Read Hmong Njua Yauhaas 14 Bible Online

Yauhaas 14 - Hmong Njua bible

Yauhaas 14

¹Yexus has rua nwg cov thwjtim has tas, “Mej tsi xob txhawj hab tsi xob nyuaj sab, mej ca le ntseeg Vaajtswv hab ntseeg kuv.

²Huv kuv Txiv lub tsev muaj ntau chaav, hab kuv taabtom yuav moog tu chaw rua mej. Yog tsi muaj le ntawd, kuv yeej yuav tsi qha le nuav rua mej.

³Thaus kws kuv tu tau chaw rua mej lawm, kuv yuav rov qaab lug hab tog mej moog nrug kuv nyob, kuv nyob qhov twg mej yeej yuav nrug kuv nyob qhov ntawd.

⁴Qhov chaw kws kuv yuav moog, mej tub paub kev moog lawm.”

⁵Thaumas has rua Yexus has tas, “Tug Tswv, peb tsi paub sov koj yuav moog qhov twg; yog le ntawd, peb yuav ua le caag paub kev moog?”

⁶Yexus teb Thaumas has tas, “Kuv yog txujkev, yog qhov tseeb, hab yog txujsa; tsi muaj leejtwg moog cuag tau leej Txiv, tsuas yog moog ntawm kuv moog xwb txhaj tau.”

⁷Yexus has rua puab has tas, “Nwgnuav mej tub paub kuv lawm, mej yeej yuav paub kuv Txiv hab, txij nuav moog mej yuav paub nwg hab pum nwg.”

⁸Filis has rua Yexus has tas, “Tug Tswv, thov koj qha leej Txiv rua peb pum, kuas peb txaus sab.”

⁹Yexus teb has tas, “Filis, kuv tub nrug mej nyob ntev lug lawm, ua le caag koj tseem tsi tau paub kuv hab? Tug kws pum kuv, tug ntawd tub pum leej Txiv lawm. Ua le caag koj tseem yuav has tas, ‘Thov koj qha leej Txiv rua peb pum hab’?

¹⁰Filis, koj tsi ntseeg has tas, kuv nyob huv Leej Txiv hab Leej Txiv nyob huv kuv los? Yexus has rua nwg cov thwjtim has tas, tej lug kws kuv qha rua mej nuav, tsi yog kuv tej lug, tabsis yog Leej Txiv tug kws nyob huv kuv ua nwg teg num xwb.

¹¹Mej ca le ntseeg tej lug kws kuv has tas, kuv nyob huv Leej Txiv hab leej Txiv nyob huv kuv. Txawm yog mej tsi ntseeg le kuv has los mej yuavtsum ntseeg tej num kws kuv ua.

¹²Kuv qha tseeb rua mej has tas, tug kws ntseeg kuv yuav ua tej num kws kuv ua, tsi yog le ntawd xwb, nwg tseem yuav ua tau ntau dlua tej kws kuv ua, rua qhov kuv moog cuag leej Txiv lawm.

¹³Hab yog mej tuav kuv lub npe thov ib yaam dlaabtsi kuv yuav muab yaam ntawd rua mej, tej kws leej Tub ua ntawd yuav ua rua leej Txiv tau ntsejmuag.

¹⁴Yog mej tuav kuv lub npe thov kuas kuv ua ib yaam dlaabtsi, kuv yuav ua yaam ntawd rua mej.

¹⁵“Yog mej hlub kuv, mej yeej yuav ua lawv le kuv tej lug saamfwm.

¹⁶Kuv yuav thov leej Txiv, hab nwg yuav khaiv dlua ib tug paab lug, tug ntawd yuav nrug mej nyob moog ibtxhis.

¹⁷Nwg yog Vaaj Ntsujplig, nwg yuav qha Vaajtswv zaaj kws yog qhov tseeb rua mej. Tuabneeg nplajteb tsi leeg yuav nwg, rua qhov puab tsi pum nwg lossis tsi paub nwg. Tabsis mej paub nwg, rua qhov nwg nrug mej nyob hab nwg yuav nyob huv mej lub sab.

¹⁸“Kuv yuav tsi tso mej ua ntsuag ib zag le; kuv yuav rov qaab lug cuag mej.

¹⁹Tshuav tsi ntev tuabneeg nplajteb yuav tsi pum kuv lawm, tabsis mej yuav pum kuv; mej yuav muaj txujsa nyob, rua qhov kuv muaj txujsa nyob.

²⁰Thaus txug nub ntawd, mej yuav paub has tas kuv nyob huv Leej Txiv hab mej nyob huv kuv, ib yaam le kuv nyob huv mej.

²¹“Tug kws leeg yuav kuv tej lug qha hab ua lawv le tej lug ntawd, tug ntawd yog tug kws hlub kuv. Tug kws hlub kuv, kuv Txiv yuav hlub tug ntawd; kuv yuav hlub tug ntawd hab qha kuv rua nwg paub.”

²²Yudas (kws tsi yog Yudas Ixakali-us) has tas, “Tug Tswv, ua le caag koj yuav qha koj rua peb paub xwb, koj tsua tsi qha koj rua tuabneeg nplajteb paub?”

²³Yexus teb Yudas has tas, “Tug kws hlub kuv yeej ua lawv le kuv tej lug qha. Kuv Txiv yuav hlub tug ntawd, kuv Txiv hab kuv yuav lug cuag nwg hab nrug nwg nyob.

²⁴Tug kws tsi hlub kuv yeej tsi ua lawv le kuv tej lug qha. Hab tej lug kws mej nov kuv qha ntawd tsi yog kuv tej lug, tabsis yog leej Txiv tug kws khaiv kuv lug tej lug.

²⁵“Nwgnuav kuv tseem nrug mej nyob, kuv txhaj qha tej nuav rua mej.

²⁶Tug paab kws yog Vaaj Ntsujplig tug Dlawbhuv kws kuv thov kuas leej Txiv khaiv lug, nwg yuav qha txhua yaam rua mej hab paab kuas mej ncu txhua yaam kws kuv tau qha rua mej lawm.

²⁷“Kuv muab kuv txujkev kaaj sab rua mej; txujkev kaaj sab kws kuv muab pub rua mej, kuv tsi muab rua mej le tuabneeg nplajteb muab. Mej tsi xob txhawj, tsi xob nyuaj sab hab tsi xob ntshai.

²⁸Mej tub nov kuv has rua mej has tas, ‘Kuv yuav moog, tabsis kuv yuav rov qaab lug cuag mej.’ Yog mej hlub kuv, mej yeej yuav zoo sab rua qhov kws kuv moog cuag leej Txiv; rua qhov nwg muaj fwjchim luj dlua kuv.

²⁹Nwgnuav kuv qha tej nuav rua mej, thaus muaj lawm, mej txhaj yuav ntseeg kuv.

³⁰Kuv yuav tsi tau nrug mej thaam ntev lawm, rua qhov tug kws kaav lub nplajteb taabtom lug lawm. Nwg tsi muaj fwjchim kaav kuv,

³¹tabsis kuv ua ib puas tsaav yaam lawv le leej Txiv kuas kuv ua, tuabneeg nplajteb txhaj paub has tas kuv hlub leej Txiv. “Ca le sawv peb moog.