Read Hmong Njua Yauhaas 13 Bible Online

Yauhaas 13 - Hmong Njua bible

Yauhaas 13

¹Thaus yuav txug nub ua Kevcai Hlaa Dlhau, Yexus paub has tas tub txug lub sijhawm kws nwg yuav tawm huv lub nplajteb nuav rov moog cuag leej Txiv lawm. Yexus yeej ibtxwm hlub nwg cov tuabneeg kws nyob huv nplajteb nuav, hab nwg yuav hlub puab moog txug nub kawg le.

²Thaus Yexus hab nwg cov thwjtim taabtom noj mo, dlaab Ntxwgnyoog tub xub tshoov Ximoos Ixakali-us tug tub Yudas lub sab lawm, kuas nwg ntxeev sab rua Yexus.

³Yexus paub has tas leej Txiv tub muab ib puas tsaav yaam tso rua nwg kaav huv tuabsi lawm; nwg paub has tas Vaajtswv khaiv nwg lug hab nwg yuav rov moog cuag Vaajtswv.

⁴Yog le ntawd, Yexus txawm sawv ntawm rooj mov moog hle nwg lub tsho ntev, hab muab ib txuj phuam lug sa ntawm dluav.

⁵Ces nwg muab dlej laub rua huv lub phab hab nqaa lug ntxuav cov thwjtim kutaw hab muab txuj phuam kws nwg sa ntawm dluav so puab kutaw.

⁶Thaus Yexus ntxuav lug txug ntawm Ximoos Petus, Ximoos Petus txawm has rua Yexus has tas, “Tug Tswv, koj yuav ntxuav kuv kutaw hab los?”

⁷Yexus teb has tas, “Taamsim nuav koj tseem tsi tau totaub qhov kws kuv ua nuav, tabsis lwm nub koj yuav totaub.”

⁸Petus has tas, “Kuv yeej tsi pub koj ntxuav kuv kutaw ib zag le!” Yexus teb has tas, “Yog kuv tsi ntxuav koj kutaw, koj yuav tsi tau ua kuv tug thwjtim lawm.”

⁹Ximoos Petus teb has tas, “Tug Tswv, yog le ntawd thov tsi xob ntxuav kuv kutaw xwb, tabsis ntxuav kuv teg hab taubhau huv tuabsi.”

¹⁰Yexus has tas, “Tug kws dlaa dlej, nwg lub cev yeej huv lawm, tsi taag yuav rov ntxuav dlua, tsuas ntxuav nwg kutaw lawm xwb. Mej txhua tug puavleej huv lawm, tsuas yog tshuav ib tug xwb txhaj tsi huv.”

¹¹(Yexus paub has tas tug twg yog tug kws yuav ntxeev sab rua nwg; yog le ntawd nwg txhaj has tas, “Mej txhua tug puavleej huv lawm, tsuas yog tshuav ib tug xwb txhaj tsi huv.”)

¹²Tom qaab kws Yexus ntxuav puab kutaw taag lawm, nwg rov muab nwg lub tsho ntev lug naav, hab rov lug nyob nwg lub chaw ntawm rooj mov. Yexus nug cov thwjtim has tas, “Qhov kws kuv ua rua mej nuav, mej puas totaub?

¹³Mej hu kuv ua Xwbfwb hab tug Tswv, mej hu le ntawd yog lawm, rua qhov kuv yeej yog tag.

¹⁴Kuv yog mej tug Tswv hab yog mej tug Xwbfwb, kuv tub ntxuav mej kutaw lawm, yog le ntawd, mej ib leeg yuavtsum ntxuav ib leeg kutaw.

¹⁵Kuv ua qauv le nuav qha rua mej, kuas mej xyum ua lawv le kuv ua rua mej lawm.

¹⁶Kuv qha tseeb rua mej has tas, tug qhev yeej tsi muaj fwjchim luj dlua nwg tug tswv, hab tug tubkhai yeej tsi muaj fwjchim luj dlua tug kws khaiv nwg moog.

¹⁷Thaus mej paub tej nuav lawm, yog mej ua lawv le ntawd, mej yuav tau kev kaaj sab!

¹⁸“Kuv tsi yog has txug mej txhua tug; kuv yeej paub cov kws kuv xaiv ca lawm. Tabsis yuavtsum muaj lawv le Vaajtswv txujlug kws has tas, ‘Tug kws koom nrug kuv noj ib taig mov yuav ntxeev sab rua kuv.’

