yexus ua ntau yaam txujci tseemceeb rua puab pum los puab tsi ntseeg nwg le,

³⁸tej nuav txhaj muaj tav lawv le Yaxayas kws yog tug cev Vaajtswv lug tau has tseg lawm has tas: “Tug Tswv, leejtwg txhaj yuav ntseeg tej lug kws peb qha? Tug Tswv ua nwg lub fwjchim rua leejtwg pum?”

³⁹Tub yog vim le ntawd, puab txhaj tsi ntseeg, rua qhov Yaxayas has ntxiv tas,

⁴⁰“Vaajtswv ua rua puab dligmuag hab ua rua puab lub sab ruag, kuas puab qhovmuag tsi pum kev hab puab lub sab tsi totaub; Vaajtswv has tas, ua le ntawd kuas puab tsi xob lug cuag kuv kuas kuv khu puab.”

⁴¹Yaxayas has le ntawd, rua qhov nwg tub pum Yexus tug tshwjchim hab nwg has txug Yexus zaaj ntaag.

⁴²Txawm yog le ntawd los cov Yudais tej numtswv kuj muaj ntau leej ntseeg Yexus; tabsis vim puab ntshai cov Falixais, puab txhaj tsi qha rua suavdlawg paub, kuas puab tsi raug ntab tawm huv lub tsev saablaaj moog.

⁴³Puab nyam kuas tuabneeg qhuas puab heev dlua le nyam kuas Vaajtswv qhua puab.

⁴⁴Yexus has nrov nrov rua suavdlawg tas, “Tug kws ntseeg kuv, tsi yog nwg ntseeg kuv tuab leeg xwb, tabsis yog nwg ntseeg tug kws khaiv kuv lug hab.

⁴⁵Tug kws pum kuv, tug ntawd pum tug kws khaiv kuv lug hab.

⁴⁶Kuv lug ua qhov kaaj rua tuabneeg nplajteb pum kev, txhua tug kws ntseeg kuv yuav tsi nyob huv qhov tsaus ntuj lawm.

⁴⁷Tug kws nov kuv tej lug hab tsi ua lawv le kuv tej lug, kuv yuav tsi txav txim rua tug ntawd. Kuv tsi yog lug txav txim rua tuabneeg nplajteb, tabsis yog kuv lug cawm tuabneeg nplajteb kuas puab dlim puab lub txim.

⁴⁸Muaj ib tug yuav txav txim rua tug kws tsi leeg paub kuv hab tsi noog kuv tej lug qha. Thaus txug nub kawg, tej lug kws kuv qha lawm yuav ua tug txav txim rua tug ntawd.

⁴⁹Rua qhov tej lug kws kuv has ntawd tsi yog kuv has lawv le kuv lub sab, tabsis yog leej Txiv kws khaiv kuv lug kuas kuv has hab kuv qha.

⁵⁰Kuv paub has tas, nwg tej lug saamfwm yog txujsa moog ibtxhis. Tej lug kws kuv has, puavleej yog leej Txiv qha rua kuv has.”