Read Hmong Njua Yauhaas 20 Bible Online

Yauhaas 20 - Hmong Njua bible

Yauhaas 20

¹Nubkaaj thaus sawv ntxuv kaaj ntug txoog, Malis Madalas moog txug ntawm lub ntxaa hab nwg pum dlaim txag zeb kws npug lub rooj ntxaas tub dlov rua ib saab lawm.

²Malis txawm dlha rov qaab lug cuag Ximoos Petus hab tug thwjtim kws Yexus hlub, hab nwg has rua obtug tas, “Puab tub muab tug Tswv nqaa tawm huv qhov ntxaa lawm, peb tsi paub sov puab coj nwg moog tso rua qhov twg lawm.”

³Petus hab tug thwjtim ntawd txawm moog rua tom lub ntxaa.

⁴Obtug sis tw dlha moog, tabsis tug thwjtim ntawd dlha ceev dlua Petus, nwg txhaj xub moog txug ntawm lub ntxaa.

⁵Nwg nyo ntshis moog xauj huv lub ntxaa, nwg pum dlaim ntaub maag kws qhwv Yexus hle ua ib pawg rua huv, tabsis nwg tsi nkaag moog rua huv.

⁶Thaus Ximoos Petus moog txug, nwg txawm nkaag plawg moog saib huv lub qhov ntxaa. Nwg pum dlaim ntaub maag kws qhwv Yexus hle ua ib pawg rua huv,

⁷hab nwg pum dlaim ntaub kws qhwv Yexus taubhau tais tso rua ib caag, tsi nyob nrug dlaim ntaub maag kws qhwv Yexus lub cev.

⁸Tug thwjtim kws xub moog txug ntawm lub ntxaa maam le moog rua huv, nwg tau pum tej ntawd hab ntseeg.

⁹(Obtug tseem tsi tau totaub Vaajtswv txujlug kws has tas, nwg yuav sawv huv qhov tuag rov qaab lug.)

¹⁰Tom qaab ntawd, obtug rov qaab lug tsev lawm.

¹¹Tabsis Malis tseem sawv ntawm lub qhov ntxaa saab nrau quaj. Thaus nwg tseem quaj quaj ntawd, nwg nyo ntshis xauj huv lub qhov ntxaa;

¹²nwg pum ob tug timtswv ceebtsheej naav rig tsho dlawb paug nyob ntawm qhov chaw kws tso Yexus lub cev rua, ib tug nyob peg taubhau hab ib tug nyob nraag kutaw.

¹³Obtug nug Malis has tas, “Mivntxhais, ua le caag koj quaj?” Malis teb obtug has tas, “Sov puab coj kuv tug Tswv moog tso rua qhov twg lawm, kuv tsi paub le.”

¹⁴Thaus Malis has le ntawd taag, nwg tig hlo lug pum Yexus sawv ntawm nwg ib saab, tabsis nwg tsi paub has tas yog Yexus.

¹⁵Yexus nug Malis has tas, “Mivntxhais, ua le caag koj quaj?” Malis xaav has tas Yexus yog tug txivneej kws tu lub vaaj ntawd, nwg txhaj nug has tas, “Tug tswv, yog koj muab nwg moog tso rua qhov twg lawm, thov koj qha rua kuv, kuv yuav moog nqaa nwg rov qaab lug.”

¹⁶Yexus has rua Malis has tas, “Malis!” Malis tig hlo moog saib Yexus, hab ua lug Henplais has rua Yexus has tas, “Lanpaunis!” (Lu lug nuav txhais has tas, “Xwbfwb.”)

¹⁷Yexus has rua Malis has tas, “Koj tsi xob tuav kuv, rua qhov kuv tseem tsi tau rov moog cuag kuv Txiv. Koj ca le moog has rua kuv cov kwvtij has tas, kuv yuav rov moog cuag tug kws yog kuv Txiv hab mej Txiv, nwg yog kuv tug Vaajtswv hab mej tug Vaajtswv.”

¹⁸Yog le ntawd, Malis Madalas txhaj rov qaab moog qha rua cov thwjtim has tas, “Kuv tub pum tug Tswv lawm”; hab Malis qha Yexus tej lug rua puab.

¹⁹Nubkaaj thaus tsaus ntuj, cov thwjtim sis sau ua ke rua huv ib lub tsev hab laag qhovrooj huv tuabsi, rua qhov puab ntshai cov Yudais tej numtswv. Thaus ntawd, Yexus lug sawv nruab nraab huv puab, Yexus has rua puab tas, “Mej ca le muaj kev kaaj sab.”

²⁰Thaus Yexus has le ntawd taag, nwg cev nwg ob txhais teg hab thws nwg saab taav rua puab saib. Cov thwjtim zoo sab heev, rua qhov puab pum tug Tswv lawm.

²¹Yexus rov has rua puab dlua has tas, “Mej ca le muaj kev kaaj sab. Leej Txiv khaiv kuv lug le caag, kuv yuav khaiv mej moog ib yaam nkaus le ntawd.”

²²Thaus Yexus has le ntawd taag, nwg txawm tshuab paa rua puab hab has tas, “Mej ca le txais yuav Vaaj Ntsujplig tug Dlawbhuv.

²³Yog mej zaam txim rua leejtwg, Vaajtswv yuav zaam txim rua tug ntawd; yog mej tsi zaam txim rua leejtwg, Vaajtswv yuav tsi zaam tug ntawd lub txim hab.”

²⁴Thaumas (tug kws muaj dlua ib lub npe hu ua Ntxaib) yog ib tug ntawm kaum ob tug thwjtim, nwg tsi nrug cov thwjtim nyob ua ke thaus Yexus lug tshwm rua puab pum.

²⁵Cov thwjtim qha rua Thaumas has tas, “Peb tub pum tug Tswv lawm.” Thaumas has rua puab has tas, “Yog kuv tsi pum cov qhov ntsa hlau ntawm nwg xibteg, kuv tsi tau muab kuv tug ntivteg xuas cov qhov ntsa hlau hab yog kuv tsi tau xuas lub qhov puab nkaug nwg saab taav, mas kuv yeej tsi ntseeg le.”

²⁶Tau ib limtam tom qaab Yexus cov thwjtim rov tuaj sis sau rua huv lub tsev ntawd dlua, zag nuav Thaumas nrug puab nyob. Puab laag qhovrooj huv tuabsi, tabsis Yexus ca le lug sawv nruab nraab huv puab hab has tas, “Mej ca le muaj kev kaaj sab.”

²⁷Yexus has rua Thaumas has tas, “Koj ca le saib kuv ob txhais teg hab cev koj tug ntivteg lug xuas. Cev koj txhais teg lug xuas lub qhov ntawm kuv saab taav. Tsi xob ua xyem xyaav, ca le ntseeg.”

²⁸Thaumas teb Yexus has tas, “Koj yog kuv tug Tswv, hab yog kuv tug Vaajtswv!”

²⁹Yexus has rua Thaumas has tas, “Koj pum kuv, koj txhaj ntseeg los? Tug kws tsi tau pum kuv tabsis nwg ntseeg, tug ntawd tau koob moov.”

³⁰Yexus ua ntau yaam txujci tseemceeb rua nwg cov thwjtim pum, tabsis tsi tau muab sau rua huv phoo ntawv nuav.

³¹Tej kws sau rua huv phoo ntawv nuav yog sau lug qha kuas mej ntseeg has tas, Yexus yog tug Mexiyas kws yog Vaajtswv tug Tub, txhua tug kws ntseeg Yexus, yuav tau txujsa.