Read Hmong Njua Yauhaas 17 Bible Online

Yauhaas 17 - Hmong Njua bible

Yauhaas 17

¹Tom qaab kws Yexus has le ntawd taag, nwg tsaa qhovmuag saib sau ntuj hab has tas, “Txiv, tub txug lub sijhawm lawm; thov koj ua kuas leej Tub tau koob meej, leej Tub txhaj yuav ua rua koj tau koob meej,

²rua qhov koj tsaa leej Tub ua tug kws muaj fwjchim luj dlua txhua tug tuabneeg, kuas leej Tub txhaj pub tau txujsa ntev dlhawv moog ibtxhis rua txhua tug kws koj muab rua nwg lawm.

³Txujsa ntev dlhawv moog ibtxhis ntawd, yog qhov kws puab paub koj hab paub has tas koj tuab leeg txhaj yog Vaajtswv, hab paub Yexus Khetos tug kws koj khaiv lug.

⁴Kuv ua rua koj tau koob meej huv nplajteb nuav, teg num kws koj kuas kuv ua, kuv tub ua tav lawm.

⁵Txiv, nwgnuav kuv nyob ntawm koj lub xubndlag, thov koj ua rua kuv tau koob meej ib yaam le thaus tseem tsi tau tsim lub nplajteb nuav, wb ibtxwm tau koob meej.

⁶“Kuv tub qha koj rua cov tuabneeg kws koj muab pub rua kuv huv nplajteb nuav txhua tug paub lawm. Puab yog koj tug, hab koj muab puab pub rua kuv, hab puab ua lawv le koj tej lug.

⁷Nwgnuav puab paub has tas ib puas tsaav yaam kws koj muab rua kuv, puavleej yog koj tug;

⁸rua qhov tej lug kws koj has rua kuv, kuv tub qha huv tuabsi rua puab lawm, puab khaws tej lug ntawd ca, puab paub tseeb hab ntseeg has tas yog koj khaiv kuv lug huv nplajteb nuav.

⁹“Kuv thov koj paab puab; kuv tsi tau thov koj paab tuabneeg nplajteb, tabsis kuv thov koj paab cov tuabneeg kws koj tub muab rua kuv lawm, rua qhov puab yog koj tug.

¹⁰Ib puas tsaav yaam kws kuv muaj puavleej yog koj tug, hab ib puas tsaav yaam kws koj muaj puavleej yog kuv tug; hab ib puas tsaav yaam ntawd ua rua kuv tau koob meej.

¹¹Nwgnuav kuv yuav rov qaab lug cuag koj, kuv yuav tsi nyob huv lub nplajteb nuav ntxiv lawm, tabsis puab tseem nyob huv lub nplajteb nuav. Leej Txiv tug kws dlawbhuv! Thov koj tsomkwm puab ntawm koj lub npe kws muaj fwjchim, kuas puab txhaj yuav koom tau ib lub sab ib yaam le koj hab kuv koom ib lub sab.

¹²Thaus kws kuv tseem nrug puab nyob, kuv tsomkwm puab ntawm koj lub npe kws muaj fwjchim. Kuv tsomkwm puab, puab tsi muaj ib tug pluj le, tsuas yog tug kws yeej yuav puamtsuaj, txhaj puamtsuaj xwb, yeej yuav muaj le ntawd kuas tav lawv le tej lug kws tub sau tseg lawm.

¹³Nwgnuav kuv taabtom yuav rov qaab lug cuag koj, thaus kuv tseem nyob huv nplajteb, kuv has tej lug nuav kuas puab zoo sab ib yaam le kuv zoo sab.

¹⁴Kuv tub qha koj tej lug rua puab lawm, tuabneeg nplajteb txhaj ntxub puab, rua qhov puab tsi yog tuabneeg nplajteb le ib yaam le kuv tsi yog tuabneeg nplajteb le.

¹⁵Kuv tsi tau thov kuas koj coj puab tawm huv lub nplajteb nuav moog, tabsis kuv thov koj tsomkwm puab kuas puab tsi xob raug dlaab Ntxwgnyoog dlaag ntxag.

¹⁶Puab tsi yog tuabneeg nplajteb le, ib yaam le kuv tsi yog tuabneeg nplajteb le.

¹⁷Koj txujlug yog lug tseeb; thov muab koj txujlug tseeb ntxuav kuas puab huv.

¹⁸Koj khaiv kuv lug rua huv lub nplajteb nuav le caag, kuv khaiv puab moog qha tuabneeg nplajteb ib yaam le ntawd.

¹⁹Vim puab, kuv txhaj muab kuv fij rua koj, kuv ua le ntawd, kuas puab txhaj muab puab fij rua koj.

²⁰“Tsi yog kuv thov koj paab cov tuabneeg nuav xwb, tabsis kuv thov koj paab cov tuabneeg kws nov tej lug kws puab qha hab lug ntseeg kuv,

²¹kuas puab koom ib lub sab. Txiv, thov ca puab nyob huv wb, ib yaam le koj nyob huv kuv hab kuv nyob huv koj, Thov koj paab kuas puab ua tau ib lub sab, tuabneeg nplajteb txhaj paub has tas koj khaiv kuv lug.

²²Kuv ua rua puab tau koob meej ib yaam le koj ua rua kuv tau koob meej, kuv ua le ntawd kuas puab koom tau ib lub sab ib yaam le wb koom tau ib lub sab.

²³Kuv nyob huv puab hab koj nyob huv kuv, kuv ua le ntawd kuas puab txhaj koom tau ib lub sab, tuabneeg nplajteb txhaj paub has tas koj khaiv kuv lug, hab paub has tas, koj hlub puab ib yaam le koj hlub kuv.

²⁴“Txiv, kuv nyob qhov twg, kuv xaav kuas cov tuabneeg kws koj muab pub rua kuv lawm, nrug kuv nyob qhov ntawd, puab txhaj yuav pum lub fwjchim kws koj pub rua kuv, rua qhov koj yeej hlub kuv thaus tsi tau tsim lub nplajteb lug lawm.

²⁵“Txiv, koj yog tug kws ncaaj nceeg, tuabneeg nplajteb tsi paub koj, tabsis kuv paub koj; cov tuabneeg nuav puavleej paub has tas koj khaiv kuv lug.

²⁶Kuv qha koj lub npe rua puab paub lawm, hab kuv tseem yuav naj nub qha puab, kuas puab muaj txujkev hlub kws koj hlub kuv nyob huv puab, hab kuv yuav nyob huv puab.”