Read Hmong Njua Yauhaas 19 Bible Online

Yauhaas 19 - Hmong Njua bible

Yauhaas 19

¹Tom qaab ntawd Philaj txawm muab Yexus rua cov tubrog nplawm.

²Cov tubrog muab maab xuavpaug ua kauj looj Yexus taubhau; hab puab muab ib lub tsho ntev tsaamxem lab khu rua Yexus naav.

³Puab has rua Yexus has tas, “Cov Yudais tug vaajntxwv, koj yuav muaj sa nyob ntev!” Hab puab xuas tawg ncuav rua Yexus ntsejmuag.

⁴Philaj rov tawm tuaj has rua puab has tas, “Mej saib, kuv yuav coj nwg tuaj rua mej, kuas mej paub has tas, kuv tsi pum nwg ua ib qhov txhum kws txaus txav txim rua nwg le.”

⁵Thaus Yexus tawm lug, nwg ntoo rawv lub kauj maab xuavpaug hab naav lub tsho ntev tsaamxem lab. Philaj has rua puab tas, “Mej saib! Tug txivneej ntawd nyob ntawm nuav.”

⁶Thaus cov thawj ntawm cov povthawj hab cov tub ceevxwm kws zuv lub Tuamtsev pum Yexus, puab has nrov nrov has tas, “Muab nwg ntsa rua sau ntoo khaublig! Muab nwg ntsa rua sau ntoo khaublig!” Philaj has rua puab tas, “Mej ca le coj nwg moog hab muab nwg ntsa rua sau ntoo khaublig. Kuv yeej tsi pum nwg ua ib qho txhum kws txaus txav txim rua nwg le.”

⁷Cov Yudais teb Philaj has tas, “Peb muaj ib txuj kevcai, lawv le txuj kevcai ntawd has mas tsimnyog muab nwg tua povtseg, rua qhov nwg khaav has tas nwg yog Vaajtswv tug Tub.”

⁸Thaus Philaj nov puab has le ntawd, ua rua Philaj hajyam ntshai heev.

⁹Philaj rov moog huv nwg lub loog hab nug Yexus has tas, “Koj nyob qhov twg tuaj?” Tabsis Yexus tsi teb Philaj ib lus le.

¹⁰Philaj has rua Yexus has tas, “Koj txawm tsi teb kuv le los? Koj tsi paub has tas kuv muaj cai tso tau koj, hab muaj cai muab koj ntsa rua sau ntoo khaublig nua los?”

¹¹Yexus teb has tas, “Koj yeej tsi muaj fwjchim luj dlua kuv, tsuas yog Vaajtswv pub fwjchim rua koj xwb; tug kws nteg kuv coj tuaj rua koj, tug ntawd ua txhum luj kawg le.”

¹²Thaus Philaj nov Yexus has le ntawd, nwg xaav muab Yexus tso. Tabsis cov Yudais has nrov nrov tas, “Yog koj muab nwg tso, mas koj yeej tsi yog Xixas tug phoojywg le. Tug kws khaav has tas nwg yog vaajntxwv, tug ntawd yog Xixas tug yeebncuab.”

¹³Thaus Philaj nov le ntawd, Philaj txawm coj Yexus tawm lug rua saab nrau hab Philaj nyob sau lub rooj txav txim, qhov chaw kws hu ua “Pua Pobzeb.” (Lug Henplais hu ua “Nkanpathas.”)

¹⁴Thaus ntawd yuav laug taav su, nub ntawd yog nub kws npaaj ua Kevcai Hlaa Dlhau. Philaj has rua cov Yudais has tas, “Mej tug vaajntxwv nyob ntawm nuav.”

¹⁵Puab has nrov nrov has tas, “Muab nwg tua povtseg! Muab nwg tua povtseg! Muab nwg ntsa rua sau ntoo khaublig!” Philaj txhaj nug puab has tas, “Mej xaav kuas kuv muab mej tug vaajntxwv ntsa rua sau ntoo khaublig los?” Cov thawj ntawm cov povthawj teb has tas, “Peb muaj tuab tug vaajntxwv xwb, tug ntawd yog Xixas.”

¹⁶Ces Philaj txawm muab Yexus rua cov Yudais coj moog ntsa rua sau ntoo khaublig. Yog le ntawd, puab txhaj coj Yexus tawm moog;

¹⁷hab muab Yexus tug ntoo khaublig rua Yexus kwv, puab coj Yexus moog txug ntawm qhov chaw kws hu ua “Pobtxhaa Taubhau.” (Lug Henplais hu ua “Khaulakhauthas.”)

¹⁸Nyob qhov ntawd, puab muab Yexus ntsa rua sau ntoo khaublig hab puab coj tau ob tug txivneej tuaj ntsa rua sau ntoo khaublig, hab muab ib tug txhus rua ib saab, muab Yexus txhus rua huv nruab nraab.

¹⁹Philaj sau ib dlaim ntawv ntsa rua sau Yexus tug ntoo khaublig. Cov lug ntawd nyeem has le nuav: “Yexus kws yog tuabneeg Naxales, yog cov Yudais tug Vaajntxwv.”

²⁰Muaj tuabneeg coob leej nyeem dlaim ntawv ntawd, rua qhov thaaj chaw kws muab Yexus ntsa rua sau ntoo khaublig nyob tsi dleb ntawm lub nroog. Cov ntawv ntawd sau ua lug Henplais, lug Latees, hab lug Kilis.

²¹Cov thawj ntawm cov povthawj has rua Philaj has tas, “Koj tsi xob sau has tas, ‘Cov Yudais tug Vaajntxwv,’ tabsis sau has tas, tug txivneej nuav has tas, ‘Kuv yog cov Yudais tug Vaajntxwv.’ ”

²²Philaj teb has tas, “Kuv sau le caag, yuav le ntawd.”