¹⁹Kuv xub qha rua mej ua ntej kws muaj tej nuav, kuas thaus muaj tej nuav tshwm tuaj, mej txhaj yuav ntseeg has tas, ‘Kuv Yog Tug Kws Kuv Yog.’

²⁰Kuv qha tseeb rua mej has tas, tug kws leeg yuav tug kws kuv khaiv moog, tug ntawd leeg yuav kuv; hab tug kws leeg yuav kuv, tug ntawd yeej leeg yuav tug kws khaiv kuv lug.”

²¹Tom qaab kws Yexus has le ntawd taag, nwg nyuaj sab heev hab nwg has tas, “Kuv qha tseeb rua mej has tas, mej cov ko muaj ib tug yuav ntxeev sab rua kuv.”

²²Cov thwjtim ib leeg txawm saib ib leeg, puab tsi paub has tas tug kws Yexus has ntawd yog leejtwg.

²³Yexus cov thwjtim tug kws Yexus hlub heev, nwg nyob npuas Yexus.

²⁴Ximoos Petus txawm ua laaj muag rua tug thwjtim ntawd hab has tas, “Koj nug Yexus saib, tug kws nwg has ntawd yog leejtwg?”

²⁵Ces tug thwjtim ntawd tig moog nug Yexus has tas, “Tug Tswv, tug ntawd yog leejtwg?”

²⁶Yexus teb has tas, “Kuv muab ncuav ntsw cev rua leejtwg noj; ces yog tug ntawd ntaag.” Yog le ntawd, Yexus txawm muab ncuav ntsw cev rua Ximoos Ixakali-us tug tub Yudas noj.

²⁷Thaus Yudas txais nkaus qhov ncuav ntawd, dlaab Ntxwgnyoog txawm nkaag rua huv Yudas. Yexus has rua Yudas has tas, “Koj yuav ua dlaabtsi, koj ca le ua kawgkag!”

²⁸Cov thwjtim kws nyob ntawm rooj mov, tsi muaj ib tug totaub has tas, vim le caag Yexus has le ntawd rua Yudas.

²⁹Yudas yog tug ceev lub naab nyaj, cov thwjtim qee leej txhaj xaav has tas, Yexus khaiv Yudas moog yuav tej yaam lug rua puab siv ua kevcai lossis Yexus kuas Yudas muab mivntsiv nyaj moog pub rua cov tuabneeg pluag.

³⁰Yudas txais nkaus qhov ncuav ntawd noj, taamsim ntawd Yudas txawm tawm plawg moog lawm. Thaus ntawd tub tsaus ntuj lawm.

³¹Tom qaab kws Yudas tawm moog lawm, Yexus has tas, “Nwgnuav tub txug lub sijhawm kws Tuabneeg Leej Tub tau koob meej lawm; nwgnuav nwg yuav ua rua Vaajtswv tau koob meej.

³²Yog Tuabneeg Leej Tub ua rua Vaajtswv tau koob meej lawm, Vaajtswv yuav ua rua Tuabneeg Leej Tub tau koob meej ib yaam nkaus hab, Vaajtswv yuav ua le ntawd taamsim nuav ntaag.

³³Kuv cov mivnyuas, kuv yuav nrug mej nyob tsi ntev lawm. Mej yuav nrhav kuv; tabsis nwgnuav kuv qha rua mej ib yaam le kuv tub qha rua cov Yudais tej numtswv lawm has tas, ‘Qhov chaw kws kuv yuav moog ntawd, mej moog tsi tau.’

³⁴Nwgnuav kuv muab ib txuj kevcai tshab rua mej: mej ib leeg yuavtsum hlub ib leeg. Mej ib leeg yuavtsum hlub ib leeg ib yaam le kuv hlub mej.

³⁵Yog mej ib leeg hlub ib leeg, suavdlawg txhaj yuav paub has tas mej yog kuv cov thwjtim.”

³⁶Ximoos Petus nug Yexus has tas, “Tug Tswv, koj yuav moog qhov twg?” Yexus teb has tas, “Qhov chaw kws kuv yuav moog ntawd, nwgnuav koj nrug kuv moog tsi tau, tabsis lwm nub koj maam le lawv kuv qaab lug.”

³⁷Petus nug has tas, “Tug Tswv, ua le caag kuv nrug koj moog tsi tau? Kuv yeej txaus sab tuag theej koj!”

³⁸Yexus teb has tas, “Koj yeej txaus sab tuag theej kuv tag los? Kuv qha tseeb rua koj has tas, thaus qab tsi tau qua koj yuav has peb zag has tas koj tsi paub kuv.”