Read Hmong Njua Yauhaas 16 Bible Online

Yauhaas 16 - Hmong Njua bible

Yauhaas 16

¹“Kuv qha tej nuav rua mej, kuas mej txhaj tsi tso kev ntseeg tseg.

²Puab yuav ntab mej tawm huv tej tsev saablaaj moog, hab tub yuav txug lub sijhawm kws puab coj mej moog tua povtseg, qhov kws puab ua le ntawd, puab xaav has tas yog puab ua Vaajtswv teg num.

³Puab yuav ua le nuav rua mej, rua qhov puab tsi paub leej Txiv hab tsi paub kuv.

⁴Kuv xub has le nuav qha rua mej, kuas thaus txug lub sijhawm kws puab tsimtxom mej, mej txhaj le yuav ncu txug tej lug kws kuv tub qha rua mej lawm. “Thaus chivthawj kuv tsi tau qha tej nuav rua mej, rua qhov kuv tseem nrug mej nyob.

⁵Tabsis nwgnuav, kuv yuav moog cuag tug kws khaiv kuv lug, txawm le ntawd los mej tub tsi muaj ib tug nug has tas kuv yuav moog qhov twg.

⁶Nwgnuav kuv qha tej nuav rua mej, mej yuav nyuaj sab kawg le.

⁷Tabsis kuv qha tseeb rua mej has tas, qhov kws kuv ncaim mej moog yuav zoo dlua, yog kuv tsi moog, tug paab yuav tsi lug cuag mej. Tabsis yog kuv moog lawm, kuv yuav khaiv nwg lug nrug mej nyob.

⁸Thaus nwg lug lawm, nwg yuav qha rua tuabneeg nplajteb kuas paub txug kev txhum, kev ncaaj nceeg, hab Vaajtswv txujkev txav txim:

⁹qhov kws puab muaj kev txhum, vim puab tsi ntseeg kuv;

¹⁰qhov kws muaj kev ncaaj nceeg, vim kuv yuav moog cuag leej Txiv, hab mej yuav tsi pum kuv lawm;

¹¹qhov kws muaj kev txav txim, vim tug kws kaav lub nplajteb tub raug txav txim lawm.

¹²“Tseem tshuav ntau zaaj kws kuv xaav qha rua mej, tabsis ntshai mej yuav ris tsi taug.

¹³Thaus Vaaj Ntsujplig tug kws qha qhov tseeb lug lawm, nwg yuav qha qhov tseeb rua mej; nwg yuav tsi has lawv le nwg xaav, tabsis nwg tsuas has tej kws nwg tau nov, hab nwg yuav qha tej kws yuav muaj lug yaav tom ntej rua mej.

¹⁴Nwg yuav ua rua kuv tau ntsejmuag, rua qhov nwg yuav muab kuv tej lug coj lug qha rua mej.

¹⁵Tej kws leej Txiv muaj puavleej yog kuv tug hab. Tub yog vim le nuav, Vaaj Ntsujplig txhaj coj tej kws kuv qha rua nwg lawm lug qha rua mej.

¹⁶“Tsi ntev nuav, mej yuav tsi pum kuv lawm, hab tom qaab ntawd tsi ntev, mej yuav rov pum kuv.”

¹⁷Ces Yexus cov thwjtim qee leej sis thaam has tas, “Nwg has rua peb tas, ‘Tsi ntev nuav, mej yuav tsi pum kuv lawm, hab tom qaab ntawd tsi ntev, mej yuav rov pum kuv,’ nwg has le ntawd, yog nwg has le caag? Hab nwg has tas, ‘Rua qhov kuv yuav moog cuag leej Txiv.’

¹⁸Qhov kws nwg has tas, ‘Tsi ntev nuav, yog has le caag?’ Peb tsi paub sov yog nwg has dlaabtsi.”