²³Tom qaab kws cov tubrog muab Yexus ntsa rua sau ntoo khaublig lawm, puab muab Yexus tej rig tsho faib ua plaub co, ib leeg yuav ib co. Puab tseem muab Yexus lub tsho ntev lawm hab, lub tsho ntev ntawd ntus thoob plawg tsi muaj kaab lejleeg le.

²⁴Cov tubrog sis thaam has tas, “Peb tsi xob muab lub tsho nuav dlua, tabsis ca peb muab twv saib leejtwg tau lub tsho ntawd xwb.” Tej kws puab ua nuav, muaj tav lawv le Vaajtswv txujlug kws has tas: “Puab muab kuv tej rig tsho sis faib, hab muab kuv lub tsho ntev twv saib leejtwg tau.” Tub yog vim le nuav cov tubrog txhaj ua le ntawd.

²⁵Thaus ntawd Yexus nam, Yexus nam tug nam hluas, Malis kws yog Kelaupas tug quaspuj, hab Malis Madalas, puab sawv ze ntawm Yexus tug ntoo khaublig.

²⁶Yexus pum nwg nam hab tug thwjtim kws nwg hlub heev sawv ua ke ntawd, Yexus has rua nwg nam has tas, “Nam, tug kws nrug koj sawv ntawm ko, yog koj tug tub.”

²⁷Yexus has rua tug thwjtim ntawd has tas, “Tug kws nrug koj sawv ntawd ko, yog koj nam.” Txij thaus ntawd lug, tug thwjtim ntawd txawm coj Yexus nam moog nrug nwg nyob lawm.

²⁸Tom qaab ntawd, Yexus paub has tas txhua yaam tav taag lawm, nwg has tas, “Kuv nqhes dlej,” (Nwg has le ntawd kuas muaj tav lawv le Vaajtswv txujlug).

²⁹Nyob qhov ntawd muaj ib taig kua txiv maab qaub, puab muab ib lub taub ntxuav yag chob rua ntawm ib tug paas hixauv raus cov kua txiv maab qaub ntawd, hab cev moog rua ntawm Yexus qhovncauj.

³⁰Yexus haus cov kua txiv maab qaub ntawd, hab Yexus has tas, “Tav lawm lauj!” Ces Yexus txawm nyo hau ntshis hab tu sav nrho taamsim ntawd.

³¹Cov Yudais tej numtswv moog thov Philaj tso cai rua puab muab cov tuabneeg kws ntsa sau ntoo khaublig ntawd tsoo kuas luv ceg hab muab puab txu sau ntoo khaublig lug. Puab ua le nuav rua qhov nub ntawd yog nub Npaaj ua kevcai, cov Yudais tsi xaav ca cov tuabneeg tuag ntawd nyob sau ntoo khaublig nub Xanpataus, rua qhov nub Xanpataus yog nub kws tseemceeb heev.

³²Cov tubrog txawm moog muab ob tug kws puab muab ntsa rua sau ntoo khaublig ib yaam le Yexus tsoo kuas luv ceg, puab xub tsoo ib tug ua ntej, puab maam le tsoo ib tug tom qaab.

³³Tabsis thaus puab moog txug ntawm Yexus, puab pum has tas Yexus tub tuag lawm, puab txhaj tsi tsoo Yexus ob txhais ceg.

³⁴Txawm le ntawd los tseem muaj ib tug tubrog muab nwg raab muv nkaug Yexus saab taav to ntshua, taamsim ntawd ntshaav hab dlej lug si quas laim.

³⁵(Tug kws pum zaaj nuav, nwg ua timkhawv qha rua suavdlawg has tas yeej muaj tseeb, hab nwg paub has tas nwg has tseeb xwb, mej txhaj yuav ntseeg zaaj ntawd.)

³⁶Qhov nuav muaj lawv le Vaajtswv txujlug kws has tas, “Nwg tej txhaa yeej tsi muaj ib yaag yuav luv le.”

³⁷Hab Vaajtswv txujlug muaj dlua ib nqai has tas, “Yuav muaj tuabneeg saib ntsoov tug kws puab xuas muv nkaug.”

³⁸Tom qaab ntawd, Yauxej kws nyob peg lub nroog Alimathas tuaj, nwg moog thov Philaj ca nwg muab Yexus lub cev txu. (Yauxej yog Yexus ib tug thwjtim hab, tabsis nwg tsi qha rua leejtwg paub, rua qhov nwg ntshai cov Yudais.) Philaj tso cai rua Yauxej; yog le ntawd, Yauxej txhaj moog muab Yexus lub cev txu coj moog log.

³⁹Nikaudemaus tug kws tub moog cuag Yexus ib zag thaus tsaus ntuj nrug Yauxej moog, nwg nqaa ib co roj ntoos tsw qaab tov cov tshuaj tsw qaab kws hu ua alau-es kwvlaam le peb caug tawm choj.

⁴⁰Obtug muab Yexus lub cev txu lug, muab cov tshuaj tsw qaab pleev hab muab ntaub maag qhwv Yexus lub cev lawv le cov Yudais txuj kevcai log tuag kws puab ibtxwm ua.

⁴¹Muaj ib lub vaaj nyob ntawm qhov chaw kws puab muab Yexus ntsa rua sau ntoo khaublig, nyob huv lub vaaj ntawd muaj ib lub qhov ntxaa tshab kws tseem tsi tau muaj leejtwg muab tuabneeg tuag log rua huv le.

⁴²Rua qhov nub ntawd yog nub kws cov Yudais Npaaj ua kevcai hab puab txhaj coj Yexus lub cev moog tso rua huv lub qhov ntxaa kws nyob ze ntawd.