¹⁹Yexus paub tej kws puab xaav nug nwg, yog le ntawd, Yexus txhaj has rua puab tas, “Puas yog mej sis nug txug qhov kws kuv has tas, ‘Tsi ntev nuav, mej yuav tsi pum kuv lawm, hab tom qaab ntawd tsi ntev, mej yuav rov pum kuv’?

²⁰Kuv qha tseeb rua mej has tas, mej yuav quaj hab ntxhuv sab, tabsis tuabneeg nplajteb yuav zoo sab kawg le; mej yuav raug kev nyuaj sab, tabsis mej tej kev nyuaj sab ntawd yuav hloov ua kev zoo sab.

²¹Tug quaspuj kws muaj mivnyuas huv plaab, thaus yuav txug caij yug nwg txhawj kawg le. Tabsis thaus nwg yug tau tug mivnyuas, nwg tsi ncu qaab qhov kws nwg mob plaab lawm, nwg zoo sab heev, rua qhov nwg yug tau ib tug mivnyuas lug rua huv nplajteb nuav.

²²Nwgnuav mej muaj kev nyuaj sab ib yaam le ntawd; tabsis kuv yuav rov lug cuag mej dlua, mas mej yuav zoo sab kawg le. Txujkev zoo sab ntawd tsi muaj leejtwg txeeb tau ntawm mej moog le.

²³“Thaus txug nub ntawd, mej yuav tsi nug kuv ib lus le lawm. Kuv qha tseeb rua mej has tas, yog mej tuav kuv lub npe thov ib yaam dlaabtsi ntawm leej Txiv, nwg yeej yuav pub yaam ntawd rua mej.

²⁴Mej ibtxwm tsi tuav kuv lub npe thov ib yaam dlaabtsi lug txug nwgnuav. Mej ca le thov mej txhaj yuav tau, thaus mej tau lawm, mej yuav zoo sab kawg le.

²⁵“Tej kws kuv has rua mej nuav, kuv ua lug pevtxwv has xwb. Tabsis thaus txug lub sijhawm ntawd, kuv yuav tsi ua lug pevtxwv has rua mej lawm, kuv yuav qha leej Txiv zaaj tseeb tseeb rua mej.

²⁶Thaus txug nub ntawd, mej yuav tuav kuv lub npe thov leej Txiv; kuv tsi tau has tas, kuv yuav paab mej thov leej Txiv,

²⁷Leej Txiv yeej hlub mej, rua qhov mej hlub kuv hab ntseeg has tas kuv yog tug kws Vaajtswv khaiv lug.

²⁸Yeej yog leej Txiv khaiv kuv lug huv nplajteb nuav, nwgnuav kuv taabtom yuav tawm huv lub nplajteb nuav rov moog cuag leej Txiv.”

²⁹Ces Yexus cov thwjtim has rua Yexus has tas, “Zag nuav koj qha tseeb rua peb tag, koj tsi ua lug pevtxwv qha rua peb lawm.

³⁰Nwgnuav peb paub has tas koj paub ib puas tsaav yaam huv tuabsi, tsi taag ib tug twg yuav nug koj lawm; tej nuav ua rua peb paub has tas, koj yog tug kws Vaajtswv khaiv lug tag.”

³¹Yexus teb puab has tas, “Nwgnuav mej ntseeg lawm tag los?

³²Tub yuav txug lub sijhawm, nwgnuav tub txug lub sijhawm ntawd lawm, mej nyag yuav tsiv nyag moog tsev, hab mej yuav tso kuv tseg. Txawm le ntawd los tsi yog kuv tuab leeg nyob xwb, tabsis leej Txiv nrug kuv nyob hab.

³³Kuv qha tej nuav rua mej, kuas mej cov kws txuas rua ntawm kuv muaj kev kaaj sab lug. Tuabneeg nplajteb yuav tsimtxom mej. Tabsis mej yuavtsum ua sab tawv; rua qhov kuv tub kovyeej lub nplajteb nuav lawm.”